‘Nepeg a Mapaabeba Kayo’

SAYAN too et nanlapud bantog a syudad. Maabig so kipapasen to lapud sikatoy nianak bilang mibabaley ed Roma tan nayarin sikatoy nanlapud prominentin pamilya. Sayan too a manngaray Saulo so akagamor na sankaabigan ya edukasyon nen inmunan siglo C.E. Manga duaran lenguahe so amta to tan sikatoy nagmaliw a membro na sakey a bantog a relihyoson grupo na saray Judio​—saray Fariseo.

Nayarin nipasal nen Saulo so manmelmelag ed saray ordinaryon totoo tan mangipangta ed dilin inkatunong to. (Lucas 18:11, 12; Gawa 26:5) Impasen na saray Fariseo a kaulop nen Saulo a mas atagtagey ira nen say arum tan labalabay day pabidbir tan patawag na atatagey iran titulo. (Mateo 23:6, 7; Lucas 11:43) Lapud impakapilimog nen Saulo ed saratan a totoo, sikato so nagmaliw a mapaatagey. Amta tayo a pinairap ton maong iray Kristiano. Kayari na pigaran taon sanen sikatoy nagmaliw lan apostol Pablo, imbaga to a sikatoy datin ‘manag-ayew, managpasegsegang, tan managdumsis.’​—1 Timoteo 1:13.

On, si Saulo so nagmaliw a Kristiano, a tinawag lan apostol Pablo, tan anguma-uman so personalidad to. Bilang Kristianon apostol, mapaabeba ton imbaga a sikato so ‘kamelagan nen say kamelmelagan ed amin a sasantos.’ (Efeso 3:8) Sikato so nagmaliw a matalonan ebanghelisador, balet ta agto impasirayew so agawaan to. Imbes, inter ton amin so dayew ed Dios. (1 Corinto 3:5-9; 2 Corinto 11:7) Onia so impanimbawa ton mismo ed saray kapara ton Kristiano: “Nepeg kayon maaro, mapangasi, mapaabeba, mauyamo, tan maanos.”​—Colosas 3:12, Maung a Balita.

Kasin onaplika iyan simbawa diad panaon tayo? Makagunggona kasi so pagmaliw a mapaabeba? Kasin say inkamapaabeba et pakabidbiran na inkabiskeg?

Kasin Mapaabeba so Makapanyarin-amin a Manamalsa?

Nipaakar ed inkamapaabeba, nepeg ya ikonsidera no anto so panmoria na Dios ed sayan kalidad. Akin? Lapud sikato  so Soberano tan Manamalsa tayo. Balet midumaan ed sikato, nepeg tayon bidbiren iray limitasyon tayo. Sikatayo so akadepende ed sikato. “Nipaakar ed Makapanyarin-amin, sikato so agtayo naromog: sikato nasnaskey ed pakayari,” so inkuan na sakey a makabat a too nensaman a manngaray Elihu. (Job 37:23) On, anggan say panmorekdek labat ed maaw-awang ya uniberso et nalikna tayo ya abebbeba tayo! “Itangay yo so saray mata yo ed tagey, tan nengnengen yo,” so impaseseg nen propeta Isaias. “Siopa so amalsa ed saraya, a sikato alaen to so saray ehersito ra ed bilang; sikato tawagen to ra ya amin ed ngaran; lapu ed kabaleg a tuloy na biskeg to ed pakapanyari, tan lapu ed mabiskeg ed pakayari, anggapo so kulang anggan sakey.”​—Isaias 40:26.

Anggaman sikato so makapanyarin-amin, si Jehova a Dios et mapaabeba. Oniay impikasi ed sikato nen Arin David: “Initer mo ed siak met so kinlong na panangilaban mo; et say kauyamoan mo ginawa to ak a baleg.” (2 Samuel 22:36) Nibaga a say Dios et mauyamo odino mapaabeba lapud iyaansakit to iray abebbeban totoo a manggugunaet a mamaliket ed sikato, ya ipapanengneng to so panangasi ed sikara. Manlapud tawen et onuusdong si Jehova, a singa panangibaga, ta pian tulongan to iray ontatakot ed sikato.​—Salmo 113:5-7.

Niarum ni, papablien nen Jehova so inkamapaabeba na saray lingkor to. Oniay insulat nen apostol Pedro: “Say Dios kaingli’to so saray atatagey a linawa, et ikdan to na grasya so saray mapaabeba.” (1 Pedro 5:5) Nipaakar ed panmoria na Dios ed panagpaatagey, oniay inkuan na sakey a managsulat na Biblia: “Balang sakey a mapangta ed puso sikato so makapadimla ed Jehova.” (Uliran 16:5) Balet, panon a say inkamapaabeba et pakabidbiran na inkabiskeg?

No Anto so Lingon Panmoria ed Inkamapaabeba

Say inkamapaabeba et aliwan kipaabeba. Diad arum iran kultura nensaman, say mapaabeban too et sakey ya aripen, salanti, sakey a toon unor-unor, miserable, tan pakaskasi. Balet, idadanet na Biblia a nigalgalang so sakey no walay kapaabebaan na nonot to. Singa bilang, oniay insulat na sakey a makabat a too: “Say tumang na kauyamoan tan say takot ed Jehova sikato so saray kayamanan, tan dayew, tan bilay.” (Uliran 22:4) Tan onia so nabasa tayo ed Salmo 138:6: ‘Anggan si Jehova et atagey, wala so panangimano to ed makabos a too, bangbalet say mankinon et kabat to ed arawi.’

 Say pagmaliw a mapaabeba et agmankabaliksan a say sakey et aliwan maabilidar odino anggapo iray agawaan to. Alimbawa, imbagan mismo nen Jesus-Kristo a sikato so bogbogtong ya Anak nen Jehova, tan agton balot imburi ya importantin tuloy so ministeryo to diad dalin. (Marcos 14:61, 62; Juan 6:51) Ingen, napatnagan ed si Jesus so kapaabebaan ta diad amin ya agawaan to et inter to so amin a dayew ed Ama to tan inusar to so pakayari to pian panlingkoran tan tulongan so arum, imbes a kontrolen tan pairapen ira.

Sakey a Pakabidbiran na Inkabiskeg

Si Jesus-Kristo so maseguron akabkabat na saray kapanaonan to diad “panamegley na saray gawa a makapanyari.” (Gawa 2:22) Ingen parad arum, sikato so ‘sankaabebaan ed saray totoo.’ (Daniel 4:17) Sikato so aglambengat nambilay a mapaabeba noagta aminpiga ton imbangat met so kaimportantian na panagpaabeba. (Lucas 9:48; Juan 13:2-16) Balet, ag-apatnagan ed sikato so inkaletey anggaman sikato so mapaabeba. Sikato so makpel ya angidepensa ed ngaran nen Ama to tan sinumpal to so ministeryo to. (Filipos 2:6-8) Diad Biblia, si Jesus so inlitrato bilang masebeg a leon. (Apocalipsis 5:5) On, ipapatnag na alimbawa nen Jesus a say inkamapaabeba et mitunosan ed inkabiskeg tan inkapekder ed moral.

Legan tayon panggugunaetan a bayuboan so tuan kapaabebaan, namoria tayo a nakaukolan so pansagpot ta pian naynay tayon nipatnag ed bilay tayo so kaabebaan na nonot. Lalanoren na satan so lawas pampasakop ed linawa na Dios imbes a pilien so pakainawaan tayo labat odino gawaen iray panlabayan na laman tayo. Nakaukolan so biskeg ed moral ta pian nabayuboan tayo so inkamapaabeba, lapud nakaukolan a masakripisyo tayon unaen so panlingkor ed si Jehova tan say pankaabigan na arum a totoo, imbes a say pankaabigan tayon dili.

Saray Gunggona ed Pagmaliw a Mapaabeba

Say inkamapaabeba et agbalot pakapatnagan na inkamapaatagey odino inkatangsit. Inusar na Kasulatan so salitan “kaabebaan na linawa” pian deskribien itan a kalidad. (Efeso 4:2) Nabayuboan tayo so mapaabeban kalakal no usisaen tayon maong so inkasikatayon dili, a singa say kabiskegan tan kaleteyan tayo, saray intalona tan insaew tayo. Maabig so simbawa nen Pablo nipaakar ed saya sanen oniay insulat to: “Kuan ko sirin ed balang sakey a too ed sikayo, ya agto nonoten so inkasikaton dili ya atagtagey nen say kanepegan a nonoten; noag ingen nonoten to ed kaabebaan na linawa.” (Roma 12:3) Siopaman a manumbok ed sayan simbawa et talagan mapaabeba.

Nipatnag met so inkamapaabeba sano masimoon tayon unaen so pankaabigan na arum. Apuyanan si Pablo a manimbawa ed saray Kristiano: “Anggapon balot komon so gawaen yo a lapud kasusumpa o pampasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili.” (Filipos 2:3) Mitunosan iya ed ingganggan nen Jesus ed saray patumbok to: “Saman so kabalbalgan ed sikayo sikato naani aripen yo. Tan siopaman a mangitandoro na inkasikato, napaabeba naani; et siopaman a mangipaabeba na inkasikato, nitandoro naani.”​—Mateo 23:11, 12.

On, itatandoro odino papablien na Dios iramay mapaabeba so kanonotan da. Sayan punto so indanet nen babangatan a Santiago sanen oniay insulat to: “Manpaabeba kayo ed mata na Katawan, et itandoro to kayo.” (Santiago 4:10) Siopa ta so agmalabay ya itandoro na Dios?

Lapud inkamapaatagey ed limog na saray grupo na totoo tan indibidual, naynay iran manggugulo tan mankokolkol. Diad biek a dapag, walaray makagunggonan resulta no mapaabeba itayo. Napanggayagaan tayo so maaron panangabobon na Dios. (Miqueas 6:8) Nawalaan itayo  na kareenan na nonot lapud mas maliket tan napnek so mapaabeban too nen say mapaatagey a too. (Salmo 101:5) Balibali tan aliwan maproblema so pidedeneng tayo ed saray kapamilyaan, kakaaro, katrabahoan, tan ed arum ni ra. Saray mapaabeba et aliwan makolkol tan manangipilit ed labay da, a mainomay a manresulta ed ingongot, barongan, panem-em na sakit na linawa, tan pansisiblangan.​—Santiago 3:14-16.

On, say pamayubo ed kapaabebaan na nonot et alay abig a paraan ta pian napansiansia tayo so maong a relasyon ed arum. Makatulong itan ta pian natalonaan tayo iray problema ed sayan mundon napnoy inkasiblet tan kompetensiaan. Diad tulong na Dios, nakal nen apostol Pablo so panagpangta tan panagpaatagey a datin kagagawa to. Nepeg tayo met sirin ya ekalen so antokaman a tendensia ed pagmaliw a mapaatagey odino say panisip a mas maong itayo nen say arum. “Say mapangta onla ed unaan na kabagbag, tan say mapasang ya espiritu ed unaan na kapelag,” so impasakbay na Biblia. (Uliran 16:18) No tumboken tayo so alimbawa tan bilin nen Pablo, namoria tayo a makabat so pangiyaplika ed simbawan ‘nepeg a mapaabeba itayo.’​—Colosas 3:12, Maung a Balita.

[Litrato ed pahina 4]

Nakal nen Pablo so inkapangta tan panagpaatagey

[Litrato ed pahina 7]

Napansiansia tayo so maong a relasyon ed arum no bayuboan tayo so kapaabebaan na nonot

[Picture Credit Line ed pahina 5]

Anglo-Australian Observatory/David Malin Images