Saray Desisyon a Mangitonton ed Liket

“A LIWAN onman komon so ginawak!” Aminpigam lan imbaga itan ed inkasika? Labay tayon amin so mandesisyon na bengatlan agtayo pagbabawian, nagkalautla no makaapekto iratan ed kurang na bilay tayo. Balet, panon tayon manggawa na saray desisyon a mangitonton ed liket?

Unona ed amin, nepeg a nawalaan itayo na saray estandarte a tuan napanmatalkan. Wala kasi ontan iran estandarte? Aliwan ontan so nononoten na dakel a totoo. Unong ed sakey a surbi diad Estados Unidos, 75 porsiento na saray estudyanten magano lan mangraduar ed kolehyo et manisia ya anggapo so estandarte parad duga tan aliwa, tan say pakatalos ed maong tan mauges et akadepende ed “estandarte na sakey tan say pandurumaan na kultura.”

Talaga kasin makatunongan so panisip a saray estandarte ed moral et basta labat personal odino popular ya opinyon? Andi, aliwan ontan. No gawaen na totoo so panlabayan da labat, manresulta itan ed gulo. Siopa so malabay a manayam ed pasen ya anggapo iray ganggan, korte, odino pulis? Sakey ni, say personal ya opinyon et agnaynay a napanmatalkan. Ompan denesidi tayon gawaen so sakey a bengatlan inisip tayon duga balet naamtaan tayo’d saginonor a nalilingo itayo manaya. On, apaneknekan diad interon awaran na too a tua so onian prinsipyo na Biblia: “Aliwa a wala ed too a manakar a mangitonton ed saray kurang to.” (Jeremias 10:23) Iner, sirin, so napangalaan tayo na giya no mandesisyon itayo nipaakar ed importante iran isyu ed bilay?

Say balolakin manuley ya abitla’d inmunan artikulo so makabat ya inmasingger ed si Jesus. Unong ed abasa tayo, inebatan nen Jesus so tepet na balolaki diad impanukoy to ed Ganggan na  Dios. Binidbir nen Jesus a si Jehova a Dios so sankatageyan a Lapuan na kakabatan tan karunongan, tan amta To so sankaabigan parad saray pinalsa To. Kanian, imbaga nen Jesus: “Say bangat ko agko kien, balet kien na angibaki ed siak.” (Juan 7:16) Petepeteg, say Salita na Dios et lapuan na napanmatalkan a panangiwanwan ya ontulong ed sikatayon manggawa na makabat a desisyon ed bilay. Konsideraen tayo pa so pigaran prinsipyo a naromog ed Salita na Dios a sano iyaplika itan et mangarum na liket tayo.

Say Binmalitok a Ganggan

Diad bantog a Sermon ed Palandey, imbangat nen Jesus so manunan prinsipyo a makatulong ed sikatayon manggawa na makabat a desisyon nipaakar ed relasyon tayo’d arum. Oniay inkuanto: “Amin a bengatla sirin a labay yo a gawaen na totoo ed sikayo, ontan so gawaen yo met ed sikara.” (Mateo 7:12) Sayan prinsipyo ed kondukta so kaslakan a tatawagen bilang Binmalitok a Ganggan.

Saray arum so manguusar na mipadparan balikas ed negatibon paraan: “Agyo gagawaen ed arum so bengatlan agyo labay a gawaen da ed sikayo.” Pian ipanengneng so pandumaan na sayan negatibon paraan tan say Binmalitok a Ganggan, konsideraen pa so parabolo nen Jesus nipaakar ed maong a Samaritano. Sakey a Judio so kinabil tan tinaynan a patey-pateyan la ed dalan. Sikatoy anengneng na saserdote tan Levita balet ta sikatoy nilabsanan da labat. Lapud anggapo met so ginawa ran mauges ed sikato, nayarin nibagan kinmiwas ira unong ed negatibon paraan na Binmalitok a Ganggan. Diad pidumaan, tinmunda so ondadalan a Samaritano pian ontulong. Binedber to iray sugat na laki tan inawit to ed sakey ya ayaman. Ginawa to ed laki no anto so labay to met a gawaen da ed sikato. Inyaplika toy Binmalitok a Ganggan tan duga so desisyon to.​—Lucas 10:30-37.

Dakel iray paraan pian niyaplika tayo iyan totontonen ed kondukta tekep na maliket iran resulta. Ipasen pan wala so balon pamilya a manayam ed lugar yo. Akin ta no unona ka lan mangibano tan mangabrasa ed sikara? Nayarin tulongan mo ira pian nakabisado ra so lugar yo, tan naasistian mo ira ed saray pankaukolan da tan ed saray labay dan itepet. No unona ka lan mangipanengneng na konsiderasyon ed saray balon kakaabay mo, magmaliw a maabig so relasyon mo ed sikara. Naliketan ka met ta antam a say ginawam et makapaliket ed Dios. Agta satan so makabat a desisyon?

Saray Desisyon a Nibase’d Aro ed Arum

Bilang kaaruman ed Binmalitok a Ganggan, angiter si Jesus na sananey nin panangiwanwan pian natulongan kan manggawa na makabat iran desisyon. Sanen tinepetan si Jesus no anto so sankatalonggaringan ed Mosaikon Ganggan, oniay inyebat to: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo. Sikato ya so baleg tan unonan ganggan. Tan say komadua a mipadpara ed sikato saya, Aroen mo so kaparam a too unong ed sikan dili. Dia ed sarayan duaran ganggan so pansaksabitan na amin a katunongan tan say salita na saray propetas.”​—Mateo 22:36-40.

Diad samay labi sakbay na ipatey nen Jesus, sikatoy angiter na “balon ganggan,” a manaaroan so sakey tan sakey. (Juan 13:34) Akin et tinukoy to itan bilang balon ganggan? Agta impaliwawa to la a say panangaro’d kaparan too et sakey ed saray duaran totontonen ya anegek ed Ganggan? Diad silong na Mosaikon Ganggan, oniay imbilin ed saray Israelita: “Nepeg mo ya aroen so kaparam a too unong ed sikan dili.” (Levitico 19:18) Balet, ingganggan natan nen Jesus iray babangatan to a nagkalalo ni nen say satan so gawaen da. Diad saman met a labi, imbaga nen Jesus ed saray babangatan to a magano to lan iter so bilay to parad sikara. Insan inkuanto ed sikara: “Saya so ganggan ko, a manaaroan so sakey tan sakey ed sikayo, salanti singa impangarok ed sikayo. Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:12, 13) Sirin, sayan ganggan et balo lapud kinaukolan na satan so pangiyuna ed pankaabigan na arum a too nen say dilin pankaabigan.

Dakel iray paraan pian nipanengneng tayo so agsinisiblet ya aro, aliwa labat lan say basta  pangaasikaso ed dilin pankaabigan tayo. Alimbawa, ipasen pan manaayam ka ed sakey ya apartment tan panliliketan moy ondedengel na manbanengbeng a musika balet ta makapasyodot itan ed kaabay mo. Mabulos mo kasin pakseten la so panliliket mon ondengel pian agnadisturbo so kaabay mo? Diad arum a panangibaga, kasin unaen mo so pankaabigan na kaabay mo nen say sika?

Konsideraen pa so sananey nin situasyon. Sakey a masiken so binisita na duaran Tasi nen Jehova ed panaoy yelo. Legan na pantotongtong da, asalambit na masiken ya agto nakaykay so yelo ed arap na abung to lapud kondisyon na puso to. Kayari na manga sakey oras, walay nadngel ton manpapala. Pinmawil manaya iray duaran Tasi pian kaykayan so dadalanan tan diad saray balitang a paarap ed puerta na abung to. Oniay insulat to’d sangan opisina na saray Tasi nen Jehova diad Canada: “Natan, naimatonan ko so tuan Kristianon panangaro. Akatulong iya ed siak tan anguman so negatibon panmoriak ed mundo natan. Lalon amabiskeg itan ed dati lan aralem a respetok ed sankamundoan iran pansasagpot yo.” On, say pangiter na tulong, anggaman singa melag labat, et walaan na positibon epekto ed arum. Agaylan liket so resulta na satan a masakripisyon desisyon!

Saray Desisyon a Nibase’d Aro ed Dios

Say sananey nin nepeg tayon konsideraen no manggawa itayo na saray desisyon et say tinukoy nen Jesus bilang sankatalonggaringan a ganggan, salanti, aroen tayo so Dios. Saray salita nen Jesus et parad saray Judio, a bilang nasyon et dedikado la ed si Jehova. Siansia ni, say sakey ya Israelita et nepeg a mandesisyon no panlingkoran to so Dios a sigpot kamarerwa tan sigpot puso a panangaro.​—Deuteronomio 30:15, 16.

Ontan met, ipapatnag na saray desisyon mo so liknaan mo ed Dios. Singa bilang, legan ya ondarakel so pikakabat mo’d praktikal a kablian na Biblia, nipapaarap ka met ed panagdesisyon. Mabulos ka kasin mangigapo na sistematikon panagaral na Biblia, tekep na gagalan magmaliw a patumbok nen Jesus? Say panggawa na ontan et seguradon mangitarok na liket ed sika, lapud inkuan nen Jesus: “Mapalar iray duruka ed espiritu; ta sikaray makankien na panaria’y tawen.”​—Mateo 5:3.

Agtayo amta no nagbabawian na balolakin manuley so desisyon to. Balet, amta tayo so alikna nen apostol Pedro diad impanumbok to’d si Jesu-Kristo ed dakel iran taon. Nen manga 64 C.E., sanen magano lan manampot so bilay nen Pedro, oniay impaseseg to ed saray kapananisian to: “Pampelengan yo ta pian naromog kayo’d kareenan, ya andi-matik tan karumsisan ed imaton [na Dios].” (2 Pedro 1:14; 3:14) Malinew ya agnagbabawian nen Pedro so desisyon to masulok a 30 taon lay apalabas, tan pinaseseg to iray arum a mansiansia ed desisyon da.

Say panumbok ed simbawa nen Pedro et mankabaliksan na pangawat ed saray responsabilidad bilang sakey ed saray babangatan nen Jesus tan pangunor ed saray ganggan na Dios. (Lucas 9:23; 1 Juan 5:3) Singa mairap iya, balet oniay panamaseguron insipan nen Jesus: “Dago kayo’d siak, amin yon nasasagpotan tan nabebelatan, et ikdan ta kayo’y pampainawa. Ala yoy pakok ed sikayo,  tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.”​—Mateo 11:28-30.

Konsideraen pa so eksperiensya nen Arthur. Sanen manedad na samplora, ginapoan toy manaral na biyolin, lapud labay toy magmaliw a propesyonal. Sanen manedad na 14, sikatoy bantog lan managtogtog na biyolin ed konsierto. Balet, sikatoy agmaliket. Lanang a mantetepet si tatay to nipaakar ed kabaliksan na bilay tan inimbitaan to ed abung da iray managbangat na relihyon, balet sikatoy agbalot apenek ed saray ebat da. Bilang sankapamilyaan, siningbat da no peteg kasin walay Dios tan no akin ya aabuloyan to so kaugsan. Insan apulongan na saray Tasi nen Jehova so tatay nen Arthur. Asagyat so interes na tatay to, a nanresulta’d panangiyaral na Biblia ed interon pamilya ra.

Asabi panaon, atalosan nen Arthur manlapud Kasulatan no akin ya aabuloyan na Dios so paniirap, tan alinewan to so gagala na bilay. Kaiba so taloran agagi to, nanggawa na desisyon si Arthur ya agto nagbabawian. Indedika toy bilay to ed si Jehova. Inkuanto: “Agaylay liket ko lapud siak so benendisyonan nen Jehova na pikakabat ed katuaan tan inyarawi to ak ed kompetensiaan a kaslakan lan nagagawa ed propesyonal iran musikero. Gawaen dan amin so antokaman pian ontalona ira.”

Panggagayagaan ni nen Arthur so pantogtog na biyolin pian ligliwaen iray kakaaro to, balet aliwa lan saya so manunaan ed bilay to. Imbes, akasentro lay bilay to ed panseserbi to ed Dios. Sikato so manlilingkor natan diad sakey ed saray sangan opisina na saray Tasi nen Jehova. Aliwan singa samay mayaman a balolakin manuley, noag singa si Arthur tan saray minilyon ni, nayarian mo met a manggawa na desisyon a makapangiter ed sika na pirmin liket, salanti, say pangawat mo ed imbitasyon nen Jesus a magmaliw a patumbok to.

[Litrato ed pahina 6]

Say desisyon mo et walaan na positibon epekto ed bilay na arum a totoo

[Litrato ed pahina 7]

Labay mo tay manaral na Biblia tan magmaliw a patumbok nen Jesus?