Nayarian Mon Arapen so Ag-Inkahustisya!

WALA ta so agnin balot akasagmak na ag-inkahustisya ed interon bilay to? Anggaman walaray ag-inkahustisya a nayarin abaloan labat odino walad nonot labat, saray arum et talagan tudtua.

Kapagno nalalames itayo, nasasakitay liknaan tayo tan nayarin apektoen toy relasyon tayo ed Dios. Kanian pilpilaleken tayon ipetek so situasyon. Akin? Say sakey a rason et say Manamalsa tayo a si Jehova a Dios, ya “anggapo so kaugsan” ed sikato so angisipor ed saray totoo na pirmin pakaliknay hustisya. (Deuteronomio 32:4; Genesis 1:26) Balet, nayarin walaray nasagmak tayon situasyon ya ipasen tayon anggapoy hustisya. Oniay inkuan nensaman na sakey a makabat a too: “Diad saman pinmawil ak tan anengneng ko so saray amin a panamasegsegang a nagagawa ed leksab na banwa; et, nia, saray lua na saray naaposan, tan andian ira na managligliwa; et dia ed abay na saray manangapos da wala nensaman so pakayari; balet andian ira na managligliwa.” (Eclesiastes 4:1) Panon tayo sirin ya arapen so ag-inkahustisya?

Anton Talaga so Ag-inkahustisya?

Say ag-inkahustisya et kipapasen odino kagagawa a pananumlang ed saray estandarte na inkapatas. Anto ta so talagan estandarte na hustisya parad totoo? Malinlinew a say matunong tan agmanguman a Manamalsa tayo so walaan na kanepegan a mangidatak na estandarte no antoy maptek tan aliwan maptek. Diad panmoria to, say panakar ed “saray panontonan na bilay” et lalanoren toy ‘agpanggawa na kaugsan’ odino ag-inkahustisya. (Ezequiel 33:15) Kanian, sanen pinalsa nen Jehova so inmunan too, insipor To ed sikato so konsiensia, a pinagkaboses ed loob to ya ontulong ed sikaton nibiig so duga tan aliwa. (Roma 2:14, 15) Niarum ni, indatak nen Jehova diad Salita to, say Biblia, no anto so maptek tan aliwan maptek.

Panon to balet no liknaen tayon inagrabyado itayo? Maabig ya aralen tayo nin maong no talagan sustoy iisipen tayo. Alaen pan alimbawa imay agawa ed Hebreon propeta a si Jonas. Sikatoy ingganggan nen Jehova a mangibaga ed saray taga Ninive a manatambang so kadederal ed sikara. Nen primero, imbatikan nen Jonas so asainmin to. Balet, diad kaunoran, sikatoy linma lanlamang ed Ninive pian pasakbayan iray manaayam diman. Lapud nagbabawi ira, sikaray agpinatey nen Jehova tan agto met dineral so syudad. Anto balet so reaksion nen Jonas? “Si Jonas [et] apatabang a mapalpalalo, tan apasnokan.” (Jonas 4:1) Impasen ton graben ag-inkahustisya so ginawa nen Jehova.

Mapatpatnag ya ag-alingo si Jehova ed ginawa to lapud nabasa to so kapusoan tan ‘inaro to so katunongan tan kaalasan’ odino hustisya. (Salmo 33:5) Kaukolan ya awaten nen Jonas a say  paraan na impandesisyon nen Jehova et mitunosan ed naspot a hustisya. No bilang et liknaen tayon naagrabyado itayo, nayarin oniay itepet tayo ed inkasikatayo, ‘Agkasi midumaan so panmoria nen Jehova ed satan?’

Pangarap ed Ag-inkahustisya

Say Biblia so angisalaysay na dakel ya alimbawa na saramay akasagmak na ag-inkahustisya. Dakel so naaralan tayo diad pangusisa ed no panon dan inarap iray mairap a problema ra. Alaen pan alimbawa si Jose ya inlako na saray maimon a kuya to pian magmaliw ya aripen ed Ehipto. Ditan et sikatoy inayat na asawa na amo to a miakdol. Balet, sanen impulisay to so bii, pinapaway ton si Jose so mamapasoot ed sikato. Lapud satan, apriso si Jose. Anggaman ontan et mas malet so pananisia to nen saray gulonggulong ya akabalor ed sikato. Agto inabuloyan ya onletey so espiritualidad to odino naandi panagmatalek to ed si Jehova lapud ag-inkahustisya.​—Genesis 37:18-28; 39:4-20; Salmo 105:17-19.

Sakey nin too ya akasagmak na ag-inkahustisya et si Nabot. Sikatoy masilib ya impapatey nen Jezabel, ya asawa na ari na Israel a si Ahab. Pirpirawat na ari so tawir a dalin nen Nabot a walad abay na palasyo. Balet, sebel ed sakey ya Israelita ya ikbanay tawir to, kanian ag-inmabuloy si Nabot ed opresi na ari a pangaliw ed dalin to. (Levitico 25:23) Lapud satan et say marelmeng a Jezabel so amawala na saray palson testigo a mangakusan inayew kuno nen Nabot so Dios tan say ari. Say resulta et impapatey si Nabot tan saray ilalak to. Nonot yo pa labat so alikna nen Nabot nen kuan da lan tupaken!​—1 Arari 21:1-14; 2 Arari 9:26.

Balet, melmelag labat iratan no ikompara ed ag-inkahustisyan sinagmak nen Kristo Jesus. Ta ilegal so impan-usay ed sikato tan nilaokay katilaan, a sengegay impanentensia ed sikato na patey. Say gobernador na Roma a nepeg komon a mangidepensa ed sikato et agto atalindegay amta ton duga. (Juan 18:38-40) Talagan diad si Kristo Jesus so angipasagmakan nen Satanas na sankagrabian ya ag-inkahustisya ya agnin balot asagmak na siopaman!

 Kasin ipapatnag na sarayan inkagawa a baliwala labat ed si Jehova so nagagawan ag-inkahustisya? Andi! Say panmoria nen Jehova ed saratan a kipapasen et duma ed panmoria na too. (Isaias 55:8, 9) Lapud si Jose et inlakon aripen, nisalba to so pamilya to. Sikatoy nagmaliw a manangasikaso na abasto ed Ehipto antis a sinmabi graben eras ya angapekta ed pamilya to. Nonot yo pa iya, no ag-inabuloyan nen Jehova so ag-inkahustisya, agnipriso si Jose. Tandaan a ditan to impatalos so kugip na duaran kaiba ton priso, tan sakey ed saratan so analambit ed si Faraon nipaakar ed si Jose, a sengegay impagmaliw nen Jose a manangasikaso na abasto.​—Genesis 40:1; 41:9-14; 45:4-8.

Kumusta met si Nabot? Salien pa lamet a moriaen so pamaakaran unong ed panmoria nen Jehova. Parad si Jehova, a makasarag a mamaoli ed saray inaatey, si Nabot et mabilay ni anggaman abayag lan inatey. (1 Arari 21:19; Lucas 20:37, 38) Kaukolan a manalagar si Nabot anggad sikatoy paolien nen Jehova, balet singa magangganoy ilalabas na panaon, lapud talagan anggapoy amtan balot na saray inaatey. (Eclesiastes 9:5) Sakey ni, si Jehova so binmales parad Nabot diad impangukom To ed si Ahab tan say sankaabungan to.​—2 Arari 9:21, 24, 26, 35, 36; 10:1-11; Juan 5:28, 29.

No nipaakar ed si Jesus, sikatoy inatey. Balet, sikato so pinaoli na Dios tan intandoro ed posisyon a “sankatageyan nen say amin ya uley, tan manuley, tan pakayari, tan nanarian, tan dia ed amin a ngaran ya abitla.” (Efeso 1:20, 21) Say ag-inkahustisyan impasagmak nen Satanas ed si Kristo Jesus et agmakaamper ed si Jehova a manumang ed Anak to. Matalek si Jesus a sarasarag nen Jehova a panampoten a tampol so anggapoy hustisyan inkaaresto to, no satan so linawa To. Ingen, amta met nen Kristo a walay panaon ya inggeter nen Jehova a panoor ed Kasulatan tan pangekal ed antokaman ya ag-inkahustisya.

Tua, si Satanas tan saray alipores to so angipaakseb na ag-inkahustisya ed saray matunong. Balet, impetek lanlamang nen Jehova so pamaakaran tan say ag-inkahustisya so permanente ton inekal odino ekalen. Kanian, no labay tayon nipetek so ag-inkahustisya, nepeg a manalagar itayo ed Dios.​—Deuteronomio 25:16; Roma 12:17-19.

No Akin a Nayarin Abuloyan nen Jehova so Ag-inkahustisya

Walaray rason nen Jehova kanian agto ni ipepetek so sakey a situasyon. Nayarin abuloyan to itayon makaeksperiensya na ag-inkahustisya lapud panangipasal itan ed sikatayo bilang Kristiano. Siempre, ‘agnayarin manukso so Dios na mauges ed siopaman a too.’ (Santiago 1:13) Anggano aabuloyan toy sakey a situasyon a nagawa tan agmibali ed satan, papabiskegen to balet iramay paibangat ed satan a panangipasal. Oniay ipapaseguro na Biblia ed sikatayo: “Say Dios na amin a grasya . . . kayari impantepel yo na irap ed magano, sikaton dili, payadyarien, paleten, pabiskegen to kayo.”​—1 Pedro 5:10.

Niarum ni, say pangiyaabuloy nen Jehova ed sakey ya ag-inkahustisya et mangiter na panaon ed saray nankasalanan pian magbabawi. Pigaran simba labat lay apalabas kayari impamatey ed si Jesus, arum ed saramay Judion dinmengel ed simbawa nen Pedro et “nanermen . . . ed kapusoan da.” Impapuso ran inawat so salita na Dios tan nampabautismo.​—Gawa 2:36-42.

Tua, aliwan amin a manggagaway ag-inkahustisya et magbabawi. Arum ni ingen so lalon ontetepel a manggaway graben ag-inkahustisya. Balet, oniay ibabaga na Uliran 29:1: “Saman so anta maparanay ya abaat paaweten to so tenger to bigla naani a nabagbag, tan satan anggapo so panambal.” On, nasabisabi et onkiwas si Jehova tan deralen to iramay ilulolot day manggagawa na makapuy.​—Eclesiastes 8:11-13.

Anggano nakaukolan so panaon pian makaimwas ed ag-inkahustisya, naseseguro tayon amta nen Jehova no panon to itayon tulongan pian makabangon. Tan seguradon ekalen to so antokaman ya ag-inkahustisya ya asagmak tayo diad sayan mauges a sistema na bengabengatla. Niarum ni, insipan to ed sikatayo so sankaabigan lan tumang, say andi-anggaan a bilay diad balon mundo a diman et ‘panayaman na katunongan.’​—2 Pedro 3:13.

[Litrato ed pahina 16, 17]

Anto kasi so alikna nen Nabot sanen aarapen to so graben ag-inkahustisya?