Manbilay a Nononoten so Arapen

“AGKAYO sirin mapaga nipaakar ed agew ya onsabi,” kuan nen Jesu-Kristo legan na bantog a paliwawa to ed gilig na palandey diad Galilea. Onia ni intuloy to: “Say agew ya onsabi manpaga nipaakar ed sikaton dili.”​—Mateo 6:34.

Antoy padesir yon kabaliksan na imbaga ton “Say agew ya onsabi manpaga nipaakar ed sikaton dili”? Labay kasin ibaga na satan a say imanoen yo et say kaplesan labat tan paulyan lay arapen? Ontan kasi panmoria nen Jesus tan saray patumbok to?

“Agkayo Mapaga”

Pibasa yo pa so intiramintin imbaga nen Jesus a naromog ed Mateo 6:25-32. Oniay kabiangan na imbaga to: “Agkayo mapaga’d panagbila’yo no anto so kanen yo, ono anto so inumen yo; agyo met kapagaay laman yo, no anto so ikawes yo. . . . Imano yo ray kamanokan ed tawen, ya ag-ira mantatanaman, ag-ira met manaani, tan ag-ira met mantipon ed kamkamalir; et say mangatatawen ya Ama yo tataganoen to ra. . . . Et siopa ta ed sikayo so, lapu ed kapagaan to makapangiyarum na sankasiko ed inalagyan to? Tan akin a mapaga kayo nipaakar ed kawes? Umameng yo ’ray lirios ed uma, no panon so katutubo ra; ag-ira mankimey, ag-ira met maninaramey . . . Agkayo sirin mapaga, ya ikuan yo, Anto kasi kanen mi? ono, Anto kasi inumen mi? ono, Anto kasi pankawes mi? Ta saraya ya amin a bengatla so anapen na saray Gentiles; et say Ama yon mangatatawen amta to a nakaukolan yo so saraya ya amin a bengatla.”

Sinampotan nen Jesus itan a kabiangan na paliwawa to diad impangiter na duaran simbawa. Say unona: “Anapen yo nin unona so panarian [na Dios], tan say inkatunong to; et amin iraya a bengatla niarum ira ed sikayo.” Tan say komadua: “Agkayo sirin mapaga nipaakar ed  agew ya onsabi; ta say agew ya onsabi manpaga nipaakar ed sikaton dili. Masarag la ed agew so uges a walad sikato.”​—Mateo 6:33, 34.

Amta na Ama Yon Walad Tawen so Nakaukolan Yo

Diad padesir yo, kasin didismayaen nen Jesus iray babangatan to, pati saray dumaralos, a ‘mantanaman, manani, odino mantipon ed kamkamalir’? Odino didismayaen to ira kasin ‘mankimey tan maninaramey’ parad kawesen da? (Uliran 21:5; 24:30-34; Eclesiastes 11:4) Seguradon andi. No ontunda ira, ‘mipayabol ira no panagani’ lapud anggapoy naakan odino kawesen da.​—Uliran 20:4.

No nipaakar balet ed panagpaga ey? Kasin say labay ya ibaga nen Jesus et aglan balot manpaga iramay babangatan to? No ontan so pangipasen, aliwan realistiko itan. Si Jesus ni lanlamang et agonigon a maong diad samay labi a sikatoy inaresto.​—Lucas 22:44.

Ibabaga labat nen Jesus no antoy tua. Salanti, agbalot nasolbar na alablabas a panaburido so antokaman a problema yo. Agnaparukey na satan so bilay yo. Unong ya inkuan nen Jesus, ag-itan “makaparukey na bilay [yo] anggan saksakey a bekta.” (Mateo 6:27, Maung a Balita) Diad tua, napatikey ni ingen na mabayag a panaburido so bilay yo.

Talagan praktikal so simbawa to, ta kaslakan ed saray panaaburidoan tayo et agmet lanlamang nagagawa. Ontan so amoria na pangulo na Britanya a si Winston Churchill nipaakar ed samay mauddiem a panaon na Guerra Mundial II. Oniay insulat to nipaakar ed saray akagonigonan to ed saman a panaon: “No pawilen ko so impanaaburidok, nanonotan ko imay istorya na masiken a magano lan ompatey, ya inkuan ton dakel so nanaburidoan to ed bilay, tan kaslakan ed saraman et agbalot agawa.” Talagan makabat a say solbaren et saray problema ed satan ya agew, nagkalalo la no grabe so panaburido tayon tampol kapagno walaray desdes tan problema.

“Anapen Yo nin Unona so Panarian”

Diad tua, wala ni nonoten nen Jesus a mas nen say pisikal tan emosyonal a pankaabigan na saramay katongtong to. Amta to a napaulyanan da la iray mas importantin bengatla no aburido  iran mananap ed saray pankaukolan da ed bilay tan ed pampilalek ed saray kayamanan tan panliliket. (Filipos 1:10) Anganko et nitepet yo, ‘Anto ta ni so mas importante nen saray pankaukolan ed bilay?’ Say ebat et say espiritual iran bengatla, salanti, say panagdayew tayo ed Dios. Impurek nen Jesus a nepeg a say manuna ed bilay tayo et say ‘pananap nin unona ed panarian na Dios, tan say inkatunong to.’​—Mateo 6:33.

Nen panaon nen Jesus, andi lay aanapen na dakel a totoo noag say materyal iran bengatla. Sankaimportantian ed sikara so pampayaman. Kanian, binilin nen Jesus iray babangatan to ya agda aaligen itan a panmoria. Lapud saramay katongtong ton Judio et akisipanan ed Dios, “kanepegan” da odino obligasyon dan “takotan . . . so Dios tan unoren . . . so saray ganggan to.”​—Eclesiastes 12:13.

No say pinonot na saramay katongtong nen Jesus et saray materyal a bengatla, salanti say “kapagaan ed mundo, tan say panamalingo na saray kayamanan,” onletey so espiritualidad da. (Mateo 13:22) Oniay insulat nen apostol Pablo: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang.” (1 Timoteo 6:9) Ta pian napaliisan da itan a “kalot,” pinanonotan nen Jesus iray papatumbok to a say Ama ran walad tawen et amta To a kaukolan da irayan amin a bengatla. Taryaan ira na Dios a singa met ed pangitatarya to ed “kamanokan ed tawen.” (Mateo 6:26, 32) Imbes a manaburido la ran manaburido, kaukolan a gawaen day anggaay nayarian da ya itarya iray materyal a pankaukolan da, kayari na satan, matalek dan ipalima so situasyon ed si Jehova.​—Filipos 4:6, 7.

Sanen inkuan nen Jesus a “say agew ya onsabi manpaga nipaakar ed sikaton dili,” say labay to labat ya ibaga et nepeg ya agtayo aabuloyan a saray problema tayo natan et naaruman ni na alablabas a pampaga tayo ed no antoy nagawa nabuas. Oniay impangipatalos na sananey nin bersion na Biblia ed satan ya imbaga to: “Agkayo sirin mapaga ed nakaukolan yo nabuas, ta say ontumbok ya agew makauley la’d saray dilin kapagaan to. Agyo la iyaarum ed sayan agew iray kapagaan nabuas.”​—Mateo 6:34, Maung a Balita.

“Onsabi Komon so Panarian Mo”

Balet, walay baleg a pandumaan na ag-alablabas a panaburido ed arapen tan say sigpot lan pangibaliwala ed arapen. Agbalot pinaseseg nen Jesus iray babangatan to a baliwalaen da so arapen. Imbes et binilin to ran magmaliw ya interesadon maong ed arapen. Duga labat ya ipikasi ra so kaplesan a pankaukolan da, say inagew-agew a kanen da. Anggaman ontan, nepeg ya ipikasi ra nin unona iray bengatlan nagawa ed arapen, salanti say isabi na Panarian na Dios tan say kagawa na linawa to diad dalin.​—Mateo 6:9-11.

Agtayo komon aaligen iramay totoo nen panaon nen Noe. Okupado iran maong a ‘nankakakan, naniinum, angaasawa, tan akiaasawa’ kanian “agda akabkabatan” so magano lan nagawa. Tan antoy resulta? “Sinmabi delap, et inyanor to ra ya amin.” (Mateo 24:36-42) Inusar nen apostol Pedro itan ya aktual ya agawa pian panonotan itayo a kaukolan tayoy manbilay a sinononot ed arapen. Oniay insulat to: “Diad inengneng a saraya ya amin a bengatla naderal ira naani, anton nengneng na inkatoo so nepeg yon pagmaliwan ed amin a masantos a panagbilay tan kasimpitan [“maridios a debosyon,” NW], dia ed panalagar tan pampilalek yo ed isabi agew na Dios [“sinononot lawas ed isabi na agew nen Jehova,” NW].”​—2 Pedro 3:5-7, 11, 12.

Mantipon na Kaykayamanan ed Tawen

On, ‘lawas tayon nonoten’ so agew nen Jehova. No gagawaen tayo itan, napatnagan itan ed paraan na panangusar tayo na panaon, biskeg, dunong, kaykayarian, tan abilidad. Kaukolan ya ag-itayo okupadon maong ed panag-anap na materyal iran bengatla, balanglan saray nakaukolan tayo odino saray likeliket ed bilay, a ngalngali anggapo lay panaon tayo ed saray gawa a mangisisindag na “maridios a debosyon.” No say imanoen tayo et say kaplesan labat, nayarin wala lay resultan tampol, balet maganggano labat iratan. Unong ya inkuan nen Jesus, maabig no “mantipon  [itayo] na kaykayamanan ed tawen” imbes a kaykayamanan ed dalin​—Mateo 6:19, 20.

Impurek nen Jesus itan a punto diad ilustrasyon to nipaakar ed samay laki ya ambisyoson namplano parad arapen, balet ta agto impila so Dios ed saray plano to. Say uma na sayan laki et mabungabunga. Kanian inggeba to ray kamalir to tan angipaalagey na mas angkakabaleg pian manliket, mangan, oninum, ya anggapoy pagpaga. Wala tay makapuy ed satan? Sikatoy inatey, antis ton natawayan so nansagpotan to. Say mas alodloor ni, aliwan marakep so relasyon to ed Dios. Sinampotan nen Jesus: “Ontan so mantipon na kayamanan nipaakar ed sikato, et aliwa a mayaman dia ed Dios.”​—Lucas 12:15-21; Uliran 19:21.

Antoy Gawaen Yo?

Agyo komon aaligen so lingo na saman a laki ya insalaysay nen Jesus. Amtaen no antoy itatarya na Dios ed arapen, tan manbilay unong ed satan. Agpinaulyanan na Dios so totoo a magmaliw ya ignorante ed no anto so gawaen To. Oniay insulat nen propeta Amos nensaman: “Petepeteg anggapo naani gawaen nen Katawan a Jehova, ya agnaani nipuyan so inamot to ed saray aripen to a propeta.” (Amos 3:7) Say imparungtal nen Jehova panamegley na saray propeta et akasabi la ed sikayo natan diad pinuyanan a Salita to, say Biblia.​—2 Timoteo 3:16, 17.

Sakey ed saray ipaparungtal na Biblia et say nagawa ed arapen a mangapektan maong ed interon dalin. Inkuan nen Jesus: “Wala naani baleg ya irap ed satan, ya anggapo so ontan a nanlapud gapo na mundo ya angga ed natan.” (Mateo 24:21) Ag-itan naamper na anggan siopan too. Diad tua, anggapoy rason ya amperen itan na saray mandadayew ed si Jehova. Akin? Lapud ekalen na satan so amin a kaugsan diad dalin, insan onsublay lay ‘balon tawen tan balon dalin,’ a kabaliksan toy balon gobierno ed tawen tan balon sosyedad na totoo ed dalin. Diad satan a balon mundo, “punasen [na Dios] so amin a lua ed kamataan [na totoo]; tan anggapo la naani ipatey; tan anggapo la naani onnangis o dageyem, o ot-ot.”​—Apocalipsis 21:1-4.

Agta makatunongan labat sirin ya ipanaon la natan so pangusisa ed no anto so ibabaga na Biblia nipaakar ed satan a nagawa? Kasin kaukolan yoy tulong pian naamtaan itan? Patulongan kayo ed saray Tasi nen Jehova. Odino mansulat ed saray amawala ed sayan magasin. Petepeteg, aliwa labat lan say kaplesan so imanoen yo noag pati say marakdakep ya arapen.

[Saray litrato ed pahina 7]

“Agkayo sirin mapaga . . . ta say agew ya onsabi manpaga nipaakar ed sikaton dili”