‘Mandeen Kayo et Nengneng Yo so Panangiliktar nen Jehova’

“Si Jehova wala ed abay ko; agak la natatakot: anto ni nayarian na too a gawaen ed siak?”​—SALMO 118:6.

1. Antoran makatantandan nagawa so nasagmak na katooan?

 DIAD sayan panaon, magano lan nasagmak na katooan iray bengatlan agnin balot agawa. Satan so impasakbay nen Jesus sanen inkuan to ed saray patumbok to: “Wala naani baleg ya irap ed satan, ya anggapo so ontan a nanlapud gapo na mundo ya angga ed natan, anggapo, anggapo la naani. Et no ag-apatikeyan iratan ya agew, anggapo komon naani laman a nilaban; balet nisengeg ed saray pinili napatikeyan so saratan ya agew.”​—Mateo 24:21, 22.

2. Anto so mamupuger ed igapo na baleg ya irap?

² Satan a baleg ya irap so pupugeran na saray anghel natan, anggaman agtayo nanenengneng itan. Diad puyan ya inter nen Jesus ed si Juan, naikdan na pribilehyo so apostol ya amtaen no akin. Oniay impangilitrato na masiken lan apostol ed satan: “Akanengneng ak na apatira ya anghel ya akaalagey ed saray apatiran suyok na dalin, a popokpokan da so apatiran dagem na dalin . . . Tan anengneng ko so sananey ya anghel ya onsesegep ed letakan na banwa, a wala ed sikato so tatak na Dios a mabilay: tan tinmawag ed baleg a boses ed saray apatira ya anghel . . . Agyo pasakitan so dalin, anggan say dayat, anggan saray kiew, angga ed agmi natatakan so saray aripen na Dios tayo dia ed saray moling da.”​—Apocalipsis 7:1-3.

3. Anto so unonan nagawa diad panaon na baleg ya irap?

³ Magano lan nasumpal so unor a pantatak ed saray alanaan ya “aripen na Dios tayo.” Akaparaan la ray apatiran anghel a mangibulos ed saratan a makaderal a dagem. Anto so unonan nagawa sano ibulos da la iratan? Oniay ebat na sakey ya anghel: “Onia a siglat so kabagbag na Babilonia, say baleg a syudad, et kapiganman agla naromog a balot.” (Apocalipsis 18:21) Seguradon manliket a maong so katawenan sano naderal lay sankamundoan ya empiryo na palson relihyon!​—Apocalipsis 19:1, 2.

4. Anto niray nagawa ed arapen?

⁴ Amin a nasyon so mankokomplot ya onsumpa ed totoo nen Jehova. Ontalona kasi iran maneral ed saray matoor a Kristiano? Ontan so abaloan da. Balet nia! Seguroen na saray armada ed tawen ya ontutumbok ed si Kristo Jesus a naderal irayan onsusumpa. (Apocalipsis 19:19-21) Diad kaunoran, say Diablo tan saray anghel to so nibantak ed simbolikon kaaralman, a ditan et anggapo lay nagawaan da. Agda la napalikdo so totoo lapud nipukok ira ed loob na sanlibon taon. Talagan makainawa la’d satan iray amayamay a makaliktar!​—Apocalipsis 7:9, 10, 14; 20:1-3.

5. Anton maliket a pankanawnawa so naeksperiensya na saray manmamatoor ed si Jehova?

⁵ Magano tayo lan naimatonan irayan makapakelaw tan makapadinayew a nagawa. Amin na saraya so mangiyalangon ed kanepegan nen Jehova a manuley. Tan nonot yo pa iya: No mantultuloy itayon manmatoor ed si Jehova tan ondapag ed pananguley to, pankanawnawa tayoy mibiang a mangidayew ed ngaran to tan manumpal ed gagala to. Seguradon agnasabsabaan so panliket tayo!

6. Lapu ed saray magano lan nagawa, anto so singbaten tayo?

⁶ Akaparaan itayo la kasi ed saratan ya importantin  nagawa? Manmamatalek itayo kasi ed pakayari nen Jehova a mangisalba? Matalek itayo kasi a tulongan to itayo ed dugan panaon tan ed sankaabigan a paraan? Legan tayon eebatan iratan, nodnonoten tayo imay imbaga nen apostol Pablo ed saray kapara ton Kristiano ed Roma: “Saray bengatla a nisulsulat nensaman, nisulat ira ya onkana ed kibanga’tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.” (Roma 15:4) Kabiangan ed saray nisulat pian nibangat, naligliwa, tan nawalaan itayo na ilalo et say impangiliktar nen Jehova ed saray Israelita a maruksan inaripen na saray Ehipsio. Say pangusisan maong ed makapadinayew iran agawa sanen inmaneobra nen Jehova so kiliktar na saray Israelita so mamaseseg a maong ed sikatayo legan tayon tatalaranan so maples ya onsasabin baleg ya irap.

Ililiktar nen Jehova so Totoo To

7. Nen 1513 B.C.E., anto so makapagonigon a situa­syon ed Ehipto?

⁷ Pawilen tayo pa so taon 1513 B.C.E. Siamera lan salot so indapo nen Jehova ed saray Ehipsio. Kayari na satan, pinapaway nen Faraon si Moises, ya inkuan to: “Taynan ka dia ed kawalaan ko, ilikas mo so inkasika, agmo la nenengnengen so lupak; ta dia ed agew a pannengneng mo na lupak ompatey ka.” Et oniay ebat nen Moises: “Maong so sinalitam; agko la nengnengen so lupam.”​—Exodo 10:28, 29.

8. Antoray instruksion ed saray Israelita pian nilegyas so bilay da, tan antoy resulta?

⁸ Kayari na saman, imbaga nen Jehova ed si Moises a dusaen To nin maminsan si Faraon tan say amin ya Ehipsio. Nen Abib (Nisan) 14, amin a panguloan ya anak na Ehipsio tan ayayep da so inatey. Balet, alegyas so bilay na saray Israelita lapud maalwar dan tinumbok iray instruksion ya inter na Dios ed si Moises. Kinaukolan dan puranisan na dalay kordero so duaran lusek tan tagey na puerta ra, tan ag-ira pinmaway. Antoy agawa ed saman a labi? Oniay impangibaga nen Moises: “Agawa a dia ed pegley-labi dinusa nen Jehova so saray amin a panguloan ya anak diman ed dalin ya Ehipto.” Apurado si Faraon, tan impatawag toy Moises tan Aaron, insan inkuan to ed sikara: “Alagey kayo pa la, taynan kayo la dia ed nanleleetan na saray panuuleyan ko, . . . onla kayo a manlingkor ed kinen Jehova unong na inkuan yo.” Tan tampol a tinmaynan iray Israelita, a nayarin masulok a taloran milyon ira, ya agni kaibay ‘dakel a nagsisananey a totoo’ ya aliwan Israelita ya ag-amta so karakel da.​—Exodo 12:1-7, 29, 31, 37, 38.

9. Iner so angipaarapan na Dios ed saray Israelita sanen pinmaway ira ed Ehipto, tan akin?

⁹ Say sankaasinggeran a nadalan na saray Israelita et say gilig na Dayat Mediteraneo ya ompugta ed dalin na saray Filisteo. Balet, teritorya iratan na kalaban. Kanian pian agla mibakal iray totoo nen Jehova, impaarap to ra ed kalawakan na Ambalangan Dayat. Anggaman pigaran milyon ira, matintinunos iran manaakar. Inkuan na Biblia: “Saray anak na Israel tinmatdang ira a pinmaway ed dalin  ya Ehipto ya akaayura [“nandarasig parad pibabakal,” NW].”​—Exodo 13:17, 18.

“Nengneng Yo so Panangiliktar nen Jehova”

10. Akin ya imbaga na Dios ed Israel a mankampo ira ed arap na Pihahirot?

¹⁰ Kayari na satan et walay makapabiglan agawa. Inkuan nen Jehova ed Moises: “Ibagam ed saray anak na Israel ya onsener ira tan onla ra a manayam ed arapan na Pihahirot, ed nanleetan na Magdal tan say dayat, diman ed arapan na Baal-zefon.” Anggaman tinulok da irayan instruksion, asaruko ira ed kapalandeyan tan Ambalangan Dayat. Singano anggapo lay nadalan da. Balet, amta nen Jehova so gagawaen to. Inkuan to ed si Moises: “Paaweten ko naani puso nen Faraon, et usilan to ra naani ya aboten; et kirayewan ko naani ed Faraon, tan diad saray amin a sankaulopan to; et nakabatan naani na saray Ehipsio a siak si Jehova.”​—Exodo 14:1-4.

11. (a) Anto so ginawa nen Faraon, tan antoy reaksion na saray Israelita? (b) Antoy ebat nen Moises ed reklamo na Israel?

¹¹ Lapud ababawian si Faraon diad impangibulos to ed saray Israelita, inusilan to ra a kaiba so 600 a sankaabigan a karwahen parad bakal. Sanen abantag na saray Israelita a nitan la ray armada na Ehipto, ataktakot iran maong kanian inkelyaw da ed si Moises: “Lapu ed anggapo so lubolubok diman ed Ehipto, inala mo kami dia pian ompatey kami dia ed lawak?” Lapud matalek si Moises ya iliktar ira nen Jehova, oniay ebat to: “Agkayo ontatakot, mandeen kayo labat, et nengneng yo so panangiliktar nen Jehova a gawaen to naani ed sikayo ed sayan agew. . . . Si Jehova naani pinagkalaman yo a mibakal, et agkayo labat la oneseesel.”​—Exodo 14:5-14.

12. Panon ya inliktar nen Jehova so totoo to?

¹² Tua imay imbaga nen Moises a si Jehova so mibakal parad Israel lapud sinmalet la’d saman iray anghel. Mamilagron inyalis na anghel nen Jehova ed benegan da so lusek a lurem a mangibabasbas ed interon Israel. Kanian, diad dapag na saray Ehipsio et binmilunget, bangta linmiwawa ed kawalaan na saray Israelita. (Exodo 13:21, 22; 14:19, 20) Pian tuloken so ganggan na Dios, inyunat nen Moises so lima to. Tan oniay katuloyan na salaysay: “Pinasener nen Jehova so dayat ed impangikana to na maksil a dagem ed bukig a sanlabi . . . Et saray anak na Israel sinmelak ira ed nanleetan na dayat ed tapew na amaga a dalin. Et saray danudanum singa ra padir nensaman ed sikara ed dapag a kawanan tan dapag a kawigi ra.” Intuloy na saray Ehipsio so panguusil da, balet tinulongan nen Jehova so totoo to. Winetwet to iray armada na Ehipsio, insan to ingganggan si Moises: “Yayag mo so limam ed dayat pian saray danum et manolian ira ed saray Ehipsio, dia ed saray luganan da, tan dia ed saray kabayoan da.” Ontan lay impakaderal na armada nen Faraon ya anggapoy anggan sakey a sundalo ya akaliktar!​—Exodo 14:21-28; Salmo 136:15.

 Say Naaralan Tayo ed Inkiliktar na Israel

13. Antoy reaksion na saray Israelita ed inkiliktar da?

¹³ Antoy reaksion na saray Israelita diad sayan mamilagron inkiliktar da? Si Moises tan saray anak na Israel so nambabansag ya angansion na panangirayew ed si Jehova! Oniay inkanta ra: “Kantaan ko si Jehova, ta analo a magloria. . . . Si Jehova manari ed ando lan ando.” (Exodo 15:1, 18) On, linman tampol ed nonot da so pangirayew ed Dios. Diad ontan et niparungtal so inkasoberano nen Jehova.

14. (a) Anto so naaralan tayo ed si Jehova diad eksperiensya na Israel? (b) Anto so teksto ed taon 2008?

¹⁴ Anton instruksion, ligliwa, tan ilalo so nagamoran tayo ed sarayan makapadinayew ya agawgawa? Seguradon atebek tayo a si Jehova et sarasarag ton tulongan so totoo to, antokaman a subok so onsabi ed sikara. Sarag ton solbaren so antokaman a situasyon a sagmaken da. Ag-akaamper ed saray Israelita so Ambalangan Dayat sanen pinasiplog nen Jehova so maksil a dagem ed bukig. Tan satan lanlamang a dayat so inusar to pian leneren to so armada nen Faraon. No nodnonoten tayo iya, nibaga tayo met imay imbaga na salmista: “Si Jehova wala ed abay ko; agak la natatakot: anto ni nayarian na too a gawaen ed siak?” (Salmo 118:6) Naligliwa itayo met ed samay imbaga nen Pablo a walad Roma 8:31: “No say Dios gampi ed sikatayo, siopa ni kasi onsumpa ed sikatayo?” Talagan sarayan pinuyanan a balikas so mamaseseg ed sikatayo a manmatalek! Pakepaen na saraya so takot tan panduaruwa tayo tan ombiskeg so paniilalo tayo. Sirin et matukotukoy so teksto tayo ed taon 2008: ‘Mandeen kayo et nengneng yo so panangiliktar nen Jehova’!​—Exodo 14:13.

15. Panon kaimportante so katutulok diad inkiliktar na Israel ed Ehipto, tan panon kaimportante itan natan?

¹⁵ Anto ni naaralan tayo diad impaway na Israel ed Ehipto? Nepeg tayon unoren so antokaman a pagagawa nen Jehova ed sikatayo. Tinulok na saray Israelita iray detalyadon preparasyon parad Paskua. Matulotulok iran nansiansia ed loob na abung da legan na labi na Nisan 14. Sanen panaon lan taynan da so Ehipto, sikaray “nandarasig parad pibabakal.” (Exodo 13:18, NW) Natan, talagan importante a tumboken tayo so panangiwanwan na “matoor tan makabat ya aripen”! (Mateo 24:45) Kaukolan tayon talinengen a maong so ibabaga na Dios: “Saya so dalan, ondalan kayo ed sikato; sano onarap kayo ed nikawanan, tan sano onarap kayo ed nikawigi.” (Isaias 30:21) Legan a mas onaasingger itayo ed baleg ya irap, nayarin walaray detalyadon instruksion ya iter ed sikatayo. Ta pian seguradon maligen itayo ed saratan a mapeligron panaon, kaukolan a makapibansag itayo ed arum ni ran matoor a lingkor nen Jehova.

16. Anto so naaralan tayo diad impangimaneobra na Dios ed saray pamaakaran sanen inliktar to iray Israelita?

¹⁶ Tandaan met ya inwanwan nen Jehova iray  Israelita ed pasen a singano asaruko la ra ed kapalandeyan tan Ambalangan Dayat. Singa aliwan duga iman a desisyon. Balet, amin a bengatla et kontrolado nen Jehova, tan inkirayewan to itan tan inkiliktaran met na totoo to. Diad sayan panaon, ompan walaray agtayo tanton natatalosan a desisyon ed saray pamaakaran na organisasyon. Balet, peteg a napanmatalkan tayo so panangiwanwan nen Jehova diad panamegley na matoor a lingkor ya uusaren to ed pitatalosan. No maminsan, singa ontatalona iray kalaban tayo. Lapud limitadon panmoria tayo, nayarin agtayo natalosan so amin a detalye. Anggaman ontan, sarag nen Jehova ya imaneobra iray pamaakaran diad dugan panaon, a singa samay ginawa to ed saray Israelita.​—Uliran 3:5.

Manmatalek ed si Jehova

17. Akin a sigpot itayon makapanmatalek ed panangiwanwan na Dios?

¹⁷ Nonot yo pa so panagmatalek a nalilikna na saray Israelita kapagno nanononotan da imay lusek a lurem ed agew tan lusek ya apoy ed labi. Paneknek iman a “say anghel na Dios” so mangiwawanwan ed pambabaroy da. (Exodo 13:21, 22; 14:19) Diad sayan panaon, makapanmatalek itayo a si Jehova so walad dapag na totoo to pian iwanwan, salimbengan, tan iliktar to ra. Kanian, ipapuso tayo iyan sipan: “[Si Jehova] agto ikaindan so sasantos to; niapiger ira lawas.” (Salmo 37:28) Agtayon balot lilingwanan iray mabiskeg ya anghel ya ontutulong ed saray lingkor na Dios natan. Diad tulong da, sikatayo so ‘mandeen tan nanengneng tayo so panangiliktar nen Jehova.’​—Exodo 14:13.

18. Akin a kaukolan tayon “isulong so kompleton kinlong na pibabakal a nanlapud Dios”?

¹⁸ Anto so makatulong ed sikatayon amin a “mandeen” odino ontalindeg ed dalan na katuaan? Say pangisulong ed espiritual a kinlong a deneskribe nen Pablo diad sulat to ed saray taga-Efeso. Imanoen a binilin itayo na apostol ya “isulong so kompleton kinlong na pibabakal a nanlapud Dios.” Kasin akasulong ed sikatayo so amin a kabiangan na sayan espiritual a kinlong? Diad sayan taon, nepeg ya usisaen na balang sakey so inkasikato pian naseguro ya akasulong tan susto so impangisulong to ed amin a kabiangan na satan a kinlong. Amta na kalaban tayo, si Satanas a Diablo, so kakapuyan tayo tan no ag-itayo akaparaan et tekmelan to itayo odino puntiryaen toy kaleteyan tayo. ‘Mipupuligesgesan’ itayo ed marelmeng iran espiritu. Anggaman ontan, diad tulong nen Jehova et ontalona itayo!​—Efeso 6:11-18, NW; Uliran 27:11.

19. No mansungdo itayo, anto so pankanawnawa tayon gawaen?

¹⁹ Inkuan nen Jesus ed saray patumbok to: “Dia ed pantepel yo natalima yo naani kamarerwa yo.” (Lucas 21:19) Komon ta sakey itayo ed saramay matoor a mansusungdo ed antokaman a kairapan a nasagmak da. Diad ontan, say agkanepegan a panangasi na Dios so mangiter ed sikatayo na pankanawnawa a ‘mandeen tan makanengneng ed panangiliktar nen ­Jehova.’

Anto so Ebat Yo?

• Antoran makapadinayew a bengatla so magano lan nagawa?

• Nen 1513 B.C.E., panon ya impanengneng nen Jehova so pakayari to a mangiliktar?

• Anto so determinado yon gawaen ed arapen?

[Tepetepet Parad Panagaral]

[Blurb ed pahina 20]

Say teksto ed taon 2008 et: ‘Mandeen kayo et nengneng yo so panangiliktar nen Jehova.’​—Exodo 14:13.

[Litrato ed pahina 17]

“Saray bengatla a nisulsulat nensaman, nisulat ira ya onkana ed kibanga’tayo”

[Litrato ed pahina 18]

Aderal so Ehipto lapud awet na puso nen Faraon

[Litrato ed pahina 19]

Akaliktar so Israel sanen ginawa ra so amin ya ingganggan nen Jehova