Ngaran na Dios Diad Musika na Russia

NEN 1877, say bantog a Ruson komposer a si Modest Mussorgsky so angipalapag na kanta a base ed agawa diad saray lugar ya abitla ed Biblia. Oniay insulat to’d sakey a kaaro: “Angompos ak na sakey ya eskena ed Biblia nipaakar ed si Jesus Navinus [Josue], a mitunosan a maong ed Biblia, a tinumbok ko ni ingen so rota nen Navinus diad matalonan inloob to ed Canaan.” Diad arum iran komposisyon to, a singa “Say Inkagba nen Senakerib,” sinaglawi met nen Mussorgsky iray tema tan karakter ed Biblia.

Makatantanda a diad kinompos to ya “Jesus Navinus” tan ed say 1874 ya edisyon ton “Say Inkagba nen Senakerib,” tinukoy nen Mussorgsky so Dios. Inusar to so panangibekas na saray Ruso ed madibinon ngaran, ya inrepresenta diad Hebreon Kasulatan na apatiran letran יהוה (YHWH) tan pinmatnag ed ngalngali 7,000 a danay.

Kanian, ipapanengneng na sarayan kinompos nen Mussorgsky a say ngaran na Dios ya akasulat ed Biblia, salanti, Jehova, so kabkabat la’d komunidad na saray Ruso sakbay ni na koma-20 siglo. Manepeg labat itan lapud oniay imbagan mismo nen Jehova ed si Moises: “Sikato ya so ngaran ko ed andi anggaan, tan sikato ya so pakanodnonotan ed saray amin a kailalakan.”​—Exodo 3:15.

[Litrato ed pahina 32]

Piesa: The Scientific Music Library of the Saint-Petersburg State Conservatory ya inngaran ed si N.A. Rimsky-Korsakov; litrato’d leksab: National Library of Russia, St. Petersburg

[Picture Credit Lines ed pahina 32]

St. Petersburg Conservatory nen 1913, say pangisisimpenan ed kinompos nen Mussorgsky