Onarap ed Kawalaan na Liwawa

SARAY parola so akapangiliktar la na dakel a bilay. Parad naksawan lan managbiahe ed dayat, say pakabantag na liwawa et aglabat mangipapasakbay ed mapeligro iran batobato, noagta mankabaliksan met itan a sikatoy asingger lan makasabi ed laen to. Mipadpara ed satan, saray Kristiano natan so manasingger la ed anggaan na andukey a biahe, sakey a biahe ed mundon abilungetan tan mapeligro ed espiritual. Diad Biblia, say katooan, salanti, say karaklan a totoon niyarawi ed Dios, so niyaliling ed ‘agulo a dayat, ta agto nayarian so onlinak tan saray danum to mangibuntok ira na pitek tan dutak.’ (Isaias 57:20) Ontan so akapaliber ed saray totoo na Dios. Balet, walaan ira na ilalo parad kilalaban, a para ed sikara et sakey itan a piguratibo tan napanmatalkan a liwawa. (Miqueas 7:8) Salamat ed si Jehova tan say nisulat a Salita to, ta “say liwawa nitanem ya onkana ed matunong, tan say liket onkana ed maptek a puso.”​—Salmo 97:11. *

Balet, walaray Kristiano ya inabuloyan day inkasikara a niyarawi manlapud liwawa nen Jehova, kanian aderal so pananisia ra dia ed saray singa mapalikdon batobato, salanti, materyalismo, imoralidad, odino apostasya ni ingen. On, singa met nen inmunan siglo, arum natan et “aderal so pananisia ra.” (1 Timoteo 1:19, Maung a Balita; 2 Pedro 2:13-15, 20-22) Say balon mundo so nayarin niyaliling ed sakey a daongan a ditan so pugtaan tayo. Legan a manasingger itayo la ed sayan piguratibon daongan, agaylan makapasinagem no nabalang na sakey so panangabobon nen Jehova!

Paliisay ‘Pakaderal na Pananisia Yo’

Diad apalabas iran siglo, nayarin maligen a makapanbiahe so bapor ed maawang a dayat, balet ta sano asinger la ed daongan et nayarin ditan so pakaderalan to. Mabetbet a say sankadelikadoan a parte na panagbiahe so nagawa sano magano lan ondaong so bapor. Ontan met, parad karaklan, say sankadelikadoan a peryodo ed awaran na too et diad sarayan “kaunoran ya agew” na sayan a sistema na bengabengatla. Matukotukoy so impaneskribe na Biblia ed saraya bilang “panaon a maatap,” nagkalautla parad saray dedikadon Kristiano.​—2 Timoteo 3:1-5.

Akin ya agaylay irap so kipapasen ed sayan kaunoran ya agew? Lapud kabat nen Satanas a ‘dagdaiset lay panaon’ to parad pibakal to ed saray totoo na Dios. Kanian lalon palolooren to so mauges a getma to a deralen so pananisia ra. (Apocalipsis 12:12, 17) Ingen ta wala so ontulong tan mangigiya ed sikatayo. Si Jehova so mansiasiansian salimbeng parad saramay manguunor ed simbawa to. (2 Samuel 22:31) Sikatoy angiter na saray manamasakbay ya alimbawa a mangiwawalwal ed saray masilib ingen ta mauges iran taktika nen Satanas. Natan et repasoen tayo so duara ed sarayan alimbawa a mangilalanor ed nasyon na Israel sanen asingger la ra ed Insipan a Dalin.​—1 Corinto 10:11; 2 Corinto 2:11.

Asingger La ra’d Insipan a Dalin

Diad impangidaulo nen Moises ed sikara, akaliktar iray Israelita manlapud Ehipto. Agnambayag et akaasingger la ra ed mamaabalaten a ketegan na Insipan a Dalin. Si Moises so angibaki na 12 lalaki pian man-espiya ed dalin. Samploran espiya ya andian na pananisia so pinmawil a walaan na makapadismayan report, ya imbaga ran saray Israelita et ag-ontalona sumpad saray Canaanita lapud ‘atatagey iran totoo’ tan mabibiskeg iran mibabakal. Panon ya angapekta itan ed saray Israelita? Ibabaga ed sikatayo na awaran a sikaray  nanmeremere ed kinen Moises tan Aaron, a kuan da: “Anto so makasengeg na angiyakaran nen Jehova ed sikami ed sayan dalin, ta pian ompatey kami ed kampilan? Saray kaasawaan mi tan angkekelag mi naruksa ra ya amin. . . . Mangipasen itayo na kapitan tayo ta ompawil itayo ed Ehipto!”​—Numeros 13:1, 2, 28-32; 14:1-4.

Agayla! Sarayan kailalakan a mismo so akaimaton ed pirmin impangiyabeba nen Jehova ed makapanyarin Ehipto, say sankamundoan a pakayari ed saman a panaon, panamegley na samploran makadesyang a salot tan sakey a makapadinayew a milagro ed Ambalangan Dayat. Tan sikaray asingsingger la ed Insipan a Dalin, a kaukolan da lambengat so mamaarap ed satan a singa sakey a bapor a mamapaarap ed liwawa a mananda ed destinasyon to. Ingen ta inisip dan agsarag nen Jehova a deralen so melag tan naapag-apag a syudad tan panarian na Canaan. Talagan sayan inkaandi na pananisian kiwas da so anismaya ed si Jehova tan ed duaran makpel ya espiya a di Josue tan Caleb, a nanisip a say Canaan et singa “tinapay [ed Israel]”! Sarayan dua so makaamta ed peteg a kipapasen lapud aliber da so Canaan. Sanen saray Israelita et ag-akaloob ed Insipan a Dalin, si Josue tan Caleb so kaukolan met a mansiansia ed kalawakan diad loob na pigaran dekada, ingen ta sikaray ag-inatey diman a kaiba na saramay andian na pananisia. On, si Josue tan Caleb so tinmulong ed sinmublay a kailalakan a makapaway ed kalawakan a mamaarap ed Insipan a Dalin. (Numeros 14:9, 30) Diad sayan mikaduan pankanawnawa, say Israel so mangarap na sananey a subok. Anto kasi pansumpalan da?

Sinali na Moabitan Ari a si Balak ya isamba iray Israelita panamegley na palson propeta a si Balaam.  Balet, inamper nen Jehova iyan pakana diad impangiganggan to ed si Balaam a mangibaga na bendisyon imbes a samba. (Numeros 22:1-7; 24:10) Si Balaam so ag-adismaya, kanian sikato lamet so angusar na sakey a mauges a pakana pian say dalin so agnakayarian na totoo na Dios. Panon? Diad impanagyat to ed sikara ed imoralidad tan pandayew ed si Baal. Anggaman diad inkalapagan et agtinmalona iyan pakana, saya so akasagyatan na 24,000 ya Israelita. Sikaray awalaan na imoral a pirerelasyon ed saray Moabita tan insiglaot day inkasikara ed Baal na Peor.​—Numeros 25:1-9.

Isipen pa itan! Dakel ed saraman ya Israelita so akaimaton ed maligen ya impangibeltang nen Jehova ed sikara diad “maawang tan makapataktakot a kalawakan.” (Deuteronomio 1:19, Maung a Balita) Anggaman ontan, sanen asingsingger la ra ed tawir da, 24,000 ed sikara so adaeg ed saray kagletan na laman, a nanresulta ed impaneral nen Jehova ed sikara. Talagan nipanpanaon iyan pasakbay parad saray lingkor na Dios natan legan a manasingger la ra ed mas babaleg a tawir!

Agla mankaukolan si Satanas na balo iran pakana, diad unor lan getma ton amperen iray modernon lingkor nen Jehova ed pakagamor da na tumang. Diad sakey a pakana a mangipanonot ed sikatayo nipaakar ed samay agawa ed saray Israelita sanen unonan pankanawnawa day makaasingger ed Insipan a Dalin, si Satanas so maparanay a mamapawalay takot tan panduaruwa, a nayarin diad panamegley na saray panamagyaw, panamasegsegang odino panagludlurey. Arum a Kristiano so apatalaw ed saratan. (Mateo 13:20, 21) Say sakey nin matalonan pakana et say paneral ed moralidad na sakey. No maminsan et walaray makakaloob ed Kristianon kongregasyon a manasalin mamalikdo ed saramay makapuy so espiritualidad da tan agla mankukurang a matalek unong ed liwawan manlalapud Dios.​—Judas 8, 12-16.

Parad saray matatken ed espiritual tan alerton indibidual, say mapmaples ya iyaabeba na moral na sayan mundo so mabiskeg a paneknek a talagan desperado la si Satanas. On, kabat nen Satanas ya agmanbayag et agto la napairap iray matoor a lingkor na Dios. Kanian natan la so panaon a magmaliw itayon alerton naynay ed saray taktika to.

Saray Tulong Diad Pansiansian Aliing ed Espiritual

Inyaliling nen apostol Pedro so mapropetikon salita na Dios ed “sakey a silewan ya onsisinag ed pasen ya ambilunget,” lapud satan so ontutulong ed saray Kristiano a natalosan so kasumpalan na gagala na Dios. (2 Pedro 1:19-21) Saramay ombubulaslas ed panangaro ed Salita na Dios tan mantutultuloy a paiwawanwan ed satan so makamoria a si Jehova so mangipetek ed saray kurang da. (Uliran 3:5, 6) Lapud walay ilalo ra, sarayan maapresyan totoo et “mankanta ra naani a nisengeg ed liket na puso,” bangta saramay agmikabat ed si Jehova odino mangikakaindan ed dalan to so manlikna na “ermen na puso” tan “irap na espiritu.” (Isaias 65:13, 14) Kanian diad panamegley na maseet a panagaral na Biblia tan pangiyaplika ed saray naaaralan tayo, napansiansia tayon akateen so kamataan tayo ed seguradon ilalo tayo imbes a diad saray temporaryon likeliket ed sayan kaplesan a sistema na bengabengatla.

Makana met so pikakasi ed pakapansiansia tayon aliing ed espiritual. Sanen nansalita si Jesus nipaakar ed anggaan na peles a sistema, inkuan to: “Balet manbantay kayo ed amin a panaon, a mikasi kayo, pian ontalona kayo a nilaban ed sarayan amin a bengatlan nagawa, tan makaalagey kayo ed arap na Anak na too.” (Lucas 21:34-36) Imanoen ya inusar nen Jesus so salitan “mikasi,” a sakey a masimoon a paraan na panagpikasi. Kabat nen Jesus a nayarin nabalang na sakey so andi-anggaan a bilay diad sarayan maatap a panaon. Kasin saray pikakasi yo so mangipapatnag na masimoon a pilalek yon mansiansian aliing ed espiritual?

Agtayo lilingwanan a say sankadelikadoan a parte na biahen mamaarap ed tawir tayo et sano asingger tayo la ed destinasyon tayo. Kanian importantin tuloy ya agtayo nabalangan so liwawa a makapangiwanwan ed sikatayo parad kilalaban.

Manalwar ed Saray Sigsilew

Sano manlayag nensaman iray bapor, sakey a mapeligron pakana so gagawaen na saray mauges a totoo a mangaanamot ed labin anggapoy bulan sano saray marino et nairapan a makabantag ed gilig na dayat. Sarayan totoo et mangiiyan  na silesilew ed mapeligron parte na baybay pian palikdoen iray kapitan na bapor ta pian umanen na saraya so direksion da. Saramay napalikdo et nayarin naderalan na barko, natakewan na saray kargamento, tan ompan ompatey ni ra ingen.

Mipadpara, si Satanas, say manamalikdon “anghel na liwawa,” so mankaliktan a manamsam ed saray lingkor na Dios manlapud pisisiglaotan da ed Sikato. Nayarin usaren na Diablo iray “palson propeta” tan apostatan “ministro na katunongan” pian palikdoen iray agmaalwar a totoo. (2 Corinto 11:13-15, NW) Balet no panon a say sakey ya alerto, onsianon kapitan tan tripulante so agbengatbengat a napalikdo na sarayan palson silesilew, saray Kristiano a “lapud panangagamil, saray pakalikna ra apasal ed panangibiig na maong tan mauges,” so agmet napalikdo na saramay mangiyaalibansa na palson bangabangat tan makapasakit iran pilosopiya.​—Hebreos 5:14; Apocalipsis 2:2.

Saray marino so mangaawit na listaan na saray parola a nadalanan da. Karga na listaan iray deskripsion na kada parola, kalaktip lay nikaduman sinag na silew to. Oniay inreport na The World Book Encyclopedia: “Amta na saray marino no anton parola so nanenengneng da, kanian amta da met so kawalaan da la, panamegley na pangobserba ed deskripsion na parola tan inengneng ed listaan da. Ontan met, say Salita na Dios so ontutulong ed saray matuan impanpuson totoo pian nakabatan so tuan panagdayew tan ed saramay manaanap ed satan, nagkalautla ed sarayan kaunoran ya agew ya inyatagey nen Jehova itan manlapud saray palson relihyon. (Isaias 2:2, 3; Malaquias 3:18) Diad pangipapabitar na malinew a pandumaan na tua tan palso a panagdayew, oniay inkuan na Isaias 60:2, 3: “Say kabilungetan sakbongan to so dalin, tan say makapal a kabilungetan so saray balbaley; balet si Jehova onalagey naani ed tapew mo, et say gloria to nanengneng mo naani ed tapew mo. Et saray nasyon ondago ra naani ed liwawam, tan saray arari ed sinag na kapepelnak mo.”

Legan ya igigiya na liwawa nen Jehova so minilyon a manlalapud amin a nasyon, agda nibalang so pananisia ra legan a manasingger la ra ed destinasyon da. Imbes, maligen iran makapanbiahe ed saray nakekeraan ya agew ed sayan sistema na bengabengatla, a paarap ed maligen a pasen diad balon mundo.

[Paimano ed leksab]

[Litrato ed pahina 15]

Singa saray marino, saray Kristiano so kaukolan a manalwar pian ag-ira napalikdo na sigsilew