Say Inkasoberano nen Jehova tan say Panarian To

“Kien mo, O Jehova, so kinabalgan, tan saray pakayari, tan say gloria; tan say palabo, tan say katageyan . . . Kien mo so nanarian, O Jehova.”​—1 AWARAN 29:11.

1. Akin a si Jehova so makanepegan a Soberano diad uniberso?

 “SI Jehova impaletneg to so trono to ed saray katawenan; tan say panarian to uleyan to ya amin.” (Salmo 103:19) Diad sarayan salita et impabitar na salmista so manunan katuaan nipaakar ed pananguley. Bilang say Manamalsa, si Jehova a Dios so makanepegan a Soberanon Manuley diad uniberso.

2. Panon a deneskribe nen Daniel iray uuleyan nen Jehova diad tawen?

² Siempre, say sakey et nibagan manuley no walaray uuleyan to. Diad gapo et manuuley la si Jehova ed saray espiritun pinalsa to​—unona et say bogbogtong ya Anak to insan saray anghel. (Colosas 1:15-17) Diad inlabas na dakel a panaon, si propeta Daniel so naikdan na pasingawey nipaakar ed panuuley nen Jehova diad tawen. Oniay inkuan to: “Ninengneng ko angga ed nipasen so saray yurongan, et sakey a Masiken na saray Ag-agew so yinmurong . . . Libolibo so saray nanlingkor ed sikato, tan samplon libo ed maminsamplon libo so inmalagey ed arap to.” (Daniel 7:9, 10) Diad loob na agnabilang a panaon, si Jehova, say “Masiken na saray Ag-agew,” so nanuley bilang Soberano na abalbaleg tan organisadon pamilya na saray espiritun ananak, a manlilingkor bilang “ministros” pian nasumpal so linawa to.​—Salmo 103:20, 21.

3. Panon a pinalaknab nen Jehova so pananguley to diad uniberso?

³ Diad saginonor, pinalaknab nen Jehova so pananguley to diad impamalsa to ed maaw-awang tan komplikadon uniberso, a kaiba la’d satan so dalin. (Job 38:4, 7) No ontangay ed tawen so sakey a too, saray bitewen tan planeta ya organisado tan eksakton ontetelek et singa agla mankaukolan na manangigiya odino managkontrol. Ingen, oniay inyabawag na salmista: “[Si Jehova] nangganggan et apalsa ra. Sikato impaletneg to ra met a lawas lan lawas: sikato nanggawa na sakey a ganggan ya agnapaso.” (Salmo 148:5, 6) Lawas manuuley si Jehova diad pangiwawanwan, pangokontrol, tan pangimamaneobra to ed saray gagawaen na saray espiritun pinalsa to ontan met ed uniberso.​—Nehemias 9:6.

4. Panon so panuuley nen Jehova ed saray totoo?

⁴ Sanen pinalsa na Dios so inmunan sanasawan too, sikato so nanuley ed arum nin paraan. Nilikud ed impangitarya nen Jehova ed amin a pankaukolan na totoo pian manbilay ira a makabaliksan tan maliket, inikdan to ra  na pakauley ed saray ayep tan tanaman, salanti, pinabtangan to ra na autoridad. (Genesis 1:26-28; 2:8, 9) Mabitar sirin a say pananguley na Dios et aliwa lambengat a mapalabo tan maomaong, noagta mamapagalang met ed saray uuleyan to. Sanen manpapasakop ni si Adan tan Eva ed inkasoberano nen Jehova, walay ilalo ran manbilay ya andi-anggaan diad paraison dalin.​—Genesis 2:15-17.

5. Anto so nibaga tayo ed paraan na pananguley nen Jehova?

⁵ Anto so nibaga tayo ed sarayan amin? Unona, si Jehova so lawas manuuley ed amin a pinalsa to. Komadua, say pananguley to et mapalabo tan mamapagalang ed saray uuleyan to. Diad kaunoran, nagamoran tayo so magnayon iran bendisyon no unoren tan suportaan tayo so pananguley to. Agpankelawan sirin no akin ya onia so nibaga nen Arin David na Israel nensaman: “Kien mo, O Jehova, so kinabalgan, tan saray pakayari, tan say gloria; tan say palabo, tan say katageyan: ta amin a wala ed saray tawen tan dia ed dalin sikato so kien mo; kien mo so nanarian, O Jehova, tan nipatagey ka a singa ulo ed labas na amin.”​—1 Awaran 29:11.

Akin a Nakaukolan so Panarian na Dios?

6. Anto so pansiglaotan na inkasoberano na Dios tan say Panarian to?

⁶ Akin a nakaukolan ni so Panarian na Dios anta si Jehova, say Soberano ed uniberso et lawas manguusar ed pakapanyari tan inkabiskeg to? Kaslakan et uusaren na sakey a manuley so autoridad to diad panamegley na sakey ya ahensian nepeg a pampasakopan na saray uuleyan to. Say Panarian na Dios sirin so sakey a pakapatnagan na pananguley to ed saray pinalsa to diad interon uniberso, sakey a paraan odino pinagka-instrumento pian nipaakseb so pananguley to.

7. Akin ya inletneg nen Jehova so sakey a balon pakapatnagan na pananguley to?

⁷ Si Jehova so nanuley la diad nanduruman paraan tan diad nanduruman kipapasen. Inletneg to so balon pakapatnagan na pananguley to bilang solusyon ed sakey a balon inkagawa. Ginawa to iya sanen say nanrebeldin anghel, si Satanas, so angimpluensya ed si Adan tan si Eva pian manrebelde met ira ed pananguley nen Jehova. Sayan impanrebelde ra so panangataki ed inkasoberano na Dios. Diad anton paraan? Sanen imbaga nen Satanas ya ‘ag-ompatey’ si Eva sano kanen to so insebel a bunga, impasagilig to ed saman a si Jehova et matila, tan sirin et agnapanmatalkan. Oniay imbaga ni nen Satanas ed si Eva: “Amta na Dios a dia ed agew a pangan yo ed saman, nalukasan so saray mata yo ed satan, et singa kayo Dios, ya amta yo so maong tan mauges.” Impasiki nen Satanas a magmaong so kipapasen nen Adan tan Eva no agda unoren so ganggan na Dios tan agla ra paigiya ed Sikato. (Genesis 3:1-6) Satan so direktan angat ed kanepegan tan inkasusto na pananguley na Dios. Anto so gawaen nen Jehova?

8, 9. (a) Anto so gawaen na sakey a manuley sano walay nanrebelde ed sakop to? (b) Anto so ginawa nen Jehova sanen agawa so impanrebelde diad Eden?

⁸ Anto so ilaloan a gawaen na sakey a manuley sano walaray nanrebelde ed sakop to? Walaray onian agawa a nanonotan na saramay mikabisado ed awaran. Say kaslakan a gawaen na sakey a manuley, anggaman sikatoy mapalabo et ukomen to iray nanrebelde tan sentensiaan to ra na panagtraidor, imbes ya ibaliwala to itan. Insan walay sakey a pabtangan to na pakayari pian maneral ed saray puersa na rebelde tan mangipawil ed kareenan. Mipadpara ed satan, impatnag nen Jehova a kontrolado to so kipapasen sanen sikatoy kinmiwas a tampol tan inyabawag to so panangukom ed saray rebelde. Say sentensia to ed si Adan tan Eva et ag-ira manepeg ed regalon bilay ya andi-anggaan, insan pinapaway to ira ed hardin na Eden.​—Genesis 3:16-19, 22-24.

 ⁹ Sanen senentensiaan to na panangukom si Satanas, imparungtal to so sakey a balon pakapatnagan na inkasoberano to, sakey a paraan pian nipawil so deen tan uksoy diad interon sakop to. Oniay imbaga na Dios ed si Satanas: “Mangiyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Genesis 3:15) Sirin, imparungtal nen Jehova a gagala ton pabtangan na pakayari so “ilalak” odino bini a manmekmek ed si Satanas tan saray puersa to tan paneknekan Ton say pananguley To et manepeg.​—Salmo 2:7-9; 110:1, 2.

10. (a) Siopa so bini? (b) Anto so imbaga nen Pablo nipaakar ed kasumpalan na inmunan propesiya?

¹⁰ Saman a bini et si Jesus-Kristo, a kaiba so nikabkabiig a grupo na saray kaulop ton manuley. Sikara so manugyop ed Mesianikon Panarian na Dios. (Daniel 7:13, 14, 27; Mateo 19:28; Lucas 12:32; 22:28-30) Balet, amin iraya so agniparungtal a tampol. Diad tua, say kasumpalan na inmunan propesiya so nansiansian sagradon sekreto odino “misteryo a nisimpen ed kaitlekan na ando lan ando a panaon.” (Roma 16:25) Diad loob na dakel a siglo, pinirawat na saray matoor a lingkor na Dios so panaon a niparungtal so “misteryo” tan nasumpal so inmunan propesiya a mangiyalangon ed inkasoberano nen Jehova.​—Roma 8:19-21.

Kalkalnan Niparungtal so “Misteryo”

11. Anto so imparungtal nen Jehova ed si Abraham?

¹¹ Diad inlabas na panaon, kalkalnan imparungtal nen Jehova iray aspekto na “misteryo na panariay Dios.” (Marcos 4:11) Kabiangan ed saray angiparungtalan nen Jehova et si Abraham, ya atawag a “kaaro na Dios.” (Santiago 2:23) Onia so insipan nen Jehova ed si Abraham: “Dia ed sika so panggawaan ko na sakey a baleg a nasyon.” Diad saginonor, oniay kaaruman ya imparungtal na Dios ed si Abraham: “Dia ed sika naani pawayan na arari,” tan “dia ed ilalak mo so pakapipalaranan na saray amin a nasyon dia.”​—Genesis 12:2, 3; 17:6; 22:17, 18.

12. Panon ya apatnagan so bini nen Satanas kayari Delap?

¹² Diad panaon nen Abraham et sinali la na arum a totoo so manuley tan mangontrol ed arum. Alimbawa, oniay imbaga na Biblia nipaakar ed si Nimrod, say apo ed pueg nen Noe: “Sikato so ginmapon nagmaliw a makapanyari diad dalin. Impatnag to so inkasikato a makapanyarin umaanop a sumpa ed si Jehova.” (Genesis 10:8, 9, NW) Mabitar, si Nimrod tan saray arum a ginawa ray inkasikaran manuley et kinontrol nen Satanas. Saraya tan saray onsusuporta ed sikara so nagmaliw a kabiangan na bini nen Satanas.​—1 Juan 5:19.

13. Anto so impasakbay nen Jehova diad panamegley nen Jacob?

¹³ Anggaman pansasagpotan nen Satanas so mamawala na saray totoon manuley, nantultuloy a sinumpal nen Jehova so gagala to. Oniay imparungtal nen Jehova diad  panamegley nen Jacob, ya apo nen Abraham: “Say setro ag-ontaynan ed Juda naani, nisay tayukor na mananguley agnaekal ed leet na salisali to, angga ed isabi nen Siloh; tan dia ed sikato wala naani katutulok na saray katooan.” (Genesis 49:10) Say salitan “Siloh” so mankabaliksan na “Sikato a Makankayarian ed Satan; Sikato ya Akankien ed Satan.” Sirin, sarayan mapropetikon salita so angipabitar a walay sakey ya onsabin makanepegan a mangawat ed “setro” odino inkasoberano, tan “tayukor na mananguley” odino say pananguley ed “saray katooan.” Siopa iyan makanepegan a mangawat?

“Angga ed Isabi nen Siloh”

14. Anton sipanan so ginawa nen Jehova ed si David?

¹⁴ Diad kapolian nen Juda, say primeron pinili nen Jehova a magmaliw ya ari ed totoo to et say managpastol a David, say anak nen Jesse. * (1 Samuel 16:1-13) Anggaman walaray kasalanan tan kalilingoan nen David, sikatoy naabobonan lapud katooran to ed inkasoberano nen Jehova. Nipaakar ed propesiya diad Eden, onia so sipanan a ginawa nen Jehova ed si David: “Paalageyen ko so binim ya ontumbok ed sika, a sikato so manlapu ed saray banel mo, tan iletneg ko so panarian to.” Saya so agmanutukoy ed si Solomon ya ilalak tan kasalat nen David, lapud oniay nidalatdat ed sipanan: “Iletneg ko so yurongan na nanarian to lawas.” Diad sayan sipanan, nipabitar a say insipan a ‘bini’ na Panarian so manlapud poli nen David.​—2 Samuel 7:12, 13.

15. Akin a nibagan say panarian na Juda et angirepresenta ed Panarian na Dios?

¹⁵ Inggapo nen David so sakey a dinastiya na arari a nilanaan na masanton larak na atagey a saserdote. Sarayan arari sirin so atawag ya alanaan, odino mesias. (1 Samuel 16:13; 2 Samuel 2:4; 5:3; 1 Arari 1:39) Sikara so nibaga ya akayurong ed trono nen Jehova tan manuley bilang arari ed Jerusalem a mangirerepresenta ed sikato. (2 Awaran 9:8) Diad ontan a pantalos, say panarian na Juda so angirepresenta ed Panarian na Dios tan pakapatnagan na inkasoberano To.

16. Antoray resulta na impanuley na saray arari ed Juda?

¹⁶ Sanen nampasakop iray arari tan totoo ed inkasoberano nen Jehova, nanggayagaan da so proteksion tan bendisyon To. Say impanuley nen Solomon so panaon na agnaparaan a kareenan tan aligwas, a mapropetikon mangililitrato ed uley na Panarian na Dios sano sigpot lan naandi so impluensya nen Satanas tan niyalangon lay inkasoberano nen Jehova. (1 Arari 4:20, 25) Makapaermen ta maslak ed saray arari ed linya nen David so ag-angunor ed saray kakaukolanen nen Jehova, tan saray totoo so nandayew ed saray idolo tan nagmaliw ya imoral. Diad kaunoran, inabuloyan nen Jehova iray taga-Babilonia a maneral ed satan a panarian nen 607 B.C.E. Diad saman et singa tinmalona si Satanas ed gunaet ton deralan so inkasoberano nen Jehova.

17. Anto so angipabitar a si Jehova so siansia nin manuuley anggaman angangga la so panarian nen David?

¹⁷ Say impangangga na panarian nen David, ontan met ed akaunan impangangga na amianen a panarian na Israel, so agmamapaneknek ed kakulangan odino insaew na pananguley na Dios, noagta saratan so makapaermen ya epekto na impluensya nen Satanas tan say insian na too ed Dios. (Uliran 16:25; Jeremias 10:23) Pian nipatnag nen Jehova a sikato nin siansia so manuuley, oniay inyabawag to diad panamegley nen propeta Ezequiel: “Yalis mo so mitra, tan ekalen mo so balanget . . . Baliktaren ko, baliktaren ko, sikato naani baliktaren ko: saya anggapo met la naani, angga ed onsabi so akankanepegan; et sikato naani iter ko ed sikato.” (Ezequiel 21: 26, 27) Ipapabitar na sarayan salita a say insipan a ‘bini,’ samay “akankanepegan,” so onsabi ni labat ed saman.

18. Anto so impasabi nen anghel Gabriel ed si Maria?

¹⁸ Kasabi 2 B.C.E., si anghel Gabriel so imbaki ed si Maria, sakey a birhen diad Nazaret, a syudad na Galilea diad mamaamianen a Palestina. Oniay inyabawag to: “Nia, ilukon mo tan ‘yanak mo so sakey ya anak a laki et tawagen mo so ngaran to a Jesus. Sikato naani baleg, et ningaran ya Anak na Sankatageyan; et iter na Dios a Katawan ed sikato so trono nen David ya ama to; et manari lawas ed abung nen Jacob; et say panarian to andi-angga to.”​—Lucas 1:31-33.

19. Sanen nianak si Jesus, anton makapaliket ya ebento so onsabi la’d saman?

¹⁹ Diad saman et asingsingger lan niparungtal so “misteryo.” Say manunan kabiangan na insipan a ‘bini’ et ompatnag la ed saman. (Galacia 4:4; 1 Timoteo 3:16) Say mukor to so sugaten nen Satanas. Balet mekmeken na sayan ‘bini’ so ulo nen Satanas, a sigpot To lan deralen iyan kabusol pati say amin a mauges a puersa to. Paneknekan to met a diad panamegley na Panarian na Dios et ekalen to lan amin so mauges a ginawa nen Satanas tan niyalangon lay inkasoberano nen Jehova. (Hebreos 2:14; 1 Juan 3:8) Panon itan a gawaen nen Jesus? Anton ehemplo so intilak ton aligen tayo? Naamtaan tayo iray ebat diad ontumbok ya artikulo.

[Paimano ed leksab]

Kasin Nipaliwawa Yo?

• Akin a si Jehova so manepeg a Soberano ed uniberso?

• Akin ya inletneg nen Jehova so Panarian?

• Panon a kalkalnan imparungtal nen Jehova so sagradon sekreto odino “misteryo”?

• Anto so mangipapabitar a manuuley nin siansia si Jehova anggaman angangga lay panarian nen David?

[Tepetepet Parad Panagaral]

[Litrato ed pahina 23]

Anto so impasakbay nen Jehova diad panamegley nen Abraham?

[Litrato ed pahina 25]

Akin a say impangangga na panarian nen David et agmamapaneknek a sinmaew so inkasoberano nen Jehova?