Nibilang a Makanepegan a Mangawat na Panarian

“Sikato so sakey a mapatnag a tanda ed kaptekan na panangukom na Dios; pian nayarian yo komon so ibilang a makana [“makanepegan,” NW] ed panariay Dios.”​—2 TES. 1:5.

1, 2. Anto so gagala na Dios nipaakar ed panangukom, tan siopa so mangipaakseb ed satan?

 NEN manga 50 C.E., walad Atenas si apostol Pablo. Lapud agonigon ed anengneng to’d man a kasmak a panagtalintao, sikatoy apakiwas a mantasi diad mataktikan paraan. Sinampotan toy paliwawa to panamegley na sakey a panangiyabawag a maseguron anagyat ed imano na saray paganon dumerengel to. Inkuan to: “Natan ibilin [na Dios] ed amin a too, dia ed amin a pasen, a magbabawi ra: Bangta tinandaan to so sakey ya agew a sikato so pangukom to naani ed mundo unong ed katunongan, ed panamegley na saman a laki a tinandaan to; a sikato so pinaletan to ed saray amin, a sikato so pinaoli to ed bilay a nanlapu ed saray inatey.”​—Gawa 17:30, 31.

² Talagan napakiwas itayo a nodnonoten a maong so katuaan a walay inggetar na Dios ya agew na pangukom to ed totoo! Satan a panangukom et ipaakseb na samay sakey ya agnginaranan nen Pablo ed paliwawa to ed Atenas balet amta tayo a say tutukoyen to et say apaolin si Jesu-Kristo. Mankabaliksan itan na balanglan bilay odino patey.

3. Akin ya akisipanan si Jehova ed kinen Abraham, tan siopa so walaan na importantin betang ed pakasumpal na satan?

³ Say karukey na satan ya Agew na Panangukom et 1,000 taon. Si Jesus ya Ari na Panarian na Dios so mangidaulo ed satan diad ngaran nen Jehova, balet agto bukbukor. Si Jehova so mamili na arum ni manlapud katooan a nakaiba nen Jesus a manari tan mangukom legan na satan a peryodo. (Ikompara so Lucas 22:29, 30.) Ngalngalin 4,000 a taon lay apalabas, inletneg nen Jehova so basiyan parad satan ya Agew na Panangukom sanen sikatoy akisipanan ed matoor a lingkor ton si Abraham. (Basaen so Genesis 22:17, 18.) Mapatnag ya inmepekto itan a sipanan nen 1943 B.C.E. Siempre, agni atalosan a maong nen Abraham no antoy kabaliksan na satan a sipanan parad katooan. Balet, diad sikatayo natan, natalosan tayo ya unong ed satan a sipanan et walay importantin betang na bini nen Abraham diad pakasumpal na gagala na Dios a mangukom ed totoo.

4, 5. (a) Siopa so manunan kabiangan na bini nen Abraham, tan antoy imbaga to nipaakar ed Panarian? (b) Kapigan nilukas so ilalon pagmaliw a kabiangan na Panarian na Dios?

⁴ Say manunan kabiangan na bini nen Abraham  et si Jesus, ya alanaan na masanton espiritu nen 29 C.E. tan apaneknekan a sikato imay insipan a Mesias, odino Kristo. (Gal. 3:16) Inusar nen Jesus so tinmumbok a talora tan kapalduan taon ed pangipulong na maong a balita na Panarian ed Judion nasyon. Kayarin naaresto si Juan a Bautista, impanengneng nen Jesus a makapanilalo so arum met a magmaliw a kabiangan na satan a Panarian sanen imbaga ton: “Nanlapu’d saray agew nen Juan a Bautista ya angga ed natan say panarian na tawen mantetepel na panamasoot, et saray totoo a manamasoot sikatoy alaen da’d biskegan.”​—Mat. 11:12.

⁵ Makapainteres ta sakbay ya akitongtong si Jesus ed saramay ‘mangala’ ed Panarian na tawen, oniay imbaga to: “Tua kuan ko’d sikayo, Diad saray nianak ed saray bibii agtinmalindeg so sakey a babaleg nen si Juan a Bautista: et ingen ta say kamelamelagan ed panariay tawen babaleg ni nen sikato.” (Mat. 11:11) Akin ya ontan so imbaga to? Lapud say ilalon pagmaliw a kabiangan na Panarian na Dios et agni sigpot a nilukas parad saray matoor anggad sanen niyibung so masanton espiritu nen Pentecostes 33 C.E. Balet sanen agawa itan et inatey lay Juan a Bautista.​—Gawa 2:1-4.

Niyabawag a Matunong so Bini nen Abraham

6, 7. (a) Diad anton paraan a say bini nen Abraham et magmaliw a “singa saray bitewen ed katawenan”? (b) Anton bendisyon so naawat nen Abraham, tan anton mipadparan bendisyon so awaten na saray bini to?

⁶ Nipasakbay ed si Abraham ya ondakel iray ilalak, odino bini, to tan magmaliw a “singa saray bitewen ed katawenan” tan buer ed gilig na dayat. (Gen. 13:16; 22:17) Kabaliksan na satan a diad panaon nen Abraham, imposiblin naamtaan na totoo no kaunongan karakel so kabiangan ed sayan bini. Balet, niparungtal lanlamang so eksakton bilang na espiritual a bini to. Nilikud ed si Jesus, manbilang itan na 144,000.​—Apo. 7:4; 14:1.

⁷ Nipaakar ed pananisia nen Abraham, onia so ibabagay Salita na Dios: “[Si Abraham] anisia ed Jehova; tan imbilang to ed sikato a katunongan.” (Gen. 15:5, 6) Tua, anggapoy toon sigpot a matunong. (Sant. 3:2) Balet, lapud mabisbiskeg a pananisia nen Abraham, sikato so akidenengan nen Jehova a singa sakey a matunong tan tinawag to ni ingen a kaaro to. (Isa. 41:8) Saramay kabiangan na espiritual a bini nen Abraham a kaiba nen Jesus et niyabawag met a matunong, tan saya so pakagamoran da na mas dakel a bendisyon nen say naawat nen Abraham.

8. Antoran bendisyon so nagamoran na saray kabiangan na bini nen Abraham?

⁸ Saray alanaan a Kristiano et niyabawag a matunong lapud pangaagamil day pananisia ed dondon bagat nen Jesus. (Roma 3:24, 28) Diad imaton nen Jehova, apaandi so kasalanan da tan nalanaan ira na masanton espiritu pian magmaliw iran espiritual ya ilalak to tan agagi nen Jesu-Kristo. (Juan 1:12, 13) Kabiangan ira ed balon sipanan tan magmaliw iran sakey a balon nasyon, say “Israel na Dios.” (Gal. 6:16; Luc. 22:20) Talagan baleg a pribilehyo itan! Lapud sarayan ginawa na Dios parad saray alanaan a Kristiano, ag-ira maniilalo a manbilay ya andi-anggaan diad dalin. Insakripisyo ra itan ya ilalo parad agnaparaan a liket ed pagmaliw a kaiba nen Jesus legan na Agew na Panangukom tan manuley a kaiba to ed tawen.​—Basaen so Roma 8:17.

9, 10. (a) Kapigan so sankaunaan ya impakalanaan na saray Kristiano panamegley na masanton espiritu, tan anto so nailaloan da? (b) Anton tulong so naawat na saray alanaan a Kristiano?

 ⁹ Nen Pentecostes 33 C.E., sakey a grupo na matoor a totoo so naikdan na pankanawnawan magmaliw a kabiangan na saramay miuley ed si Jesus legan na Agew na Panangukom. Manga 120 ed saray babangatan nen Jesus so abautismoan na masanton espiritu tan sikara sirin so sankaunaan ya alanaan a Kristiano. Balet ta gapoan labat itan, lapud kaukolan ya itultuloy dan paneknekan so katooran da ed si Jehova anggaman ed amin a pananubok ed sikara nen Satanas. Kaukolan day manmatoor anggad patey pian naawat da so balanget na bilay ed tawen.​—Apo. 2:10.

¹⁰ Pian natulongan ira, intarya nen Jehova so panamilin tan panamaseseg a nakaukolan na saray alanaan a Kristiano panamegley na Salita to tan say Kristianon kongregasyon. Alimbawa, oniay insulat nen apostol Pablo ed saray alanaan a Kristiano ed Tesalonica: “Singa sakey ya ama ed saray dilin anak to, a kakalaran mi kayo, tan pababayanien mi kayo, tan tatasian, ta pian komon mankurang kayo a makanakana ed Dios, a manawag ed sikayo ya onloob ed panarian tan gloria ton dili.”​—1 Tes. 2:11, 12.

11. Anton rekord so intarya nen Jehova parad saray kabiangan na “Israel na Dios”?

¹¹ Diad saray dekada kayari impamili ed saray sankaunaan a kabiangan na kongregasyon na alanaan a Kristiano, anengneng nen Jehova a matukoy so pakawalaan na permanentin rekord nipaakar ed ministeryo nen Jesus diad dalin, ontan met ed saray impideneng tan impanimbawa To ed saray alanaan a Kristiano nen inmunan siglo. Kanian, intarya nen Jehova so nipuyan a Kristianon Griegon Kasulatan bilang kaaruman ed wala lan nipuyan a Hebreon Kasulatan. Diad gapo et nisulat so Hebreon Kasulatan parad nasyon na Israel legan na samay panaon a walaan iray espisyal a siglaotan ed Dios. Say Kristianon Griegon Kasulatan et manunan nisulat parad “Israel na Dios,” salanti, saramay alanaan ya agagi nen Kristo tan espiritual ya ilalak na Dios. Siempre, ag-itan mankabaliksan ya agnagunggonaan a maong iray aliwan Israelita diad panaral da ed Hebreon Kasulatan. Mipadpara, saray Kristianon ag-alanaan na masanton espiritu et nagunggonaan met na daakan diad panaral da ed Kristianon Griegon Kasulatan tan pambilay da unong ed simbawa na satan.​—Basaen so 2 Timoteo 3:15-17.

12. Antoy impanonot nen Pablo ed saray alanaan a Kristiano?

¹² Niyabawag a matunong iray Kristiano nen inmunan siglo tan alanaan ira na masanton espiritu ta pian naawat da so mangatatawen a tawir da. Saman ya inkalanaan da et agmankabaliksan ya ompasen la ran arari na saray kapara ran alanaan a Kristiano legan a wadia ni ra’d dalin. Mapatnag ya alingwanan na arum ed saray inmuunan Kristiano itan a katuaan tan pinirawat da so pakatawan ed saray agagi ra ed kongregasyon. Lapud satan et apakiwas si Pablo a mangikuan: “Sikayo napnek kayo la, sikayo mayaman kayo la, akapanari kayo ya andi kami: tan labay ko komon a manari kayo, ta pian makapiari kami met komon ed sikayo.” (1 Cor. 4:8) Kanian onia so impanonot nen Pablo ed saray alanaan nen panaon to: “Aliwan say uleyan mi pananisia yo, noag ingen mananulong kami ed liket yo.”​—2 Cor. 1:24.

Say Inkakompleto na Nipasakbay a Bilang

13. Panon a nantultuloy so impanawag ed saray alanaan kayari 33 C.E.?

¹³ Aliwan amin a 144,000 ya alanaan a Kristiano et apili nen inmunan siglo. Say panatawag ed sikara so nantultuloy ed interon panaon na saray apostol tan diad inlabas na saray siglo et mapatnag a pigpigara so apili. Balet, nantultuloy lamet itan diad tinmumbok iran siglo ya anggad natan. (Mat. 28:20) Diad saginonor, sanen ginmapo lay Jesus a man-ari nen 1914, maples lan nantutumbokan iray ebento.

14, 15. Antoray agawa diad panaon tayo nipaakar ed panatawag ed saray alanaan?

¹⁴ Unona, pinagit nen Jesus ed tawen iray amin ya onsusumpa ed pananguley na Dios. (Basaen so Apocalipsis 12:10, 12.) Insan to inimano  so panagtipon ed nakekeraan niran prospektibon kabiangan na Panarian to pian nakompleto so bilang a 144,000. Sanen mamepegley so dekada na 1930, mapatnag a ngalngali la akompleto itan tan dakel ed saramay onkikiwas ed panagpulong a kimey so agla nanilalon onla’d tawen. Say espiritu so agmamapaneknek a sikara so ananak na Dios. (Ikompara so Roma 8:16.) Imbes, binidbir da a kabiangan ira na ‘arum a karnero,’ a walaan na ilalon manbilay ya andi-anggaan diad paraison dalin. (Juan 10:16) Kanian, kayari 1935 et niyapasakey so panagpulong a kimey diad pantipon ed “baleg ya ulop,” salanti, saramay anengneng nen apostol Juan ed pasingawey a makaliktar ed “baleg ya irap.”​—Apo. 7:9, 10, 14.

¹⁵ Anggaman ontan, diad dakel la ran taon nanlapu la’d dekaday 1930, pigpigara la so natatawag a walaan na ilalo ed tawen. Akin? Diad arum a kipapasen et nayarin sikara so kasalat na saray indibidual ya atawag la balet ta agnansiansian matoor. (Ikompara so Apocalipsis 3:16.) Sinalambit ni ingen nen Pablo so pigaran kabat to ya angibeneg ed katuaan. (Fil. 3:17-19) Siopa sirin so tawagen nen Jehova bilang kasalat na saratan? Siempre, sikaton mismo so mandesidi. Ingen, seguradon agto tawagen iramay balobalo nin abautismoan, noagta saramay indibidual ya akapaneknek lan maong ed katooran da. *​—Luc. 22:28.

16. Anto so pisalamatan tayo nipaakar ed saray alanaan, tan anto so napanisiaan tayo?

¹⁶ Balet, ompatnag ya aliwan amin ya atawag parad mangatatawen ya ilalo nanlapu la’d dekaday 1930 et kasalat na saramay agnansiansian matoor. Mapatnag a sineguro nen Jehova a walaray alanaan a Kristiano ed limog tayo legan na kaunoran iran agew na sayan sistema na bengabengatla angga ed pakaderal na “Babilonia a Baleg.” * (Apo. 17:5) Tan makapanisia tayo a sigpot a nakompleto so 144,000 a membro diad aturon panaon nen Jehova tan amin da so manuley la diad gobierno na Panarian. Napanisiaan tayo met so mapropetikon Salita a say ondarakel lawas a baleg ya ulop et mantultuloy a manmatoor bilang sakey a grupo. Agmanbayag et sikara so ompaway ‘manlapu ed baleg ya irap’ a nasagmak na mundo nen Satanas tan maliket iran mamaarap ed balon mundo na Dios.

Ngalngali la Nakompleto so Mangatatawen a Gobierno na Dios!

17. Unong ed 1 Tesalonica 4:15-17 tan Apocalipsis 6:9-11, anto lay agawa ed saramay alanaan a Kristiano ya inatey a matoor?

¹⁷ Manlapu la’d 33 C.E., pinaneknekan na samplon nilibo ed saray alanaan a Kristiano so mabiskeg a pananisia ra tan nantultuloy iran matoor anggad patey. Sikara so nibilang lan makanepegan a makaawat na Panarian, tan mapatnag ya inawat da lay mangatatawen a tumang da diad kagapo na panaon na kiwawala nen Kristo.​—Basaen so 1 Tesalonica 4:15-17; Apocalipsis 6:9-11.

18. (a) Antoy napanmatalekan na saramay alanaan a wadia ni ed dalin? (b) Panon so pangipasen na saramay kabiangan na arum a karnero ed saray agagi ran alanaan a Kristiano?

 ¹⁸ Saramay alanaan a wadia ni ed dalin et sigpot a makapanmatalek a no mantultuloy iran matoor, naawat dan siansia so tumang da lapud katooran da. Sano dalepdepen na minilyon ed arum a karnero so pananisia na alanaan iran agagi ra, onabobon ira ed sayan imbaga nen apostol Pablo nipaakar ed alanaan iran agagi ed Tesalonica: “Sikamin dili manggayaga kami ed sikayo ed saray iglesia na Dios lapu ed saray anos tan pananisia yo ed amin ya impakapasegsegang yo tan dia ed saray kaermenan ya itetepel yo; A sikato so sakey a mapatnag a tanda ed kaptekan na panangukom na Dios; pian nayarian yo komon so ibilang a makana ed panariay Dios, a lapu ed sikato manlilikna kayo met.” (2 Tes. 1:3-5) Diad ipatey na unor lan membro na alanaan diad dalin, kapiganman itan, nakompleto la so mangatatawen a gobierno na Dios. Talagan makapalikliket itan a panaon​—namparan diad tawen tan diad dalin!

[Saray paimano ed leksab]

Kasin Nipaliwawa Yo?

• Anto so imparungtal na Dios ed si Abraham a walaan na pisiglaotan ed Agew na Panangukom?

• Akin a niyabawag a matunong si Abraham?

• Antoray nagamoran na saray bini nen Abraham sano niyabawag la ran matunong?

• Anto so napanmatalekan na amin a Kristiano?

[Tepetepet Parad Panagaral]

[Litrato ed pahina 20]

Pinaseseg nen Jesus iray papatumbok to a panggunaetan da so pakaawat na Panarian

[Litrato ed pahina 21]

Nen Pentecostes 33 C.E., ginapoan nen Jehova so impamili ed arum a kabiangan na bini nen Abraham

[Saray litrato ed pahina 23]

Misalsalamat so arum a karnero lapud walaray alanaan a Kristiano ed limog da legan na kaunoran iran agew