Aligen so Sankamaongan a Managgaway Babangatan

“Imano yo no panon so kadedengel yo.”​—LUCAS 8:18, NW.

1, 2. Akin a kaukolan yon imanoen so paraan na impideneng nen Jesus ed saray totoo legan na ministeryo to?

 SUSUMPALEN nen Jesu-Kristo so betang to bilang Sankamaongan a Managbangat tan Managgaway Babangatan sanen inkuan to ed saray papatumbok to: “Imano yo no panon so kadedengel yo.” (Lucas 8:16-18, NW) Onaaplika itan a prinsipyo diad Kristianon ministeryom. No talagan ondengel ka ed espiritual a panangibangat, satan so iyaplikam, diad ontan et magmaliw kan epektibon manangiyabawag na Panarian. Siempre, natan et agmo la narengel so boses nen Jesus, balet ta nabasam ed Kasulatan iray imbaga tan ginawa to. Anto so ipaparungtal na saratan nipaakar ed paraan na impideneng nen Jesus ed totoo legan na ministeryo to?

² Si Jesus et sakey a maong a managpulong na maong a balita tan managbangat na katuaan ed Kasulatan. (Lucas 8:1; Juan 8:28) Say kimey a panaggaway babangatan et namparan lalanoren toy pampulong tan pambangat. Ingen ta walaray Kristianon epektibon manpulong, balet ta no kasabi ed panangiyaral et nanairapan ira. Say panagpulong et mankabaliksay pangiyabawag ed mensahe, sabalet so pambangat nipaakar ed si Jehova tan saray gagala to et kaslakan lan mankaukolan a samay manbabangat et mamayuboy siglaotan ed saray babangatan to. (Mateo 28:19, 20) Nagawaan tayo iya no aligen tayoy Jesu-Kristo, say Sankamaongan a Managbangat tan Managgaway Babangatan.​—Juan 13:13.

3. No aligen yo si Jesus, anto so epekto na satan ed panggugunaet yon manggaway babangatan?

³ No aligen yoy metodo na panagbangat nen Jesus, natumbok yo iyan impaseseg nen apostol Pablo: “Mankurang kayo’d karunongan ed saray wala ed paway, a dondonen yo so panaon. Say salita yo komon natekepan lawas na liga, alaokan na asin, pian nakabatan yo no panon so nepeg yo a yebat ed balang sakey.” (Colosas 4:5, 6) Tua, kaukolan so pansagpot pian naalig si Jesus diad panaggaway babangatan,  balet say resulta et epektibo so panagbangat yo ta ontulong itan ed sikayo ya ‘onebat [unong ed pankaukolan na] balang sakey.’

Pinaseseg nen Jesus so Arum a Mansalita

4. Panon tayon nibaga a si Jesus et maong ya ondengel?

⁴ Inugawan la nen Jesus so ontalineng tan mamaseseg ed totoo a mangibalikas ed panmoria ra. Alimbawa, sanen mantaon na 12, sikatoy nalmo na atateng to a walad limog na saray managbangat ed templo, “ya ondedengel tan ontetepet ed sikara.” (Lucas 2:46) Aglinma ditan si Jesus pian ipalikna ed saraman a managbangat a mas dakel so amta to, noagta pian ondengel, anggaman nantetepet met. Nayarin say sakey ya akagamoran nen Jesus na panangabobon na Dios tan totoo et say ugali ton maong ya ondengel.​—Lucas 2:52.

5, 6. Panon tayon amta ya ondedengel si Jesus ed balikas na saray binangatan to?

⁵ Kayari na bautismo tan inkilanaan nen Jesus bilang Mesias, apansiansia to so interes ton ondengel ed totoo. Si Jesus et aliwan ontanlan nigalet ed ibabangat to, ya alingwanan to lan wala’ra manayay dumerengel to. Imbes et mabetbet ya ontutundan magano, mantepet no antoy walad kanonotan da, tan dedengelen toy ebat da. (Mateo 16:13-15) Alimbawa, kayari impatey na agi nen Marta a si Lazaro, oniay inkuan nen Jesus ed sikato: “Siopaman a manbilay tan manisia ed siak agbalot ompatey.” Insan to tinepetan: “Sisiaen mo ya?” Tan maseguron dinengel nen Jesus so ebat nen Marta: “On, Katawan; Siak sinisiak a sika so Kristo ya Anak na Dios.” (Juan 11:26, 27) Seguradon bali-bali liknaan nen Jesus diad pananisian imbalikas nen Marta ed ontan iran salita!

⁶ Sanen si Jesus et tinaynan na dakel iran babangatan, labay ton dengelen no antoy panmoria na saray apostol to. Kanian intepet to: “Laba’yo met so ontaynan?” Oniay ebat nen Simon Pedro: “Katawan, siopa so laen mi? Wala ed sika so saray salita na maando a bilay. Et anisia kami tan amta mi a sika so Santo na Dios.” (Juan 6:66-69) Seguradon amaliket ed si Jesus iratan a balikas! No mangibalikas na ontan a pananisia so iyaaralan yo, seguradon manliket kayo met.

Marespeton Ondedengel si Jesus

7. Akin ya anisia ed si Jesus so amayamay a Samaritano?

⁷ Say sakey nin rason no akin ya epektibo si Jesus ed panaggaway babangatan et walay panangiyansakit to ed saray totoo tan marespeton ondedengel ed sikara. Aminsan, sikatoy nampulong ed sakey a Samaritana diad abay na bobon nen Jacob diad Sicar. Leleg na satan, aliwan si Jesus labat so nansalita, inabuloyan to met a mansalita imay bii tan dinengel To. Diad pandedengel to, naimano toy interes na bii ed panagdayew kanian imbaga nen Jesus ed sikato a say aanapen na Dios et saramay mandayew ed Sikato ed espiritu tan katuaan. Angipatnag si Jesus na respeto tan interes ed sayan Samaritana, kanian intongtong to si Jesus ed arum. Bilang resulta, ‘amayamay so Samaritano ya anisia ed si Jesus nisengeg ed salita na sayan bii.’​—Juan 4:5-29, 39-42.

8. Panon ya ontulong ed sikayo a makapangigapo na tongtongan diad ministeryo so kaslakan lan tendensia na too a labalabay ton ibalikas so opinyon to?

⁸ Kaslakan lan labalabay na totoo ya ibalikas so panmoria ra. Alimbawa, saray taga Atenas nensaman et labalabay da so mangibagay opinyon da tan ondengel ed antokaman a balon bengatla. Lapud saya et epektibo so impampaliwawa nen apostol Pablo diad Areopago ed satan a syudad. (Gawa 17:18-34) Natan, sano mangigagapo kayo na tongtongan ed unabung diad pampupulong yo, nayari yon ibaga, “Pinegdat mi kayo ta labay min narengelan no antoy nibaga yo ed [sakey a tema].” Dengel yo so opinyon to, komentoan yo odino mantepet kayo nipaakar ed satan. Tan diad mauy-uyamon paraan, ipanengneng yo so ibabaga na Biblia nipaakar ed satan a tema.

Amta nen Jesus no Antoy Ibaga To

9. Anto so ginawa nen Jesus antis ton ‘nilukasan so sulsulat’ ed si Cleofas tan say kaiba to?

⁹ Agbalot nagmaliw ya ata-ata si Jesus.  Nilikud ni ed impagmaliw ton maong ya ondengel, kaslakan lan nababasa to so kanonotan na totoo, tan amta to no antoy mismon nepeg ton ibaga. (Mateo 9:4; 12:22-30; Lucas 9:46, 47) Bilang panangiyilustra: Agnambayag kayari inkioli nen Jesus, walay duaran papatumbok to a nanlapud Jerusalem a manaakar paarap ed Emmaus. “Et agawa, nen mantotongtong ira tan mantetepetan ira,” so inkuan na Ebanghelyo, “si Jesus lanlamang inmasingger, [tan] akiulop ed sikara. Balet saray mata ra asaniban pian sikatoy agda nakabatan. Et inkuan to ed sikara, Anto so sarayan tongtong a sasalitaen yon dua, leleg yon manaakar? Et tinmunda ra a maer-ermen so lupa ra. Et sakey ed sikara a manngaran na Cleofas, inmebat ya inkuan to ed sikato, Sika lambengat so linmabas ed Jerusalem ya agmo amta so saray bengatlan agawar’man ed sarayan agew? Et inkuan to ed sikara, Anto ran bengabengatla?” Sayan Sankamaongan a Managbangat et dinmengel legan dan ipapaliwawa a si Jesus a Nazareno et nambabangat na totoo, nanggagaway milagro, tan insan impapatey. Ingen, natan et walaray mangibabagan sikatoy pinaoli. Pinaulyan nen Jesus si Cleofas tan say kaiba to a makapansalita. Insan to impaliwawa so kaukolan dan naamtaan, a ‘nilukasan to ed sikara so saray sulsulat.’​—Lucas 24:13-27, 32.

10. Antoy nayari yon gawaen pian naamtaan yoy relihyoson panmoria na sakey a toon aromog yo ed ministeryo?

¹⁰ Nayarin anggapoy amta yo nipaakar ed relihyoson panmoria na sakey ya unabung. Balet, pian naamtaan itan, nayari yon ibagan labalabay yon narengel so opinyon na saray totoo nipaakar ed pikakasi. Insan yo nayarin itepet, “Diad padesir yo, wala kasi talagan onderengel ed saray pikakasi?” Diad ebat to et nayarin dakel so naamtaan yo nipaakar ed panmoria tan sisisiaen to. No sikatoy interesado ed relihyon, nayari yon nasagyat a mangibalikas ni na panmoria to diad pantepet na, “Antoy padesir yo, say Dios kasi, onderengel ed amin a pikakasi, odino walaray agto aabobonan?” Say ontan iran tepet et nayarin gawaen ton relaks so tongtongan. No bilang ta matukoy so pangibasa na sakey a teksto, gawa yo itan ed mataktikan paraan, agyo aatakien so sisiaen to. No nanliketan toy dinmengel ed sikayo, nayarin labay to kayon ompawil. Balet, panon to no walay intepet ton agyo naebatan? No ontan et mansukimat kayo ni insan kayo ompawil ya akaparaan a mangiter na ‘rason ed ilalo yo, a gawaen yo itan tekep na inkatamoy tan baleg a respeto.’​—1 Pedro 3:15, NW.

Binangatan nen Jesus Iramay Makanepegan

11. Anto so ontulong ed sikayon naromog iramay makanepegan a bangatan?

¹¹ Walay abilidad na ayadyarin Jesus a manebek no sioparay makanepegan a bangatan. Sikatayo balet et mairap tayon napugta no sioparamay “walay inklinasyon dan mangawat na katuaan a mangitonton ed andi-anggaan a bilay.” (Gawa 13:48, NW) Kapara tayo iramay apostol a binagaan nen Jesus na: “Anggan dinan a syudad ono baley a looban yo, anapen yod’man no siopa so makana.” (Mateo 10:11) Singa saray apostol nen Jesus, nepeg a say anapen  yo et saramay totoon mabulos ya ondengel tan pabangatan na katuaan ed Biblia. Naromog yo iray makana diad idengel yon maong tan pangimano ed awawey na kada toon nakatongtong yo.

12. Antoy gawaen yo pian nitultuloy yon natulongan so interesadon too?

¹² Kayari yon akatongtong so angipanengneng na interes ed mensahe na Panarian, maabig no itultuloy yon nodnonoten iray espiritual a pankaukolan to. No isulat yo so naamtaan yo ed akatongtong yo nipaakar ed maong a balita, nitultuloy yon naasistian ed espiritualidad to. Legan yon papawilen, nepeg ya ontalineng kayon maong pian naarumay amta yo nipaakar ed saray sisisiaen, awawey, odino kipapasen to.

13. Anto so nayarin ontulong ed sikayo pian natebek so opinyon na sakey a too nipaakar ed Biblia?

¹³ Panon yon nasagyat iray totoo a mangibagay opinyon da nipaakar ed Salita na Dios? Diad arum a paspasen, epektibo so pantepet na, “Sinali yo met la kasin inaral so Biblia pian natalosan itan?” Mabetbet lan naamtaan yo ed ebat na satan a tepet so awawey na sakey ed espiritual iran bengatla. Say sananey nin paraan et say pangibasa na sakey a teksto insan pantepet na, “Parad sikayo, makatunongan kasi iya?” Singa si Jesus, nayarin dakel so nagawaan yo ed ministeryo no mangusar kayo na matukoy a tepetepet. Balet, walay nepeg yon panalwaran.

Epektiboy Impangusar nen Jesus ed Saray Tepet

14. Panon yon nipatnag so interes ed panmoria na totoo diad paraan ya agyo ra susukisuken na tepet?

¹⁴ Ipatnag so interes ed panmoria na arum diad paraan ya ag-ira nasisikig. Alig yo so paraan nen Jesus ya aliwan butar-butar a manag-upapet, noagta, manguusar na saray tepet a talagan pannonoten to ka. Sikatoy sakey met a sinseron dumerengel kanian narerepreskoan tan komportable ed sikato iray masimoon a totoo. (Mateo 11:28) Agnansuyat iray totoo, antokaman so kipapasen da ed bilay, ya angiyasingger ed sikato na saray problema ra. (Marcos 1:40; 5:35, 36; 10:13, 17, 46, 47) Ta pian say sakey a too et bulo-bulos met a mangibaga ed sikayo na opinyon to nipaakar ed Biblia tan saray bangat na satan, paliisan so butar-butar a pantepet.

15, 16. Panon yon nasagyat iray totoo a mitongtong nipaakar ed relihyon?

¹⁵ Nilikud ni ed epektibon panangusar ed tepet, nasagyat yo ran mitongtong no mangibaga kayo’y makapainteres a bengatla insan yo dengelen so ebat da. Alimbawa, oniay inkuan nen Jesus ed si Nicodemo: “No say sakey a too agnianak a napasimbalo, agto nanengneng so panariay Dios.” (Juan 3:3) Ontan lan makapainteres iratan a balikas, kanian ag-apokpokan nen Nicodemo so mankomento tan ontalineng. (Juan 3:4-20) Nayari yo met a sagyaten a mitongtong iray totoo ed ontan a paraan.

¹⁶ Natan, say idarakel na relihyon et makapainteres a pantongtongan diad saray pasen a singa say Aprika, Latin Amerika, tan Mamabukig a Europa. Diad sarayan pasen, makapangigapo kayo lay tongtongan diad pangibagay: “Derlawen koy idarakel na relihyon. Balet ta walay ilalok a magano lan mankakasakey so amin a totoo ed tuan relihyon. Agta marakep awa, no ontan so nagawa?” No mangibaga kayo na bengatlan nipaakar ed ilalo yo, ya agdan balot naisip, nayarin nasagyat yo ran mangibalikas ed panmoria ra. Tan mas mainomay iray tepet a duaray posiblin ebat to. (Mateo 17:25) Kayarin komentoan na unabung so tepet yo, ebatan yo met a mismo itan panamegley na sakey odino duaran teksto. (Isaias 11:9; Sofonias 3:9) Diad italineng yon maong tan pangimano yo ed saray ebat to, nadetermina yo no antoy itongtong yo diad ontumbok.

Tinmalineng si Jesus ed Ugugaw

17. Antoy mangipapanengneng a si Jesus et interesado ed saray ugugaw?

¹⁷ Aliwa labat a diad saray adulto interesado si Jesus noag pati ed saray ugugaw. Amta to no antoray gagalawen na ugugaw tan say bungay  sangi ra. No maminsan, paasinggeren to ra ed sikato. (Lucas 7:31, 32; 18:15-17) Diad saramay ulop na karaklan a dinmengel ed si Jesus et dakdakel so ugugaw. Aminsan, sanen walaray ugugaw a lalaki ya angikelyaw na pandinayew da ed sikato bilang Mesias, inimano to itan tan imbaga ton satan et impasakbay na Kasulatan. (Mateo 14:21; 15:38; 21:15, 16) Natan, dakdakel so ugugaw a magmamaliw a babangatan nen Jesus. Kanian panon yo ran natulongan?

18, 19. Panon yon natulongan ed espiritual so anak yo?

¹⁸ Pian natulongan yo ed espiritual so ugaw nin anak yo, nepeg ya ontalineng kayo ed sikato. Kaukolan a natalosan yo iray ideya to a nayarin agmitunosan ed kanonotan nen Jehova. Antokaman so ibaga to, maabig no positibo so ibaga yo. Insan mangusar kayo na matukoy iran teksto pian tulongan a mantalos ed panmoria nen Jehova ed saray bengabengatla.

¹⁹ Makatulong so pantepet. Balet singa saray adulto, agmet labay na ugugaw so natepetan lan natepetan. Kanian, imbes a paebatan ed anak yo so piga-pigaran mairap a tepet, akin ta no mangibaga kayo na antikey nipaakar ed inkasikayo? Nayarin ibaga yo a nen ugaw kayo ni et onia odino, ontan so alikna yo, tan ipaliwawa yo no akin, depende ed pantotongtongan yo. Insan nayari yon itepet, “Sika ey, ontan mo met?” Say ebat na anak yo et nayarin manresulta ed makatulong tan makapaseseg a tongtongan nipaakar ed Biblia.

Mantultuloy ya Aligen so Sankamaongan a Managgaway Babangatan

20, 21. Akin a nepeg kayon magmaliw a maong ya ontalineng diad kimey a panaggaway babangatan?

²⁰ Ugaw man odino siopaman ni so pangitotongtongan yo na sakey a tema, importante so italineng a maong. On, panangipatnag itan na aro. No, ondedengel kayo, ipapatnag yoy kapaabebaan, tan say mansasalita et naiikday respeto tan maaron konsiderasyon. Siempre, diad italineng yo, kaukolan yon imanoen iray ibabalikas to.

²¹ Legan yon gagawaen so Kristianon ministeryo yo, itultuloy yon talinengen a maong iray unabung. Diad pangimano yon maong ed ibabaga ra, maseguron natebek yo no dinan iran mensahe na Biblia so nagkalautlan paninteresan da. Insan pampelengan yo ran tulongan diad pangiyaplika ed saray paraan nen Jesus ed panagbangat. No gawaen yo itan, natumangan kayo na liket tan inkapnek lapud aaligen yo so Sankamaongan a Managgaway Babangatan.

Panon Yon Ebatan?

• Panon a pinaseseg nen Jesus so arum a mangibesngaw ed kanonotan da?

• Akin et tinmalineng si Jesus ed saramay binangatan to?

• Panon yon nausar iray tepet ed ministeryo yo?

• Anto so nagawaan yo pian natulongan yo ed espiritual iray ugugaw?

[Tepetepet Parad Panagaral]

[Litrato ed pahina 28]

Sano manpupulong kayo, seguroen yon ontalineng kayo

[Litrato ed pahina 30]

Aaligen tayo si Jesus sano tutulongan tayo ed espiritual iray ugugaw