Say Kaimportantian na Panagsulat ed Israel Nensaman

KASIN walaray abasam lan kabiangan na Iliad odino Odyssey, duaran bantog ya anlong ed Gresya nensaman? Saratan so ipapasen ya insulat nen koma-siam odino koma-walon siglo B.C.E. Anto so pidumaan na saratan ed Biblia, a mas akauna nin nisulat na piga-pigaran siglo? Imanoen pay inkuan na tomo na The Jewish Bible and the Christian Bible: “Ag-onkulang ed 429 a danay so impanukoy na Biblia nipaakar ed panagsulat tan saray dokumento.” No ikompara, balbaleg iyan pidumaan ed “aminpinsan ya impanukoy na Iliad ed panagsulat tan anggapon balot ed Odyssey.”

Idadalatdat na The Oxford Encyclopedia of Archaeology in the Near East a “diad Israel nensaman et ompatnag a say panagsulat so importantin kabiangan na panagdayew.” Singa bilang, say Ganggan a sipanan so insulat tan diad saginonor et regular ya imbasa ed publiko diad arap na amin a lalaki, bibii, tan ugugaw. Satan met so binasa tan inaral na totoo bilang grupo tan indibidual. Oniay inkuan na sakey a senior lecturer ed Unibersidad na Liverpool, a si Alan Millard, kayari ton inusisa so pigaran aspekto na say Ganggan: “Mapatpatnag, iilaloan ya amin da et makabasa tan makasulat.”​—Deuteronomio 31:9-13; Josue 1:8; Nehemias 8:13-15; Salmo 1:2.

Insalaysay nen apostol Pablo no anto so nepeg a panmoria na saray Kristiano ed masanton sulsulat: “Saray bengatla a nisulsulat nensaman, nisulat ira ya onkana ed kibanga’tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.” Kasin papablien mon mismo so Biblia diad maparanay mon panbabasa ed satan?​—Roma 15:4.