“Say Mabmablin Regalom”

ONTAN so impaneskribe na sakey a datin pangulo na Belgium ed libron The Greatest Man Who Ever Lived, * ya inter ed sikato na sakey a kabandaan ton binmisita ed sikato. Agnambayag, onia so insulat to bilang pisasalamat: “Talagan atenyeg so liknaan ko ed imbisitam, tan say lalon nandinayewan ko et say mabmablin regalom: say libron nipaakar ed ‘Sankatalonggaringan a Too.’”

Kayarin inusisa na sayan datin pangulo so libro, oniay imbaga to: “No say paninteresan komon a maong na totoo et say mensahe na Ebanghelyo tan iyaplika ra ed bilay da iray prinsipyo nen Jesu-Kristo, magmaliw a nidumaduma so kipapasen na mundo natan. Diad satan et agtayo la nakaukolan so Security Council; tan anggapo la iray iyataki na terorista, tan naandi met lay karawalan ed mundo.” Anggaman inaksobi to a singa kugip labat iya, imbalikas toy panamabli to ed maabig a ginawa na kabandaan to.

Onia ni so nabasa ed sulat: “Kabiangan ka ed sakey a nakomendaan a grupo na maomaong a totoo, ya aliwan optimistiko nisay pesimistiko, noagta saraman so manisia ya onaligwas ni iray totoo tan bengabengatla.”

Panisiaan na saray Tasi nen Jehova a diad kaunoran et magmaliw a maabig so kipapasen na mundo diad panamegley na isalet na Dios, aliwan diad saray sagpot na too. Panggugunaetan dan aligen so sankatalonggaringan a too, si Jesu-Kristo. Kasin wala lay binmisita ed sika a Tasi nen Jehova? Nayarin panliketan moy pitongtong ed sikara nipaakar ed say sankatalonggaringan a toon nambilay ed kapiganman. Tan maliket met iran mangiter ed sika na kopya na samay libron nandinayewan a maong na datin pangulo.

[Paimano ed leksab]