Pansukimat ed ‘Saray Aralem a Bengatla na Dios’

“Say espiritu kusimaten to so ami bengatla, pati saray kaaralman na bengatla na Dios.”​—1 CORINTO 2:10.

1. Antoray pigaran katuaan na Biblia a mamapaliket ed saray manaaral ed Biblia?

 NANONOTAN ni na maslak ed sikatayo ed Kristianon kongregasyon no panoy inkaliket tayo sanen primero tayon naaralan so katuaan. Naamtaan tayo so kabaliksan na ngaran nen Jehova, no akin ya aabuloyan toy kairapan, no akin a walaray totoon onla ed tawen, tan no anto so arapen na matoor a katooan. Nayarin inusisa tayo met la so Biblia sakbay na satan, balet sarayan bengatla so niyamot ed sikatayo, a singa met ed maslak a katooan. Aliling tayoy sakey a too ya onkukunineng ed saray korales ed dalem na danum. No anggapoy aparato, daiset labat so nanengneng ton mararakep a bengatla. Balet no walay salming to a parad dalem na danum odino no akalugan ed baluton de-salming so datal to, panliketan ton nanengneng iray alay abig a makolor a korales, sira, saray sea anemone, tan arum niran makapalikliket a pinalsa. Mipadpara, sanen walay tinmulong ed sikatayo a natalosan so Kasulatan, apasimaran tayo, a singa panangibaga, ‘iray aralem a bengatla na Dios.’​—1 Corinto 2:8-10.

2. Akin a nayarin mantultuloy so liket ed panagaral ed Salita na Dios?

² Kasin mankontento itayo labat la ed ataptapew a pikakabat ed katuaan na Biblia? Say balikas a ‘saray aralem a bengatla na Dios’ et sakopen toy pakatalos ed kakabatan na Dios a niparungtal ed saray Kristiano panamegley na masanton espiritu balet ta niyamot ed arum. (1 Corinto 2:7) Talagan anggapoy anggaan na pansukimat ed kakabatan na Dios, a makapaliket ed sikatayo! Agtayon balot naaralan so amin a nipaakar ed kakabatan na saray dalan na Dios. Say liket ya  alikna tayo sanen primeron naaralan tayo so manuna iran bangat na Biblia et mansiansia ed sikatayo ed andi-geter a panaon no itultuloy tayon sukimaten ‘iray aralem a bengatla na Dios.’

3. Akin a kaukolan a natalosan tayon maong iray rason na sisiaen tayo?

³ Akin a kaukolan tayon talosan iratan ya ‘aralem a bengatla’? Napaelet so pananisia tan talek tayo no agtayo labat la tatalosan iray sisisiaen tayo, noagta pati saray rason no akin a sisisiaen tayo iratan. Ibabaga ed sikatayo na Kasulatan ya usaren tayoy “pakayari na panagrason,” pian “napaneknekan [tayo] so maong tan makapaliket tan nasnaspot a linawa na Dios.” (Roma 12:1, 2, NW) Napabiskeg so determinasyon tayon mangunor ed si Jehova no natalosan tayo no akin a kakaukolanen ton tumboken tayo so sakey a dalan. Kanian, say pikakabat ed ‘saray aralem a bengatla’ so mamabiskeg ed sikatayo pian labanan so tukso a manggawa na saray isesebel tan mamakiwas ed sikatayon magmaliw a “mapaga ed saray maabig a gawa.”​—Tito 2:14.

4. Anto so lalanoren na panagaral na Biblia?

⁴ Kaukolan so panagaral pian natalosan iray aralem a bengatla. Balet, say panagaral et aliwan basta labat panagbasa. Lalanoren toy maalwar a pangusisa no panon a mitunosan so sakey ya impormasyon ed amta tayo la. (2 Timoteo 1:13) Kaukolan a tebeken tayo met iray rason ed saray nibaga. Say panagaral na Biblia so nepeg a mangilaktip ed panagdalepdep ed no panon tayon usaren so naaralan tayo diad panggawa na makabat iran desisyon tan diad panulong ed arum. Ontan met, lapud “amin a sulat ya impuyan na Dios sikato met so maabig a pakaaralan,” say panagaral tayo et kaukolan a mangilaktip ed ‘amin a salitan ombesngaw ed sangi na Dios.’ (2 Timoteo 3:16, 17; Mateo 4:4) Tua, kaukolan a pampelengan so panagaral na Biblia! Balet ta makapaliket met itan, tan aliwan mair-irap a talosan ‘iray aralem a bengatla na Dios.’

Tutulongan nen Jehova a Makatalos Iray Mapaabeba

5. Siopa so makatalos ed ‘saray aralem a bengatla na Dios’?

⁵ Anggano aliwa kayon mautek ed eskuelaan tan agyo nipasal so manaral, agyo ipapasen ya agyo la natalosan ‘iray aralem a bengatla na Dios.’ Legan na ministeryo nen Jesus ed dalin, imparungtal nen Jehova so pakatalos ed gagala To, aliwan ed saray de-aral, noag ed saray anggapoy aral tan ordinaryon totoo a mapaabeban tuloy a paibangat ed saray lingkor na Dios. Singa ira melag nin ugugaw no ikompara ed saramay de-aral. (Mateo 11:25; Gawa 4:13) Nipaakar ed saray ‘bengatlan . . . intadia na Dios ed saray mangaro ed sikato,’ onia so insulat nen apostol Pablo ed saray kapananisiaan to: “Say Dios impuyan tora ed sikami ed panamegley na espiritu: ta say espiritu kusimaten to so ami bengatla, pati saray kaaralman na bengatla na Dios.”​—1 Corinto 2:9, 10.

6. Antoy kabaliksan na 1 Corinto 2:10?

⁶ Panon a say espiritu na Dios so mansukimat ed “ami bengatla, pati saray kaaralman na bengatla na Dios”? Imbes a sansakey ton parungtalan so kada Kristiano, uusaren nen Jehova so espiritu to pian iwanwan so organisasyon to, a mangitatarya ed nankakasakey a totoo na Dios na pakatalos ed Biblia. (Gawa 20:28; Efeso 4:3-6) Diad sankamundoan, panggagayagaan na amin a kongregasyon so parehon programa ed panagaral na Biblia. Diad inlabas na saray taon, kinobrian da so amin a bangat na Biblia. Say masanton espiritu to so onkikiwas panamegley na kongregasyon pian tulongan iray totoo a nawalaan na awawey a nakaukolan pian natalosan ‘iray aralem a bengatla na Dios.’​—Gawa 5:32.

 No Anto so Laktipen na ‘Saray Aralem a Bengatla na Dios’

7. Akin ya agnatatalosan na dakel a totoo ‘iray aralem a bengatla na Dios’?

⁷ Agtayo nepeg ya ipapasen a mairap a talosan ‘iray aralem a bengatla.’ Say pikakabat ed ‘saray aralem a bengatla na Dios’ et aliwan malinew ed maslak a totoo, aliwan lapud ta say pikakabat na Dios et mair-irap a talosan, noag lapud papalikdoen nen Satanas iray totoo pian agda awaten so tulong ya itatarya nen Jehova panamegley na organisasyon To.​—2 Corinto 4:3, 4.

8. Antoran aralem a bengatla so tinukoy nen Pablo ed komatlon kapitulo na sulat to ed saray taga Efeso?

⁸ Say komatlon kapitulo na sulat nen Pablo ed saray taga Efeso so mangipapanengneng a ‘saray aralem a bengatla na Dios’ et mangilaktip ed dakel a katuaan a natatalosan a maong na maslak ed totoo nen Jehova, a singa say nipaakar ed insipan a Bini, say pakapili ed limog na katooan na saray indibidual a walaan na mangatatawen ya ilalo, tan say Mesianikon Panarian. Insulat nen Pablo: “Dia ed saraman a nagsisananey a kapolian agnipakabat ed saray anak na saray totoo, a singa say inkipuyan to natan ed saray sasanton apostoles to tan saray propetas ed inka-espiritu. Labay ton salitaen, a saray Gentiles sikara so makapitawir, tan kabiangan na saksakey a laman, tan kaapag ira ed sipan ed Kristo Jesus.” Inkuan nen Pablo a sikatoy apabtangan a “mangipanengneng ed totoo no panon so impangasikaso ed sagradon sekreto a niyamot ed Dios manlapu la nen apalabas a panaon ya andiay geter.”​—Efeso 3:5-9, NW.

9. Akin a pribilehyo tayon natalosan ‘iray aralem a bengatla na Dios’?

⁹ Intuloy ya impaliwawa nen Pablo so linawa na Dios a “dia ed panamegley na iglesia [odino kongregasyon] nipakabat komon ed saray . . . pasen a mangatatawen so akamayamay a karunongan na Dios.” (Efeso 3:10) Makaaral iray anghel diad pakakaimaton tan pakakatalos da ed kakabatan na pidedeneng nen Jehova ed Kristianon kongregasyon. Talagan sakey a pribilehyo parad sikatayo so pakatalos ed saray bengatla a makapainteres anggan ed saray anghel! (1 Pedro 1:10-12) Insublay ya imbaga nen Pablo a kaukolan tayon panggunaetan a ‘talosan a maong, a pati saray lapag a sasantos, no panon so kaawang tan karukey tan kaatagey tan kaaralem’ na saray Kristianon sisiaen. (Efeso 3:11, 18) Singbaten tayo so pigaran alimbawa na saray aralem a bengatla a mamalaknab na pakatalos tayo.

Saray Alimbawa na Saray Aralem a Bengatla

10, 11. Unong ed Kasulatan, kapigan a nagmaliw si Jesus a manunan kabiangan na “bini” na mangatatawen a pinagka-asawan “bii” na Dios?

¹⁰ Amta tayo a si Jesus so manunan kabiangan na “bini” na mangatatawen a pinagka-asawan “bii” na Dios ya atukoy ed Genesis 3:15. Pian napalaknab so pakatalos tayo, nayarin itepet tayo: ‘Kapigan a nagmaliw ya insipan a Bini si Jesus? Kasin sanen wala ni ed tawen antis a nagmaliw a too, sanen wadiad dalin, sanen abautismoan, odino sanen apaoli?’

¹¹ Insipan na Dios a say mangatatawen a kabiangan na organisasyon to, ya atukoy ed propesiya bilang say pinagka-asawa ton “bii,” so mamawala na sakey a bini a manmekmek ed ulo na uleg. Balet ta linmabas lay nilibon taon et say pinagka-asawan bii na Dios so ag-amawala na bini a makasarag a maneral ed si Satanas tan saray kimey to. Lapud saya, say propesiya nen Isaias so anawag ed sayan bii bilang “lepes” tan “apaermen ed linawa.” (Isaias 54:1, 5, 6) Diad saginonor, nianak si Jesus ed Betlehem. Balet kayari inkabautismoan to, sanen sikatoy alanaan na masanton espiritu tan nagmaliw ya espiritual ya anak na Dios, diad saman lambengat inyabawag nen Jehova: “Saya so Ana’ko.” (Mateo 3:17; Juan 3:3) Say manunan kabiangan na “bini” na bii so angiparungtal a siansia ed inkasikato. Diad inlabas na panaon, saray patumbok nen Jesus so alanaan met tan tinagibi na masanton espiritu. Say pinagka-asawan “bii” nen Jehova, ya abayag ya “agnananak,” so diad kaunoran et ‘nankanta’ ed liket.​—Isaias 54:1; Galacia 3:29.

12, 13. Antoran teksto so mangipapanengneng ya amin ya alanaan a Kristiano ed dalin so manugyop ed “matoor tan makabat ya aripen”?

¹² Say komaduan alimbawa na saray aralem a bengatla a niparungtal ed sikatayo et say  nipaakar ed gagala na Dios a pamili ed 144,000 manlapud limog na katooan. (Apocalipsis 14:1, 4) Inawat tayo so bangat ya amin ya alanaan a manbibilay ed dalin, ed dinanman a panaon, so manugyop ed “matoor tan makabat ya aripen” ya imbaga nen Jesus a mangitarya na nipanpanaon a “tagano” parad saray sankaabungan to. (Mateo 24:45) Antoran teksto na Biblia so amaneknek a tua iyan pakatalos? Kasin tutukoyen nen Jesus so anggan siopan Kristiano a mamabiskeg ed saray agagi to panamegley na espiritual a panamakan?

¹³ Inkuan na Dios ed nasyon na Israel: “Sikayo so saray tasik . . . say aripen ko a pinilik.” (Isaias 43:10) Balet nen Nisan 11 ed taon 33 C.E., inkuan nen Jesus ed saray lider na Israel ya impulisay na Dios so nasyon da bilang lingkor To. Inkuan to: “Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga to.” Inkuan nen Jesus ed saray karaklan: “Nia say abung yo nataynan ed sikayo ya andi lugan.” (Mateo 21:43; 23:38) Bilang aripen nen Jehova, say abung na Israel so agnanmatoor nisay makabat. (Isaias 29:13, 14) Diad saginonor na satan lanlamang ya agew, sanen intepet nen Jesus “Siopa sirin so matoor tan makabat ya aripen?” diad tua et itetepet to, ‘Anton makabat a nasyon so onsalat ed Israel pian magmaliw a matoor ya aripen na Dios?’ Inter nen apostol Pedro so ebat sanen inkuan to ed kongregasyon na alanaan iran Kristiano: “Sikayo so . . . masantos a nasyon, sakey a baley na Dios a dilin kayarian to.” (1 Pedro 1:4; 2:9) Satan ya espiritual a nasyon, “say Israel na Dios,” so nagmaliw a balon aripen nen Jehova. (Galacia 6:16) No panon a say amin a membro na Israel nensaman et anugyop ed sakey ya “aripen,” ontan met a say amin ya alanaan a Kristiano a walad dalin ed anggan dinan a panaon so manugyop ed “matoor tan makabat ya aripen.” Talagan sakey a pribilehyo parad sikatayo so pakagamor na “tagano” panamegley na aripen na Dios!

Makapaliket so Personal a Panagaral

14. Akin a mas makapaliket so panagaral na Biblia nen say basta pambasa labat ed satan?

¹⁴ Sano niparungtal ed sikatayo so balon pakatalos ed Kasulatan, agta maliket itayo ed panamabiskeg na satan ed pananisia tayo? Satan so rason no akin a makapaliket so panagaral na Biblia, ya aliwan basta pambasa labat. Kanian, sano babasaen yo iray publikasyon a parad saray Kristiano, tepetan yoy inkasikayo: ‘Panon a mipara iyan eksplinasyon ed dati lan pakatalos ko nipaakar ed teman nasisingbat? Anto niran Makasulatan a teksto odino argumento so nanonotan ko a manuporta ed saray katuaan a niprepresenta ed sayan artikulo?’ No nakaukolan ni so pansukimat, inota iray tepet yo a labay yon naebatan, tan gawaen ya asainmin ed ontumbok a panagaral.

15. Antoran asainmin ed panagaral so makapaliket, tan panon iratan a mangunggonan maong?

¹⁵ Antoran asainmin ed panagaral so mangiter ed sikayo na liket ed balon aralem a pakatalos? Saray asainmin a singa say detalyadon panagaral ed nanduruman impisipanan na Dios parad pakagunggonaan na katooan et mamalaknab na pakatalos tayo. Ombiskeg so pananisia yo diad panaral ed saray propesiyan ontutukoy ed si Jesu-Kristo odino diad bersikulo por bersikulon pangusisa ed saray libro na Biblia nipaakar ed saray propesiya. Ombiskeg met so pananisia tayo diad panrepaso ed modernon panaon ya awaran na saray Tasi nen Jehova, ya usaren so libron Jehovah’s Witnesses​—Proclaimers of God’s Kingdom, no wala iyan publikasyon ed lenguahe yo. * Tan  say panrepaso ed apalabas a “Tepetepet na Saray Manbabasa” ya impalapag ed Say Panag-Bantayan so talagan mamalinew ed pakatalos yo ed pigaran teksto. Imanoen a maong so Makasulatan a panagkatunongan ya inusar a panuporta ed saray nipresentan konklusyon. Ontulong iya pian nipasal so “pakayari yon manebek.” (Hebreos 5:14, NW) Legan kayon manaaral, manggawa na nota ed dilin Biblia yo odino diad papel pian say panagaral yo et mangunggonan maong ed sikayo tan ed saramay tulongan yo.

Tulongan Iray Kalangweran a Manggayaga ed Panagaral na Biblia

16. Panon yon natulongan iray kalangweran pian panliketan day panagaral na Biblia?

¹⁶ Baleg so nagawaan na saray atateng pian sagyaten so espiritual a ganas na ananak da. Agmemelmelagen so pakatalos na saray kalangweran ed saray aralem a bengatla. No ikdan yo na asainmin iray kalangweran nipaakar ed sakey a tema pian sukimaten bilang preparasyon ed pampamilyan panagaral na Biblia, natepetan yo ira no antoy naaralan da. Kalaktip met ed panagaral na pamilya so panagpasal pian natulongan iray kalangweran a makaaral no panon dan idepensa so pananisia ra tan paneknekan a tua so ibabangat ed sikara. Niarum ni, nayari yon usaren so brosyur a “See the Good Land” * pian ibangat iray lugar ya asalambit ed Biblia tan nipalinew so kokobrian yo ed sinimban panagbasa yo na Biblia.

17. Akin a kaukolan tayoy magmaliw a balanse ed personal a panagaral tayo na Biblia?

¹⁷ Say personal a panagaral na Biblia so makapaliket tan makapabiskeg na pananisia, balet manalwar ya agnagamgaman so panaon parad preparasyon yo ed saray pantitipon ed kongregasyon. Saray pantitipon et sananey nin paraan na panangibangat nen Jehova ed sikatayo panamegley na “matoor tan makabat ya aripen.” Balet, say kaaruman a panagsukimat so ontulong ed sikayo pian magmaliw a makabaliksan iray komento yo ed saray pantitipon​—singa bilang, diad Panagaral na Kongregasyon ed Libro odino legan a sisingbaten iray pabitar ed sinimban babasaen ed Biblia parad Teokratikon Eskuelaan Parad Ministeryo.

18. Akin a makanakana a pampelengan so panagaral ed ‘saray aralem a bengatla na Dios’?

¹⁸ Say malaknab a personal a panagaral na Salita na Dios so ontulong ed sikayon onapit ed si Jehova. Bilang pangipapanengneng ed kablian na ontan a panagaral, inkuan na Biblia: “Say kakabatan sikato so sakey a sakurong, singa met say kuarta sakey a sakurong, balet say katageyan na pikakabat sikato, a say kakabatan kawaloen to so bilay na walaan ed sikato.” (Eclesiastes 7:12) Kanian, makanakana no pampelengan yon paaralemen so pakatalos yo ed espiritual iran bengatla. Onia so isisipan na Biblia ed saramay mantultuloy a mansusukimat: “Naromog mo so pikakabat ed Dios.”​—Uliran 2:4, 5.

[Saray paimano ed leksab]

Kasin Nipaliwawa Yo?

• Anto ‘iray aralem a bengatla na Dios’?

• Akin ya anggapoy tunda na panagaral tayo ed saray aralem a bengatla?

• Akin a posible parad amin a Kristiano so pakaeksperiensya ed gayaga na pakatalos ed ‘saray aralem a bengatla na Dios’?

• Panon kayon nagunggonaan a nagkalalo manlapud ‘saray aralem a bengatla na Dios’?

[Tepetepet Parad Panagaral]

[Litrato ed pahina 28]

Kapigan a nagmaliw ya insipan a Bini si Jesus?

[Litrato ed pahina 31]

Nayarin ikdan na atateng iray ananak da na asainmin iran tema pian sukimaten bilang preparasyon ed pampamilyan panagaral