Manbilay Unong ed Gagala na Dios Natan
Manbilay Unong ed Gagala na Dios Natan
‘Inatey parad amin a katooan si Kristo, pian saray mabilay et agla ra manbilay parad sikaran dili.’—2 CORINTO 5:15, Maung a Balita.
1. Isalaysay pa so eksperiensya na sakey a misionaryo diad teritorya to.
“SANEN anampot so guerra sibil, say luganan mi a parad sibilyan so sankaunaan a linmoob ed nisulinek a baryo na Aprika,” so anonotan na sakey a misionaryon manngaray Aaron. * “Anggapo so komunikasyon mi ed melag a kongregasyon diman, tan walaray pankaukolan na agagi diman a kapilitan min asikasoen. Niarum ni ed tagano, kawesen, tan literatura na Biblia, angawit kami met na video a Jehovah’s Witnesses—The Organization Behind the Name. * Satan so kinaukolan min ipalabas a mamidua lapud dakel ya interesado so dinmagsa ed ‘sinean’ na baryo—sakey a baleg ya alolong a walaan na telebisyon tan VCR. Bilang resulta et dakel so impaiyaralan na Biblia kayari na impanbantay da. Mapatnag a makanakana so amin a sagpot mi.”
2. (a) Akin a determinado iray Kristiano a mangusar ed bilay da diad panaglingkor ed Dios? (b) Antoran tepet so konsideraen tayo natan?
2 Akin a nanggunaetan nen Aaron tan saray kaiba to so mibiang ed satan a mair-irap a misyon? Lapud apresasyon da ed dondon bagat nen Jesu-Kristo, indedika ra so bilay da ed Dios tan labay dan usaren itan diad pambilay unong ed gagala na Dios. Singa sikara, determinado so amin a dedikadon Kristiano ya ‘agla manbilay parad sikaran dili’ tan labay dan gawaen so anggaay nayarian da “nisengeg ed ebanghelyo.” (2 Corinto 5:15, Maung a Balita; 1 Corinto 9:23) Amta ra a sano mangangga la iyan sistema na bengabengatla et anggapo lanlamang so kakanaan na amin a kuarta tan posisyon da ed sayan mundo. Kanian labay dan usaren so bilay tan amin a biskeg da unong ed gagala na Dios. (Eclesiastes 12:1) Panon tayon nagawaan iya? Panon itayon nawalaan na nakaukolan a pakpel tan biskeg ta pian nagawaan tayo itan? Tan antoran aspekto na sagradon panaglingkor so akalukas ed sikatayo?
Gawaen so Progresibo tan Praktikal Iran Kundang
3. Antoran manunan kundang so nalalanor ed panggawa na linawa na Dios?
3 Parad saray tuan Kristiano, say panggawa ed linawa na Dios et legay-bilay. Kaslakan et onggapo itan ed manuna iran kundang a singa say inagew-agew a panagbasa na Biblia, pampalista ed Teokratikon Eskuelaan Parad Ministeryo, pibiang ed panagpulong, ya anggad pampabautismo. Legan ya onaaligwas, nodnonoten tayo iray salita nen apostol Pablo: “Gawam tan isaklang mo’d saraya so bilay mo, pian nanengneng na amin so iyaaligwas mo’d pananisia.” (1 Timoteo 4:15, Maung a Balita) Say ontan ya iyaaligwas et aliwan panangitandoro ed dili noagta panangipatnag na determinasyon tayon manggaway linawa na Dios ed mabulos a paraan. No ontan so gagawaen tayo, aabuloyan tayo so Dios a mangigiya ed saray kundang tayo diad amin ya aspekto na bilay, ta magmaong itan a panangigiya to nen say antokaman a gawaen tayo.—Salmo 32:8.
4. Panon tayon ekalen ed nonot tayo iray agmet la nepeg a pampagaan?
4 Balet, naamper so iyaligwas tayo ed panaglingkor ed Dios no masuyat itayo odino pinonot tayo so dili tayo. (Eclesiastes 11:4) Antis tayo sirin a nalikna so tuan liket diad panaglingkor ed Dios tan ed arum, nakaukolan a talonaan tayo nin unona iray pampapagaan tayo. Alimbawa, si Erik et mannononot a manlingkor ed sakey a kongregasyon a mansasalita na sananey a lenguahe. Balet onia so papagaan to: ‘Makapiulop ak kasin maong ed saray agagi diman? Kasin marakep iran nakaiba? Labay da ak met kasi?’ Insan oniay inkuan to: “Amoriak a siansia a say mas kaukolan kon nonoten et aliwan say dilik noagta saray agagi. Inekal ko’d nonot ko iray negatibon bengatla tan say angiyapasakeyan ko et say nagawaan ko parad arum. Nampikasi ak pian onkerew na tulong tan intuloy koy planok. Natan et panliliketan kon maong so serbisyok diman.” (Roma 4:20) On, no mabulbulos itayon manlingkor ed Dios tan ed arum, nalikna tayo so liket tan inkapnek.
5. Akin a nakaukolan so maalwar a panagplano ta pian makapambilay itayo unong ed gagala na Dios? Iyilustra.
5 Nakaukolan met so maalwar a panagplano ed saray gawaen tayo ta pian matalona itayon makapambilay unong ed gagala na Dios. Makabat so agpakawalaan na nantatabonan ya utang, a mangaripen la ed sikatayo ed sayan sistema tan manlimita la ed panagserbi tayo ed Dios. Oniay panonot na Biblia ed sikatayo: ‘Say akautang et aripen na amautang.’ (Uliran 22:7) Mansiansian asimbang so panmoria tayo ed saray bengatla no manmatalek itayo ed si Jehova tan iyuna tayo so panaglingkor ed sikato. Alimbawa, si Guoming tan say duaran agagi ton bibii so kaiba na ina ra a manaayam ed sakey a lugar a mabli so pakawalaan odino pan-abang na abung tan mairap so pananap na permanentin trabaho. Lapud magimper ira ed panaggastos da tan mannanagnag ira ed saray babayaran da, akapambilay ira anggan ag-ira mantratrabahon amin. “No maminsan et agkami makapansueldo ya amin,” so kuan nen Guoming. “Balet, akapantultuloy kami ed panagpayunir mi tan naasikaso mi met a maong so ina mi. Misalsalamat kami ta agkami pinatunda nen Nanay ed pampapayunir mi ta pian nitarya labat ed sikato so mainawan panagbilay.”—2 Corinto 12:14; Hebreos 13:5.
6. Anton alimbawa so mangipatnag ed no panon tayon nitunos so bilay tayo ed gagala na Dios?
6 No akasentro natan so panagbilay yo ed pinansyal odino arum niran sekular a gegemtan, nakaukolan so baleg a pananguman ta pian niyuna yo so gagala na Dios. Saratan a pananguman et agtampol nagawaan, insan no alingo kayo ed primeron impanali yo et agnepeg ya ipasen ya agkayo lan balot ontalona. Nodnonoten pa so eksperiensya nen Koichi, ya alablabas so impangusar toy panaon to diad panagligliwaan. Nen sikatoy tinedyer ni et sikatoy nanaral na Biblia, balet ta diad loob na dakel a taon et sikato so nigalet ed video games. Sakey ya agew et oniay ninonot to: ‘Anto’yay gagawaen ko? Masulok ko lan 30 años, tan anggapo nin balot so agawak a makabaliksan ed bilay ko!’ Kanian intuloy nen Koichi so impanaral to na Biblia tan sikatoy impatulongan ed kongregasyon. Agton balot sinmuko anggaman agton tampol atalonaan so problema to. Balet lapud naynay a pampipikasi to tan ed maaron panamaseseg na arum, atalonaan ton siansia so problema to. (Lucas 11:9) Natan, sikato la so maliket a manlilingkor bilang ministeryal a lingkor.
Aralen so Pagmaliw a Balanse
7. Akin a nakaukolan so pagmaliw a balanse ed panggagawa tayoy linawa na Dios?
7 Nakaukolan so interon-kamarerwan panagsagpot ta pian makapambilay itayo unong ed gagala na Dios. Nepeg ya agtayon balot magmaliw a masuyat odino mangiras ed panggawa ed satan. (Hebreos 6:11, 12) Anggaman ontan, aglabay nen Jehova a nabanalan itayo ed pisikal, mental, odino emosyonal a paraan. Nigloria tayo so Dios tan nipatnag tayo so inkabalanse no mapaabeba tayon bidbiren ya agtayo nagawaan so linawa na Dios diad dilin biskeg tayo. (1 Pedro 4:11) Insipan nen Jehova ya ikdan to itayo na nakaukolan a biskeg ta pian nagawaan tayo so linawa to, balet agtayo nepeg ya ipipilit so agtayo nayarian, a pambanikelan iray bengatlan agto met iilaloan a nagawaan tayo. (2 Corinto 4:7) Nakaukolan ya usaren tayon makabat so biskeg tayo ta pian ag-itayo nabanalan tan makapantultuloy itayon manlingkor ed Dios.
8. Anto so agawa ed sakey a kalangweran a Kristiano a manasalin manggawa na sankaabigan to parad si Jehova tan ed trabaho to, tan anton pananguman so ginawa to?
8 Singa bilang, si Ji Hye, a taga-Bukig Asia, so duay taon lan walaay makapadesdes a trabaho legan a manpapayunir. Oniay inkuanto: “Sinalik ya iter so sankaabigan ko parad si Jehova tan ed trabahok, balet limaran oras labat so ugip ko ed kada labi. Diad saginonor et naksawan lay nonot ko parad katuaan, tan agko la napanliliketan iray espiritual a bengatla.” Ta pian sikatoy makapanlingkor ed si Jehova diad ‘amin a puso to, amin a kamarerwa to, amin a nonot, tan ed amin a biskeg to,’ si Ji Hye so nananap na simplin trabaho. (Marcos 12:30) “Anggaman siak so dedesdesen na pamilyak pian mananap na dakel a kuarta, nanggunaetan kon iyuna so gagala na Dios,” so inkuan to. “Siansian makakalmo ak ni na magenap parad manuna iran pankaukolan ko, a singa say marakep a kawes. Tan maksil ak lapud susto lay ugip ko! Malikeliket ak ed ministeryok, tan mas mabiskeg ak natan ed espiritual. Say makasengeg et anggapoy panaon ko parad saray makapasagyat ya opresi tan panangisuawi na mundo.”—Eclesiastes 4:6; Mateo 6:24, 28-30.
9. Panon a naapektoan iray totoo ed teritorya tayo diad saray pansasagpot tayo?
9 Aliwan amin a lingkor na Dios et makapanlingkor bilang sigpot-panaon ya ebanghelisador. No say manlilimita ed sikayo et say itatatken, makapuy a bunigas, odino arum nira, tandaan yo a papablien a maong nen Jehova so panmamatoor yo tan say sigpot-puson panlilingkor yo ed sikato. (Lucas 21:2, 3) Agtayo sirin nepeg a melmelagen so epekto na saray sagpot tayo ed arum a totoo, limitado man iratan. Alimbawa, ipasen pa a binisita tayo so pigaran abung tan anggapo so dinmengel ed mensahe tayo. Kataynan tayo, nayarin pantotongtongan lanlamang na saray unabung so inyakar tayo ed sikara, anggano agda inlukas so puerta ra ed sikatayo! Agtayo iilaloan a positibo so ikiwas na amin ya ondengel ed maong a balita, balet say arum et peteg a mangawat ed satan. (Mateo 13:19-23) Arum so nayarin onkiwas ed saginonor sano manguman iray kipapasen na mundo odino say bilay dan mismo. Antokaman so kipapasen, gagawaen tayo so panlabayan na Dios sano pampepelengan tayo so mibiang ed panagpulong a kimey. On, ta sikatayo et “kakimeyan na Dios.”—1 Corinto 3:9.
10. Antoran pankanawnawa so lukas parad amin ya agagi ed kongregasyon?
10 Niarum ni, amin tayo so makatulong ed saray kapamilyaan tayo tan ed saray agagi tayo ed kongregasyon. (Galacia 6:10) Say maong ya impluensya tayo ed arum so walaan na aralem tan magnayon ya epekto. (Eclesiastes 11:1, 6) Sano maseet a gawaen na saray mamatatken tan ministeryal a lingkor iray obligasyon da, natulongan da so kongregasyon a magmaliw a mabunigas tan mabiskeg ed espiritual, tan onaligwas ni so Makristianon kimey da. Napaseguroan tayo a sano walaan itayo na ‘daakan a kimey ed Katawan,’ say sagpot tayo et ‘aliwan anggapoy-kabaliksan.’—1 Corinto 15:58.
Gawaen a Karera so Pambilay Unong ed Gagala na Dios
11. Nilikud ed pikikimey tayo ed dilin kongregasyon tayo, antoran pankanawnawa so nayarin niwala ed sikatayo?
11 Bilang Kristiano, panliliketan tayo so bilay tan labay tayon igloria so Dios diad amin a gagawaen tayo. (1 Corinto 10:31) Sano matoor itayon mibibiang ed panangipulong ed maong a balita na Panarian tan ed panagbangat ed arum a mangunor ed amin a bengatlan ingganggan nen Jesus, nagamoran tayo so dakel a makapatumang ya aspekto na serbisyo ya akalukas ed sikatayo. (Mateo 24:14; 28:19, 20) Nilikud ed pikikimey yo ed dilin kongregasyon yo, nayarin walaray pankanawnawa tayon makapanlingkor ed lugar a walay babaleg a pankaukolan, balanglan diad sananey a teritorya, lenguahe, odino bansa. Saray kualipikadon mamatatken tan ministeryal a lingkor a balolaki ni so nayarin naimbitaan a manaral diad Ministerial Training School, tan kayari na satan et manlingkor ira ed saray kongregasyon a mankakkaukolan na tulong na saray matatken a Kristiano, balanglan diad bansa ra odino diad arum a nasyon. Saray sanasawan walad sigpot-panaon a ministeryo so nayarin onkualipikan manaral ed Gilead parad saray manmisionaryo insan manlingkor ira ed arum a bansa. Tan natan et nakaukolan nin siansia iray boluntaryon mankimey diad nanduruman departamento na Bethel tan ed panagpaalagey tan panagmintina na saray pantitiponan tan saray sangan opisina.
12, 13. (a) Panon kan makapandesidi no dinan ya aspekto na serbisyo so dampoten mo? (b) Iyilustra no panon a say eksperiensyan agamoran ed sakey ya asainmin et mausausar met ed arum ya asainmin.
12 Dinan ya aspekto na serbisyo so nepeg mon gegemtanen? Bilang dedikadon lingkor nen Jehova, lawas manilalo ed panangiwanwan to tan say organisasyon to. Say “maong ya espiritu” to so ontulong ed sikayon manggawa na dugan desisyon. (Nehemias 9:20) Say sakey ya asainmin so mabetbet a mangitonton ed sananey nin pribilehyo, tan say eksperiensya tan dunong a nagamoran tayo ed sakey ya aspekto na serbisyo so nayarin nausar ed sananey nin asainmin.
13 Singa bilang, si Dennis tan say asawa ton si Jenny so naynay ya ontutulong ed panagpaalagey na Kingdom Hall. Kayari na bagyon Katrina ya angapekta ed mamaabalaten ya Estados Unidos, sikara so namboluntaryon ontulong ed saray mankaukolan. Oniay inkuan nen Dennis: “Malikeliket kami lapud nausar mi iray naaralan min dunong ed panagpaalagey na saray Kingdom Hall ta pian natulongan iray agagi. Talagan makapaligsay-puso so panangapresya na saramay atulongan mi. Limitado labat so agawaan na maslak ed saray grupon ontutulong met ed panagpaalagey, balet saray Tasi nen Jehova so akaapiger odino akapangipaalagey-lamet na masulok a 5,300 ya abung tan dakel iran Kingdom Hall. Naimatonan iya na totoo tan sikara so nagmaliw ya interesadon maong ed mensahe tayo.”
14. Anto so nagawaan yo no pilalek yo so onloob ed sigpot-panaon a ministeryo?
14 Sarag yo kasi so manbilay unong ed gagala na Dios diad iloob ed sigpot-panaon a ministeryo? No ontan, maseguro kayo a nagamoran yo so dakel iran bendisyon. No ag-iyabuloy na kaplesan iran kipapasen yo, nayarin walaray pananguman a nepeg yon gawaen. Manpikasi kayo a singa ginawa nen Nehemias sanen pinirawat toy makaawat na sakey ya importantin asainmin: “O Katawan, pikasik ed sika, . . . paaligwasen mo komon . . so aripen mo.” (Nehemias 1:11) Insan diad panmatalek ed ‘Dumerengel na pikakasi,’ panseetan yon gawaen so impikasi yo. (Salmo 65:2) Nepeg yo nin gawaen iratan ta pian bendisyonan nen Jehova iray sagpot yon manlingkor a nagkalalo ed sikato. No akapandesidi kayo lan onloob ed sigpot-panaon a ministeryo, sumpal yo itan a desisyon yo. Diad ilabas na panaon, ombulaslas so eksperiensya yo, tan lalon manliket kayo.
Say Bilay a Peteg a Makanakana
15. (a) Panon itayon nagunggonaan diad pitongtong ed saray ababayag lan lingkor na Dios tan ed pambasa ed istorya na impanbilay da? (b) Mangiter na sakey ya istorya na bilay a makapabiskeg a maong ed sikayo.
15 Anto so nailaloan yon resulta sano manbilay kayo unong ed gagala na Dios? Katongtongen iray ababayag lan manlilingkor ed si Jehova, nagkalalo la ed saramay pigapigay taon da lan walad sigpot-panaon a ministeryo. Agaylan makapatumang tan makabkabaliksan so panagbilay da! (Uliran 10:22) Dakel ya eksperiensya so iyistorya ra ed sikayo, a singa say lawas impanulong nen Jehova ed sikara a makagamor ed saray pankakkaukolan da anggano diad mair-irap iran kipapasen. (Filipos 4:11-13) Manlapud 1955 anggad 1961, nipalapag ed The Watchtower so serye na saray artikulo nipaakar ed impanbilay na saray matoor diad silong na paulon, “Pursuing My Purpose in Life.” Manlapu la’d saman, nipalapag so nilasus niran istorya na bilay na saratan ya agagi. Kada salaysay so mangipabitar ed seseg tan liket a mangipapanonot ed sikatayo ed salaysay na libro na Gawa. No basaen yo iratan a makapaliket a salaysay, napakiwas kayon mangibalikas na, ‘Onian klase na panagbilay so labay ko!’
16. Panon a magmaliw a makabaliksan tan makapaliket so bilay na sakey a Kristiano?
16 Onia so imbaga nen Aaron, ya asalambit ed gapo: “Diad Aprika, mabetbet kon nakatongtong iray kalangweran a manaalis-alis ed nanduruman lugar na bansa pian anapen da so gagala na bilay. Maslak ed sikara et anggapoy aromog da. Balet sikami et manbibilay unong ed gagala na Dios diad pangiyaalibansa ed maong a balita na Panarian, tan manggagayaga ed makapaangat, ingen ta makabkabaliksan a bilay. Naeksperiensya min mismo a wala so nagkalalon liket ed pangiter nen say pangawat.”—Gawa 20:35.
17. Akin a nepeg itayon manbilay unong ed gagala na Dios natan?
17 Komusta kayo met? Anton gagala so gegegemtanen yo? No anggapo so malinew a kalat yo ed espiritual, say panaon tan biskeg yo so mainomay a samsamen na arum iran sekular a gegemtan. Akin a pirdien yo so mablin bilay yo ed saray maapan bengatla ya iyoopresi na sayan mundo nen Satanas? Maganggano la, sano onggapo lay ‘baleg a kairapan,’ anggapo lay kakanaan na materyal a kaykayamanan tan minumundon posisyon. Say sankaimportantian natan et say relasyon tayo ed si Jehova. Agaylay liket tayo lapud manlilingkor itayo ed Dios tan ed arum tan sigpot tayon gegegemtanen ed bilay tayo so gagala na Dios natan!—Mateo 24:21; Apocalipsis 7:14, 15.
[Saray paimano ed leksab]
^ par. 1 Sinalatan so arum a kangaranan.
^ par. 1 Impalapag na saray Tasi nen Jehova.
Kasin Nipaliwawa Yo?
• Anto so liknaan nen Jehova ed panlilingkor tayo ed sikato?
• Panon itayon natulongan na pagmaliw a praktikal tan balanse ta pian makapanlingkor tayo ed Dios tan ed arum nira?
• Antoran aspekto na serbisyo so lukas ed sikatayo?
• Panon a magmaliw a makabkabaliksan so bilay tayo natan?
[Tepetepet Parad Panagaral]
[Saray litrato ed pahina 23]
Nepeg a balanse itayo ta pian sigpot-kamarerwa itayon makapanlingkor ed si Jehova
[Saray litrato ed pahina 24]
Dakel so paraan pian makapanlingkor ed Dios