Say Makapuy a Desisyon na Mayaman a Manuley

SAY mayaman a balolakin manuley so maptek, matulok ed ganggan, tan relihyoso. Sikatoy inmasingger ed si Jesus, tinmalimukor, insan intepet to: “Maong a Managbangat, anto so gawaen ko, pian natawir ko so bilay ya andi-anggaan?”​—Marcos 10:17.

Bilang ebat, impabitar nen Jesus a pian nagamoran to so bilay, nepeg a sumpalen na balolaki iray ganggan na Dios. Sanen kinerew to so mas espisipikon ebat, inkuan nen Jesus: “Agka mamatey, Agka manlawan ed agmo asawa, Agka mantakew, Agka mansalita na tila a pantasi. Igalang mo so amam tan inam; tan, Aroen mo so kaparam a too unong ed sika lanlamang.” Manuna irayan kakaukolanen a lugan na Ganggan ya inter ed si Moises. Insan inkuan na balolaki: “Amin so saraya inuunor ko ra: dinan ni kakulangan ko?”​—Mateo 19:16-20.

Alikna nen Jesus ya “inaro to” so balolaki tan inkuanto: “Sakey a bengatla so kulang ed sika: onla ka, ilakom so anggan anton wala ed sika, et iter mo ed saray duruka, et wala naani kayamanan mo ed tawen: et gala, tumbok moak.”​—Marcos 10:18-21.

Say balolakin mayaman et biglan nidunget ed ambelat a desisyon. Anto so gawaen to? Kasin mabulos ton italirak iray materyal a kayamanan tan magmaliw a patumbok nen Jesus, odino mas pablien to iray kayamanan to? Kasin panggunaetan to iray kayamanan ed dalin, odino saray kayamanan ed tawen? Parad sikato, seguradon mairap itan a desisyonan. Malinew a sikatoy interesado ed relasyon to’d Dios, ta uunoren to so Ganggan tan nantepet no panon a nawalaay pabor na Dios. Antoy desisyon to? Sikatoy “tinmaynan a maer-ermen: ta sikatoy sakey a walaan na baleg a kayarian.”​—Marcos 10:22.

Agmakabat so desisyon na balolakin manuley. No sikatoy nagmaliw labat a matoor a patumbok nen Jesus, agamoran to komon so aanapen to, salanti, say bilay ya andi-anggaan. Ag-imbaga ed sikatayo no anto so agawa ed saman a balolaki. Anggaman ontan, amta  tayo a kalabas na manga apatiran dekada, dineral na saray Romanon sundalo so Jerusalem tan dakel a kabiangan na Juda. Naandi so kaykayarian tan bilay na dakel a Judio.

Diad pidumaan ed balolakin manuley, si apostol Pedro tan saray arum a babangatan so makabat a nandesisyon. ‘Tinaynan dan amin’ so bengatla tan tinmumbok ira ed si Jesus. Talagan agunggonaan ira ed ontan a desisyon! Imbaga nen Jesus a makaawat ira na mas dakerakel ni nen say tinaynan da. Niarum ni, tawiren da so bilay ya andi-anggaan. Say desisyon da et talagan agda nagbabawian diad saginonor.​—Mateo 19:27-29.

Amin tayo so nipapaarap ed saray panagdesisyon ed bilay, melag man odino baleg. Antoy insimbawa nen Jesus nipaakar ed ontan iran desisyon? Awaten mo kasi so simbawa to? No gawaen mo itan, natumangan ka na baleg. Konsideraen tayo pa natan no panon tayon tumboken si Jesus pian nagunggonaan itayo ed saray imbaga to.