Panalona ed Saray Angat Pian Ipasabi so Maong a Balita

MANASINGGER lay trak mi ed checkpoint a guardiado na manga 60 ya armadon lalaki, bibii, tan pati saray tinedyer. Walaray akaunipormi, balet akasibilyan la iray arum. Dakel so angiparayag na armas dan automatiko. Mapatnag a tatalaranan da kami. Walay sibil a panggugulo ditan.

Apat agew kami lan manbiabiahe tan walay kargada min samploran toniladan literatura na Biblia. Agmi segurado no kasin padalanen da kami. Onkerew ira kasi na kuarta? Kaunongan kabayag iran nakombinse a mareen so gagala na kimey mi?

Sakey a lakin anggatel so lima ton mamaltog so amaputok pian ipalikas ed sikami a sikato so lider da. Anengneng to iray cellphone mi tan imbaga ton iter mi iratan. Sanen masuyat kami, insinyas ton pateyen to kami, kanian amta mi lay nagawa no agkami ontulok. Kanian inter mi iray cellphone.

Kabekta, sakey ya akaunipormin bii so angalay paltog to tan inmasingger ed sikami. Sikato kuno so “sekretarya,” tan labay to met so onkerew. Mairap kunoy bilay, kanian makatulong so melag a “regalo.” Insan nilukasan na sakey nin sundalo so tangki na krudo mi pian kargaan so pananginan to. Imbaliwala to so reklamo mi, tan imbaga ton uunoren to labat iray ganggan. Anggapoy nagawaan mi. Komon ta anggapo lay onalig ya arum.

Pinadalan da kamin siansia, tan binmuat kami la. Siak tan samay kaibak so akaingas na baleg. Makapanerbiyos iman, balet ta apasal kami la ed sarayan makapakebbiew a checkpoint. Diad baetan na Abril 2002 tan Enero 2004, aka-labinwalon biahe kami la manlapud daongan na Douala, Cameroon, anggad Bangui, say kabisera na Central African Republic. Say 1,600 kilometro a biahe so napno lan lanang na saray peligro tan ag-iilaloan iran nagawa. *

“Dakel so naaralan mi ed sarayan biahe,” so impaliwawa na saray drayber a si Joseph tan Emmanuel, a regular a manbiabiahe ed saya. “Makabat so mabetbet a pampikasin mareen, insan  mansiansian kalmado. ‘Dia ed Dios so nanmatalekan ko. Agak antakot; anto so nayarian na too a gawaen ed siak?’ so insulat na salmista. Ontan met so labay min gawaen. Segurado kamin amta nen Jehova a say biahe mi et pian ipasabi so mensahe na ilalo a talagan kaukolan.”​—Salmo 56:11.

Say Internasyonal a Pansasagpot a Mangitarya na Espiritual a Tagano

Labalabay na dakel a totoo ed sayan parte na Aprika so ondengel ed maong a balita na Panariay Dios. Say kargada min literatura et denesinyo pian napenek so espiritual a pankaukolan da. (Mateo 5:3; 24:14) Say sangan opisina na saray Tasi nen Jehova ed Cameroon a walad Douala so regular a mansusuplay na literatura ed masulok a 30,000 a manangipalapag na Panarian tan interesadon totoo a manaayam ed Cameroon tan ed apatira nin kakaabay a bansa.

Arawi lay abiahe na sarayan literatura. Maslak ed saratan so inimprinta ed Alemanya, Espanya, Inglatera, Finland tan Italya. Insan impatulor iratan diad panamegley na barko manlapud Pransya. Say container van na literatura na Biblia et kaslakan ya onsasabi diad daongan na Douala kada duay simba.

Say container van so aalsaen tan ilulugan ed trak ya ididiretso ed sangan opisina. Insan say literatura so panbibiiganen na saray mantratrabaho ed Departamento na Shipping unong ed pangideliberan ed saratan. Aliwan mainomay so pangideliber na saray publikasyon ed nisulinek iran pasen na sarayan bansa. Balet kabiangan iya na pangipapasabi ed maong a balita “angga ed kasampotan na dalin.” (Gawa 1:8) Say sangan opisina ditan et manmamatalek ed saray masakripisyon boluntaryo a mabulos a mangibiabiahe na trak anggaman mapeligro. Kanian, say regular a suplay na literatura ed Biblia so makakasabi ed minilyon a totoo ed sentro na Aprika.

Kaslakan a Biahe

Diad panamegley na trak, idedeliber iray literatura ed Cameroon, Chad, Equatorial Guinea, Gabon, tan diad Central African Republic. Ulopen tayo pay sakey a trak a kaiba iray drayber na satan. Isip mo pan kaabay mo iray drayber, tan  manparaan ka parad mapeligron biahe a sabien toy samploy agew odino onsulok ni.

Anemiran drayber so mantuturnoan ed sayan biahe. Nepeg a mabiskeg, maabilidad, maanos, tan desente iran mangawes. Balanglan akasulong ira na estiloy panangawes ed Aprika odino akadesente tan de-korbata ira. Diad apalabas, oniay inkomento na saray opisyales ed kustom: “Nia la imay malinis a trak tan saray maayos tan akadesentin drayber, a singa met ed nanenengneng ed saray litrato na publikasyon da.” Mas importante ni nen say itsura na sarayan drayber et say inkamabulos dan onla ed lugar a walay pankaukolan pian manlingkor ed arum.​—Salmo 110:3.

Say iyaalis ed Douala et manga ala-sais na kabuasan, kabutay na agew, pian napaliisan so sobran trapik ed sayan masoliwet tan maples ya ombabaleg a syudad. Kasumpal tayon ombeltang ed taytay ya asingger ed sangan opisina tan ed okupadon syudad, mamaarap tayo la ed bukig diad primeron biahien tayo, say Yaoundé a kabisera na Cameroon.

Saray anemiran drayber so mangibaga ed sika no panon kairap ya imaneho so trak a walay kargadan samploran toniladan libro. Daiset labat so problema ed primeron taloy agew a biahe ed asementon dalan, balet kaukolan so inkaalerto. Insan, biglan ombalasubos so uran. Say dalan manlapud dia et aliwa lan sementado. Ngalngali agnanengneng so dalan, andanglel lay karsada, tan kaukolan itayon mantantan lapud nikutkutlaong lay dalan. Kabekta et onsirunget la. Oras lay itunda tan pangan, insan piliten so onugip ya akatagey so sali tayo ed dashboard. Ontan so bilay ed sarayan biahe!

Kaimbuasan, ituloy tayo lamet so biahe. Sakey ed saray drayber so aliston onnengneng ed kipapasen na dalan. Tampol ton ipakabig no asingsingger tayo la ed kanal. Kabisado la na saray drayber a no onlargo ira ed kanal, palabasen ni pigaran agew insan makaalis ditan. Agmet miarawian so klase na karsada legan tayon ondadalan ed ketegan a paonla ed Central African Republic. Diad ontumbok a 650 kilometro, ondalan itayo ed mabirdi tan nipukpukdol a probinsya. Saray ugugaw, mamasiken tan akukulaw, tan saray kainaan ya akadagi iray angkekelag nin ananak da so manpapayapay legan tayon matantan ya ondadalan ed saray baryo ra. Lapud aliwan maligen so lugar da, pigpigara so ondadalan a luganan ed sarayan agew, kanian mankelaw iray totoon nadalan tayo.

Makapaliket Iran Eksperiensya

Si Janvier, sakey ed saray drayber tayo, so mangibaga ya anggaman okupado iray eskedyul da, mabetbet iran ontutunda ed angkekelag a baryo pian manpainawan magano tan manbunog na literatura na Biblia. Nanonotan to ni: “Diad Baboua, panggugunaetan min naynay a nakatongtong so sakey a mantratrabaho ed ospital ya interesadon maong ed mensahe na Panarian, insan  mi iyaralan a magano na Biblia. Aminsan et impabantay mi ni ingen ed sikato tan ed pamilya to so tape na VHS nipaakar ed si Noe. Sinmabi met iray kakaaro tan kakaabay to, tan napnon tampol so abung to na totoon maliket a manbantay. Amin so makaamta la ed istorya nipaakar ed si Noe, tan natan et nabantayan da lay istorya to. Makapatenyeg a nanengneng so impangapresya ra. Kasumpal na satan, angitarya ira na espisyal a panangan lapud pisasalamat da, tan labay dan onugip kami diman. Balet kaukolan mi onalis a tampol tan ituloy so andukey nin biahe mi, ingen ta maliket kami ta nipulong mi so maong a balita ed sarayan mapaabeban totoo.”

Nanonotan met ni na sakey a drayber a si Israel so sakey nin biahe ed Bangui, say destinasyon tayo. Insalaysay to: “Legan a manasingger kami la ed Bangui, mas dakel a checkpoint so nadadalanan mi. Maong labat ta dakel a sundalo ditan so makaaro tan atandaan day trak mi nen imbebeneg iran biahe. Pinayurong da kamin kaiba ra, tan maliket dan inawat so literatura na Biblia. Ontan lay panamabli da ed libro, kanian isusulat da ditan so ngaran da, insan say petsa tan ngaran na samay angiter ed sikara. Arum a sundalo et walaray kakanayon dan Tasi, kanian sakey met ni iyan rason no akin et makaaro ira.”

Si Joseph, say sankaeksperiensyadoan a drayber, so mangisalaysay ed ipapasen ton pantok na sarayan biahe​—say isabi ed destinasyon. Oniay nanonotan to nipaakar ed sakey a biahe: “Pigaran kilometro labat la manlapud Bangui, tinawagan mi iray agagi pian ibagan magano kami lan onsabi. Inibaan da kami ed syudad, tan tinulongan da kamin man-ayos na papeles a kaukolan ed satan a lugar. Kasabi mi, amin ed sangan opisina so pinmaway pian abeten tan lakapen kami. Walaray sinmabin ontulong manlapud asingger iran kongregasyon, tan diad loob na pigaran oras, nilasus a karton na saray Biblia, libro, brosyur, tan magasin so indiskarga tan inkamada ed panagsimpenan.”

Inkuan ni nen Joseph: “No maminsan, kaiba’d kargada mi iray indonasyon a kawes, sapatos, tan bengatlan parad ugugaw pian iter ed kaabay a Democratic Republic of Congo. Talagan makapaliket a nanengneng so imis na sarayan misalsalamat ya agagi!”

Kayari sanagew a painawa, iparaan tayo la so trak tan ombiahe tayo lan papawil. Walaray probleman manatalaran, balet saray makapaliket a naeksperiensya tayo et talonaan toy antokaman iran irap.

Saray andukey a biahe, maksil ya uran, plat iran dalig, tan pakaderal na luganan et nayarin makapadismaya. Makaabalan naynay iray busangel a sundalo. Ingen, anggapo lay arum a mas makapalikliket ed sarayan drayber noag say pangipasabi na maong a balita na Panarian ed nisulinek iran pasen na Aprika tan say pakanengneng ed epekto na satan ed kabibilay na totoon makakaawat ed satan.

Singa bilang, lapud sarayan pandedeliber, sakey a lakin manaayam ed nisulinek a pasen na Central African Republic ya asingger ed ketegan na Sudan et makakabasa la natan na modernon patalos na Biblia. Say asawa to so manaaral met la na saray balon kopya na Say Panag-Bantayan, tan saray anak da so nagugunggonaan ed libron Manaral Manlapud Sankamaongan a Managbangat. * Sikara tan dakel ni ed sarayan komunidad a walad baryo so makakaawat la na espiritual a tagano, a singa met ed kaagian da diad dakel ya angkabaleg iran syudad. Talagan lapuan iya na baleg a liket!

[Saray paimano ed leksab]

[Saray mapa/Litrato ed pahina 9]

(Parad aktual a format, nengnengen so publikasyon)

CAMEROON

Douala

CENTRAL AFRICAN REPUBLIC

Bangui

[Litrato ed pahina 9]

Joseph

[Litrato ed pahina 9]

Emmanuel

[Litrato ed pahina 10]

Sangan opisina ed Central African Republic, diad Bangui

[Litrato ed pahina 10]

Pandidiskarga diad Bangui