Tepetepet na Saray Manbabasa

Anto so nepeg a panmoria na sakey a Kristiano ed panag-anop tan panagbanwit?

Ag-isesebel na Biblia so panag-anop odino panagbanwit. (Deuteronomio 14:4, 5, 9, 20; Mateo 17:27; Juan 21:6) Anggaman ontan, walaray pigaran prinsipyo ed Biblia a nepeg nin nonoten na saray Kristiano a manaanop odino manbabanwit.

Inabuloyan na Dios si Noe tan saray kailalakan to a pateyen tan kanen iray ayep, daput no patedteren da so dala na saratan sakbay a kanen. (Genesis 9:3, 4) Sayan ganggan so angipabitar a nepeg a respetoen so bilay na ayep ta nanlapu itan ed Dios. Kanian, saray Kristiano et agmamapatey na saray ayep lapud isport odino panliliket labat. Talagan papablien da so bilay.​—Uliran 12:10.

Nepeg tayo met ya ikonsidera so arum nin aspekto nipaakar ed awawey tayo. Sanen akarel na dakerakel a sira iramay managsigay ya apostol, mapatnag ya aliketan ira. Ingen, agda inlastog so abilidad dan mangerel odino agda itan ginawa pian mikompetensia ed arum, pian paneknekan so inkalaki ra, odino para labat ed liket na pananap, pangerel, odino pamatey.​—Salmo 11:5; Galacia 5:26.

Kanian, nayarin tepetan tayo so inkasikatayo: ‘Kasin ehemplo ak no nipaakar ed panagrespeto ed panmoria nen Jehova ed bilay? Kasin say pinonot ko tan bungay-sangik et say panag-anop tan panagbanwit? Kasin ipapanengneng na paraan na panagbilay ko a panliliketan ko so panag-anap, panag-erel, panagpatey na ayep odino sira? Odino ipapatnag na kabibilay ko a sakey ak a ministro na Dios? Kasin maapit ak la ed saray agmananisia odino napapaulyanan ko lay pamilyak lapud sarayan aktibidad?’​—Lucas 6:45.

Diad arum a bansa, walay panaon ya iyaabuloy na ley so panag-erel na ayep tan sira. Nayarin ibaraan na saray manaanop odino mangeerel na sira so panaanap day kanen da pian paulyanan lay espiritualidad da. Balet, nipatnag tayo so pananisia tan panagmatalek ed Dios sano ituloy tayon unaen so gagala to. (Mateo 6:33) Niarum ni, uunoren na saray Kristiano so amin a ley nen “Cesar” nipaakar ed panag-erel na ayep tan sira, estriktoan man itan na gobierno odino andi.​—Mateo 22:21; Roma 13:1.

Kanian, kaukolan ya itunos na arum so kanonotan da ed saray estandarte nen Jehova ta pian natumbok da so panmoria to nipaakar ed panag-anop tan panagbanwit. (Efeso 4:22-24) Diad biek a dapag, kaukolan tayo met a respetoen iray maalwar a desisyon na arum. Oniay matukoy a simbawa nen apostol Pablo nipaakar ed sayan pamaakaran: “Ag-itayo la sirin manuukoman: noag ingen ukomen yo ya, ta anggapo so mangiyan komon na katiroran o pansengegan na kapelagan ed dalan na agi to.” (Roma 14:13) No ipatnag tayo so masakripisyon aro tan respeto ed arum, niwala so kareenan diad kongregasyon tan napaliket so Manamalsa tayo, say Lapuan na amin a bilay. ​—1 Corinto 8:13. *

[Paimano ed leksab]