‘O Jehova, Subok Mo Ak’

‘SI Jehova so managsali [odino manangusisa] ed saray kapusoan.’ (Uliran 17:3) Nepeg labat a makaligliwa itan a maong ed sikatayon amin. Akin? Lapud say Ama tayo a walad tawen et “onnenengneng ed puso,” ya aliwan singa saray totoo a manhuhusga unong ed no anto labat lay nanenengneng da.​—1 Samuel 16:7.

Diad tua, anggan sikatayon mismo et aliwa itayon sankaabigan a manangusisa ed dilin sankaaraleman a motibo tan liknaan tayo. Akin? Lapud “say puso [tayo et] manamalingon alabas nen saray amin a bengatla, et sikato so mapalalo a mauges; siopa so makaamta ed sikato?” Siempre, say Dios so makaamta ed satan, lapud oniay inkuan to: “Siak si Jehova, usisaen ko so isip [“puso,” NW] salien ko so puso [“saray bato,” NW].” (Jeremias 17:9, 10) On, natatalosan nen Jehova so “puso,” kalaktip la ray motibo tayo, ontan met ed “saray bato,” salanti, saray sankaaraleman a kanonotan tan emosyon tayo.

Akin a Nasusubok?

Agtayo la pankelawan sirin no akin ya imbaga nensaman nen Arin David ed Dios: “Sumal mo ak, O Jehova, tan subok mo ak; salim so pusok [“saray batok,” NW] tan linawak.” (Salmo 26:2) Kasin anggapon balot so kalilingoan nen David, kanian agto ontakot no sikatoy suboken nen Jehova? Siempre andi! Si David et kapara tayon aliwan perpekto tan agto naspot ya atumbok iray estandarte na Dios. Lapud saray kakapuyan to, sikatoy aminpigan akagawa na seryoson lingo, anggaman ontan, sikatoy ‘nanakar ed katooran na puso.’ (1 Arari 9:4) Panon? Diad impangawat to ed saray panamaat tan diad impangipetek to ed saray kurang to. Impanengneng to sirin a talagan inaro to si Jehova tan say debosyon to ed Sikato et sigpot.

Kumusta tayo? Amta nen Jehova ya aliwa itayon ayadyari tan makapankakasalanan itayo diad salita tan gawa. Balet, agto aamtaen so pansumpalan na kabibilay tayo diad pangusar ed pakayari ton mangamta ed arapen. Pinalsa to itayo a makapandesisyon a bukor, tan igagalang to itan a kawayangan tayo, a satan so mabunlok ton inregalo ed sikatayo.

Anggaman ontan, no maminsan et nibaga tayon singa susuboken nen Jehova so inkatoo tayo, kalaktip la ray motibo tayo. Nayarin gawaen to iya diad pangiyabuloy to ed saray pankanawnawa a mangiparungtal ed kondisyon na puso tayo. Nayarin abuloyan to met iray nanduruman kipapasen odino problema a mangiparungtal ed saray sankaaraleman a nalilikna tayo. Mangiter itan ed sikatayo na pankanawnawa a nipanengneng ed si Jehova no kaunongay kaaralem na debosyon tan inkamatoor tayo. Saratan a subok ya iyaabuloy nen Jehova so mangipabitar ed kalidad na pananisia tayo, no kasin “ayadyari tan nagnap tan anggapoy pankulangan” tayo.​—Santiago 1:2-4, Maung a Balita.

Impakasubok na Pananisia Nensaman a Panaon

Aliwa lan balo ed saray lingkor nen Jehova so pakasubok ed pananisia tan motibo ra. Alaen pan alimbawa si patriarkan Abraham. Inkuan na Genesis 22:1 a ‘sinubok na Dios si Abraham.’ Sanen insulat iratan a balikas, asumpal lan asubok so pananisia nen Abraham ed Dios. Pigaran dekada antis ni na satan, kinerew nen Jehova ed si Abraham a taynan dan sankapamilyaan so Ur  tan onla ra ed dalin ya agda kabisado. (Genesis 11:31; Gawa 7:2-4) Seguradon walay abung nen Abraham diad Ur. Balet, sikatoy ag-angaliw na napanayaman diad Canaan, anggaman manga sanlasus taon ton nanayam ditan. (Hebreos 11:9) Kanian lapud alis-alis ira, walay posibilidad a sikaray naerasan odino nalusob na saray armadon pangkat tan paganon manuley ed saman a lugar. Diad amin na saratan, apaneknekan a mabisbiskeg so pananisia nen Abraham.

Insan, sikatoy pirmin sinubok nen Jehova. “Alam natan so laki ya anak mo, say anak mo a bogbogtong, ya inararom, salanti si Isaac . . . ta sikato so yapay mo’d man a sakey a pinoolan a bagat.” (Genesis 22:2) Parad si Abraham, aliwan ordinaryon anak si Isaac. Sikatoy bogbogtong ya anak da nen Sarah. Si Isaac so insipan ya anak, say alenleneg ya iilaloan nen Abraham a pawayan na “ilalak” odino bini to a manawir ed dalin na Canaan tan pakabendisyonan na dakel, unong ya insipan na Dios. Sakey ni, si Isaac imay anak ya aalagden nen Abraham tan sikatoy nianak lapud milagro na Dios!​—Genesis 15:2-4, 7.

Kanian natebek yo no akin a si Abraham et agaylay irap ton talosan iyan ganggan. Kasin kakaukolanen nen Jehova so toon bagat? Akin a diad inkamasiken to et impagamor ni nen Jehova so liket na pakawalaay anak, anta paibagat to met lanlamang manaya? *

Anggaman anggapoy malinew ya ebat ed sarayan tepet, tampol a tinmulok si Abraham. Taloy agew ton tinatdang so apili a palandey. Diman et nanggaway altar tan tinapewan to na abelang a kiew. Nia la natan so kapantokan na subok ed sikato. Inegnaan nen Abraham so yoro, balet sanen kuan to lan pateyen so anak to, sikatoy inamper nen Jehova panamegley na anghel tan inkuan to: “Natan amtak la a sika et tatakotan mo so Dios, ta sika et agmo inkibot ed siak so anak mo, say bogbogtong ya anak mo.” (Genesis 22:3, 11, 12) Nonot yo pay impakainawaan nen Abraham sanen nadngel to itan! Duga imay  konklusyon nen Jehova nipaakar ed pananisia to. (Genesis 15:5, 6) Kayari na saman, imbagat nen Abraham so kalakian a karnero a kasandi nen Isaac. Insan pinaletan nen Jehova iray sipan to nipaakar bini nen Abraham. Kanian manaya atawag si Abraham a kaaro nen Jehova.​—Genesis 22:13-18; Santiago 2:21-23.

Nasusubok Met so Pananisia Tayo

Amta tayon amin ya agnapaliisan na saray lingkor na Dios natan iray subsubok. Balet, say pakasusubokan tayo ed kaplesan et aliwan saray pagagawa nen Jehova, noagta saray iyaabuloy to.

Oniay insulat nen apostol Pablo: “Amin so saray malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:12) Nayarin say panlapuan na saratan a panamasegsegang et saray kaeskuela, kakaaro, kakanayon, kakaabay, odino saray walad gobierno a lingoy abaloan da ed sikatayo. Nayarin pati met lay panag-insulto tan pibabali ed anapan na sakey a Kristiano. Nasasagmak met na saray tuan Kristiano iray kaslakan a problema na katooan, a singa saray sakit, kalamidad, tan impaka-agrabyado. Amin na saratan et pakasubokay pananisia na sakey.

Indanet nen apostol Pedro so gunggona na panubok ed pananisia na sakey, oniay inkuan to: “Manermen kayon magano lapud saray nanduruman subsubok na bilay. Say balitok a naderal, iparala’d apoy pian naamtaan no tuan puro. Ontan met, say pananisia yo a maong nen say balitok, nasubok pian naamtaan no tuan malet. Diad ontan napagalangan, nadayew tan nitandoro kayo no agew a nipanengneng si Jesu-Kristo.” (1 Pedro 1:6, 7, Maung a Balita) On, saray epekto na subsubok et mipara ed balitok ya imparalan ed apoy. Iparungtal na panagdalisay so inkapuro tan napalin iray dutak. Singa ontan so nagagawa ed pananisia tayo sano nasusubok.

Alimbawa, nayarin pansengegay ir-irap so sakey ya aksidente odino kalamidad. Anggaman ontan, saramay walaan na putel a pananisia et ag-alablabas a nagonigon. Sikaray naliligliwa ed panamaseguro nen Jehova ya “agtaka naani taynan, tan agtaka naani ikaindan.” (Hebreos 13:5) Itutultuloy dan iyuuna iray maespiritual a bengatla, a matalek a bendisyonan nen Jehova a Dios so pansasagpot dan nawalaan na peteg a nakaukolan da. Pabiskegen ira na pananisia ra ya arapen iray mairap a panaon tan ipaliis to ira ed ibaleg na problema diad agpanaburidon maong.

Lapud iparungtal na subsubok so kaleteyan na pananisia tayo, satan so makagunggona no natebek tayon nakaukolay ikiwas tan panangipetek. Maabig no itepet yo iraya ed inkasikayo: ‘Panon kon napabiskeg so pananisiak? Kasin kaukolan kon aruman so panaon ko parad seryoson panaral na Biblia tan pandalepdep ed satan? Kasin sigpot kon aanamoten iray probisyon ya onatendi ed amin a pantitipon kaiba iray kaparan mananisia? Kasin say panmamatalkan ko et say dilik, anta say nepeg komon et ipikasik ed si Jehova a Dios iray pakakagonigonan ko?’ Say onian panangusisa ed dili et gapo ni labat.

Pian napabiskeg so pananisia na sakey, kaukolan ton paaligwasen so ganas to ed espiritual, a “pampilalekan [to] so gatas a maespiritu ya andian na saol.” (1 Pedro 2:2; Hebreos 5:12-14) Kaukolan tayon pansagpotan ya aligen imay toon deneskribe na salmista: “Say gayaga to wala ed ganggan nen Jehova; tan diad ganggan to mandalepdep ed agew tan labi.”​—Salmo 1:2.

Aliwa labat lan say pambasa na Biblia so kakaukolanen na saya. Importantin nonoten tayo no anto so ibabaga na Salita na Dios ed sikatayo tan iyaplika so isisimbawa to. (Santiago 1:22-25) Say resulta et onaralem so panangaro tayo ed Dios, magmaliw a mas espisipiko tan personal so pikakasi  tayo, tan mas ombiskeg so pananisia tayo ed sikato.

Say Inkamakana na Asubok a Pananisia

Amta tayo ya importante so pananisia pian abobonan itayo na Dios, kanian napakiwas itayon pabiskegen itan. Oniay ipapanonot ed sikatayo na Biblia: “No anggapo so pananisia [sikatoy] agnayarin paliketen: ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” (Hebreos 11:6) Kanian kaukolan a mipara’d samay laki ya akikasi ed si Jesus so liknaan tayo, ya inkuan ton: “Tulongan mo so kulang a pananisiak.”​—Marcos 9:24.

Makatulong met ed arum so pakasubok na pananisia tayo. Singa bilang, sano inateyan so sakey a Kristiano, say mabiskeg a pananisia to ed sipan na Dios a kikioli so ontulong ed sikato. Tua a sikatoy manermen, balet ‘ag-onermen, unong na singa saray arum, ya anggapo so ilalo ra.’ (1 Tesalonica 4:13, 14) Namoria na saramay makakaimano ed inkabiskeg na pananisia to a walay bengatlan maab-abig ed disposisyon to. Nayarin saya so mamakiwas ed kapusoan da a kaliktanen met so nawalaan na ontan a pananisia, a nasagyat iran aralen so Salita na Dios tan magmaliw a babangatan nen Jesu-Kristo.

Amta nen Jehova a say asubok a pananisia et makanakana. Niarum ni, natulongan itayo na subsubok a naamtaan no kasin putel so pananisia tayo. Natulongan itayo na satan a nasukayan so kaleteyan na pananisia tayo, diad ontan et nipetek tayo so pamaakaran. Tan bilang kaunoran, say matalonan idalan tayo ed subsubok so ontulong ed arum a magmaliw a babangatan nen Jesus. Kanian, gawaen tayo komoy anggaay nayarian tayo a pansiansiaen a mabiskeg so pananisia tayo, pananisia a kayarin asubok na aminpiga et “naalmo ed dayew, gayaga tan galang . . . no ompanengneng si Jesu-Kristo.”​—1 Pedro 1:7.

[Paimano ed leksab]

[Litrato ed pahina 13]

Nagmaliw a kaaro nen Jehova si Abraham lapud agawaan na pananisia to

[Saray litrato ed pahina 15]

Iparungtal na subsubok no kasin putel so pananisia tayo

[Picture Credit Line ed pahina 12]

Nanlapud Illustrated Edition of the Holy Scriptures, di Cassell, Petter, & Galpin