Wala Lay Sankamundoan a Pankakasakey​—Panon?

PARAD sika, antoy kabaliksan na “pankakasakey”? Parad arum, sayan salita et mankabaliksan labat na kaandiay balingaan odino panlalaban. Alimbawa, no pinirmaan na duara odino pigara niran bansa so sakey a paknaan nipaakar ed kareenan, nayarin nibagan wala lay pankakasakey da. Balet, peteg kasin pankakasakey itan? Andi.

Nonoten pa iya: Diad inlalabas na saray taon, nilibo lan paknaan parad kareenan so ginawa balet ta agmet lanlamang natotoor. Akin? Mabetbet a say rason et mas interesado iray lider na mundo a napansiansiay inkasuperyor da nen say ed pakagamor na kareenan tan pankakasakey. Sakey ni, walaray bansan natatakot ed posiblin nagawa no bilbilang ta daegen la na arum a bansa so puersa na militar da.

Sirin, sano say duaran bansa et agmanggueguerra, agkabaliksan na satan a sikaray nankasakey la ed kareenan. Alimbawa, no walay duaran laki a pinatoyongan day sakey tan sakey na paltog, nibaga la kasin walay kareenan ed baetan da lapud agda itan kakabliten? Seguradon andi! Balet, singa ontan so kipapasen natan na dakel a bansa. Lapud kaaandi lay talek, dakel so natatakot ya ompan onsabi panaon et usaren la na saray bansa so armas da. Anto lay agawaan pian naamper so ontan a desyang?

Takot ed Nuklear Iran Armas​—Sesga ed Pankakasakey

Say paniilaloan na dakel et say Nuclear Non-Proliferation Treaty (Paknaan Parad Agpamarakel na Nuklear Iran Armas) odino NPT. Sayan paknaan, ya inaprobaan nen 1968, et mangisesebel ed panggaway nuklear iran armas diad saray bansan andian ni, tan mangokontrol na pamarakel ed saratan diad saray bansan walaan la. Say ultimon gagala na NPT et say sigpot a pamaandi ed nuklear iran armas, tan diad kaplesan et wala lay masulok a 180 a bansa ya akapirma ed satan.

Anggaman ompatnag ya alay-abig itan a gagala, momoriaen na arum a kritiko a say NPT et pakana labat pian pugeran a manggawa na nuklear iran armas iramay bansan andian ni. Kanian, tatakotan ya ompan nabababawian so arum a pinmirma ed satan a paknaan. On, moriaen na arum a bansa a talagan agmakatunongan a sebelan iran manggawa na saray armas a panisiaan dan pakasalimbengan da.

Mas onloloor iyan isyu tan nayarin ondarakel ni ingen so posiblin peligro lapud  ta agsesebelan na NPT iray bansa a manggawa na nuklear ya enerhiya. Kanian natatakot so arum ya ompan saramay bansan say pangipapasenan ed sikara et uusaren da so nuklear ya enerhiya parad mareen iran getma, et maamot manayan manggagawa na nuklear iran armas.

Anggan saray bansan walaan lay nuklear iran armas et nayarin mangibaliwala met ed NPT. Ibabaga na saray kritiko a kakulangkulangan so panilalo a saray bansan walaay dakel ya akasimpen a nuklear iran armas et sigpot a mangekal odino mamawas ingen na saratan. Unong ed sakey a reperensya, “pian nagawa iya, nepeg a magmaliw a sankaaron maong tan sigpot a manmatalek ed sakey tan sakey iray bansan diad kaplesan et manbabalingaan, [kanian mairap a panisiaan a] nagawa ni itan.”

Anggaman masimsimoon iray totoo ed pansasagpot da pian nagamoray pankakasakey, saratan so siansian onsasaew. Agla itan pankelawan na saray manaaral na Biblia, lapud ibabaga na Salitay Dios: “Aliwa a wala ed too a manakar a mangitonton ed saray kurang to.” (Jeremias 10:23) Diretsaan met ya ibabaga na Biblia: “Wala so dalan a singa maptek ed too, balet say sampot to sikara so saray dalan na patey.” (Uliran 16:25) Limitado labat so nagawaan na gobiernoy too pian nagamoran so pankakasakey. Balet, agto labay ya ibagan anggapo lay ilalo tayo.

Say Lapuan na Tuan Pankakasakey

Lugan na Biblia so sipan na Dios a niwalay sankamundoan a pankakasakey, balet aliwan diad panamegley na sagpot na too. Say Manamalsa​—a ginagala ton manbilay ed kareenan so sankatooan​—so manggawa ed bengatlan agsarag na too. Parad arum, satan so mairap a panisiaan. Balet, talagan gagala na Dios nanlapu la’d gapoy-gapo a say sankatooan et manbilay ed kareenan tan mantutunosan. * Papaneknekan na dakel a kasulatan ed Biblia ya ag-anguman so gagala na Dios a pankasakeyen so katooan. Niraya so pigara labat ya alimbawa:

• “Gala, ta nengneng mo so saray gawa nen Jehova, no anto a kaingewan so ginawa to dia ed dalin. Sikato patundaen to so bakabakal angga ed sampot na dalin; sikato balbalen to so bekang, tan puteren to a mankadua so gayang; sikato ipool to so karusa ed apoy.”​—SALMO 46:8, 9.

• “Ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa saray danum sakbongan da so dayat.”​—ISAIAS 11:9.

• “Inakmon to so patey ed ando lan ando; et say Katawan a Jehova punasen to naani so saray lua ya unagus ed saray amin a lupa; et say kabalawan na baley to ekalen to naani a manlapu ed amin a dalin: ta si Jehova sikato so sinalita to.”​—ISAIAS 25:8.

• “Unong ed sipan to alagden tayo so saray tawen a balo tan dalin a balo,  a sikara so panaayaman na katunongan.”​—2 PEDRO 3:13.

• “[Say Dios] punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot:  ta saray  una a bengatla sikara so linmabas la.”​—APOCALIPSIS 21:4.

Napanmatalkan irayan sipasipan. Akin? Bilang Manamalsa, walay pakayari nen Jehova a Dios a pankasakeyen so katooan. (Lucas 18:27) Tan pampilpilalekan ton gawaen itan. Diad tua, sanen tinukoy itan na Biblia, inkuan na satan a “[“panliketan na Dios,” NW] so panagtipon ed saray amin a bengatla ed Kristo, na saray bengatlan wala ed tawen, a singa met ed saray wala ed tapew na dalin.”​—Efeso 1:8-10.

Say sipan na Dios a “dalin a balo” a “panaayaman na katunongan” et aliwan kugkugip. (2 Pedro 3:13) Tan no nipaakar ed saray sipan nen Jehova a Dios, oniay inkuan to: ‘Say salitak ag ompawil ed siak a paoypaoy, no ag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.’​—Isaias 55:11.

Pinankasakey na Salitay Dios

Singa nibaga la ed inmunan artikulo, imbes a pankasakeyen na relihyon so katooan, kaslakan lan satan ni ingen so sengegan na inkaapag-apag da. Nepeg tayon nonoten a maong iya, lapud ta no manisia tayo a walay Manamalsa, agta makatunongan labat ya ilaloan a saray managdayew to et nepeg a mareen tan mankakasakey? Siempre!

Say kaaapag-apag na katooan lapud relihyon et agbalot linawa na Dios tan agmitunosan ed Salita to. Noagta, paneknek iya ya ag-aabobonan na Dios irayan relihyon a mangiyaalibansay paraan na too pian nagamoran so pankakasakey imbes a mangitandoro ed gagala na Dios. Tinawag nen Jesus a “mansimpisimpitan” iramay relihyoson lider nen panaon to tan imbaga to ed sikara: “Maong so impangipropeta nen Isaias ed sikayo, a kuan to, ‘Sayan baley igalang to ak ed saray bibil da; Say puso ra balet arawi’d siak. Balet maapa so panangigalang da’d siak, Ya ibangat dan singa matuan kakabatan da so bilibilin na saray totoo.’”​—Mateo 15:7-9.

Diad pidumaan, pankakasakeyen na tuan panagdayew iray totoo. Impasakbay nen propeta Isaias: “Et nagawa dia ed saray kaunoran ya agew, a say palandey na abung nen Jehova niletneg ed toktok na saray palandey, tan nipaatagey ed labas na saray pukdol; et saray amin a nasyon onagus ira ya angga ed sikato. Et mangukom ed leet na saray nasyon, tan mangigeter a nipaakar ed dakerakel a baley; et pitpiten da naani so saray kampilan da a pagmaliwen da a dingding na lukoy, tan saray gayang da a komkompay. Say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.”​—Isaias 2:2, 4.

Diad masulok lan 230 a daldalin natan, saray Tasi nen Jehova so manguunor ed instruksion ya inter nen Jehova a Dios nipaakar ed daladalan na pankakasakey. Anto so pundasyon na pankakasakey da? Insulat nen apostol Pablo: “Ikawes yo so aro, a sikato so singer yo ed inkayadyari.” (Colosas 3:14) Say orihinal a Griegon salita ya inusar nen Pablo parad “singer” et nayarin ontukoy ed saray ula-ulat na laman tayo. Sarayan ula-ulat et malet a singa lubir, tan walay duaran importantin usar da. Nilikud ed pamapasiansia ra ed nanduruman parte na laman tayo ed pasen da, paneeletan da met iray pukepukel.

Singa itan ed aron impanengneng nen Kristo. Satan et aglabat basta mamuger ed saray totoo a manpateyan. Noagta, gawaen to met a mantutunosan iray nanduruman klase na totoo. Alimbawa, lapud aro kanian nayarian na totoo so manbilay unong ed samay tatawagen na karaklan a Binmalitok a Ganggan, a nirekord ed Mateo 7:12, a ditan et inkuan nen Jesu-Kristo: “Amin a bengatla sirin a labay yo a gawaen na totoo ed sikayo, ontan so gawaen yo met ed sikara.” Say itutulok ed sayan prinsipyo so tinmulong ed dakel a totoo pian napaliisan so pangidumaduma.

‘Aro ed Sakey tan Sakey’

Determinado iray Tasi nen Jehova a paneknekan a babangatan ira nen Kristo diad panguunor da ed samay imbaga to: “Amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:35) Nagkalautlan nipapatnag so ontan ya aro diad saray panaon a walay kaguloan nisengeg ed rasa tan politika. Alimbawa, sanen walay agawan palanit a panagpatey ed Rwanda nen 1994, impanengneng na  saray Tasi nen Jehova diman so panangaro ra ed sakey tan sakey. Inrisga na saray Tasi a kabiangan na tribun Hutu so bilay da pian salimbengan iray kaagian dan kabiangan na tribun Tutsi!

Siempre, aliwan realistiko so panilalon saray bansa et nawalaay panangaro a sarag ton pankasakeyen so totoo ed sankamundoan. Unong ed Biblia, nagawa itan sano asabi la so panaon ya inggeter na Dios. Balet, anggan natan ni labat et sarag lan ikawes na totoo so aro diad ontan et nagamoran day pankakasakey.

Nen imbeneg a taon, masulok a sakey bilyon ya oras so inusar na saray Tasi nen Jehova diad ibibisita tan pangitotongtong da ed saray totoo nipaakar ed Biblia tan say kaimportantian na satan ed sayan panaon a pambibilayan tayo. Pinankasakey na suston pikakabat ed Salita na Dios so minilyon a totoo, arum ed sikara et datin manbubusolan. Singa bilang, saray Arabo tan Judio, Armeniano tan Turko, Aleman tan Ruso, diad pamitla labat na pigara.

Labay moy makaaral nin maong nipaakar ed pakayari na Salita na Dios, say Biblia, a pankasakeyen iray totoo? Sirin, ipangasim a kontaken iray Tasi nen Jehova diad lugar yo, odino mansulat ka ed matukoy ya address a nilista ed pahina 2.

[Paimano ed leksab]

[Blurb ed pahina 4]

Nilibo lan paknaan parad kareenan so ginawa balet ta agmet lanlamang natotoor

[Blurb ed pahina 7]

Say panangiyaplika ed saray prinsipyo na Biblia so angitarok na pankakasakey, bengatlan agnagawaan na gobiernoy too

[Litrato ed pahina 5]

Tutukoyen na Salita na Dios so Lapuan na tuan pankakasakey

[Litrato ed pahina 7]

Saniiban mangipapaalagey na pasen a panagdayewan iray Tasi nen Jehova a nanlapud tribu na Hutu tan Tutsi