“Mapangasi so Ama Yo”

“Mapangasi kayo komon, unong a mapangasi so Ama yo.”​—LUCAS 6:36.

1, 2. Panon ya ipapabitar na saray imbalikas nen Jesus ed saray eskribas tan Fariseo tan ed saray patumbok to a say panangasi et alay abig a kalidad?

 SAY Ganggan a niiter panamegley nen Moises et tugyopen na ngalngalin 600 a totontonen tan regulasyon. Anggaman importante so panumpal ed saray kakaukolanen ed Mosaikon Ganggan, importantin maong met so pangipatnag na panangasi. Imanoen pa so imbaga nen Jesus ed saray Fariseo, ya andian na panangasi ed arum. Sikaray amiduan binaat to tan impabitar to ya oniay ingganggan na Dios: “Say panangasi so pirawat ko, ya aliwan say bagat.” (Mateo 9:10-13; 12:1-7; Oseas 6:6) Sanen magano lan manampot so ministeryo nen Jesus, inkuan to: “Kasi kayo la, ya eskribas tan Fariseos, a mansimpisimpitan! Ta manbayar kayo na kakaplo na yerbabuena tan anis tan cumino, balet pinaulyan yo ya agsinumpal so saray ambelbelat a pamaakaray katunongan salanti, kaalasan, tan panangasi tan pananisia.”​—Mateo 23:23.

² Talagan impasen nen Jesus ya importantin maong so pagmaliw a mapangasi. Inkuan to ed saray papatumbok to: “Mapangasi kayo komon, unong a mapangasi so Ama yo.” (Lucas 6:36) Balet, pian ‘naalig tayo so Dios’ diad sayan pamaakaran, kaukolan tayon amtaen so tuan kabaliksan na panangasi. (Efeso 5:1) Sakey ni, no natebek tayo iray gunggona ed pagmaliw a mapangasi, napakiwas itayon ipatnag itan a nagkalalo diad kabibilay tayo.

Ipatnag so Panangasi ed Saray Mankaukolan

3. Akin a si Jehova so nepeg tayon pampabangatan nipaakar ed tuan kabaliksan na panangasi?

³ Oniay inkanta na salmista: “Si Jehova maong a linawa tan mapangasi: matantan a manpasnok tan baleg ed abig na linawa. Si Jehova maong ed amin; tan saray matamoy a panangasi to wala ra ed tagey na saray amin a kimey.” (Salmo 145:8, 9) Si Jehova so “Ama na saray panangasi tan Dios na ami’ ligliwa.” (2 Corinto 1:3) Lalanoren na say pangipatnag na panangasi so maabagey a pantrato ed arum. Sakey iya ed saray manunan aspekto na personalidad na Dios. Diad panamegley na ehemplo to tan saray bilin to ed sikatayo, naaralan tayo so tuan kabaliksan na panangasi.

4. Anto so ibabangat ed sikatayo na Isaias 49:15 nipaakar ed panangasi?

⁴ Unong a nisulat diad Isaias 49:15, oniay imbaga nen Jehova: “Nayarian ta na sakey a bii a lingwanan so anak to a mansuso, ya agto komon kasian so anak na eges to?” Saray Hebreon salita a mipadparay kabaliksan ed salitan impatalos a “kasian” so inusar a mitunosan ed panangasi a walad Salmo 145:8, 9, ya inaon ed tagey. Say emosyon a mamapakiwas ed si Jehova ed pangipapatnag toy panangasi et nikompara  ed panangaro a kaslakan a nalilikna na sakey a manpapasuson ina ed anak to. Nayarin say anak to et narasan odino wala ni arum a nakaukolan to. Balet lapud panangabagey odino simpatiya a nalilikna na ina, sikatoy onkiwas a mangiter ed pankaukolan na anak to. Si Jehova et walaan na ontan a matamoy a liknaan parad saramay pangipapatnagan to na panangasi.

5. Panon ya impatnag nen Jehova a sikatoy “mayaman ed panangasi” parad Israel?

⁵ Maabig so pakaliknay panangabagey ed arum, balet mas maabig no tekepan itan na gawa pian nagunggonaan iray mankaukolan. Imanoen no panon a kinmiwas si Jehova sanen naaripen ed Ehipto iramay mandadayew ed sikato manga 3,500 taon lay apalabas. Oniay inkuan to ed si Moises: “Peteg ya anengneng ko so ermen na totook a wadman ed Ehipto, et dinengel ko so tagleey da lapu ed saray kapatas da, ta amtak so kaermenan da; et linmasur ak ta ekalen ko ra ed saray lima na saray Ehipsios, tan pian itaynan ko ra ed saman a dalin tan yakar ko ra ed sakey a maong tan maawang, dia ed sakey a dalin a panagusan na gatas tan dilo.” (Exodo 3:7, 8) Manga 500 taon kayarin nibulos ed Ehipto iray Israelita, oniay impanonot ed sikara nen Jehova: “Inagwat ko so Israel ed Ehipto, tan sikayo so inlaban ko ed lima na saray Ehipsio, tan ed lima na saray amin a nanarian ya angapos ed sikayo.” (1 Samuel 10:18) Saray Israelita so mabetbet a nidunget ed mairap a kipapasen lapud kinmasipa ira ed matunong ya estandarte na Dios. Ingen, sikaray inabagey nen Jehova tan aminpiga to ran inliktar. (Uko-ukom 2:11-16; 2 Awaran 36:15) Iyiilustra na saya no panon so ikikiwas na maaron Dios parad saramay walad pankaukolan, walad kaatapan, odino walad kairapan. Si Jehova et “mayaman ed panangasi.”​—Efeso 2:4.

6. Panon ya inalig nen Jesu-Kristo so Ama to ed panangipatnag na panangasi?

⁶ Sanen wadia ed dalin si Jesu-Kristo, naspot ton inalig so Ama to ed panangipatnag na panangasi. Panon so inkiwas nen Jesus sanen akikasi ed sikato so duaran bulag, a kuan da: “Katawan, kasian mo kami komon, sika anak nen David”? Mikakasi ra ed si Jesus a mamilagro ton ipawil so pakanengneng da. Pinaabig ira nen Jesus, balet agto ginawa itan a milagro ya andian na simpatiya. Oniay inkuan na Biblia: “Si Jesus, dia ed impangabagey to, diniwi’to so saray kamataan da: et tampol ya inawat da so pakanengneng da.” (Mateo 20:30-34) Say panangabagey so amakiwas ed si Jesus pian manggawa na dakel a milagro, a nanresulta ed impakainawaan na saray bulag, aselepan na demonyo, akating, tan atateng a walaay mansasakit ya ananak.​—Mateo 9:27; 15:22; 17:15; Marcos 5:18, 19; Lucas 17:12, 13.

7. Anto so ibabangat ed sikatayo na ehemplo nen Jehova a Dios tan si Jesu-Kristo nipaakar ed panangasi?

⁷ Ipapanengneng na saray ehemplo nen Jehova a Dios tan si Jesu-Kristo a say panangasi et walaan na duaran aspekto​—say liknaan a maabagey, masimpatiya, odino makasi ed saray mankaukolan, tan say gawa a mangitatarok na pakainawaan da. Nakaukolan itan a duaran aspekto pian nibagan mapangasi so sakey. Diad Biblia, say panangasi so mabetbet a manutukoy ed positibon panangipatnag na kaabigan parad saramay mankaukolan. Balet, no walay sakey a nankasalanan, panon ya ipatnag so panangasi? Kasin lalanoren na satan so agpanusa ed nankasalanan, a saya et ipapasen na arum a negatibo?

Panangasi Parad Saray Nankasalanan

8, 9. Anto so lalanoren na impangagamil na Dios na panangasi ed si David kayari impankasalanan da nen Bat-seba?

⁸ Imanoen pa so agawa kayarin kinompronta nen propetan Natan so ari na Israel a si David nipaakar ed impikalugoran to ed si Bat-seba. Oniay impikasi na magbabawin si David: “Kasian mo ak komon, O Dios, ya unong na maaro ya abig na linawam, unong na kinaraklan na matamoy a panangasim, bural mo so saray impakasumpak. Urasan mo ak a maong ed kasulitan ko, tan linisan mo ak ed kasalanan ko. Ta amtak so saray impakasumpak; tan say kasalanan ko wala a naynay ed arapan ko. Onsumpa ed sika, dia ed sika labat, so nankasalananan ko,  tan ginawak so saya a mauges ed nanengneng mo.”​—Salmo 51:1-4.

⁹ Nanermen a maong si David, kanian pinerdona nen Jehova so kasalanan to tan pinokpokan to so pangukom ed sikara nen Bat-seba. Unong ed Mosaikon Ganggan et nepeg a napapatey komon si David tan si Bat-seba. (Deuteronomio 22:22) Sikaray alegyas ed ipapatey, balet ta agda apaliisan so amin a nansumpalan na kasalanan da. (2 Samuel 12:13) Say impangagamil na Dios na panangasi et lalanoren toy pamerdona ed lingo. Balet, agkabaliksan na satan ya agto la idapo ed sikara so manepeg a dusa.

10. Anggaman mapangasi si Jehova sano manguukom, akin ya agtayo nepeg a lalamlamen so panangasi to?

¹⁰ Unong a ‘say kasalanan et linmoob ed mundo lapu ed sakey a too,’ si Adan, tan ‘say bayar na kasalanan et patey,’ amin a totoo et manepeg komon ya ompatey. (Roma 5:12; 6:23) Agaylan misalamat itayo lapud mapangasi si Jehova sano uukomen to itayo! Balet, nepeg tayon alwaran ya agtayo lalamlamen so panangasi na Dios. Ibabaga na Deuteronomio 32:4 a “kaptekan so saray amin a dalan [nen Jehova].” Sano mangipapatnag na panangasi so Dios, agto ibabaliwala iray naspot ya estandarte to nipaakar ed hustisya.

11. Panon ya impatnag na Dios so makatunongan a panamabli to ed inkahustisya sanen nankasalanan si David tan si Bat-seba?

¹¹ Diad kaso nen David tan si Bat-seba, sakbay a napalemew so dusan ipapatey, kaukolan nin naperdona so kasalanan da. Saray ukom ya Israelita so andian na kanepegan a manggawa ed satan. No bilang ta sikara so naabuloyan a mamemben ed satan a kaso, anggapo lay arum a desisyon da noag say sentensian patey. Ontan so kakaukolanen na Ganggan. Balet, lapu ed impisipanan nen Jehova ed si David, sineguro To ni no kasin walay basiyan na pamerdona ed kasalanan nen David. (2 Samuel 7:12-16) Kanian, si Jehova a Dios, “say Ukom na amin a dalin,” tan “manangusisa na puso,” so mismon amemben ed kaso. (Genesis 18:25; 1 Awaran 29:17, NW) Say Dios so makayarin manebek ed peteg a walad puso nen David, mangusisa ed inkapuro na pagbabawi to, tan mangipagamor na panangasi.

12. Panon a nagunggonaan iray totoon makasalanan ed panangasi na Dios?

¹² Say panangasi ed sikatayo nen Jehova diad impanggawa to na paraan pian nibulos itayo ed dusa na atawir a kasalanan et mitunosan ed hustisya to. Pian naperdona so kasalanan tayo ya agnasumlang so estandarte nipaakar ed hustisya, intarya nen Jehova so dondon bagat na Anak to, si Jesu-Kristo, a satan so sankatalonggaringan lan panangipatnag na panangasi. (Mateo 20:28; Roma 6:22, 23) Pian nagunggonaan itayo ed panangasi na Dios, a saya so makapangiliktar ed sikatayo ed pakadusa lapud atawir a  kasalanan, nepeg itayon mangagamil na ‘pananisia ed Anak to.’​—Juan 3:16, 36.

Say Dios a Mapangasi tan Walaan na Inkahustisya

13, 14. Kasin palemewen na panangasi na Dios so inkahustisya to? Ipaliwawa.

¹³ Anggaman agsusumlangen na panangasi nen Jehova so estandarte to nipaakar ed hustisya, kasin anggan panon et naapektoan na satan so hustisya to? Kasin napakepa so ambelat ya epekto na hustisya na Dios diad pangipatnag to na panangasi? Andi.

¹⁴ Diad panamegley nen propetan Oseas, oniay imbaga nen Jehova ed saray Israelita: “Yasawa taka naani ed siak lawas; on, yasawa taka naani ed siak dia ed inkatunong, tan dia ed kaptekan, tan dia ed maaro ya abig na linawa, tan dia ed saray panangasi.” (Oseas 2:19) Ipapabitar na sarayan salita a say pangaagamil nen Jehova na panangasi et lawas mitunosan ed arum niran kalidad to, a singa say inkahustisya. Si Jehova et “Dios a mapangasi tan mapaaro, . . . mamerdona na inkauges, tan impakasumpa, tan kasalanan; tan anggan anton pamaakaran agto ibilang a malinis so nankasalanan.” (Exodo 34:6, 7) Si Jehova et Dios a mapangasi tan walaan na inkahustisya. Oniay ibabaga na Biblia nipaakar ed sikato: “Say Dampay, ayadyari so gawa to; ta kaptekan so saray amin a dalan to.” (Deuteronomio 32:4) Naspot so inkahustisya na Dios, a singa met ed panangasi to. Anggapo ed sarayan kalidad so mas matalonggaring nen say sananey, nisay nakaukolan na sakey so sananey pian onlemew so epekto na sakey. Imbes, saraya so namparan aagamilen na Dios a naspot a mantunosan ed sakey tan sakey.

15, 16. (a) Anto so mangipanengneng ya aliwan maruksa so inkahustisya na Dios? (b) Sano ipaakseb la nen Jehova so panangukom to ed sayan marelmeng a sistema na bengabengatla, anto so naseguro na saray mandadayew ed sikato?

¹⁵ Aliwan maruksa so inkahustisya na Dios. Say inkahustisya et naynay lawarin walay dusa bektaman a walay asumlang, tan naynay a kakaukolanen ed panangukom so manepeg a panusa ed saray nankasalanan. Balet say pangaagamil na Dios ed inkahustisya et nayarin manresulta met ed kiliktar na saramay makanepegan. Alimbawa, sanen aderal iray marelmeng a syudad na Sodoma tan Gomorra, say patriarkan si Lot tan say duaran mamarikit to so aliktar.​—Genesis 19:12-26.

¹⁶ Makaseguro itayo a sano ipaakseb la nen Jehova so panangukom to ed sayan peles a marelmeng a sistema na bengabengatla, say “baleg ya ulop” na saray tuan managdayew, ya ‘anguras na kawekawes da tan pinaputi ra ed dala na Kordero,’ so makaliktar. Kanian, sikara so manlapu ed “baleg ya irap.”​—Apocalipsis 7:9-14.

Akin a Magmaliw Itayon Mapangasi?

17. Anto so manunan rason no akin a magmaliw itayon mapangasi?

¹⁷ Talagan makaaral itayo ed ehemplo nen Jehova tan si Jesu-Kristo nipaakar ed tuan kabaliksan na panangasi. Oniay ibabaga ed sikatayo na Uliran 19:17 bilang manunan rason no akin a magmaliw itayon mapangasi: “Say walaan na panangasi ed duka pautangen to si Jehova, et say maong a gawa to ipawil to ed sikato a bayaran.” Napapaliket si Jehova sano aaligen tayo so inkamapangasi to tan say Anak to diad pidedeneng  tayo ed balang sakey. (1 Corinto 11:1) Tan mamaseseg itan ed arum pian magmaliw met iran mapangasi, lapud say toon mapangasi et makagamor na panangasi.​—Lucas 6:38.

18. Akin a nepeg tayon panggunaetan so magmaliw a mapangasi?

¹⁸ Say panangasi et impantetekep na dakel iran maabig a kalidad. Lalanoren na satan so panangaro, kaabigan, tan kamaongan. Say matamoy a panangabagey odino simpatiya so mamakiwas ed sikatayo pian ipatnag so panangasi diad gawa. Anggaman agpapalemewen na panangasi nen Jehova so hustisya to, sikato so matantan ya onsanok tan maanos ton iikdan na magenap a panaon iray managgaway-mauges a makapambabawi. (2 Pedro 3:9, 10) Kanian lalanoren na inkamapangasi so pagmaliw a maanos tan manangitepel. Lapud say panangasi et impantetekep na dakel a maabig iran kalidad, laktip lay nanduruman aspekto na bunga na espiritu na Dios, satan so magmamaliw a sengegan pian nabayuboan irayan kalidad. (Galacia 5:22, 23) Agaylan importante a panggunaetan tayoy magmaliw a mapangasi!

“Mapalar Iray Mapangasi”

19, 20. Panon a say panangasi so malikeliket a manalona ed panangukom?

¹⁹ Ibabaga ed sikatayo nen babangatan a Santiago so rason no akin a nepeg tayon gawaen a sakey a manunan kalidad ed bilay tayo so panangasi. Insulat to: “Say panangasi so malikeliket a manalona ed panangukom.” (Santiago 2:13b, NW) Tutukoyen nen Santiago so panangasi ya ipapatnag na sakey a mandadayew ed si Jehova parad arum. Satan so malikeliket a manalona ed panangukom diad pantalos a no nasabi lay panaon a say sakey a too so ‘mangiusa-usa la na nipaakar ed inkasikaton dili ed arap na Dios,’ si Jehova so mangikonsidera ed inkamapangasi to tan sikatoy perdonaen To unong ed dondon bagat na Anak To. (Roma 14:12) Andi-duaruwa a say sakey a rason no akin a kinasian na Dios si David ed impankasalanan da nen Bat-seba et lapud sikaton mismo so mapangasin too. (1 Samuel 24:4-7) Diad biek a dapag, “say sakey ya agmangagamil na panangasi so naukom ya andi-panangasi.” (Santiago 2:13a, NW) Agpankelawan a say “andi-panangasi” et nibilang ed saramay ipapasen na Dios a ‘makanepegan ya ompatey’!​—Roma 1:31, 32.

²⁰ Diad Sermon nen Jesus ed Palandey, oniay inkuan to: “Mapalar iray mapangasi: ta makagamor iray panangasi.” (Mateo 5:7) Agaylan idadanet na sarayan salita a saramay malabay a makagamor na panangasi na Dios et nepeg iran magmaliw a mapangasi a mismo! Singbaten diad onsublay ya artikulo no panon tayon naagamil so panangasi diad inagew-agew a bilay tayo.

Anto so Naaralan Yo?

• Anto so panangasi?

• Diad antoran paraan a nipatnag so panangasi?

• Diad anton paraan a si Jehova et Dios a mapangasi tan walaan na inkahustisya?

• Akin a nepeg a magmaliw itayon mapangasi?

[Tepetepet Parad Panagaral]

[Litrato ed pahina 21]

Say matamoy a liknaan nen Jehova ed saramay mankaukolan et singa say panangaro na ina ed anak to

[Litrato ed pahina 23]

Anto so naaralan tayo ed saray milagro nen Jesus nipaakar ed panangasi?

[Litrato ed pahina 24]

Kasin sinumlang nen Jehova so hustisya to diad impanginatnat toy panangasi ed si David?

[Litrato ed pahina 25]

Say pangipapatnag na Dios na panangasi ed saray totoon makasalanan et mitunosan ed inkahustisya to