Siracusa​—Dinaongan nen Nambaroy si Pablo

SAY taon et manga 59 C.E., binmuat so sakey a bapor manlapud isla na Malta ed Mediteraneo a paonla ed Italya. Say arap na bapor et akurtian na ulo na “siping a sanagi (ananak nen Zeus),” saray dios ya impasen a managprotekta ed saray marino. Insalaysay na managsulat na Biblia a si Lucas a say bapor et ‘dinmoong ed Siracusa’ diad abalaten-bukig ed gilig na dayat na Sicily tan ‘nanayam diman na taloy agew.’ (Gawa 28:11, 12) Akalugan met a kaiba nen Lucas si Aristarco tan si apostol Pablo, ya inawit ed Roma pian usayen.​—Gawa 27:2.

Agtayo amta no kasin naabuloyan si Pablo ya onepas diad Siracusa. No sikato odino saray kaiba ton nambiahe et inmepas, anto kasi anengneng da?

Nen panaon na Griego tan Romano, say Siracusa et milalaslasan ed Atenas tan Roma. Unong ed tradisyon, inletneg itan na saray taga Corinto nen 734 B.C.E. Walaray panaon a say Siracusa so bantog tan ditan so nianakan na saray kabkabat a totoo nensaman, a singa say managsulat na saray komedya a si Epicharmus tan matematiko a si Archimedes. Nen 212 B.C.E., kinubkob na saray Romano so Siracusa.

No ombisita ka ed modernon syudad, nayarin nawalaan ka na pigaran ideya ed kipapasen na Siracusa diad panaon nen Pablo. Say syudad so naapag ed duaran parte​—say sakey et walad melag ya isla na Ortygia, a nayarin dinmaong ditan so barkon niluganan nen Pablo, tan say sakey et walad baleg ya isla.

Natan, nanengneng mo ed isla so geray na karaanan iran arkitektura na Griegon templo diad Sicily​—say templo nen Apolo, a say kabayag to la et sani nen komanem a siglo B.C.E. Wala met iray lusek na templo ya indeboto ed Atenas, a say kabayag to met la et sani nen komaliman siglo B.C.E., balet nagmaliw a kabiangan itan na katedral.

Say sentro na modernon syudad et walad baleg ya isla, a ditan et nayarian moy ombisita ed arkeolohikon parki na Neapolis. Asingger ed looban na satan so angiletnegan na Griegon teatro. Irerepresenta na satan so sakey ed saray alay abig ya arkitektura na Griegon teatro. Lapud sankabantag so dayat, kanian alay abig itan a lugar parad saray palabas. Diad sankaabalatenan a parte na parki et say teatro na Roma a say kabayag to la et sani nen komatlon-siglo C.E. Satan so palimpek, a walay dukey ton 140 metro tan 119 a metro ed kaawang, tan satan so komatlon sankabalgan diad Italya.

No nawalaan ka na pankanawnawan ombisita ed Siracusa, nayarian moy onyurong ed bangko a sankabantag so dayat diad Ortygia, lukasan moy Bibliam ed Gawa 28:12, tan ilitratom ed nonot mo a si apostol Pablo so akalugan ed bapor ya ondadaong dia.

[Diagram/Mapa ed pahina 30]

(Parad aktual a format, nengnengen so publikasyon)

Malta

Sicily

Siracusa

ITALYA

Regio

Puteoli

Roma

[Litrato ed pahina 30]

Saray geray na Griegon teatro ed Siracusa