Ag-ontalona so Antokaman ya Ayura a Ginawan Sumpad Sikayo

“Anggapo so ayura ya agawa a sumpa ed sika ya onaligwas.”​—ISAIAS 54:17.

1, 2. Panon ya ipapatnag na saray eksperiensya na saray Tasi nen Jehova ed Albania a tudtua so Isaias 54:17?

 PIGARAN dekada lay apalabas, wala so makpel a grupo na saray Kristiano diad sakey a melag, ingen mapalandey a bansa ed abalaten-bukig ya Europa. Sikara so nanggunaetan a deralen na gobiernon ateista tan Komunista. Balet, ag-ira aderal anggano pinairap ira, impisok ira ed kampon paskaran so pantrabaho, tan inataki ira na media. Siopa iyan grupo? Saray Tasi nen Jehova ed Albania. Anggaman nairapan iran maong a makapantipon tan makapanpulong, say impansungdo ra ed dakel a dekada so angitandoro tan amagalang ed Inkakristiano tan angidayew ed ngaran nen Jehova. Nen imbeneg a taon, oniay inkuan na sakey ya abayag lan matoor a Tasi sanen nidedika iray balon pasilidad na sangan opisina ra: “Anggan antoy gawaen nen Satanas, sikato so naynay a natatalo tan si Jehova so lawas manatalo!”

2 Saraya so mabiskeg ya ebidensia a tudtua so insipan na Dios ed saray totoo to a nabasa ed Isaias 54:17: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani.” Pepekderan na awaran ya agbalot naamper na mundo nen Satanas so panagdayew na saray dedikadon lingkor nen Jehova a Dios.

Saray Agtinmalonan Sagpot nen Satanas

3, 4. (a) Anto so kabiangan ed saray ayura nen Satanas? (b) Diad anton paraan ya apaneknekan ya agtinmalona iray ayura na Diablo?

3 Saray ayuran inkana sumpad saray tuan managdayew et saray pananebel, maramsak a panangataki, panangipriso, tan ‘panagsaol diad panamegley na ganggan.’ (Salmo 94:20) Diad tua, legan tayon aaralen iyan artikulo, ‘nasasali’ so katooran ed Dios na saray Tasi nen Jehova ed arum a bansa.​—Apocalipsis 2:10.

 4 Alimbawa, inreport na sakey a sangan opisina na saray Tasi nen Jehova a diad loob labat na sakey taon et walay 32 ya inkagawa a sinakitan iray lingkor na Dios sanen manpupulong ira. Niarum ni, wala so 59 ya inkagawa ya inerel tan inkulong na saray pulis iray manpupulong a Tasi, balanglan kalangweran, matatken, laki, odino bii. Pigara so inalaan na fingerprint, nilitrato, tan impriso a singa kriminal. Arum so pinagyaw ni ingen a sikaray kabilen. Diad sananey a bansa, masulok la natan a 1,100 so nireport a kaso nipaakar ed saray Tasi nen Jehova ya inaresto, pinanmulta, odino pinekpek. Masulok a 200 ed sarayan kaso so agawa ed loob na sakey agew sanen manseselebra ira na Memoryal na impatey nen Jesus! Anggaman ontan, tinmulong so espiritu nen Jehova ed saray totoo to pian nasungdoan da iray mair-irap a babeng diad sarayan bansa tan ed arum niran lugar. (Zacarias 4:6) Say pirmin sanok na saray kabusol so agmakaamper ed saray mandadayew ed si Jehova. On, matalek itayo ya agnaamper na antokaman ya ayura so gagala na Dios.

Apaneknekan a Palso Iray Dila ya Onsusumpa

5. Anto iray palson akusasyon ed saray lingkor nen Jehova nen inmunan siglo?

5 Impropesiya nen Isaias a dusaen odino paneknekan na saray totoo na Dios a palso so antokaman ya akusasyon ed sikara. Nen inmunan siglo, saray Kristiano so mabetbet a puntirya na panagpauges, a sikara so ipapasen a managgaway-kaugsan. Diad ontan iran akusasyon et kaslakan irayan salita: “Sarayan totoo . . . guguloen dan tuloy so syudad tayo. Et ibabangat da so saray ugali ya agmanepeg ed sikami ya akoen tan gawaen, lapu ed Romano kami.” (Gawa 16:20, 21) Diad sananey ya inkagawa, sinugsogan na saray onsusumpan relihyon iray manuuley ed syudad pian onsumpa ed saray patumbok nen Kristo, ya impilit dan: “Saraya a mangogotgot na mundo, linma ra dia met; [tan] manggawa ra na sumpa ed saray ganggan nen Cesar.” (Gawa 17:6, 7) Si apostol Pablo so apangaranan a ‘toon makasalot’ tan lider na sakey a sektan ­manggugulo “ed sankamundoan.”​—Gawa 24:2-5.

6, 7. Anto so sakey a paraan a papaneknekan na saray tuan Kristiano a palso iray ambelat ya akusasyon ed sikara?

6 Mitunosan ed satan, agtayo la pankelawan no akin a dederalan, papaugesen tan ikakayat iray palson impormasyon sumpad saray tuan Kristiano natan. Panon tayon papaneknekan a palso iratan ya ambelat ya akusasyon?​—Isaias 54:17.

7 Saratan ya akusasyon tan propaganda so mabetbet a napapaneknekan a palso diad panamegley na maabig a kondukta na saray Tasi nen Jehova. (1 Pedro 2:12) Sano saray Kristiano et matulok ed ley tan atagey so moralidad da, a peteg a mangiyaansakit ed kapara ran totoo, napaneknekan a palso iray akusasyon ed sikara. Kanian, say maong a kondukta tayo so ebidensya na kaptekan tayo. No naimano na saray makakaobserba so pantutultuloy tayo ed maabig iran gawa, sikara so napakiwas a mangigloria ed mangatatawen ya Ama tayo tan mamidbir ed atagtagey ya estandarte na kabibilay na saray lingkor to.​—Isaias 60:14; Mateo 5:14-16.

8. (a) Anto so nakaukolan no maminsan ta pian nidepensa tayo so Makasulatan a talindeg tayo? (b) Diad pangaalig tayo ed si Kristo, panon tayon paneknekan a palso iray dila ya onsusumpa ed sikatayo?

8 Niarum ni ed maridios a kondukta tayo, nayarin nakaukolan no maminsan so makpel a pangidepensa ed talindeg tayo a nibase ed Biblia. Say sakey a paraan et say iyapela ed saray gobierno tan korte pian naprotektaan. (Ester 8:3; Gawa 22:25-29; 25:10-12) Sanen wadiad dalin si Jesus, walaray pankanawnawa a diretsaan ton inebatan iray mamabalaw ed sikato, a sinuppiat to iray palson akusasyon da. (Mateo 12:34-37; 15:1-11) Diad pangaalig tayo ed si Jesus, aanamoten tayo so pankanawnawan mangiter na malinew ya eksplinasyon ed arum nipaakar ed masimoon iran kombiksion tayo. (1 Pedro 3:15) Agtayon balot aabuloyan so panagbalaw na saray kaeskuelaan, katrabahoan, odino saray agmananisian kanayon a mangamper ed pangipupulong tayo ed katuaan na Salitay Dios.​—2 Pedro 3:3, 4.

 Jerusalem​—“Bato ya Ambelat”

9. Dinan a Jerusalem so insimbolo na “bato ya ambelat” ya asalambit ed Zacarias 12:3, tan sioparay mangirerepresenta ed satan diad dalin?

9 Imparungtal na propesiya nen Zacarias so rason no akin ya onsusumpa iray nasyon ed saray tuan Kristiano. Imanoen so inkuan na Zacarias 12:3: “Nagawa naani dia ed satan ya agew, a siak gawaen ko naani so Jerusalem a bato ya ambelat a nipaakar ed saray amin a baley.” Dinan a Jerusalem so tutukoyen na sayan propesiya? Say propesiya nen Zacarias nipaakar ed Jerusalem so onaplika ed “Jerusalem a mangatatawen,” say mangatatawen a Panarian ya anawagan ed saray alanaan a Kristiano. (Hebreos 12:22) Wadia ni ed dalin so daiset a nakdaan na sarayan mananawir ed Mesianikon Panarian. Kaiba da iray ‘arum a karnero,’ sasagyaten da so totoo a manpasakop ed Panarian na Dios legan a wala ni panaon. (Juan 10:16; Apocalipsis 11:15) Panon so inkiwas na saray nasyon ed sayan imbitasyon? Tan anton klase na suporta so iiter nen Jehova ed saray tuan managdayew natan? Amtaen tayo so ebat diad pangusisa tayo ni ed kabaliksan na Zacarias kapitulo 12. Diad panggawa ed satan, napaseguroan itayo ya ‘anggapo so ayuran onaligwas’ sumpad saray nilanaan na Dios tan saray dedikadon kakaiba ra.

10. (a) Akin ya aatakien iray totoo na Dios? (b) Anto so agawa ed saramay mangaalsa ed “bato ya ambelat”?

10 Ipapabitar na Zacarias 12:3 a saray nasyon so ‘nasugat-sugat.’ Panon iyan nagawa? Ingganggan na Dios a say maong a balita na Panarian so nepeg ya ipulong. Seseryosoen na saray Tasi nen Jehova so obligasyon dan manpulong. Balet, say panangiyabawag ed Panarian bilang say alenleneg ya ilalo na katooan so nagmaliw a “bato ya ambelat” parad saray nasyon. Sasalien dan alsaen itan diad panesebel da ed saray managpulong na Panarian. Diad panggagawa ra ed satan, saratan a mibabalin nasyon so ‘asugat-sugat’ la ingen. Nadederal so reputasyon da lapud makapabaing ya insaew da. Agda napatunda iray tuan managdayew a mamapabli ed panangiyabawag da ed “andi-angga a maabig a balita” na Mesianikon Panarian na Dios sakbay a manampot iyan sistema na bengabengatla. (Apocalipsis 14:6) Oniay imbaga na guardia na prisoan diad sakey a bansa ed Aprika sanen naimatonan to so pamapairap ed saray lingkor nen Jehova: ‘Pipirdien yo labat iray sagpot yo a mamasegsegang ed sarayan totoo. Ag-iran balot mikompromiso. Mas ondakel ni ra ingen.’

11. Panon a tinoor na Dios so sipan ton akasulat ed Zacarias 12:4?

11 Basaen so Zacarias 12:4. Insipan nen Jehova a piguratibon bulagen tan ‘kebbiewen’ to iramay onsumpa’d saray makpel a mensahero na Panarian. Tinoor to so salita to. Alimbawa, diad sakey a bansa a sebel so tuan panagdayew, agnaamper na saray onsusumpa so pakakaawat na saray totoo na Dios ed espiritual iran tagano. Inkuan ni ingen na sakey a peryodiko ya uusaren na saray Tasi nen Jehova iray lobo ta pian niloob iray literatura na Biblia diad bansa ra! Tua so insipan na Dios ed saray matoor a lingkor to: “Lukasan ko naani so saray matak . . . et kabilen ko naani ed kabulag so balang kabayo na saray  ­baley.” Lapud abulag la ra’d sanok da, ag-amta na saray onsusumpa’d Panarian no iner so arapen da. Ingen, kombinsido itayo a salimbengan nen Jehova so totoo to bilang grupo tan iyansakit to ra.​—2 Arari 6:15-19.

12. (a) Diad anton pantalos a pinadangat nen Jesus so apoy sanen sikatoy wadiad dalin? (b) Panon a pinadalang na saray alanaan a nakdaan iray bengatla diad espiritual a paraan, tan antoray resulta?

12 Basaen so Zacarias 12:5, 6. “Saray manunaan na Juda” so manutukoy ed saramay alanaan a mangaasikaso ed totoo na Dios. Sikara so pagmaliwen nen Jehova a maseseg a maong parad saray kimey na Panarian to diad dalin. Diad sakey ya inkagawa, oniay imbaga nen Jesus ed saray babangatan to: “Linma ak dia a mangiyan na apoy ed dalin.” (Lucas 12:49) On, pinadangat to so apoy. Diad maseseg ya impanpulong nen Jesus, say manunaan a mensahe to ed totoo et say Panarian na Dios. Sayan mensahe so sengegan na pirmin sayangeseng diad interon nasyon na saray Judio. (Mateo 4:17, 25; 10:5-7, 17-20) Mipadpara, ‘singa say pananginan na apoy ed leet na kiew, tan singa mandarlang a banuot ed leet na saray piningey,’ saray patumbok nen Kristo ed panaon tayo so amadalang ed saray bengatla diad espiritual a paraan. Mapuersan inwalwal na libron The Finished Mystery * a nipalapag nen 1917 so pansimpisimpitan na Kakristianoan. Satan so makasengeg no akin a sinmanok iray klero. Diad agano ni, say Kingdom News No. 37 a “Magano lan Manampot so Palson  Relihyon!” so amakiwas ed dakel a totoo ya ontalindeg para odino sumpa ed Panarian na Dios.

Niliktar ‘Iray Tolda na Juda’

13. Anto so ipapabitar na saray salitan “saray tolda na Juda,” tan akin ya isalba nen Jehova iramay naapektoan?

13 Basaen so Zacarias 12:7, 8. Diad Israel nensaman, saray tolda et kaslakan a nanengneng diad dalin da, ya uusaren iratan no maminsan na managpastol tan dumaralos. Saratan a totoo so unonan naapektoan tan mankaukolan na proteksion no walay kalaban a nasyon ya onataki ed syudad na Jerusalem. Saray salitan “saray tolda na Juda” so mangipapabitar a saray alanaan a nakdaan ed panaon tayo so walad uma, a singa panangibaga, tan anggapo ra ed abakoran iran syudad. Ditan et sikara so makpel a mangidedepensa ed intereses na Mesianikon Panarian. Say “unona” ya iliktar nen Jehova na saray ehersito et “saray tolda na Juda” lapud sikara so puntirya na panangataki nen Satanas.

14. Panon so pangidedepensa nen Jehova ed saramay walad “tolda na Juda” tan anto so gagawaen to pian ag-ira onkapuy?

14 On, say awaran so mamaneknek ya idedepensa nen Jehova irayan alanaan ya embahador na Panarian a walad “saray tolda” ra ed uma. * Agto ra abuloyan ya ‘onkapuy’ kanian pabiskegen tan papakpelen to ira a singa si David, say mibabakal ya ari.

15. Akin a panggugunaetan nen Jehova a ‘bagbagen iray amin a nasyon,’ tan kapigan to gawaen itan?

15 Basaen so Zacarias 12:9. Akin a panggugunaetan nen Jehova a ‘bagbagen iray amin a nasyon’? Lapud sikara so mantutultuloy ya onsusumpa ed Mesianikon Panarian. Sikara so naukom lapud papairapen tan papasegsegangen da so totoo na Dios. Saray tuan managdayew ed Dios so magano lan nipaarap ed unor a pangataki na saray ontutumbok ed si Satanas, a mamantok ed kipapasen na mundo ya adeskribe ed Biblia ya Armagedon. (Apocalipsis 16:13-16) Diad satan a panangataki, say Supremon Ukom so mangidepensa ed saray lingkor to tan pasantosen to so ngaran to ed amin a nasyon.​—Ezequiel 38:14-18, 22, 23.

16, 17. (a) Anto so “tawir na saray ariripen nen Jehova”? (b) Anto so papaneknekan na pansusungdo tayo ed saray panangataki nen Satanas?

16 Anggapo so antokaman ya ayura nen Satanas a mamakapuy ed pananisia odino mamatayer ed seseg na saray totoo na Dios ed sankamundoan. Say kareenan tayo ed espiritual, a makasengeg ed manangiliktar a pakayari nen Jehova, so ‘tawir na saray ariripen to.’ (Isaias 54:17) Anggapo so makapangekal ed deen tayo tan say inkadaakan tayo ed espiritual. (Salmo 118:6) Itultuloy nen Satanas a parlangan so isusumpa tan pawalaen so kairapan. Anggaman babalawen itayo, say matoor a pansusungdo tayo et paneknek a walad sikatayo so espiritu na Dios. (1 Pedro 4:14) Say maong a balita na niletneg lan Panarian nen Jehova so niyaabawag la ed sankamundoan. Pian nabugak iray totoo na Dios, dakel a simbolikon “bato” na isusumpa so nitutupak ed sikara. Ingen, agnatataktakot iray lingkor nen Jehova ed saratan a bato lapud biskeg ya ipapagamor to ed sikara. (Zacarias 9:15) Agbalot napatunda iray alanaan a nakdaan tan saray matoor a kaiba ra!

17 Ilaloan tayo sirin so sigpot lan pakaliktar ed saray panangataki na Diablo. Agaylan makaligliwa so panamaseguro ed sikatayo ya ‘anggapo so ayura ya agawa a sumpad sikatayo ya onaligwas naani; tan balang sakey a dila ya onsumpa ed sikatayo ed pangukom dusaen tayo naani’!

[Saray paimano ed leksab]

Panon Yon Ebatan?

• Anto so mangipatnag ya ag-ontalona iray ayura nen Satanas?

• Panon a magmaliw a “bato ya ambelat” so mangatatawen a Jerusalem?

• Panon ya iliktar nen Jehova ‘iray tolda na Juda’?

• Diad panasingger lay Armagedon, anto so napanmatalkan tayo?

[Tepetepet Parad Panagaral]

[Saray litrato ed pahina 21]

Nansiansian matoor iray totoo nen Jehova diad Albania anggaman aatakien ira nen Satanas

[Litrato ed pahina 23]

Sinuppiat nen Jesus iray palson akusasyon

[Saray litrato ed pahina 24]

Ag-ontalona so antokaman ya ayuran agawa a sumpad saramay mangiyaabawag ed maong a balita