Wala Kasi Biblia nen Jesus?
Wala Kasi Biblia nen Jesus?
ANGGAPO. Akin? Lapud say Biblia a walad sikatayo natan et agni akompleto ed panaon to. Anggaman ontan, diad saray sinagoga nensaman et walaray koleksion dan lukot a pakabasaan ed sulsulat ya amta tayon nagmaliw a kabiangan na Biblia. Nambasa si Jesus manlapud lukot nen Isaias diad sinagoga ed Nazaret. (Lucas 4:16, 17) Ontan met, nadngel nen apostol Pablo so “impanbasa na Ganggan tan saray Propeta” diad Antioquia ed Pisidia. (Gawa 13:14, 15) Insan imbaga na babangatan a si Santiago a saray sulat nen Moises et ‘imbasa ed saray sinagoga ed balang sabaton.’—Gawa 15:21.
Kasin saray totoo nen inmunan siglo et walaan na saray lukot na Masanton Kasulatan? Samay Etiopen eunoko a kabiangan ed palasyo nen Reyna Candace et mapatnag a walaan na lukot lapud sikato so ‘akayurong ed luganan to, tan babasaen to so propeta Isaias’ sanen sikatoy inasinggeran nen babangatan a Felipe diad dalan a paonla’d Gasa. (Gawa 8:26-30) Sakey ni, kinerew nen apostol Pablo ed si Timoteo ya awiten to iray “lukot, nagkalalo la ed saramay pergamino.” (2 Timoteo 4:13, NW) Anggan ag-imbaga nen Pablo no dinan iratan a lukot, posiblin kabiangan iratan na Hebreon Kasulatan.
Unong ed sakey a propesor na Semitiko iran lenguahe a si Alan Millard, diad limog na saray Judio et nayarin saraman labat so “maimpluensyan totoo ed Palestina, saramay mangibabagan de-aral ira, saray arum a Fariseo tan managbangat a singa si Nicodemo” so walaan na saray lukot na Kasulatan. Say sakey a rason et lapud mabmabli itan. Kinuenta nen Millard a “say bili na sakey a kopya na Isaias et manga anemira anggad samploran denario” tan imbaga to met a say kompleton Hebreon Biblia et “onduga ed 15 anggad 20 a lukot,” odino manbili na ngalngali kapalduay taon a sueldo.
Ag-ibabaga na Biblia no kasin si Jesus odino saray babangatan to et walaan na saray lukot na Kasulatan. Balet, talagan kabkabisado nen Jesus so Kasulatan, nayarian ton tukoyen odino idalatdat itan lapud satan et memoryado to. (Mateo 4:4, 7, 10; 19:4, 5) Agta nepeg a satan so mamakiwas ed sikatayo natan pian kabisadoen so Biblia, lapud aliwa lan mabmabli itan tan mainomay lay makala?