Tepetepet na Saray Manbabasa

Makapuy ta imay impankuankuanan nen Jacob a sikato si Esau, unong ya akarekord ed Genesis 27:18, 19?

Nayarin kabisado yo la iyan salaysay. Sanen masiken la si Isaac, imbaki to si Esau a man-anup na ulsa, ya inkuan to: ‘Pakan mo ak, pian say kamarerwak napapalar to ka komon ambegyan agak ni inatey.’ Kadngel nen Rebeca ed sayan imbaga na masiken to, sikatoy nanluto na mananam a putahi insan to inkuan ed Jacob: “Yakar mo [so tagano] ed amam, pian makapangan, tan pian nikerewan to ka na maong a kapalaran [“bendisyon,” NW] mo ambegya ya agni inatey.” Et insulong nen Jacob so kawekawes nen Esau tan impaibalkot to so katat na kilaw a kanding ed tenger tan limalima to. Insan to nila so ama to, a sankaawit to imay mananam a putahi. Sanen tinepetan nen Isaac: “Siopa ka ta ana’ko?” say ebat to et “Siak si Esau ya anak mo a panguloan.” Sikatoy anisiaan nen Isaac tan benendisyonan to.​—Genesis 27:1-29.

Ag-indetalye na Biblia no akin a ginawa itan nen Rebeca tan Jacob, anggaman impabitar na satan a biglaan so agawa. Nepeg tayon imanoen ya ag-aabobonan nisay kokondenaen na Salita na Dios so ginawa dan dua, kanian aliwa itan a basiyan na pantila tan pamalikdo. Balet, walay iiter na Biblia ya impormasyon nipaakar ed satan a situasyon.

Unona, impabitar na salaysay a kanepegan nen Jacob so panamendisyon nen ama to, aliwan si Esau. Ta diad apalabas et legal lan sinaliw nen Jacob so kanepegan na inkapanguloan ed andiay panamablin lason to, ya angilako ed satan kasalat na sakey a tagano pian napesel. ‘Minudmora nen Esau so inkapanguloan to.’ (Genesis 25:29-34) Kanian sanen nila nen Jacob so ama to, aalaen to labat so bendisyon a kanepegan to.

Komadua, sanen naamtaan nen Isaac a say angiteran to manaya na bendisyon et si Jacob, agto sinali a babawien itan. Nayarin anonotan to imay imbaga nen Jehova ed si Rebeca sanen agni nianak so lason: “Say panguloan naani manlingkor ed yugtan.” (Genesis 25:23) Naimano met a sanen onla la’d Haran si Jacob, inaruman ni nen Isaac so inter to lan bendisyon ed sikato.​—Genesis 28:1-4.

Say kaunoran, nepeg a tandaan a si Jehova et interesado tan amta to so amin a nagagawa. Say bendisyon ya inter nen Isaac et misiglaotan ed sipan na Dios ed si Abraham. (Genesis 12:2, 3) No aglabay na Dios a si Jacob so mangawat ed satan a bendisyon, sikatoy sinmalet la komon. Balet ta andi, imbes et pinekderan ni nen Jehova itan ed si Jacob diad impangibagan: “Dia ed saray ilalak mo so pakapapalaran da naani na amin a kapamilyaan dia ed dalin.”​—Genesis 28:10-15.