Bayuboan ed Puso na Anak Yo so Aro ed Dios

NATAN et talagan mairap ed sakey a too so pakabayubo na maapit a siglaotan ed si Jehova a Dios. (Salmo 16:8) Singa nipropesiya la, manbibilay itayo la natan ed “saray panaon a maatap.” Maslak a totoo et “maaro ed saray likeliket, a lalo nen say dia ed Dios.” (2 Timoteo 3:1-5) On, talagan dagdaiset la natan so petepeteg a mangaaro ed Dios.

No labay tayon impapuson naaro na anak tayo so Dios, agnayarin anggapoy gawaen tayo. Kaukolan tayon bayuboan diad kapusoan na ananak tayo so aro ed si Jehova a Dios. Balet, panon tayon nagawaan iya?

Lukas a Komunikasyon

Nabayuboan tayo so aro ed Dios diad puso na ananak tayo no say mismon puso tayo et manleppuas ed panangaro’d sikato. (Lucas 6:40) Ontan so impabitar na Biblia sanen inkuan to: “Aroen mo si Jehova a Dios mo ed amin a pusom tan dia ed amin a kamarerwam, tan dia ed amin a pakayarim. Et saraya a salita, ya iganggan ko ed sika ed sayan agew, nepeg da so ontatak ed pusom; tan nepeg mo ya ibangat iraya a sankakulian ed saray anak mo.”​—Deuteronomio 6:4-7.

Panon tayon nabayuboan so panangaro ed Dios diad puso na anak tayo? Unona, kaukolan ya amtaen tayo so walad puso ra. Tan komadua, nepeg ya ipaamta tayo no antoy walad puso tayo.

Say sakey ya alimbawa na lukas a komunikasyon et samay agawa sanen mamapaarap si Jesus tan say duaran babangatan to ed Emmaus. Diad saman et pinaseseg to ni irayan babangatan a mangibalikas ed saray pilalek tan paga ra. Kayari ton nadngel so imbaga ra, insan to labat la nansalita pian ipetek so kanonotan da diad impangipaliwawa to ed Kasulatan. Kanian diad saginonor et oniay imbaga ra: “Agta dinmalang so puso ta ed loob ta, legan a nansalita ed sikata?” (Lucas 24:15-32) Balet, panon tayo kasin natebek so nalilikna na anak tayo?

Diad agano ni et tinepetan nipaakar ed lukas a komunikasyon so pigaran atateng a saray anak dan wala la’d edad odino baleg la et maong iran ehemplo ed kongregasyon. Sakey ed saratan et si Glen a taga Mexico. * Apatiray anak to ya angkabaleg lara. Oniay inkuanto: “Aliwan automatiko ‘tay matintinunos a komunikasyon ed baetan na anak tan ateng. Say gagawaen mi nen asawak et ipipireg mi ray agtanto importantin bengatla pian walay panaon min milimog ed saray anak mi. Sanen tinedyer nira, no maminsan et sanlabi kamin maniistoryaan, a pantotongtongan mi ray anggan anton nanonotan da. Ontan met no panaoy panangan, dedengelen mi ray tongtongan da, kanian natetebek mi ray problema ra, insan mi ap-apigeren ya ipetek so antokaman a makapuy a tendensia ra, a kaslakan et diad paraan ya agda naliklikas.”

Nalalanor met ed lukas a komunikasyon so pangipaamta tayo ed walad mismon puso tayo. Inkuan nen Jesus: “Say maong a too ipaway to so maabig dia ed maong a kayamanan na puso to; . . . ta dia ed inkadaakan na puso say sangi to mansalita.” (Lucas 6:45) Oniay inkuan nen Toshiki, a say taloran anak to et walad sigpot panaon a serbisyo ed Hapon: “Aminpiga-pigak ya imbaga ed sikara no akin ya awalaan ak na pananisia ed si Jehova, no panon kon anisiaan ed interon pusok a sikatoy petepeteg tan no panon a saray mismon naeksperiensyak et angombensi ed siak a say Biblia et tua tan sankaabigan a giya ed bilay.” Inkuan nen Cindy a taga Mexico: “Naynay a manpipikasi si masiken ko kaiba iray anak mi. No narerengel daray impapuson balikas to, amta ran si Jehova et aliwa labat a komkombalet noagta tuan persona.”

Say Inkaepektibo na Ehemplo Tayo

Say mas epektibo nen saray ibabaga tayo et say paraan na kabibilay tayo, lapud diad satan a nanengneng na ananak so kinabaleg na panangaro  tayo ed Dios. Singa diad kipapasen nen Jesu-Kristo, atebek na totoo a baleg so panangaro to ed si Jehova ta anengneng da so katutulok to ed Sikato. Inkuan nen Jesus: “Pian nakabatan na mundo ya inarok so Ama, tan unong a say Ama initdan to ak na ganggan, ontan so gawaen ko.”​—Juan 14:31.

Oniay inkomento met nen Gareth, a sakey a Tasi nen Jehova ed Wales: “Nepeg a nanengneng na ananak tayo ya inaro tayo si Jehova tan panggugunaetan tayon gawaen iray bengatla unong ed paraan to. Alimbawa, pian nanengneng na saray anako ya ontutulok ak ed ibabaga na Dios ed sikatayo, aawaten ko iray lingok. Kanian natan, ontan met lay gagawaen na saray ana’ko.”

Si Greg ya Australiano et inkuan to: “Labay min nanengneng na ananak mi a say manuna ed bilay mi et say katuaan. No mandedesisyon kami nipaakar ed trabaho odino panagligliwaan, nonoten mi ni no kasin naapektaan iray obligasyon mi bilang Kristiano. Malikeliket kami ta nanenengneng min ontan met so gagawaen na marikit min 19 años diad pan-o-auxiliary payunir to.”

Tulongan Iray Anak Tayo a Natalosan so Dios

Agtayo naaro odino napanmatalkan so siopaman no agtayo natatalosan. Sanen pinirawat nen apostol Pablo ya ombulaslas komon so aro ed si Jehova na saray Kristiano ed Filipos, oniay insulat to: “Saya so kerewen ko a say aro yo ondaak a lalo nin lalo komon ed kakabatan dia ed amin a panangimano.” (Filipos 1:9) Inkuan met nen Falconerio a taga Peru tan mamapabaleg na apatiran anak: “Ombibiskeg so pananisia ra lapud regular a panagbasa tan panagaral mi na Biblia. No maminsan, naliliwatan ko itan a gawaen, et naiimanok ya onkakapuy so panangaro ra ed Dios.” Inkuan nen Gary a taga Australia: “Naynay kon ipapanengneng ed saray ana’ko iray paneknek a saray propesiya ed Biblia et nasusumpal. Ipapabitar ko met ed sikara so kakanaan na panangiyaplika ed saray prinsipyo na Biblia. Lapud regular so panagaral mi na Biblia, binmiskeg a maong so pananisia ra.”

No gawaen ed paraan ya aliwan masyadon pormal, ingen ta walaan na dignidad, mas nipaslep so pikakabat ed puso na anak, lapud makapaliket so manaral ed ontan a kipapasen. (Santiago 3:18) “No peles na panagaral, panggugunaetan min agpampasnokan iray anak mi, anggaman medyo  magulo la ra,” so inkuan na Britanon sanasawan Shawn tan Pauline a walaan na apatiran anak. “Nandurumay paraan na panangikondukta mi panagaral. No maminsan, pampipilien miray ugugaw no antoy labay dan aralen mi. Uusaren miray video a pinawala na organisasyon nen Jehova. No maminsan, ire-replay mi so sakey ya eksena odino i-po-pause mi so video pian napantongtongan mi.” Dia met ed Britanya, onia so inkuan na ina a si Kim: “Manpaparaan ak a maong parad panagaral na pamilya mi pian saray nitepet ko et talagan pannonoten toray anak ko. Maliket so panagaral mi. Mabetbet so elekan.”

Panamili na Saray Kaulop

Say panangaro ed si Jehova tan panamabli ed tuan panagdayew et mas ombulaslas ed ananak tayo no saray nakakaulop da et totoon kakaaro na Dios. Tua, kaukolan so sagpot ed panggaway paraan pian say nakaulop-ulop na ananak tayo et saramay makagunggonan katongtong odino kagalaw. Balet ta nabawbawi tayo itan! Makatulong met no iyuksoy tayon napilimogan daray kaagian a say pinili ran karera ed bilay et sigpot panaon a ministeryo, ta say maslak ed saraya et nandesisyon na ontan lapud impakapilimog da met ed maseseg iran lingkor na Dios. Oniay inkuan na sakey ya agin bii a nagmaliw a misionaryo: “Naynay ya iimbitaan na atateng ko iray payunir a mangan ed sikami. Et talagan sankanengneng kon malikeliket ira ed ministeryo ra, kanian nilabay ko met so manpayunir a singa sikara.”

Siempre, nayarin naimpluensyaan iray anak tayo balanglan diad pankaabigan odino pankaugsan da. Nasubok sirin so abilidar tayo ran atateng no kasabi’d pananalimbeng ed sikara ed kapeligroay mauges a pipiulop. (1 Corinto 15:33) Kaukolan so diskarte pian nibangat tayo ray ugugaw a paliisay pipiulop ed saramay agmangaaro odino agda kabat si Jehova. (Uliran 13:20) Oniay inkuan nen Shawn ya asalambit niman: “Binangatan miray anak mi a magmaliw a makaaro ed saray kaeskuelaan da balet ta nepeg ya angangga labat itan ed eskuelaan. Natatalosan na saray anak mi no akin ya ag-ira nepeg a mibiang ed ekstrakurikular iran aktibidad odino diad saray pagalaw ed eskuelaan.”

Say Kaimportantian na Panangipasal

No ipasal tayo ray anak tayo a mangipaliwawa ed pananisia ra, tutulongan tayo ran manliket ed panangibalikas na panangaro ra ed Dios. Oniay inkuan nen Mark a taga Amerika: “Labay min nalikna na saray anak mi a nayarian dan itongtong so pananisia ra ed arum ed anggan anton panaon, aliwa labat a sano akapales iran manpulong. Kanian no ompasyar kami, alimbawa diad parki, gilig na dayat, odino diad takel, mangaawit kami na saray Biblia tan literaturay Biblia, tan kakatongtongen mi iray totoo ditan nipaakar ed saray sisiaen mi. Panlikliketan na saray anak mi so miiba’d sikamin makapanpulong ed ontan a paraan. Mibibiang ira ed tongtongan tan ibabalikas day pananisia ra.”

Dakel so atulongan nen masiken lan apostol Juan a mamabulaslas na aro ra ed Dios. Oniay insulat to nipaakar ed saraya: “Anggapo so babaleg a liket ko nen say saya, salanti say pakadngel ko a saray ana’ko [ed espiritual et] manaakar ira ed katuaan.” (3 Juan 4) No bayuboan tayo ed kapusoan na ananak tayo so aro ed Dios, seguradon nalikna tayo met so ontan a liket.

[Paimano ed leksab]

[Saray litrato ed pahina 9]

Ag-automatikon nagagawa so bulo-bulos a pantongtong nipaakar ed pananisia

[Litrato ed pahina 10]

Bangatan iray anak yo a mangibalikas na panangaro ra ed Dios

[Credit Line]

Unong ed impangiyabuloy na Green Chimneys Farm