Nawalaan Itayo Komon na “Puso a Maabagey”

DAKEL a totoo natan so mankakkaukolan na panangabagey nen say kapiganman, legan dan sasagmaken so eras, sakit, kairapay-bilay, krimen, sibil a panlalaban, tan saray kalamidad. Say panangabagey et mankabaliksan na pisisimpatya ed kairapan na arum, tekep na pilalek a pakepaen itan. No panon a makarepresko so sanbason ambetel a danum legan na makapunaw a petang na agew, ontan met a say panangabagey so makatambayo ed toon nagogonigon, mamakepa na sakit, tan mamabiskeg ed toon nanairapan.

Nipatnag tayo so panangabagey panamegley na saray gawa tan salita tayo, salanti, diad pangasikaso ed arum tan pagmaliw a lawas akaparaan ya ontulong sano nakaukolan da itayo. Maabig no aliwa labat a diad kapamilya, kakaaro tan kabkabat so pangipanengnengan tayo na panangabagey. Inatnat tayo met itan ed totoon agtayo kabat. Diad Sermon ed Palandey, oniay intepet nen Jesu-Kristo: “Ta no aroen yo ray mangaro ed sikayo, anto so tumang a naalagar yo?” Oniay inkuan ni na sayan maabagey a too: “Amin a bengabengatla sirin a labay yo a gawaen na totoo ed sikayo, ontan so gawaen yo met ed sikara.”​—Mateo 5:46, 47; 7:12.

Sarayan balikas, a kabkabat bilang say Binmalitok a Ganggan, so nabasa diad Masanton Kasulatan. Dakel so mipakna a say Biblia et sankaabigan a giya ed panangipanengneng na panangabagey. Aminpigan imbaga na Kasulatan ya obligasyon tayo so ontulong ed saramay anggapon balot so pakagawa ra ed bilay. Ipaparungtal met na Biblia a say Autor to tan Manamalsa tayo, si Jehova a Dios, so sankamanunaan ya ehemplo ed panangipatnag na panangabagey.

Alimbawa, oniay nabasa tayo: “Iyalagey [na Dios so] pankatunongan da ray ulila tan saray balo; inaro to ray sankaili, a manaayam ed kawalaan da ray totoo tayo, tan iikdan to ra na tagano tan kawes.” (Deuteronomio 10:18, Maung a Balita) Si Jehova a Dios so deniskribe a ‘mangipapakana na inkaalas ed saray napapairap, tan mangiiter na tagano ed naeerasan.’ (Salmo 146:7) Nipaakar ed saray mankakkaukolan a sankaili, oniay inganggan nen Jehova: “Say sankaili . . . sikato naani nibilang a singa say nianak ed abung yo, tan aroen mo naani a singa sika a dili.”​—Levitico 19:34.

Balet, aliwan naynay a mainomay so pangipanengneng na panangabagey. Insulat nen apostol Pablo ed saray Kristianon taga-Colosas: ‘Lakseben yo so toon daan a pati saray gawa to, tan wala so isulong yo a balon too, a sikato so papasimbaloen nipaakar ed kakabatan a nipara ed talintao na amalsa ed sikato. Ipales yo la sirin, a singa  saray pinili Dios, sasanto tan inararo, so sakey a puso a maabagey.’​—Colosas 3:9, 10, 12.

Nakaukolan sirin so pansagpot pian nabayuboan tayo so panangabagey ed arum. Sayan awawey et kabiangan na ‘balon too’ a nepeg ya isulong na saray Kristiano. Nambilay si Pablo ed kadaanan a Roma, a ditan et maruksa iray totoo. Kanian, pinaseseg to iray kapananisiaan to ed Colosas a manggawa na balbaleg a pananguman ed personalidad da ta pian magmaliw iran mas masimpatya tan mas maabagey.

Say Nagawaan na Panangabagey

Momoriaen na arum a saray totoon maabagey et makapuy tan magmainomay a napalikdo. Kasin duga itan a panmoria?

Andin balot! Say peteg a mamapakiwas ed sakey pian mangipatnag na panangabagey et say aralem a panangaro. Satan a kalidad et nanlapud Dios, say sankamanunaan ya ehemplo ed naspot a panangaro. “Say Dios sikato so aro.” (1 Juan 4:16) Manepeg sirin so impanawag ed si Jehova ya “Ama na saray panangasi tan Dios na ami’ ligliwa.” (2 Corinto 1:3) Say balikas a nipatalos a “saray panangasi” et mankabaliksan na panangiyansakit tan panangabagey ed totoon maniirap. Diad tua, si Jehova et maong “ed saray mauges tan saray agda amtay mamidbir na utang na linawa”!​—Lucas 6:35, Maung a Balita.

Igaganggan na Manamalsa tayo ya ipatnag tayo met so maabig iran kalidad, a singa say panangabagey. Oniay nabasa tayo ed Miqueas 6:8: “Impatnag to ed sika, O too, so maong: et anto so kaukolan nen Jehova ed sika, noag say manggawa lambengat na inkatunong, tan mangaro na kaabigay-linawa?” Diad Uliran 19:22, oniay nabasa tayo: ‘Say manggawa ed too pian sikatoy pampilalekan et say kauyamoan to.’ Sigpot ya impatnag na Anak na Dios, si Jesu-Kristo, so personalidad nen Ama to, tan oniay mipadparan insimbawa to ed saray patumbok to: “Mapangasi kayo komon, unong a mapangasi so Ama yo.” (Lucas 6:36) Onia so impangipatalos na The Jerusalem Bible ed sayan simbawa: “Magmaliw kayon maabagey unong a say Ama yo et ­maabagey.”

Makatunongan a sikatayoy magmaliw a maabagey, ta satan so makapangitarok na daakan iran bendisyon. Tua imay nisulat diad Uliran 11:17: “Say mapangasi a too manggawa na maong ed dili a kamarerwa to.” Sano ipapatnag tayoy panangabagey ed totoon mankaukolan, ipapasen iya na Dios bilang pabor a ginawa parad Sikato. Aakoen to so responsabilidad a bayaran so antokaman a panangabagey ya ipapanengneng na saray lingkor to. Si Arin Solomon so  apuyanan a mangibagan: “Say walaan na panangasi ed duka pautangen to si Jehova, et say maong a gawa to ipawil To ed sikato a bayaran.” (Uliran 19:17) Tan insulat nen Pablo: “Kabaten yo ya anggan anton bengatla a maabig a gawaen na balang sakey, ontan so awaten to lamet naani a manlapu ed Katawan.”​—Efeso 6:8.

Wala so nagawaan na panangabagey pian napansiansia so pantutunosan tan naresolbe iray kolkolan odino balingaan. Makatulong met iya pian nalinew iray agpantatalosan, a mansumpal ed pampeperdonaan. No maminsan, walaray onlesan agpantatalosan lapud agtayo malinew a nibalikas so peteg a walad kanonotan tan liknaan tayo odino dumay impakatalos na arum ed inkiwas tayo. Dia natan makatulong so panangabagey pian naresolbe so problema tan napansiansiay kareenan. Mainomay a perdonaen so sakey a toon kabkabat a maabagey. Tulongan itayo na panangabagey ya unoren imay simbawa nen Pablo parad saray Kristiano: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidaleman to ed siopaman.”​—Colosas 3:13.

Panangabagey​—Simpatya ya Ipapatnag ed Gawa

Niarum ni, wala so nagawaan na panangabagey pian napakepa so paniirap. Singa nibaga la, say panangabagey so mamakiwas ed sikatayo pian misimpatya ed saray nagogonigon tan mangiyansakit ed saramay maniirap. Lalanoren na satan so matamoy a pangimano ed totoon maneermen tan ikiwas pian tulongan ira.

No masimpatya iray Kristiano, aaligen da si Jesus. Sikatoy akaparaan lawas ya ontulong ed arum, diad materyal tan espiritual a paraan. Sanen atebek to a mankaukolan so arum, maabagey to iran tinulongan.

Nonoten pa no panon a kinmiwas si Jesus sanen anengneng to so dakerakel a totoo ya apaulyanan ed espiritual: “Sanen anengneng to ray dakerakel a totoo, inabagey to ra, lapud maermen tan abuybuyak ira, a singa saray karnero ya anggapoy pastol da.” (Mateo 9:36) Nipaakar ed salitan nipatalos ed sayan teksto ya “inabagey,” imbaga na sakey ya iskolar na Biblia a mankabaliksan iya na “liknaan a manetenyeg ed akindaledalem na sakey a too.” Diad tua, sayan salita so impasen a sakey ed saray sankamatukoyan a salita ed Griego parad araldalem a liknaan a panangabagey.

Mipadpara, tampol ya onkikiwas iray maabagey a Kristiano pian tulongan so arum diad materyal tan espiritual a pankaukolan da. Oniay insulat nen apostol Pablo: “Mankakasakey komon so nonot yo, maabagey kayo komon, manaaroan kayo a singa sanaagi, masibeg.” (1 Pedro 3:8) Alimbawa, sanen sakey a mairap a pamilya so inmalis na ayaman makasengeg ed bunigas da, impausar na saray kaagian da ed lugar ya inalisan da so sakey ya abung ed loob na anem bulan ya anggapoy abang. Oniay imbaga na samay asawan laki: “Inagew-agew da kamin bibisitaen pian komustaen day kipapasen mi, tan say makapabiskeg iran balikas da so angipalikna a naab-abrasa kami.”

Mapaga met iray tuan Kristiano ed pankaukolan na anggan saray sankaili. Malikeliket dan uusaren so panaon, biskeg tan saray materyal a kayarian da pian tulongan iray agda kabat. Saramay boluntaryo ya abitla diad inmunan artikulo a tinmulong ed totoon agda kabkabat et saray Tasi nen Jehova.

Sirin, say panangabagey tan maaron-kaabigan et peteg a napatnagan ed Kristianon kongregasyon. Lapud papakiwasen na aro iray kabiangan na kongregasyon, sikaray napapaseseg ya ontulong ed arum. Ompan nakaukolan na saray ulila tan balo ed kongregasyon yo so panangiyansakit tan empatya lapud nanduruman problema ra. Kasin sarag mo iran tulongan a manalona ed kairapay-bilay, kakulangay pampatambal, inkaandi panayaman, odino arum nin personal a problema?

Imanoen pa so eksperiensya na sakey a sanasawa ed Gresya. Naistrok imay asawan laki. Sikato so imbatik ed arawdawin ospital, a kaibay asawa to. Balet, say anapan da et akadepende labat ed saray naboborbor da ed tanamanan day kahil. Siopa kasi so mamorbor legan iran walad ospital? Kinmiwas iramay kakongregasyon da. Sikaray amurbor ed saratan insan da inlako kanian wala lay nagastos na sayan sanasawan mankakkaukolan,  tan anggapo met lay paga ra.

Dakel so paraan pian nipanengneng so panangabagey. Alimbawa, kabat na saray tuan Kristiano a say kakkaukolan na sakey a maneermen no maminsan et say maaron ibibisita na totoon maan-anos ya ondengel, mililikna, tan manginanabang na ligliwa panamegley na Kasulatan.​—Roma 12:15.

Panliketan so Pilimog ed Totoon Maabagey

Say Kristianon kongregasyon ed sankamundoan et sakey a mareen tan makaligliwan pasen, a ditan nipapatnag so panangabagey tan kaabigan. Kabat na saray Kristiano a say inkamaabagey et mamaasingger bangta say inkaruksa et mamaarawi. Kanian, legan dan aaligen so mangatatawen ya Ama ra, manggugunaet iran magmaliw a maabagey.

Maliket iray Tasi nen Jehova a mangimbita ed sika pian naeksperiensyam so panangabagey, panangaro, tan panangiyansakit a sankapatnagan ed limog da bilang Kristiano. Segurado ira a naliknam ditan so panangabrasa tan naimatonan mo so marakep a panlilimog.​—Roma 15:7.

[Litrato ed pahina 5]

Pinaseseg nen Pablo iray Kristiano ed Colosas ya ipales da ed inkasikara so puso a maabagey

[Saray litrato ed pahina 7]

Sanen atebek nen Jesus a mankaukolan so arum, sikatoy maabagey a tinmulong ed sikara