Nonoten a Naynay so Kaimportantian na Panangomenda

WALA ta lay nadngel mon manrereklamo lapud sikatoy mataltalag a kokomendaan na amo to? Kasin ontan met so irereklamom? Odino no sakey kan kalangweran, kasin ontan met so reklamom nipaakar ed atateng mo odino ed mamaestrom tan mamaestram?

Nayarin makatunongan met so arum ed sarayan reklamo. Balet, unong ed sakey ya eksperton Aleman, sano ontan so irereklamo na saray empleyado, say makasengeg et aliwa labat a say agda pakakaawat na komendasyon noagta say inkaandi na personal ya interes ed sikara na amo ra. Antokaman so kipapasen, wala so mapatpatnag ya agnagagawaan. Say panangomenda tan panangipaliknay personal ya interes et namparan importante pian nawalaan itayoy makapenek iran siglaotan.

Tua met iya no nipaakar ed panagdayew. Nepeg a napatnagan ed Kristianon kongregasyon so makomendan awawey, inkaligsa, tan personal ya interes. Saray membro na kongregasyon so magmaliw ya ontan tan napansiansia ra itan diad pangunor da ed saray totontonen na Biblia. Balet, anggan panon lay inkamaaro na kongregasyon tayo, satan so posible nin napaaligwas. Nipaakar ed saya, konsideraen tayo natan so taloran maabig ya ehemplo ed panangomenda: si Elihu, a lingkor na Dios sakbay na panaon na saray Kristiano, si apostol Pablo, tan si Jesu-Kristo a mismo.

Magalang tan Marespeton Pananimbawa

Si Elihu, a nayarin arawi lan kanayon nen Abraham, so akatulong a maong ed si Job pian nasimbang toy panmoria to ed siglaotan to ed Dios. Magalang tan marespeto si Elihu. Maanos ton inalagar so turno ton mansalita. Sikatoy aglabat animbawa, noagta alisto ton kinomendaan si Job ed maptek a pankukurang to, bangta saray mankuan a kaaro nen Job et impabitar da labat iray lingo to. Sikatoy maligligsan angomenda tan mapatnag a walay personal ya interes to bilang kaaro, a binitla toy ngaran nen Job, aliwan singa saramay arum. Onia so magalang ton inkerew: “Job, dengel mon maong iray amin a salitaen ko’d sika.” Marespeto ton impatnag so empatya ed si Job, a kuan to: “Nampara ita, Job, ed pakanengneng na Dios; nanlapu ita’n dua ed pitek.” Tan bilang komendasyon, inkuan to: “Balet no walay labay mon ibaga, ibagam labat; maliket ak a mamirbir a walay katunongan mo.”​—Job 33:1, 6, 32, Maung a Balita.

Diad tua, say magalang tan marespeton panagtrato tayo ed arum et sakey a paraan na panangomenda ed sikara. Singa tayo ibabaga ed dumerengel tayo a, ‘Parad siak et nepeg ta kan imanoen tan tratoen a maong.’ Diad ontan et ipapalikna tayoy inkaligsa tan ipapatnag tayoy personal ya interes tayo ed sikato.

Say pagmaliw a magalang et aglabat mankabaliksan na panumbok ed saray  totontonen na maabig ya ug-ugali. Ta pian nasabi so puso na arum, nepeg a masimoon tan nanlapud puso so inkamagalang tayo. Nepeg a pakapatnagan iratan na peteg ya interes tan panangaro.

Mataktikan Mangiter na Komendasyon

Impanengneng nen apostol Pablo no panon kaepektibo so inkamataktika sano mangokomenda ed arum. Singa bilang, sanen manpupulong ed Atenas diad samay mikaduan impanbaroy to bilang misionaryo, indepensa to so Inkakristiano ed arapan na saray Griegon pilosopo. Imanoen no panon ton mataktikan agawaan iyan mairap ya asainmin. “Saray arum met ed saray pilosopo ya Epicureo tan Estoico akisangsangan ira ed sikato; et saray arum kuan da: Anto so labay ton ibaga so sayan malabir? Et saray arum kuan da met: Singa sakey a mangipupulong na saray sankaili a dirios.” (Gawa 17:18) Anggano walaray ontan a komento, nansiansia labat a kalmado si Pablo tan inmebat: ‘Lalakin taga-Atenas, dia ed amin a bengatla, nanengneng ko a mapagalang kayon tuloy ed dirios.’ Imbes a kondenaen nen Pablo so panagtalintao ra, kinomendaan to so inkadeboto ra.​—Gawa 17:22.

Kasin mankuankuanan labat si Pablo? Andin balot. Amta to ya agto nayarin husgaan iray dumerengel to, tan binidbir to a sikaton mismo et datin ignorante ed katuaan. Sikatoy niganggan a mangipasabi na mensahe na Dios, aliwan pian manhusga ed arum. Napaneknekan to ed mismon eksperiensya to a tua imay namomoria na saray Tasi nen Jehova natan: Arum iran maseseg a manangidepensa na palson relihyon so magmamaliw a kabiangan na saray makmakpel a manangidepensa na tuan relihyon.

Epektibo so paraan nen Pablo tan maabig iray resulta na satan. “Saray arum a totoo nen akitipon ira ed sikato, anisia ra; ed sikara sakey met si Dionisio ya Areopago, tan sakey a bii a manngaray Damaris, tan arum ni ya ibiba ra.” (Gawa 17:34) Talagan makabat si Pablo ed impangomenda to ed saray taga-Atenas lapud masimoon a papanisiaan da, anggano palso iratan, imbes a kondenaen to ra lapud kakulangan day suston pikakabat! Saramay totoon apalikdo na lingo iran impormasyon et mabetbet a maong so puso ra.

Sanen impatawag si Pablo pian mangidepensa ed arap nen Herodes Agripa II, sikatoy nansalita ed mataktikan paraan. Kabat si Herodes a walaay sebel a relasyon ed agi ton si Bernice, a malinlinew a kokondenaen na Salita na Dios. Balet sikatoy agbalot kinondena nen Pablo. Imbes, akaromog na makatunongan a rason si Pablo pian komendaan si Herodes. “Igaton koy inkasiak a mapalar, ari Agripa, ta dia ed arap mo nagawaan ko so mankatunongan nipaakar ed amin a bengatla ya angidaleman da ed siak na saray Judio: Laut la, ta kabat mo ya amin so saray kaugalian tan siblangan a wala ed saray Judios.”​—Gawa 26:1-3.

Agaylan makabat so pagmaliw tayo met a mataktika sano midedeneng itayo ed arum! Say pangomenda ed kaabay, kaparan estudyante, odino katrabahoan so mamawalay mareen a siglaotan tan manresulta ed maong ya ugali. Diad panabi ed puso panamegley na matukoy a komendasyon, no maminsan et napakiwas tayoray masimoon ya indibidual pian umanen da iray palson panagkatunongan tan kiwakiwas da, tan itunos da iratan ed suston pikakabat.

Say Naspot ya Ehemplo nen Jesus ed Panangomenda

Si Jesus et angiter na komendasyon. Singa bilang, kayari na inkioli tan insegep to ed tawen, sikato so ingganggan na Dios a mansalita panamegley nen apostol Juan diad pitoran kongregasyon ed Asia Minor. Naynay ton kinomendaan iramay manepeg a komendaan. Parad saray kongregasyon na Efeso, Pergamum, tan Tiatira, inusar to iray balikas a singa say: “Siak amtak so saray gawam, tan say sagpot mo, tan kasungdoan mo, tan say agmo pakayarin mangitepel ed saray mauges a totoo”; “pinokpokan mo so ngaran ko, tan agmo imburi pananisiak”; tan “siak amtak so saray gawam, tan say arom tan pananisiam  tan panaglingkor tan kasungdoan mo, tan saray gawam a kaunoran nagkalalo ra nen saray akauna.” Anggan diad kongregasyon na Sardis a mankaukolan na mabiskeg a simbawa, inimano nen Jesus iramay indibidual a manepeg a komendaan, a kuan to: “Balet wala ed sika so pigaran ngaran ed Sardis ya agda dinutakan so kawekawes da: et kaulop ko ra naani a manakar ya akawesan na amputi; ta makana ra.” (Apocalipsis 2:2, 13, 19; 3:4) Agaylay abig ya ehemplo so impanengneng nen Jesus!

Bilang pangalig ed si Jesus, nepeg ya agtayon balot kondenaen so interon grupo lapud impakasaew na pigara ed sikara, nisay mangiter itayo na nakaukolan a simbawa ya anggapoy matukoy a panangomenda. Anggaman ontan, tandaan tayo a posiblin nibaliwala so panangomenda tayo no gawaen tayo labat itan sano getma tayoy manimbawa. Naynay kayon mangomenda kapiganman a posible! Diad ontan, sano nakaukolan so panimbawa ed arum a panaon, mas mainomay itan ya awaten.

Mamatatken a Mangiiter na Manepeg a Komendasyon

Si Cornelia et sakey a Kristianon bii a manlilingkor natan ed sakey a sangan opisina na saray Tasi nen Jehova ed Europa. Nanonotan to a diad asasakbay na dekaday 1970, say ombiabiahen manangasikaso ya ombibisita so angumusta ed personal a panagaral to tan ed pambabasa toy magasin. “Medyo nababaingan ak,” so inkuan to. Balet impatua to ya agto nababasa so kada artikulo na magasin. Onia so nanonotan to: “Imbes a balawen to ak ed saya, kinomendaan to ak ed pambabasak na anggaay nayarian ko. Apaseseg ak a maong ed komendasyon to, kanian manlapud saman et nampelengan ko lan basaen so kada artikulo.”

 Agnalingwanan nen Ray, a manlilingkor ed sakey a sangan opisina ed Europa, so primeron agew to bilang payunir. Say mangidadaulon manangasikaso ed kongregasyon da, a walaay negosyo tan obligasyon ed pamilya tan dakel niran responsabilidad ed kongregasyon, so linmoob ed Kingdom Hall ed saman a labi tan dinago toy Ray insan to tinepetan, “Kumustay primeron agew mo bilang payunir ey?” Natan a ngalngali 60 taon lay linmabas, siansia nin agnalingwanan nen Ray so inkamanonot na saman a matatken.

Unong ya ipapanengneng na satan a duaran eksperiensya, say masimoon tan maaron panangapresya ed agawaan na arum​—ya aliwan basta labat angibalikas na komendasyon odino andi-kakanaan a panaglarog​—so makagunggonan maong. Diad loob na Kristianon kongregasyon, dakdakel so rason tayo pian komendaan iray agagi tayo. Isipen pa labat so pilalek dan manlingkor ed si Jehova, saray imparaan dan maong a komento ra, say pakakatalona ra ed pannerbiyos da ed entablado pian manpaliwawa odino mibiang ed saray parte na programa ed aral, say inkaseseg da ed panagpulong tan panagbangat, tan say pansasagpot dan iyuna so intereses na Panarian tan maespiritual iran kalat. Sano komendaan tayo so arum, nabendisyonan itayo na daakan. Sikatayo so manliket tan natulongan itayon nawalaan na positibon kanonotan.​—Gawa 20:35.

Nepeg a komendaan na saray mamatatken so kongregasyon ed maabig a nagagawaan na satan. Tan no nakaukolan so panimbawa, gawaen da itan ed maaron paraan. Diad biek a dapag, paliisan da so pagmaliw a perpeksyonista, ya ipasen dan baleg lan kakulangan so melag labat a lingo.

Saray Kristianon mamatatken a mangaalig ed maaron inkamagalang nen Elihu, mataktikan paraan nen Pablo, tan maaron panangiyansakit nen Jesus so peteg a pakapasesegan na agagi ra. Say panangomenda so mamaseseg ed arum pian gawaen day sankaabigan da tan manresulta itan ed maliket tan mareen iran siglaotan. Seguradon aliketan si Jesus diad samay impanpabautismo to sanen nadngel toy onian komendasyon na Ama ton walad tawen: “Sika so inad-arok ya Anak, napaliket ak a maong ed sika.” (Marcos 1:11) Komon ta napaliket tayo so kapusoan na saray agagi tayo diad pangibalikas tayo na masimoon tan makabaliksan iran komendasyon.

[Saray litrato ed pahina 15]

Say inkamataktika so amawala na maabig iran resulta ed si Pablo, kanian ontan met ed sikatayo

[Litrato ed pahina 16]

Alay abig so resulta na maligsa tan masimoon a panangomenda