Kasin Nanonotan Yo?

Agunggonaan kayo kasi ed impanbasa ed agano niran paway na Say Panag-Bantayan? Sali yo pan ebatan so onggendan a tepetepet:

• Akin a magnayon so kablian na “Daan a Sipan”?

Say Autor na satan et aliwan maruksan dios noagta say maaron Dios a Jehova. Si Jesus tan saray inmunan patumbok to so nantultuloy ya anukoy ed Hebreon Kasulatan. Walaan itan na praktikal a simbawa nipaakar ed inagew-agew a kabibilay tan mangiiter na marakdakep ya ilalo ed arapen.​—9/1, pahina 4-7.

• Antoy apaneknekan sanen inabuloyan ya onlabas so panaon nanlapu la nen nankasalanan si Adan tan Eva?

Manga anem libon taon lay linmabas nanlapu la nen nankasalanan si Adan tan Eva, apaneknekan a matila si Satanas lapud inatey so inmunan sanasawa tan say minilyon ya anak da. Imparungtal na linmabas a panaon ya aliwan marakep so kipapasen na saray totoo no ag-ira manpasakop ed Dios tan anggapoy kanepegan da nisay abilidad da a mangitonton ed saray kurang da.​—9/15, pahina 6-7.

• Akin ya aliwan makapuy so impankuankuanan nen Jacob a sikato si Esau?

Walay kanepegan nen Jacob ed bendisyon na ama to lapud sinaliw to la’d si Esau so kanepegan na inkapanguloan. Sanen naamtaan nen Isaac a say benendisyonan to manaya et si Jacob, agto sinali a babawien itan. Sakey ni, malinew a labay na Dios a si Jacob so mangawat na bendisyon, ta no andi et Sikatoy sinmalet la komon.​—10/1, pahina 31.

• Panon a papaneknekan na impakawalaan tayo na konsiensia ya aliwan tua so ebolusyon?

Diad amin a rasa tan kultura, saray totoo so mabulos ya ontutulong ed arum, anggano irisga ray inkasikara. Agnailaloan so ontan a panagsakripisyo no ibagan saray totoo et ayep labat a say nononoten da et say pakapansiansia ran mabilay.​—10/15, pahina 20.

• Akin a nibaga tayon mapaabeba so Dios, tan panon ton ipapatnag iyan kalidad?

Bilang Soberano tan Manamalsa, say Dios et anggapoy limitasyon to a singa sikatayo. Balet, mitunosan ed 2 Samuel 22:36, nibagan say Dios et mauyamo odino mapaabeba lapud iyaansakit to iray abebbeban totoo a manggugunaet a mamaliket ed sikato, tan ipapanengneng to so panangasi ed sikara. Manlapud tawen et onuusdong si Jehova, a singa panangibaga, ta pian tulongan iray ontatakot ed sikato.​—11/1, pahina 4-5.

• Panon a saray kadaanan a langa so mamepekder ed rekord na Biblia?

Saray arkeologo so akaromog na saray kadaanan a langa diad Samaria ya akasulatan na pitoran poli a nabasa ed Josue 17:1-6. Ontan met, pinekderan na saray langa ed Arad so impormasyon nipaakar ed pamilya na saray saserdote tan akasulat ditan so ngaran na Dios. Saray langa ed Lakis so mangipapaliwawa ed kipapasen na politika tan say gulo a nagagawa ed Juda sakbay ya inmataki so Babilonia.​—11/15, pahina 12-14.

• Panon tayon nibaga a si Lucas so nansulat ed libron Saray Gawa?

Say Ebanghelyo nen Lucas tan Saray Gawa so insulat a parad si Teofilo, kanian mapatnag a si Lucas so anugyop ed saraya. Ipapatnag met ed impangusar na saray salitan “sikami,” “kami,” tan “mi,” a si Lucas so kabiangan ed arum ya ebento. (Gawa 16:8-15)​—11/15, pahina 18.

• Anto so nepeg a panmoria na sakey a Kristiano ed panag-anop tan panagbanwit?

Manlapu la’d panaon nen Noe, inabuloyan na Dios iray totoo a mamatey tan mangan na ayep. Ingen, say ganggan a patedteren so dala na saray ayep so mangipapabitar a say bilay na ayep so nepeg a respetoen ta nanlapu itan ed Dios. Nepeg ya agmamatey na ayep iray Kristiano lapud isport odino para labat ed liket na pananap odino pamatey. Importante ya unoren iray ganggan nen Cesar tan nonoten so konsiensia na arum. (Roma 14:13)​—12/1, pahina 31.