Lawas Nasusumpal so Salita nen Jehova

“Anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo.”​—JOSUE 23:14.

1. Siopa si Josue, tan anto so ginawa to sanen magano lan manampot so bilay to?

 SIKATOY makilas tan anggapoy tatakotan a komander na militar, lakin walaan na pananisia tan matoor. Sikatoy katambayan nen Moises tan tinuro nen Jehova a mangidaulo ed nasyon na Israel manlapud makapataktakot a kalawakan a paarap ed dalin a panaagusan na gatas tan dilo. Sanen magano lan manampot so bilay na sayan galgalangen a laki, a si Josue, sikatoy angitilak na makapatenyeg a bilin ed saray mamasiken ed Israel. Andi-duaruwa ya apabiskeg so pananisia na saraman so dinmengel ed sikato. Tan napabiskeg met so pananisiam ed satan.

2, 3. Anto so kipapasen na Israel sanen binilin nen Josue iray mamasiken, tan anto so imbaga to?

² Ilitratom pa’d nonot mo so kipapasen, unong ya adeskribe diad Biblia: “Agawa kayari dakel ya agew, sanen si Jehova initer to so painawa ed Israel manlapu ed saray amin a kabusol da ed liberliber, tan si Josue sikato nensaman so masiken la tan naskey ed saray taon; a si Josue tinawag to so amin na Israel, saray mamasiken da tan saray uloen da, tan saray ukom da tan saray makauley da, tan inkuan to ed sikara, Siak masiken ak la tan naskey ed saray taon.”​—Josue 23:1, 2.

³ Ngalngali la 110 so edad nen Josue, a nambilay legan na sakey ed saray sankaliketan tan makatantandan peryodo ed awaran na totoo na Dios. Naimatonan ton mismo iray makapanyarin gawa na Dios, tan anengneng toy impakasumpal na dakel a sipasipan nen Jehova. Kanian, lapu ed personal ya eksperiensya to, sikato so matalek a makapangibagan: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.”​—Josue 23:14.

4. Antoran panamaseguro so inter nen Jehova ed saray Israelita?

⁴ Antoran salita nen Jehova so tinmua legan na impanbilay nen Josue? Konsideraen tayo iray taloran panamaseguro ya inter nen Jehova ed saray Israelita. Unona, sikaray iliktar na Dios manlapud panangaripen. Komadua, sikaray salimbengan to. Tan komatlo et sikaray sustunien to. Ontan met iran panamaseguro so inter nen Jehova ed saray totoo to ed modernon-panaon, tan naiimatonan tayon mismo ya ontutua iratan. Balet, antis tayon singbaten no anto so ginawa nen Jehova ed modernon panaon, konsideraen tayo ni so ginawa to ed panaon nen Josue.

Ililiktar nen Jehova so Totoo To

5, 6. Panon ya inliktar nen Jehova iray Israelita manlapud Ehipto, tan anto so pinaneknekan na saya?

⁵ Sanen inmakis iray Israelita ed si Jehova a Dios lapud impakaaripen da ed Ehipto, sikara so dinengel to. (Exodo 2:23-25) Manlapu ed mandarlang a kiew, oniay inkuan nen Jehova ed si Moises: “Linmasur ak ta ekalen ko [iray totook] ed saray lima na saray Ehipsios, tan pian itaynan ko ra ed saman a dalin tan yakar ko ra ed sakey a maong tan maawang, dia ed sakey a dalin a panagusan na gatas tan dilo.” (Exodo 3:8) Agaylan makapaliket so pakanengneng ed panumpal nen Jehova ed saya! Sanen aglabay a pataynanen nen Faraon iray Israelita ed Ehipto, impaamta nen Moises ed sikato a pagmaliwen na Dios a dala iray danum na Nilo. Tinmua so salita nen Jehova. Nagmaliw a dala so danum ed Ilog na Nilo. Inaatey iray sira, tan agla nainum so danum ditan.  (Exodo 7:14-21) Siansia nin pinaawet nen Faraon so puso to, kanian indapo nen Jehova so siamera nin bakbak, a deneskribe to so kada sakey antis ton idapo. (Exodo, kapitulo 8-12) Kayarin inatey iray panguloan ya ananak ed Ehipto diad komasamplon bakbak, ingganggan nen Faraon ya ontaynan la iray Israelita​—tan petepeteg a tinmaynan ira!​—Exodo 12:29-32.

⁶ Satan ya inkiliktar na Israel so angiter ed si Jehova na pankanawnawa pian tagibien ira bilang pinili ton nasyon. Lapud satan et nitandoro si Jehova bilang Mananumpal na saray sipan, say sakey a walaan na salitan sigpot a napanmatalkan. Pinaneknekan na satan ya atagey so pakapanyari nen Jehova no ikompara ed dirios na saray nasyon. Sano basaen tayo so nipaakar ed impangiliktar to, ombiskeg so pananisia tayo. Isipen pa labat so pakaeksperiensya a mismo ed satan! Apaneknekan nen Josue a si Jehova et talagan ‘Sankatageyan a manuna ed amin a dalin.’​—Salmo 83:18.

Sasalimbengan nen Jehova so Totoo To

7. Panon a sinalimbengan nen Jehova iray Israelita sumpad armada nen Faraon?

⁷ Komusta balet so komaduan panamaseguro, a salimbengan nen Jehova so totoo to? Napatnagan iyan panamaseguro dia ed sipan nen Jehova ya iliktar to ra manlapud Ehipto tan abuloyan toran makaaloob ed Insipan a Dalin. Tandaan a say Israel so inusilan na sinmanok a Faraon kaibay mabiskeg ya armada to, a walaan na nilasus iran karwahe. Maseguron mataletalek iyan matangsit a Faraon, nagkalalo la sanen ompatnag ya asaruko la iray Israelita ed baetan na saray palandey tan say dayat! Diad saman et sinmalet so Dios pian salimbengan iray totoo to diad impangiyan to na lurem ed baetan na sayan duaran kampo. Ambilunget ed dapag na saray Ehipsio bangta maliwawa diad saray Israelita. Legan ya aamperen na lurem so iyaabanti na saray Ehipsio, intagey nen Moises so baston to tan abelsay iray danum na Ambalangan Dayat, kanian akatakas iray Israelita bangta nalner ditan iray Ehipsio. On, sigpot a dineral nen Jehova so mabisbiskeg ya armada nen Faraon, kanian aliktar so totoo To manlapud seguradon pakatalo.​—Exodo 14:19-28.

8. Anton pananalimbeng so naeksperiensya na saray Israelita (a) diad kalawakan tan (b) sanen linmoob ira ed Insipan a Dalin?

⁸ Kayari imbeltang na saray Israelita ed Ambalangan Dayat, nanliberliber ira ed dalin ya adeskribe a ‘maawang tan makapataktakot a kalawakan a kawalaan na maditan uleg tan alakdan, diad amaga tan anggapoy danum a dalin.’ (Deuteronomio 8:15, Maung a Balita) Sinalimbengan met nen Jehova ditan so totoo to. Komusta balet so inloob da ed Insipan a Dalin? Sikaray sinumpa na mabiskeg iran armada na Canaanita. Ingen, oniay inkuan la nen Jehova ed si Josue: “Ombaliw ka ed sayan Jordan, sika, tan amin so sayan baley, angga ed dalin ya iter ko ed sikara, ed saray anak ni na Israel. Anggapo so siopaman a too a  makatalindeg ed arap mo ed amin na saray agew na bilay mo: singa wala ak nensaman ed Moises, ontan met wala ak ed sika; agak onliwat ed sika, tan sika so agko ikaindan.” (Josue 1:2, 5) Talagan tinmua iratan a salita nen Jehova. Diad loob labat na ngalngalin anemiran taon, 31 ya arari so tinalo nen Josue tan asakop to so baleg a kabiangan na Insipan a Dalin. (Josue 12:7-24) Agton balot nagawaan itan no anggapo so pananalimbeng nen Jehova.

Susustunien nen Jehova so Totoo To

9, 10. Panon a sinustuni nen Jehova so totoo to diad kalawakan?

⁹ Konsideraen natan so komatlon panamaseguro, a sustunien nen Jehova so totoo to. Kayarin tuloy na impangiliktar na Dios ed saray Israelita manlapud Ehipto, oniay insipan to ed sikara: “Nia, pauranen ko a manlapu ed tawen so tagano yo; et saray totoo ompaway ira naani tan inagew-agew mantipon ira na sakey a tinandaan a karakel.” Petepeteg a say Dios so angitarya na ‘tagano a manlapu ed tawen.’ “Sanen anengneng na saray anak na Israel iman, inkuan na sakey tan sakey ed iba to, Anto ya?” Satan imay mana, say tagano ya insipan nen Jehova ed sikara.​—Exodo 16:4, 13-15.

¹⁰ Legan na 40 a taon da diad kalawakan, inasikaso nen Jehova iray Israelita, ya intaryaan to ra na tagano tan danum. Sineguro to ni ingen ya ag-ondaan iray kawes da tan ag-onlanok iray sali ra. (Deuteronomio 8:3, 4) Amin iratan et atasian nen Josue. Saray Israelita so inliktar, sinalimbengan, tan sinustuni nen Jehova, unong ya insipan to ed sikara.

Panangiliktar ed Modernon Panaon

11. Anto so agawa diad Brooklyn, New York nen 1914, tan asabi ed saman so panaon parad anto?

¹¹ Komusta balet ed panaon tayo? Biernes na kabuasan ed saman na Oktubre 2, 1914, sanen si Charles Taze Russel, a mangidadaulo nensaman ed saray Estudyante na Biblia, so linmoob ed silir a pananganan diad Bethel ed Brooklyn, New York, tan sikatoy maligligsan angibano: “Maabig a kabuasan ed sikayon amin.” Antis ya onyurong, sikatoy malikeliket ya angiyanunsio: “Anampot la so panaon na Gentil; nigetar la so agew na arari ra.” Asabi lamet so panaon pian si Jehova, say Soberano ed uniberso, so onkiwas ed biang na totoo to. Tan peteg ya ontan so ginawa to!

12. Anton inkibulos so agawa nen 1919, tan antoray resulta na satan?

¹² Limay taon labat so apalabas, imbulos nen Jehova so totoo to manlapud “Babilonia a Baleg,” say mabiskeg ya empiryo na palson relihyon. (Apocalipsis 18:2) Pigpigara ed limog tayo natan iray maedad la ya akaimaton ed saman a makapaliket ya inkibulos. Ingen, sankanengneng tayo iray resulta. Inletneg lamet nen Jehova so puron panagdayew tan pinankakasakey to iramay manpipirawat a mandayew ed sikato. Saya so nipasakbay la panamegley nen propeta Isaias: “Nagawa dia ed saray kaunoran ya agew, a say palandey na abung nen Jehova niletneg ed toktok na saray palandey, tan nipatagey ed labas na saray pukdol; et  saray amin a nasyon onagus ira ya angga ed sikato.”​—Isaias 2:2.

13. Anton idaraak so naimatonan yo ed limog na saray totoo nen Jehova?

¹³ Talagan tinmua iray salita nen Isaias. Nen 1919 et ginapoan na alanaan a nakdaan so makpel a panagpulong ed sankamundoan, a satan so angitandoro ed panagdayew ed tuan Dios. Kaleganan na dekada 1930, apatnagan a natitipon la iray “arum a karnero.” (Juan 10:16) Unona et nilibo, insan nagmaliw a nilasus nilibo, tan natan et minilyon la so ondadapag ed puron panagdayew! Dia ed pasingawey ed si apostol Juan, sikara so adeskribe bilang “baleg ya ulop, a sikato so agnayari a bilangen na too, a nanlapu ed balang nasyon tan amin na saray kailalakan, tan binaleybaley, tan salita.” (Apocalipsis 7:9) Anto met so naimatonan yon mismo? Kaunongan karakel so Tasi nen Jehova sanen primeron naaralan yo so katuaan? Natan et masulok lan 6,700,000 so manlilingkor ed si Jehova. Diad impangibulos nen Jehova ed totoo to manlapud Babilonia a Baleg, nilukasan to so dalan parad makapalikliket ya idaraak da ed sankamundoan.

14. Anton panangiliktar so nagawa ni ed arapen?

¹⁴ Wala so sananey a panangiliktar a nagawa ni labat, a mangilalanor ed balang sakey a too. Diad makapakelkelaw a pangipatnag nen Jehova na pakapanyari to, pagiten to so amin ya onsusumpa ed sikato, tan iliktar toray totoo to tan ipaarap to ra ed sakey a balon mundo a kawalaan na inkatunong. Agaylan makapaliket so pakaimaton ed panampot na karelmengan tan ed igapo na say sankaliketan a panaon ed interon awaran na too!​—Apocalipsis 21:1-4.

Say Panasalimbeng nen Jehova Diad Panaon Tayo

15. Akin a nakaukolan so pananalimbeng nen Jehova diad panaon tayo?

¹⁵ Unong a naimano tayo, talagan kaukolan na saray Israelita ed panaon nen Josue so pananalimbeng nen Jehova. Wala ta so pidumaan na saray totoo nen Jehova ed panaon tayo? Anggapo! Pinasakbayan nen Jesus iray patumbok to: “Yawat da kayo ed pakapasegsegang, tan pateyen da kayo naani; tan gulaen da kayo naani na saray amin a nasyon nisengeg ed ngaran ko.” (Mateo 24:9) Diad loob na dakel a taon, saray Tasi nen Jehova ed dakel a daldalin so nansungdo na pirmin isusumpa tan maruksan panamasegsegang. Ingen, mapatnag a susuportaan nen Jehova so totoo to. (Roma 8:31) Papaseguroan itayo na Salita to ya ‘anggapo so ayura ya agawa a sumpa ed sikatayo’ a makapatunda ed kimey tayon panangipulong ed Panarian tan panagbangat.​—Isaias 54:17.

16. Anto so nanenengneng yon ebidensya a sasalimbengan nen Jehova so totoo to?

¹⁶ Anggaman ed panamusol na mundo, siansia  nin ondarakel iray totoo nen Jehova. Ondaraak iray Tasi nen Jehova diad 236 a daldalin, a mabisbiskeg iyan ebidensya a walad benegan tayo si Jehova, a sasalimbengan to itayo manlapud saramay mangegetman mamuyak tan mamatunda ed sikatayo. Wala tay natandaan yo a kangaranan na saray lider na politika odino relihyon a pirmin amairap ed totoo na Dios? Anto lay agawa ed sikara? Kawalaan da la natan? Maslak ed sikara et anggapo la, a singa met ed si Faraon diad panaon nen Moises tan si Josue. Tan komusta balet iramay lingkor na Dios ed modernon panaon ya inatey a matoor? Niseguro la ra ed pakanodnonotan nen Jehova. Ditan so sankaligenan lan pasen parad sikara. Malinew a no nipaakar ed sipan a pananalimbeng, napapaneknekan a tua iray salita nen Jehova.

Susustunien nen Jehova so Totoo To

17. Antoy impaseguro nen Jehova nipaakar ed espiritual a tagano?

¹⁷ Sinustuni nen Jehova iray totoo to diad kalawakan, tan susutunien to itayo met natan. Sikatayoy papakanen ed espiritual na “matoor tan makabat ya aripen.” (Mateo 24:45) Nakakabatan tayo iray espiritual a katuaan a niyamot ed nilasus a taotaon. Oniay inkuan na anghel ed si Daniel: “Kapotan mo so saray salita, tan talakan mo so libro anggan lanlamang ed panaon na kasumpalan; dakerakel naani so ombatik ya onla tan ompawil, tan say pikakabat ondaak naani.”​—Daniel 12:4.

18. Akin a nibagan ondaraak natan so tuan pikakabat?

¹⁸ Manbibilay tayo la natan ed panaon na anggaan, tan peteg ya ondaraak so tuan pikakabat. Diad sankamundoan et itotonton na masanton espiritu iray mangaaro na katuaan dia ed suston pikakabat nipaakar ed tuan Dios tan ed saray gagala to. Nikakayat la natan so Biblia ed interon dalin, pati saray publikasyon ya ontutulong ed totoo a natalosan iray mablin katuaan a walad Biblia. Alimbawa, konsideraen pa iray lugan na libron uusaren ed panagaral ya Anto so Peteg ya Ibabangat na Biblia? * Kabiangan ditan iray kapitulon: “Anto so Katuaan Nipaakar ed Dios?,” “Iner so Kawalaan na Saray Inaatey?,” Anto so Panarian na Dios?,” tan “Akin ya Aabuloyan na Dios so Kairapan?” Saratan a tepet et nilibon taon lan panuumamengan na saray totoo. Saray ebat ed saratan so mainomay la natan a naamtaan. Anggaman abaybayag ya andian na pikakabat so totoo nipaakar ed Biblia tan imbangat ed sikara na Kakristianoan so bangat na apostata, say Salita na Dios so siansia nin ontatalona tan ontutulong ed amin a manpipirawat a manlingkor ed si Jehova.

19. Antoran sipan so apaneknekan yon asumpal, tan antoy nibaga yo ed saratan?

¹⁹ Andi-duaruwa ya unong ed atalosan tayon mismo, oniay nibaga tayo: “Anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo.” (Josue 23:14) Talagan ililiktar, sasalimbengan, tan susustunien nen Jehova iray lingkor to. Wala tay nibaga yo anggan sakey a sipan to ya ag-asumpal diad aturon panaon to? Anggapo! Talagan makabat so panmatalek tayo ed napanpiyaan a Salita na Dios.

20. Akin a matalek itayon makapanilalo diad arapen?

²⁰ Anto balet so nailaloan ed arapen? Imbaga la nen Jehova ed sikatayo a maslak ed sikatayo et makapanilalon manbilay dia ed sakey ya apasimbalon dalin a makapalikliket a paraiso. Pigpigara ed limog tayo so walaan na ilalon manuley a kaiba nen Kristo diad tawen. Antokaman so ilalo tayo, dakel so rason tayo pian mansiansian matoor a singa si Josue. Nasabi panaon et ontua la so iilaloan tayo. Diad satan, sano nononoten tayo so amin ya insipan nen Jehova, onia met so nibaga tayo: “Sikara so agawa ya amin.”

[Paimano ed leksab]

Kasin Nipaliwawa Yo?

• Antoran panamaseguro nen Jehova so naimatonan nen Josue ya asumpal?

• Antoran panamaseguro na Dios so nanenengneng yon nasusumpal?

• Anto so naseguro tayo nipaakar ed salita na Dios?

[Tepetepet Parad Panagaral]

[Litrato ed pahina 23]

Sinmalet si Jehova pian iliktar toy totoo to

[Litrato ed pahina 23]

Panon a sinalimbengan nen Jehova so totoo to diad Ambalangan Dayat?

[Litrato ed pahina 24]

Panon a sinustuni nen Jehova so totoo to diad kalawakan?

[Saray litrato ed pahina 25]

Itatarya nen Jehova iray pankaukolan na totoo to natan