Kasin Susuportaan Yo so Inkasoberano nen Jehova?

“Ibaga yo ed saray nasyones a, Si Jehova man-ari.”​—SALMO 96:10.

1, 2. (a) Anto so makatantandan ebento ya agawa nen manga Oktubre 29 C.E.? (b) Anto so kabaliksan na satan parad si Jesus?

 NEN manga Oktubre 29 C.E., wala so makatantandan ebento ya agnin balot agawa nensaman diad dalin. Oniay insalaysay na managsulat na Ebanghelyo a si Mateo: “Si Jesus, sanen abinyagan la, tinmatdang a tampol a nanlapu ed danum; et nia, alukasan so saray tawen ed sikato, et anengneng [nen Juan a Managbautismo] so espiritu na Dios ya onleleksab a singa sakey a malapati, tan oonla ed [si Jesus]. Tan nia, sakey a boses a nanlapu ed saray katawenan a kuan to, Saya so Ana’ko ya inararok; napaliket ak a maong ed sikato.” Sakey iya ed saray pigaran ebento ya insulat na amin ya apatiran managsulat na Ebanghelyo.​—Mateo 3:16, 17; Marcos 1: 9-11; Lucas 3:21, 22; Juan 1:32-34.

² Say impangikalbo na masanton espiritu ed si Jesus so angipabidbir ed sikato bilang say Sakey ya Alanaan, a mankabaliksan iya na Mesias, odino Kristo. (Juan 1:33) Abidbiran a siansia imay nisipan a “bini”! Sayan manalalagey ed arapan nen Juan a Managbautismo et sikato imay sugaten nen Satanas ed mukor tan sikato met imay manmekmek ed ulo na satan a manunan onsusumpa ed si Jehova tan ed inkasoberano To. (Genesis 3:15) Manlapu la’d saman, amta nen Jesus a nepeg toy mansagpot pian nasumpal so gagala nen Jehova nipaakar ed inkasoberano To tan say Panarian.

3. Panon ya imparaan nen Jesus so inkasikato parad kimey to pian nitandoro to so inkasoberano nen Jehova?

³ Pian makapanparaan parad satan a kimey to, “si Jesus, a napno na espiritu santo, pinmawil a nanlapu ed Jordan, et intonton na espiritu dia ed lawak.” (Lucas 4:1; Marcos 1:12) Diman et 40 agew ya akapandalepdep a maong si Jesus nipaakar ed isyu na inkasoberano a pinalesa nen Satanas tan nipaakar ed kimey a nepeg Ton gawaen pian nitandoro so inkasoberano nen Jehova. Satan ya isyu so mangilalanor ed amin ya intelihentin pinalsa ed tawen tan diad dalin. Kanian kaukolan tayon konsideraen so matoor ya impanbilay nen Jesus tan nengnengen no anto so nepeg tayon gawaen pian nipanengneng tayo a labay tayo met ya itandoro so inkasoberano nen Jehova.​—Job 1:6-12; 2:2-6.

Linmesa so Isyu na Inkasoberano

4. Anto so ginawa nen Satanas ya amalesa ed isyu na inkasoberano?

⁴ Siempre, amin iratan ya ebento ya asalambit  et naimatonan nen Satanas. Kanian inataki ton tampol so manunan “bini” na “bii” a pinagka-asawa na Dios. (Genesis 3:15, NW) Amitlon danay a tinukso nen Satanas si Jesus, ya inkuan to a nepeg a gawaen nen Jesus so maabig kuno parad inkasikato imbes a gawaen so pagagawa nen Ama to. Ingen, samay komatlon pananukso so amalesa ed isyu na inkasoberano. Sanen nipanengneng nen Satanas ed si Jesus so “amin a panarian na mundo, tan say dayew da,” oniay malangas ton inkuan ed si Jesus: “Amin dara nia iter ko ra naani ed sika, no ondakmomo ka tan igalang mo ak.” Amta nen Jesus a si Satanas so peteg a mangokontrol ed “amin a panarian na mundo.” Kanian pian nipanengneng to no iner so dadapagan to diad isyu na inkasoberano, oniay inyebat to: “Arawi ka dia, Satanas: ta walan nisulat, Sika igalang mo naani so Dios a Katawan mo, tan sikato labat so panlingkoran mo.”​—Mateo 4:8-10.

5. Anton mairap a kimey so kaukolan a sumpalen nen Jesus?

⁵ Sankapatnagan ed paraan na impanbilay nen Jesus a say manunan gagala to et say pangitandoro na inkasoberano nen Jehova. Amtan maong nen Jesus a nepeg toy mansiansian matoor anggad patey diad lima nen Satanas, unong a nipropesiya a sugaten ed mukor so “bini” na bii, ta pian napaneknekan a say Dios so makanepegan a Soberano. (Mateo 16:21; 17:12) Kaukolan to met a tasian so katuaan a say Panarian na Dios so manunan usaren nen Jehova ed paneral ed rebelden si Satanas tan ed pangipawil na kareenan tan inkauksoy ed amin a pinalsa. (Mateo 6:9, 10) Anto so ginawa nen Jesus pian nasumpal iyan mairap a kimey to?

“Say Panarian na Dios Asingger la”

6. Panon ya impakabat nen Jesus a say Panarian so usaren na Dios a ‘panderal ed saray gawa na Diablo’?

⁶ Unona, “linma si Jesus ed Galilea, ya angipulpulong na ebanghelyo na Dios, tan inkukuan to, Say panaon asumpa’la, tan say panarian na Dios asingger la.” (Marcos 1:14, 15) Diad tua et inkuan to: “Kaukolan ko met ya ipulong . . . so ebanghelyo na panariay Dios ed saray arum a syudad; ta sikato’ya so nibakian ko.” (Lucas 4:18-21, 43) On, nambaroy si Jesus ed nanduruman syudad, “a nampupulong tan angiyakar na saray maong a balita na panarian na Dios.” (Lucas 8:1) Sikatoy nanggawa met na dakel a milagro​—ya amakan na amayamay a totoo, amatunda na maksil a bagyo, amaabig na saray mansasakit, tan amaoli na inaatey. Diad panamegley na sarayan milagro et pinaneknekan nen Jesus a sarag na Dios a paandien so amin a deral tan paniirap a resulta na impanrebelde ed Eden, a diad ontan et ‘naderal la iray gawa na Diablo.’​—1 Juan 3:8.

7. Anto so imbilin nen Jesus a gawaen na saray patumbok to, tan anto so resulta?

⁷ Pian malaklaknab a niyabawag so maong a balita na Panarian, tinipon nen Jesus so sakey a grupo na saray matoor a papatumbok to tan impasal to ira ed satan a kimey. Unona et pinabtangan to na kimey iray 12 apostoles to tan “imbaki to’ra a mangipulong na panarian na Dios.” (Lucas 9:1, 2) Insan, imbaki to so 70 nin babangatan pian mangiyabawag ed mensahen: “Inmasingger ed sikayo so panariay Dios.” (Lucas 10:1, 8, 9) Sanen pinmawil irayan babangatan tan imbalita ra ed si Jesus so maabig a resulta na impangipulong da ed Panarian, oniay inyebat to: “Anengneng ko so Satanas a naplag nanlapu ed tawen a singa kirmat.”​—Lucas 10:17, 18.

8. Anto so malinew ya impatnag na impanbilay nen Jesus?

⁸ Nanseet a maong si Jesus tan inanamot ton amin so pankanawnawan mantasi nipaakar ed Panarian. Sikatoy agtinmundan nankimey, a nansagpot ed agew tan labi, ya inlingwan to ni ingen iray kaslakan lan pakainawaan ed bilay. Inkuan to: “Saray kuyangen walay ungib da, tan saray manok ed tawen walaan ira na ubong; balet say Anak na too andian na napangisaralan to ed ulo to.” (Lucas 9:58; Marcos 6:31; Juan 4:31-34) Sakbay a tuloy na impatey nen Jesus, oniay makpel ya inkuan to ed si Poncio Pilato: “Nisengeg ed saya linma ak dia ed mundo, pian tasian ko so katuaan.” (Juan 18:37) Ipapatnag sirin na interon bilay nen Jesus a sikato so aglabat linma dia pian magmaliw a sankamaongan a managbangat odino managgaway  milagro odino Manangisalba ni ingen ya angisakripisyo ed dili to, noagta pian gawaen to so linawa na Soberanon si Jehova tan tasian to so pakayari na Dios a manumpal ed satan a linawa panamegley na Panarian.​—Juan 14:6.

“Asumpal la!”

9. Panon a tinmalonan siansia si Satanas ed impanugat to ed mukor na “bini” na biin pinagka-asawa na Dios?

⁹ Amin a ginawa nen Jesus nipaakar ed Panarian so ag-amaliket ed Kabusol a si Satanas a Diablo. Kanian diad panamegley na saray kabiangan na “bini” to diad dalin, salanti, say politika tan relihyon, aminpiga ton sinali a pateyen so “bini” na biin pinagka-asawa na Dios. Manlapud inkianak nen Jesus angga ed kaunoran na bilay to diad dalin et sikatoy puntirya nen Satanas tan saray onsusuporta ed sikato. Diad kaunoran, nen 33 C.E., asabi so panaon a niyawat so Anak na too ed lima na Kabusol pian sugaten to ed mukor. (Mateo 20:18, 19; Lucas 18:31-33) Ipapabitar na saray salaysay na Ebanghelyo no panon ya inmaneobra nen Satanas iray totoo​—manlapud si Judas Iscariote anggad saray atagey a saserdote, saray eskriba, Fariseos, tan Romano​—pian kondenaen si Jesus tan sikatoy idunget da ed makapaot-ot ya ipapatey diad panamairapan a kiew.​—Gawa 2:22, 23.

10. Anto so sankaimportantian ya asumpal nen Jesus diad impatey to ed panamairapan a kiew?

¹⁰ Antoy nanonotan yo sano isipen yoy Jesus a walad panamairapan a kiew, a maniirap ed kalkalna tan makapaot-ot ya ipapatey? Nayarin nanonotan yo so dondon bagat a mabulbulos ton inyapay parad makasalanan a katooan. (Mateo 20:28; Juan 15:13) Maseguron pandinayewan yo so baleg a panangaron impatnag nen Jehova diad impangitarya to na satan a bagat. (Juan 3:16) Nayarin nalikna yo so singa alikna na Romanon sundalo ya apakiwas a mangibagan: “Petepeteg a saya sikato so Anak na Dios.” (Mateo 27:54) Seguradon matukoy ya amin iratan a kiwas. Diad biek a dapag, nonoten pa so unor ya imbalikas nen Jesus diad panamairapan a kiew, a kuan to: “Asumpal la!” (Juan 19:30) Anto so asumpal? Anggaman dakel a bengatla so agawaan nen Jesus diad bilay tan impatey to, agta say manunan gagala na inyakar to diad dalin et say panolbar ed isyu nipaakar ed inkasoberano nen Jehova? Tan agta nipasakbay met a bilang sikato so “bini,” sagmaken to so graben subok manlapud si Satanas ta pian napunas so amin a pakabalawan ed ngaran nen Jehova? (Isaias 53:3-7) Saratan et ambelat a responsabilidad, ingen sinumpal ya amin iratan nen Jesus. Agaylan kabaleg ya agawaan!

11. Anto so gawaen nen Jesus pian sigpot a nasumpal so nipropesiya diad Eden?

¹¹ Lapud katooran nen Jesus, sikato so pinaoli, aliwan bilang too, noagta sakey ya “espiritu a manamilay.” (1 Corinto 15:45; 1 Pedro 3:18) Onia so insipan nen Jehova ed niglorian Anak to: “Yurong ka ed nikawanan ko, a sanlegan na panggawak ed saray kakabusol mo a totoonan na salim.” (Salmo 110:1) Saratan a “kakabusol” et say manunan kriminal, si Satanas, tan amin na saramay “bini” to. Si Jesu-Kristo, ya Ari ed Mesianikon Panarian nen Jehova, so mangidaulo ed panderal ed amin a rebelde ed tawen tan diad dalin. (Apocalipsis 12:7-9; 19:11-16; 20:1-3, 10) Sigpot lan nasumpal ed satan so propesiya diad Genesis 3:15 ontan met ed say pikakasin imbangat nen Jesus ed papatumbok to ya: “Onsabi komon so panarian mo. Nagawa komon so linawam, unong ed tawen, ontan met ed dalin.”​—Mateo 6:10; Filipos 2:8-11.

 Sakey ya Ehemplo a Nepeg a Tumboken

12, 13. (a) Anto so naiimatonan tayo natan ya ikikiwas na totoo ed maong a balita na Panarian? (b) Antoray nepeg tayon itepet ed inkasikatayo no labay tayon natumbok so bakat nen Kristo?

¹² Natan et nipupulong la ed dakel a daldalin so maong a balita na Panarian, unong ya ontan so impasakbay nen Jesus. (Mateo 24:14) Bilang resulta et minilyon a totoo so mangidededika na bilay da ed Dios. Maliket iran makagamor na saray bendisyon ya itarok na Panarian. Tatalaranan da so pambilay ya andi-anggaan a walay kareenan tan kaligenan diad paraison dalin, tan malikeliket iran manginanabang na ilalo ra ed arum. (Salmo 37:11; 2 Pedro 3:13) Kasin sakey ka la ed sarayan manangiyabawag na Panarian? No ontan, nakomendaan ka. Balet, wala ni so bengatlan nepeg a konsideraen na kada sakey ed sikatayo.

¹³ Oniay insulat nen apostol Pedro: “Si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) Imanoen a say sinalambit dia nen Pedro et aliwan say inkaseseg nen Jesus ed panagpulong odino say inkadunong to ed panagbangat, noagta say impanirap to. Lapud atasian itan a mismo nen Pedro, kabkabat to no kaunongan ya irap so mabulos a sinagmak nen Jesus ta pian makapampasakop ed inkasoberano nen Jehova tan pian napaneknekan to a talagan matila si Satanas. Sirin, diad antoran paraan a natumbok tayo so bakat nen Jesus? Nepeg tayon tepetan so inkasikatayo: ‘Anggad kaunongan ya irap so mabulos kon sagmaken pian nasuportaan tan nigalang ko so inkasoberano nen Jehova? Kasin ipapatnag ko ed paraan na kabibilay ko tan ed panusumpal koy ministeryok a manunan pampapagaan ko so panuporta ed inkasoberano nen Jehova?’​—Colosas 3:17.

14, 15. (a) Panon so inkiwas nen Jesus ed saray lingon kanonotan tan opresi, tan akin? (b) Anton isyu so nepeg tayon nodnonoten lawas? (Ilaktip iray komento diad kahon ya “Ondapag ed si Jehova.”)

¹⁴ Diad inagew-agew et walaray aarapen tayon subok tan dedesisyonan, baleg man odino melag. Panon tayon naamtaan so manepeg a paraan na ikiwas tayo? Alimbawa, sano nipaarap itayo ed pakatuksoan a manggawa na bengatla a maneral ed talindeg tayo bilang Kristiano, panon so nepeg  tayon ikiwas? Sanen binagaan nen Pedro si Jesus a kasian toy inkasikato, panon so inkiwas nen Jesus? “Ekal ka’d arap ko, Satanas,” so kuan to. “Ta agmo nononoten iray bengatlan nipaakar ed Dios, noag saray bengatlan nipaakar ed saray totoo.” (Mateo 16:21-23) Odino sano naopresian itayo na saray pankanawnawan onasenso ed pinansyal odino atagey a posisyon ed trabaho a nayarin mangapekta ed espiritualidad tayo, kasin onkiwas itayo a singa ed ginawa nen Jesus? Sanen atebek nen Jesus a saramay akanengneng ed milagro to et ‘ngalngali la ra onla a mangala ed sikato a pilit pian gawaen da ya ari,’ sikatoy inmarawi a tampol ed sikara.​—Juan 6:15.

¹⁵ Akin a mapekder a kinmiwas si Jesus ed saratan tan ed arum niran inkagawa? Lapud atebek ton maong ya aliwa labat a say personal a kaligenan odino pankaabigan to so nalalanor. Labay ton gawaen so linawa nen Ama to a Jehova tan itandoro so inkasoberano To antokaman so nagawa. (Mateo 26:50-54) Kanian, no agtayo nodnonoten lawas so peteg ya isyu, a singa ed ginawa nen Jesus, naynay a walay kapeligroan a makapikompromiso itayo odino agtayo nagawaan so duga. Akin? Lapud mainomay itayon nadaeg na saray pakana nen Satanas, a sarasarag ton gawaen a makapaayat so bengatlan mauges, a singa ginawa to sanen tinukso toy Eva.​—2 Corinto 11:14; 1 Timoteo 2:14.

16. Anto so nepeg a manunan gagala tayo ed panulong ed arum?

¹⁶ Diad ministeryo tayo, panggunaetan tayon itongtong ed totoo iray bengatlan kapapagaan da tan ipanengneng ed sikara so ebat na Biblia. Sakey iyan epektibon paraan pian nasagyat tayo so interes da a manaral na Biblia. Balet, say manunan gagala tayo et aliwan say panulong labat ed totoo a naamtaan so ibabaga na Biblia odino saray bendisyon ya itarok na Panarian na Dios. Nepeg a tulongan tayo ran natalosan so peteg ya isyu. Kasin mabulos iran magmaliw a tuan Kristiano tan manakbat ed “panamairapan a kiew” da tan manirap nisesengeg ed Panarian? (Marcos 8:34, NW) Kasin akaparaan ira ya ondapag ed saramay manusuporta ed inkasoberano nen Jehova pian napaneknekan a matila tan managpauges si Satanas? (Uliran 27:11) Pribilehyo tayo a tulongan so inkasikatayo tan saray arum a manggawa na ontan.​—1 Timoteo 4:16.

Sano say Dios Wala la ed “Amin ed Ami’ Ganagana”

17, 18. Anton makapalikliket a panaon so nailaloan tayo no ipanengneng tayo a susuportaan tayo so inkasoberano nen Jehova?

¹⁷ Legan tayon gagawaen so anggaay nayarian tayo natan pian nipanengneng ed kondukta tan ministeryo tayo a susuportaan tayo so inkasoberano nen Jehova, makapanilalo itayo ya onsabi panaon si Jesu-Kristo et “iter to so panarian ed Dios tan Ama.” Kapigan itan nagawa? Oniay impaliwawa nen apostol Pablo: “Sano naekal to la’ra ya ami panag-ari, tan ami pananguley tan pakayari. Ta sikato so nakaukolan a manari, angga ed pakapangiyan [na Dios ed] saray kabusol to ed silong na saray sali to. . . . Sirin say Anak met a dili pauleyan ed anguley ed ami ganagana, pian say Dios wala ed amin ed ami ganagana.”​—1 Corinto 15:24, 25, 28.

¹⁸ Agaylan makapalikliket a panaon sano say Dios et wala la ed “amin ed ami’ ganagana”! Nasumpal la ed satan so gagala na Panarian. Naandi la so amin ya onsusumpa ed inkasoberano nen Jehova. Nipawil la so kareenan tan inkauksoy diad interon talba. Unong ya imbalikas na salmista, amin a pinalsa so mankanta: “Ipabtang yo ed Jehova so gloria a makana ed ngaran to . . . Ibaga yo ed saray nasyones a, Si Jehova man-ari.”​—Salmo 96:8, 10.

Kasin Naebatan Yo?

• Panon ya impatnag nen Jesus a lawas ton sankanonot so isyu nipaakar ed inkasoberano na Dios?

• Anto so manunan asumpal nen Jesus diad ministeryo to tan diad impatey to?

• Diad antoran paraan a natumbok tayo so ehemplo nen Jesus pian nipanengneng tayo a susuportaan tayo so inkasoberano nen Jehova?

[Tepetepet Parad Panagaral]

[Kahon/Saray litrato ed pahina 29]

ONDAPAG ED SI JEHOVA

Mipakna so dakel ya agagi ed Korea tan ed arum nin pasen a sano manasagmak na grabe iran subok iray Kristiano, natulongan iran mansungdo no nodnonoten da lawas so rason no akin a sasagmaken da iratan a subok.

Oniay inkuan na sakey ed saray Tasi nen Jehova a nipriso legan na uley na datin Sobyet: “Say akatulong ed sikami a makapansungdo et say malinew a pakatalos mi ed isyun pinalesa diad hardin na Eden​—say isyu nipaakar ed kanepegan na Dios a manuley. . . . Amta mi a walay pankanawnawa min suportaan so pananguley nen Jehova. . . . Saya so amabiskeg ed sikami tan akatulong iya pian napansiansia mi so katooran mi.”

Insalaysay na sakey nin Tasi no antoy akatulong ed sikato tan ed saray kaagian to a walad panamairapan a kampo. Inkuan to: “Tinulongan kami nen Jehova. Anggaman mair-irap iray kipapasen, sikami so naynay ya aliing ed espiritual. Naynay kamin nampapasesegan diad pangipapanonot mi ed sakey tan sakey a wala kami ed dapag nen Jehova diad isyu na sankatalbaan ya inkasoberano.”

[Litrato ed pahina 26]

Panon ya intandoro nen Jesus so inkasoberano nen Jehova sanen tinukso nen Satanas?

[Litrato ed pahina 28]

Anto so asumpal diad impatey nen Jesus?