Panlikliketan so “Impanalon Kaibay Kordero”

“SARAY taon ya impanlingkor ed si Jehova et alay abig ed nikadkaduman paraan. Say impilimog-limog ed saray totoo to; impakasalimbeng manlapud saray managgaway mauges ed sayan marelmeng a mundo nen Satanas; say pankanawnawan manalo a kaibay Korderon si Jesu-Kristo; laktip lay panangaro nen Jehova, so mangitarok na kareenan tan inkapnek a manalimbeng ed puso tan makapangiter na peteg ya ilalo parad pinal a pambiktorya.” Ontan so insulat nen Carey W. Barber sanen 1971, legan ton nononoten so apalabas a 50 taon ya impanlingkor to ed tuan Dios.

Kayari na anemiran taon, si Brother Barber, sakey ya alanaan a Kristiano, so nagmaliw a membro na Mananguley ya Ulop na saray Tasi nen Jehova. Bilang kabiangan na satan ed loob na 30 taon, nantultuloy ton pitamitam so “panalo a kaibay Kordero.” Adampot to itan diad impansiansia ton matoor anggad patey. Sikatoy inatey nen Simba na Abril 8, 2007, diad edad a 101.​—1 Corinto 15:57.

Si Carey Barber so nianak ed Inglatera nen 1905 tan abautismoan ed Winnepig, Canada nen 1921. Kayari na duay taon, sikato tan say lason ton si Norman, so linma ed Brooklyn, New York, pian ontulong ed sakey a balon proyekto. Diad saman a panaon, saray Tasi nen Jehova so onggapo ni lambengat a manimprinta na saray libro ra pian iwakawak so maong a balita na Panarian ed “sankamundoan.” (Mateo 24:14) Sakey ed saray inmunan trabaho nen Brother Barber et say pamaandar ed melag a makina. Kabiangan ed saray inimprinta to et say sumaryo na saray kaso ed korte ya insubmiti ed Korte Suprema na Estados Unidos. Agnambayag sikato so nankimey ed Service Department pian asikasoen iray pankaukolan na saray kongregasyon tan say panagpulong a kimey diad interon bansa.

Lapud ontan ya eksperiensya nen Brother Barber, talagan sikatoy kualipikado sanen apabtangan a magmaliw ya ombiabiahen manangasikaso nen 1948, pian bisitaen iray asemblea tan amin a kongregasyon diad bandad sagur na Estados Unidos. Inkuan to a panlikliketan toy mapalayupoy a dagem sano manpupulong ed kaalogan. Dakerakel ya agagi so akapikabkabat ed sikato lapud sayan asainmin. Say aliston panagnonot to tan say seseg to ed ministeryo so nagmaliw a makanakana diad impaneskuela to ed saginonor ed koma-26 a klase na Watchtower Bible School of Gilead. Legan na satan, nagmaliw a maapit so liknaan to ed sakey a kaklase to a taga Canada, si Sydney Lee Brewer. Sikaray inkasal kayari na impangraduar da tan say honeymoon da so agawa ed antikey a biahen mamaarap ed Chicago, Illinois, a ditan ira manserbi ed saray kongregasyon. Si Sister Barber so talagan maomaong a katambayan tan lawas a lapuan na suporta parad kinen masiken to legan na duaran dekadan impanserbi ra ed saray kongregasyon.

Saramay awalaan na pankanawnawan akapikabat tan akapilimog ed sikato legan na saray dekadan sikatoy manangasikaso na distrito odino sirkito, odino ed loob na 30 taon ya impankimey tan impanbiahe to bilang membro na Mananguley ya Ulop so agmakalingwan ed saray paliwawa tan mabilabilay a panagkomento to. Walaan itayo na magenap a rason pian panliketay ‘impanalo to a kaibay Kordero.’