Walaan Ka ta na Manangibangat ed Espiritual?

ANGGAMAN 16 años ni labat nen Uzias, sikatoy nagmaliw lan ari na abalaten a panarian na Juda. Masulok a 50 taon so impanuley to, manlapud pansamposampot na komasiam a siglo anggad kagapo na komawalon siglo B.C.E. Manlapud satan a malangwer ya edad to, “ginawa to so maptek ed saray mata nen Jehova.” Antoy akaimpluensya ed sikato pian manbilay a maptek? Onia so kuan na rekord na awaran: “Impasen [nen Uzias] so inkasikato a mananap ed Dios ed saray agew nen Zacarias, a walaan na pakatalos ed pasingawey na Dios [“say managbangat diad itatakot ed tuan Dios,” NW]: et leleg ya inanap to si Jehova, sikato so ginawa na Dios a maaligwas.”​—2 Awaran 26:1, 4, 5.

Nilikud ed sayan salaysay ed Biblia, daiset labat so amta tayo nipaakar ed si Zacarias, say mananimbawa na ari. Balet, bilang “say managbangat diad itatakot ed tuan Dios,” sikato so akaimpluen­syan maong ed malangwer nin ari a manggawa no antoy duga. Inkomento na The Expositor’s Bible a mapatnag a si Zacarias et “sakey a lakin kabkabisado toy Kasulatan, walaan na malaknab a pakatalos ed espiritual, tan marundunong a manginabang na pikakabat to.” Onia met so inkuan na sakey ya iskolar na Biblia nipaakar ed si Zacarias: “Kabkabisado to iray propesiya tan . . . sikato so intelihente, debosyonado, maptek a too; tan, ompatnag a mabiskeg so impluensya to ed si Uzias.”

Dakel a bendisyon so naawat nen Uzias lapud katooran to, tan “mapalalo a binmiskeg” lapud “sikato so tinulongan na Dios.” On, say intalona to ed pibabakal et makasengeg ed katooran to ed Dios legan na “saray agew nen Zacarias.” (2 Awaran 26:6-8) Balet sanen inmaligwas lay Uzias, nilingwanan to la iray imbabangat ed sikato nen Zacarias. Say “puso to nipatagey, ed ontan a nanggawa a sankabandayan, tan linmukso sumpa ed Jehova.” Bilang resulta na agmarespeton inkiwas to, sikatoy awalaan na makapadimlan sakit ed baog a nanlimita ed pakayari to, kanian agto la agawaan ya amin iray kimey to bilang ari.​—2 Awaran 26:16-21.

Wala ta so manangibangat mo, a mangiwawanwan ed sikan “mananap ed Dios”? Nayarin wala, balanglan sika so malangwer ni odino matatken la, laki man odino bii. Pablim itan a manangibangat lapud makatulong ed sika iray bilin to pian nitultuloy mon gawaen so duga ed imaton nen Jehova. Dengel mo itan a matatken a Kristiano, tan imanom a maong so isisimbawa to. Komon ta agmon balot ibabaliwala so makabat iran simbawa na ontan a “managbangat diad itatakot ed tuan Dios.”​—Uliran 1:5; 12:15; 19:20.