Kasin say Kaplesan Labat a Bilay so Imanoen Mo?

“AGKON balot nononoten so arapen ta onsabi met lanlamang itan a tampol,” kuan na kabkabat a sientista a si Albert Einstein. Dakel a totoo so mipakna ed satan, ya ibabaga ra, “Akin et panaburidoan mo ni arapen?” Odino nayarin nadngel yo lan inkuan na arum a “Basta gawam labat lay kimey mo ed inagew-agew.” “Say natan so nonot mo.” “Akauley lay nabuas.”

Siempre, say ontan a kasmak a panmoria et aliwa lan balo. Nensaman a panaon, pibaga la na saray patumbok nen Epicurus ya “Anggapo lay arum ya importante nen say pangan, iyinum, tan panliket.” Tan ontan met so panmoria na saray kapanaonan nen apostol Pablo. Oniay inkuan da: “Mangan itayo tan oninum itayo sirin, ta nabuas ompatey itayo.” (1 Corinto 15:32) Panisiaan da ya angangga itayo labat la’d sayan antiktikey a bilay, kanian ipapaseseg da ya anamoten tayo la iyan bilay.

Balet, parad saray minilyon a totoo, agda nibagan naaanamot da iyan bilay, lapud sikaray mankukuranges tan mipupuligesgesan kalamor pian nabilay labat. Kanian akin et isipen da ni so arapen, anta anggapo met lanlamang so nailaloan da?

Nepeg ni Kasin Iplano so Arapen?

Anggan saray totoo a maasenso met lay bilay da et ipapasen dan anggapoy kakanaan na pamplano parad arapen. Nayarin ikuan da, “Akin a problemaen ni itan?” Saray arum so nayarin mangikatunongan a saramay manplaplano et onsasaew met lanlamang. Anggan si Job diad Biblia et nanermen a maong sanen naimatonan ton ‘abuyak’ iray plano to, diad ontan et apabes so maliket komon ya arapen dan sankapamilyaan.​—Job 17:11; Eclesiastes 9:11.

Inyaliling na manag-anlong a tubo ed Scotland a si Robert Burns so mairap a kipapasen tayo ed sakey a bulilit diad uma a say abot to et apasagaran na lukoy nen Burns. Kuyat so bulilit sanen abuyak so abot to. ‘On, agaylan betbet a napapaneknekan tayo ya anggapoy nayarian tayo sano nagawa so bengatlan agtayo  kontrolado, tan anggan saray inap-apiger a plano et mabetbet ya onsasaew,’ kuan nen Burns.

Kabaliksan kasi na satan a sasayangen ti labat lay panaon tayo no manplano tayo parad arapen? Say katuaan to, sano walay onsabin bagyo odino kalamidad et mapeligro no anggapoy suston panagplano. Singa bilang, sanen binmasig so makmaksil a Bagyon Katrina diad Amerika, anggapoy akayarin angamper ed satan. Balet, agta aliwa komon ya ontan kagrabe so agawa ed sikara no namparaan tan namplano iran maong antis a sinmabi itan?

Antoy padesir yo, kasin makatunongan a say imanoen tayo et say kaplesan labat tan ibaliwala lay arapen? Imanoen pa no antoy ibaga na onsublay ya artikulo nipaakar ed saya.

[Saray litrato ed pahina 3]

“Anggapo lay arum ya importante nen say pangan, iyinum, tan panliket”

[Litrato ed pahina 4]

Kasin aparaisetan komon iray epekto na Bagyon Katrina no namparaan tan namplano iran maong antis a binmasig itan?

[Credit Line]

U.S. Coast Guard Digital