Ibangat Yoy Ananak yo a Mangaro ed si Jehova

‘Singa saray panapana ed lima na sakey a mabiskeg a too, ontan so saray anak a kalangweran.’​—SALMO 127:4.

1, 2. Panon a say ananak et niyaliling ed “panapana ed lima na sakey a mabiskeg a too”?

 SAKBAY a kenaen na pumapana so puntirya to, asigtaen ton ibala so pana ed banteng na bekang, insan to ipinat a maong. Anggaman ngalngali la onkelat so taklay to, maan-anos to nin ipuntirya so pana. Insan to ibulos itan! Kasin onkena so pana ed puntirya? Walay pigaran bengatla a pakadeterminaan no kasin onkena itan, a lalanoren na satan so inkadunong na pumapana, say epekto na dagem, tan say itsura na pana.

² Inyaliling nen Arin Solomon so ananak ed “saray panapana ed lima na sakey a mabiskeg a too.” (Salmo 127:4) Imanoen no panon ya onaplika iyan ilustrasyon. Say sakey a pumapana et maganggano ton ibala so pana ed bekang. Pian nakenay puntirya to, nepeg ton ibulos a tampol itan. Mipadpara, saray ateng so walaan na antiktikey a panaon a mangibangat ed ananak da na impapuson panangaro ed si Jehova. Kayari na satan ya antiktikey a panaon, saray ananak so ombaleg insan naandi la ra’d pudir na atateng da. (Mateo 19:5) Kasin nakena na atateng so puntirya, salanti, mantultuloy ya aroen tan panlingkoran na ananak da so Dios sano naandi la ra’d pudir da? Dakel so pakadeterminaan na ebat. Say talora ed saratan et say inkadunong na ateng, say kaliberliber a pamabalegan ed ananak, tan say paraan na ikiwas na anak diad pangipapasal ed sikato. Usisaen tayo pan sansakey iraya diad mas detalyadon paraan. Unona, konsideraen tayo so pigaran pakabidbiran ed marunong ya ateng.

Say Marunong ya Atateng et Maong ya Ehemplo

3. Akin a kaukolan ya atekepan na gawa iray ibabaga na atateng?

³ Si Jesus so napanuliranan na atateng lapud ginawa ton mismo so imbangat to. (Juan 13:15) Balet, kinondena to iray Fariseo ya angangga labat ed salita tan andian na gawa. (Mateo 23:3) Sirin, pian napakiwas na atateng so ananak da a mangaro ed si Jehova, nepeg dan gawaen a mismo so ibabaga ra. Saray salita ya andian na gawa et andi-kakanaan a singa bekang ya andian na banteng.

4. Antoray nepeg ya itepet na atateng ed inkasikara, tan akin?

⁴ Akin ya importantin maong so ehemplo na atateng? No panon a saray wala  la’d edad et naaralan dan aroen so Dios diad inengneng da ed ehemplo nen Jesus, naaralan met na ananak ya aroen si Jehova diad pangalig da ed maong ya ehemplo na atateng da. Saray kalimog na anak et balanglan mamabiskeg ed sikato odino ‘maneral ed saray maong ya ugali’ to. (1 Corinto 15:33) Diad bilay na sakey ya ugaw, tan nagkalautla diad primero iran taon na ibabaleg to, say sankaapitan tan manunan makaimpluensya a kalimog to et saray ateng to. Kanian, nepeg a tepetan na atateng so inkasikara: ‘Anton klase ak a kalimog? Kasin say ehemplok so mamaseseg ed anak ko pian bayuboan to iray maong ya ugali? Anton ehemplo so ipapanengneng ko diad importante iran pamaakaran a singa diad panagpikasi tan panagaral na Biblia?’

Say Marunong ya Atateng et Manpipikasi a Kaibay Ananak Da

5. Anto so naaralan na ananak ed saray pikakasi na ateng?

⁵ Dakel so naaralan na ananak yo nipaakar ed si Jehova diad pakarengel da ed saray pikakasi yo. Anto so namoria ra no narerengel da kayon misasalamat ed Dios antis na panangan tan no manpipikasi kayo sakbay tan kayari yon manaral na Biblia? Naaralan da ed satan a si Jehova so mangitatarya na saray pankaukolan tayo ed pisikal, a sikatoy manepeg a pisalamatan, tan sikato so mangibabangat ed sikatayo na espiritual iran katuaan. Saraya so makanakanan leksion.​—Santiago 1:17.

6. Panon a nipalikna na atateng ed ananak da ya interesado si Jehova ed sikara bilang indibidual?

⁶ Balet, wala ni mas nagkalalo a nagawaan yo no manpipikasi kayon sankapamilyaan likud ed oras na panangan tan panagaral yoy Biblia tan no espisipiko yon ipikasi iray pamaakaran a mangaapekta ed sikayo tan ed ananak yo. Nipalikna yo ed sikara a kabiangan si Jehova ed pamilya yo, tan sikatoy mangaasikason maong ed sikayo bilang indibidual. (Efeso 6:18; 1 Pedro 5:6, 7) Oniay inkuan na sakey ya ama: “Manlapu nen niyanak so anak min bii, sikatoy kaiba min manpipikasi. Legan na ibabaleg to, ipipikasi mi so nipaakar ed matukoy a relasyon ed arum tan arum nin pamaakaran a mangaapekta ed sikato. Anggad sakbay a naandi’d pudir mi ta miasawa la, anggapoy agew a linmabas a sikatoy agmi kaiban nampikasi.” Nayarian yo met kasi so manpikasi a kaibay ananak yo ed kada agew? Kasin natulongan yo ra ya ipasen dan Kaaro si Jehova, ya aglambengat mangitatarya ed saray pankaukolan ed pisikal tan espiritual noagta mangaasikaso met ed emosyonal a pankaukolan da?​—Filipos 4:6, 7.

7. Pian magmaliw ya espisipiko iray pikakasi na atateng, anto so kaukolan dan amtaen?

⁷ Siempre, pian magmaliw ya espisipiko iray pikakasi yo, kaukolan yon amtaen so nagagawa ed bilay na anak yo. Imanoen pa iray komento na sakey ya ama ya amabaleg na duaran anak a bibii: “Diad sampot na kada sakey simba, tetepetan koy inkasiak na duaran tepet: ‘Anto iray nampagaan na ananak ko ed sayan simba? Tan anto iray maabig a nagagawa ed bilay da?’” Atateng, nayarian yo kasin itepet iratan ed inkasikayo, insan yo salambiten so arum ed saray ebat diad pampikasi yo a kaibay ananak yo? No ontan so gawaen yo, nibangat yo ra ya aglambengat manpikasi ed si Jehova, a Dumerengel na pikakasi, noagta sikato met so aroen da.​—Salmo 65:2.

Ipapaseseg na Marunong ya Atateng so Maabig ya Ugali ed Panagaral

8. Akin a nepeg a pasesegen na atateng so ananak da a mangiyugali ed panagaral na Salitay Dios?

⁸ Panon a say awawey na ateng ed panagaral na Biblia so mangimpluensya ed relasyon na anak ed Dios? Pian ombulaslas tan mantultuloy so dinanman a relasyon, nepeg ya aglambengat mantongtong iray indibidual a nalalanor noagta ondengel met ira. Say sakey a paraan ya idengel tayo ed si Jehova et diad panaral na Biblia diad tulong na saray publikasyon ya itatarya na ‘matoor ya aripen.’ (Mateo 24:45-47; Uliran 4:1, 2) Sirin, pian nabayuboan na ananak so magnayon tan maaron relasyon ed si Jehova, nepeg a pasesegen ira na atateng da a mangiyugali  ed panagaral na Salitay Dios.

9. Panon a natulongan so ananak a mangiyugali na regular a panagaral?

⁹ Panon a natulongan so ananak a mangiyugali ed regular a panagaral? Unong a nikuan la, say ehemplo na ateng so sankaabigan a makapangibangat. Kasin naynay kayon nanenengneng na ananak yo a panliliketan yo so personal a panagbasa odino panagaral na Biblia? Tua a nayarin okupado kayon maong ed pangaasikaso yo ed ananak yo, tan nayarin nononoten yo no kapigan yo nipanaon so pambasa tan panaral. Balet tepetan yo pay inkasikayo, ‘Kasin naynay ak a nanenengneng na ananak ko a manbabantay na telebisyon?’ No ontan, sarag yo kasin usaren so arum ed saratan a panaon pian magmaliw kayon uliran da ed personal a panagaral?

10, 11. Akin a nepeg a gawaen a regular na atateng so panagaral da ed Biblia bilang pamilya?

¹⁰ Say sananey nin praktikal a paraan a nibangat na atateng so ananak da ya ondengel ed si Jehova et diad regular a panaral day Biblia bilang pamilya. (Isaias 30:21) Balet oniay nayarin isipen na arum, ‘Akin a kaukolan nin ipila so ananak diad panagaral na pamilya anta mabetbet met la ran aawiten na atateng da ed saray miting diad kongregasyon?’ Walaray pigaran maabig a rason. Inmatalek nen Jehova ed saray ateng so manunan responsabilidad a mangibangat ed ananak da. (Uliran 1:8; Efeso 6:4) Say panaral na Biblia bilang pamilya so mangibangat ed ananak a say panagdayew et aliwan sakey a ritual a gagawaen lambengat ed arap na totoo, noagta kabiangan ed pribadon bilay na pamilya.​—Deuteronomio 6:6-9.

¹¹ Niarum ni, say maabig a panangikondukta ed panagaral na pamilya so mangiter ed atateng na pankanawnawa pian natebek da no antoy panmoria na ananak da ed espiritual tan moral iran pamaakaran. Singa bilang, sano malangwer ni so ananak, nayarin usaren na atateng iray publikasyon a singa say Manaral Manlapud Sankamaongan a Managbangat. * Diad amin lawarin parapo na sayan katulongan ed panagaral na Biblia et walaray tepet ed ananak no antoy nibaga ra ed saray apantongtongan. Diad pankatunongan na atateng unong ed saray tekston asalambit diad libro, natulongan da so ananak da a napaaligwas so pakayari ran manebek ‘pian nibiig da so maong tan mauges.’​—Hebreos 5:14.

12. Panon a nitukoy na atateng so panagaral da bilang pamilya diad saray pankaukolan na anak da, tan antoy maabig a resulta ed panggagawa yo ed satan?

¹² Legan ya ombabaleg so ananak yo, itukoy yo so aaralen diad saray pankaukolan da. Imanoen no panon a tinulongan na sakey a sanasawa iray tinedyer ya ananak da a mankatunongan sanen manpapatanir iran onla’d sayawan diad eskuelaan. Oniay inkuan na ama: “Imbaga mi ed ananak mi a diad ontumbok a panaral mi  bilang pamilya, sikamin sanasawa so ompasen ya ananak, bangta saray mamarikit mi so ompasen ya atateng. Balangla ed sikara so onakton Ama odino Ina, balet ta kaukolan a mantulongan iran dua a mansukimat nipaakar ed satan tan ibaga ra no panon a nepeg a moriaen iray sayawan diad eskuelaan.” Anto so resulta? Oniay intuloy na ama: “Nikelawan kami ed inkatatken na panagnonot na mamarikit mi (ya inmakton atateng) sanen impaliwawa ra ed sikami (ya inmakton ananak) so rason da a nibase ed Biblia no akin ya aliwan makabat so onla’d sayawan. Say sakey nin nandinayewan mi et samay insuheri ra ya isandi ed sayan aktibidad a nayari parad saray Kristiano. Lapud saya et atebek min maong so walad kanonotan da tan saray paniinteresan da.” Tua a nakaukolan so inkaanos tan inkamanonot na paraan pian mansiansian regular tan makagunggona so panagaral bilang pamilya, balet ta maabig iray tumang ed ontan a pansasagpot.​—Uliran 23:15.

Mamawala na Mareen ya Ulopan na Pamilya

13, 14. (a) Panon a makapawala na mareen a kaliberliber ed ayaman iray atateng? (b) Anto so makagunggonan resulta sano aksobien na atateng iray lingo ra?

¹³ Say pana so posiblin onkena no ipuntirya tan ibulos itan na pumapana legan a mapalna so dagem. Mipadpara, posiblin naaralan na ananak ya aroen si Jehova no saray ateng et mamawala na mareen a kaliberliber ed ayaman. Oniay insulat nen Santiago: “Say bunga na katunongan wala a nitanem ed kareenan ed saray manggawa na kareenan.” (Santiago 3:18) Panon a napawala na atateng so mareen ya ulopan na pamilya? Kaukolan a pansiansiaen na sanasawa a malet so aroan da. Say sanasawa a manaaroan tan manrerespetoan so walaan na baleg a tsansan nibangat so ananak da a mangaro tan manrespeto ed arum, pati ed si Jehova. (Galacia 6:7; Efeso 5:33) Niwala so kareenan no walay panaaroan tan panrerespetoan. Tan say sanasawa a walaay mareen a relasyon so mas mainomay a makaresolbe ed pankokolkol a nayarin onlesa ed loob na pamilya.

¹⁴ Siempre, no panon ya anggapo so perpekton panamaley, anggapo met so perpekton pamilya diad dalin natan. Nayarin no maminsan et agnipatnag na atateng iray bunga na espiritu sano midedeneng ira ed ananak da. (Galacia 5:22, 23) Sano nagawa itan, anto so nepeg a gawaen na atateng? No aksobien da so impakalingo ra, kasin mamawas itan na respeto ed sikara na anak da? Imanoen pa so alimbawa nen apostol Pablo. Sikatoy ipapasen na dakel bilang ama ra ed espiritual. (1 Corinto 4:15) Ingen, inaksobi to a sikatoy alingo. (Roma 7:21-25) Anggaman ontan, say inkamapaabeba tan inkamatua to so lalon amaaralem na respeto tayo ed sikato imbes a nabawasan. Anggaman walaray kakulangan nen Pablo, sikatoy matalek a nansulat ed kongregasyon ed Corinto: “Mialig kayo komon ed siak, singa  siak met ed Kristo.” (1 Corinto 11:1) No aksobien yo met iray lingo yo, nayarin agla imanoen na ananak yo iray kakulangan yo.

15, 16. Akin a nepeg ya ipasal na atateng so ananak da a mangaro ed saray Kristianon agagi, tan panon dan nagawaan iya?

¹⁵ Anto ni so nagawaan na atateng pian makapawala ira na kaliberliber ya ontulong ed ananak da a napabulaslas so panangaro ra ed si Jehova? Oniay insulat nen apostol Juan: “No wala so mankuan, Aroen ko so Dios, tan busolen to so agi to, sikato so matila: ta say agmangaro ed agi to, anta anengneng to, agto nayarian ya aroen so Dios ya agto anengneng.” (1 Juan 4:20, 21) Kanian no ipapasal yoy ananak yo a mangaro ed saray Kristianon agagi, ibabangat yo iran mangaro ed Dios. Oniay nepeg ya itepet na atateng ed inkasikara, ‘Kasin say naynay ya itotongtong ko nipaakar ed kongregasyon et makapaseseg odino makapadismaya?’ Panon yon naamtaan? Dengel yon maong so paraan na panagsalita na ananak yo nipaakar ed saray aral tan ed saray membro na kongregasyon. Nayarin napatnagan yo ed saray panagkomento ra so paraan na panag-isip yo.

¹⁶ Anto so nagawaan na atateng pian natulongan day ananak da a mangaro ed saray agagi ra ed espiritual? Oniay inkuan nen Peter, ya ama na duaran tin-edyer a lalaki: “Manlapu nen malangwer ni iray ananak mi, naynay min iimbitaan iray agagin matatken ed espiritual a mangan tan milimog ed sikami diad abung mi, tan panliliketan min maong itan. Binmaleg iray ananak mi a saray kalimog da et totoon mangaaro ed si Jehova, tan namomoria da natan a say panaglingkor ed Dios et makapaliket a paraan na kabibilay.” Oniay inkuan nen Dennis, ya ama na limaran bibii, “Papasesegen mi iray ananak mi a mikaaro ed saray abayag lan payunir diad kongregasyon, tan kapiganman a posible et paparawesen mi iray ombiabiahen manangasikaso tan saray kaasawaan da.” Nayarian yo met kasi so onkiwas lan unona pian nipamoria yo ed ananak yo a say kongregasyon et singa la kabiangan na pamilya yo?​—Marcos 10:29, 30.

Say Responsabilidad na Anak

17. Anto so nepeg a desisyonan na ananak diad kaunoran?

¹⁷ Imanoen pa lamet imay ilustrasyon nipaakar ed pumapana. Anggaman sikato met so marundunong, nayarin agto nakena so puntirya no pikelkel odino pikewet so pana. Siempre, manseet a maong so atateng a mangipetek ed pana, a singa panangibaga, diad pansagpot dan ipetek so pikewet a kanonotan na anak da. Balet, diad saginonor, saray anak so nepeg a mandesidi parad inkasikara no kasin paimpluensyaan ira ed mundo odino abuloyan da si Jehova a ‘mangitonton ed saray basbas da.’​—Uliran 3:5, 6; Roma 12:2.

18. Anto so nayarin epekto ed arum na say desisyon a gawaen na anak?

¹⁸ Bangta walaan na ambelat a responsabilidad so atateng a mamabaleg ed ananak da diad ‘kadudusa tan panamilin nen Jehova,’ say unor a mandesisyon ed no anto so labay na anak a pagmaliwan to diad ibaleg to et sikaton mismo. (Efeso 6:4) Sirin, oniay itepet yoran ananak ed inkasikayon dili, ‘Kasin awaten ko so maaron pangipapasal ed siak na atateng ko?’ No awaten yo itan, pipilien yo so sankaabigan a paraan na kabibilay. Napaliket yon maong so atateng yo. Tan say sankaimportantian et napaliket yo so puso nen Jehova.​—Uliran 27:11.

[Paimano ed leksab]

Kasin Natandaan Yo?

• Panon a nipanengneng na atateng so maong ya ehemplo nipaakar ed panagpikasi tan panagaral na Biblia?

• Panon a makapawala na mareen ya ulopan na pamilya iray atateng?

• Antoran desisyon so nepeg a gawaen na ananak, tan panon mangapekta ed arum iray desisyon da?

[Tepetepet Parad Panagaral]

[Litrato ed pahina 28]

Kasin mangipapanengneng kayo na maong ya ehemplo ed anak yo diad personal a panagaral?

[Litrato ed pahina 29]

Niwala so liket no mareen so ulopan na pamilya