Akin ya Aabuloyan na Dios so Karelmengan?

AGMO la kaukolan so onarawi pian nanengneng mon kasmak la so kaugsan tan kairapan. Ompapatey ed guerra iray sibilyan tan sundalo. Mabetbet a nagagawa so krimen tan karawalan. Ompan diad agano ni et abiktima ka met la na panangiduma-duma tan ag-inkahustisya. Nisengeg ed saray anengneng tan naeksperiensiam, nayarin onia lay intepet mo, ‘Akin ya aabuloyan na Dios so karelmengan?’

Aliwa lan balo itan a tepet. Manga 3,600 taon la so linmabas, onia so intepet na matoor a lingkor na Dios a manngaray Job: “Akin et manbilay so saray marelmeng?” (Job 21:7) Lapud nagogonigon si Jeremias ed mauges iran kagagawa na kanasyonan to manga 2,600 taon la so apalabas, onia so intepet to: “Akin et say dalan na marelmeng onaligwas? Akin et main-inawa so saray amin a managamil ed liputan?” (Jeremias 12:1) Amta nen Job tan Jeremias a say Dios et matunong. Balet, pankelawan da no akin ya alablabas lay karelmengan. Nayarin nawewetwet ka met ed saya.

Tetetelen na arum a totoo so Dios lapud karelmengan tan kairapan. Tetepetan da met so inkasikara: ‘No say Dios so makapanyarin amin, matunong, tan maaro, akin ya agto ni panampoten so kaugsan tan kairapan? Akin ya inabuloyan ton mantultuloy ni so kaugsan anggad natan?’ Saraya tan arum niran importantin tepet so ebatan ed ontumbok ya artikulo.

[Picture Credit Line ed pahina 3]

AP Photo/Adam Butler