Onkikiwas “Iramay Walaan na Dugan Awawey na Puso”

“Amin iramay walaan na dugan awawey na puso parad bilay ya andi-anggaan et nagmaliw a mananisia.”​—GAWA 13:48, NW.

1, 2. Panon so inkiwas na saray inmunan Kristiano ed propesiya nen Jesus a say ebanghelyo na Panarian et nipulong ed sankamundoan?

 DIAD libro na Biblia a Gawa et nabasa so makapainteres a salaysay nipaakar ed inkiwas na saray inmunan Kristiano ed propesiya nen Jesus a say ebanghelyo na Panarian et nipulong ed sankamundoan. (Mat. 24:14) Saray maseseg a managpulong et singa ra nanggaway basbas parad amin na saramay ontumbok ed sikara. Lapud maseet ya impanpulong na saray babangatan nen Jesus diad Jerusalem, nilibon totoo a pati say “baleg ya ulop na saray saserdote” so akitipon dia ed inmunan-siglon kongregasyon.​—Gawa 2:41; 4:4; 6:7.

² Saray inmunan misionaryo et dakdakel so atulongan dan magmaliw a Kristiano. Sakey la si Felipe, a linma ed Samaria, tan dakdakel diman so totoon dinmengel ed mensahe to. (Gawa 8:5-8) Si Pablo et maaw-awang so binaroy to, a nanduruma so kaiba to, pian ipulong so mensahe na saray Kristiano diad Chipre, saray arum a lugar ed Asia Minor, Macedonia, Gresya, tan Italya. Diad saray syudad a nampulongan to, dakdakel a Judio tan Griego so nagmaliw a Kristiano. (Gawa 14:1; 16:5; 17:4) Si Tito so nampulong diad Creta. (Tito 1:5) Tan si Pedro so okupadon nankimey ed Babilonia, tan diad samay panaon na impangisulat to ed primeron sulat to nen manga 62-64 C.E. et kinmayat la so kimey a panagpulong na saray Kristiano diad Ponto, Galacia, Capadocia, Asia, tan Bitinia. (1 Ped. 1:1; 5:13) Agaylan makapaliket iraman a panaon! Ontan lay inkaseseg na saray Kristianon managpulong nen inmunan siglo kanian imbaga na saray kakabusol da a ‘ginotgot da so mundo.’​—Gawa 17:6; 28:22.

3. Anto iray resulta natan na panagpulong a kimey na saray manangiyabawag na Panarian, tan antoy epekto na saratan ed sikayo?

³ Diad panaon tayo met et nabebendisyonan so Kristianon kongregasyon na makatantandan idaraak. Agta napapaseseg kayo sano nababasa yo so tinaon a report na saray Tasi nen Jehova tan nanenengneng yo iray resulta na kimey tayo ed sankamundoan? Agta naliketan kayo sano naamtaan yo a saray manangiyabawag na Panarian et akapangikondukta na masulok ya anemiran milyon a panangiyaral ed Biblia legan na 2007 a serbisyon taon? Niarum ni, say bilang na inmatendi ed Memoryal na impatey nen Jesu-Kristo nen katantaon et mangipapatnag a ngalngalin samploran milyon a totoo ya aliwa nin Tasi nen Jehova so interesadon maong ed ebanghelyo kanian inmatendi ra ed sayan importantin okasyon. Mankabaliksan iya a dakel ni so nepeg tayon kimeyan.

4. Siopa iray onkikiwas ed mensahe na Panarian?

⁴ Singa nen inmunan siglo, “amin iramay walaan na dugan awawey na puso parad bilay ya andi-anggaan” so onkikiwas met natan ed mensahe na katuaan. (Gawa 13:48, NW) Si Jehova so mangitotonton ed saratan a totoo dia ed organisasyon  to. (Basaen so Aggeo 2:7.) Anton awawey nipaakar ed Kristianon ministeryo so kaukolan tayon pansiansiaen pian sigpot itayon makapitulongan ed sayan kimey a panagtipon?

Manpulong ya Anggapoy Nilabi

5. Anton klase na totoo so aabobonan nen Jehova?

⁵ Atalosan na saray Kristiano nen inmunan siglo a “say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.” (Gawa 10:34, 35) Kada sakey a malabay a nawalaan na maabig a relasyon ed si Jehova et nepeg a mangagamil na pananisia ed dondon bagat nen Jesus. (Juan 3:16, 36) Tan linawa nen Jehova ya “amin a totoo nilaban ira komon, tan ondago ra ed pakapikabat ed katuaan.”​—1 Tim. 2:3, 4.

6. Anto so agnepeg a gawaen na saray manangiyabawag na Panarian, tan akin?

⁶ Agmanepeg a husgaan na saray manangiyabawag na Panarian iray totoo unong ed rasa ra, kipapasen na bilay da, itsura ra, relihyon da, odino arum niran pakabidbiran da. Nonot mo pan magano: Agta pisalamatan mo so ag-impanlabi ed sika na samay too ya inmunan angitongtong ed sika na saray katuaan ed Biblia? Sirin, nepeg ya ag-itayo masuyat a manginabang ed mensahen makapangisalba na bilay dia ed siopaman a nayarin ondengel ed satan.​—Basaen so Mateo 7:12.

7. Akin ya agtayo nepeg a husgaan iray totoon pupulongan tayo?

⁷ Tinuro nen Jehova si Jesus bilang Ukom; kanian anggapoy kanepegan tayo a mangukom ed siopaman. Matukoy itan lapud, aliwan singa si Jesus, sikatayo so makapanhusga lambengat unong ed “pakanengneng na saray mata” tayo odino “pakadngel na saray layag” tayo. Balet si Jesus et nabasa to so akindalem a kanonotan tan panagkatunongan na sakey a too.​—Isa. 11:1-5; 2 Tim. 4:1.

8, 9. (a) Anton klase na too si Saulo antis a nagmaliw a Kristiano? (b) Anto so naaralan tayo ed eksperiensya nen apostol Pablo?

⁸ Amin lawarin klase na totoo so magmamaliw a lingkor nen Jehova. Sakey lan manunan alimbawa si Saulo, a taga-Tarso, ya akabkabat ed saginonor bilang apostol Pablo. Si Saulo, a sakey a Fariseo, so maruksan sinmumpa ed saray Kristiano. Mabiskeg ton papanisiaan a lingo so Kristianon kongregasyon, kanian sikaray pinasegsegang to. (Gal. 1:13) Diad panmoria na too, ompatnag a sikatoy sakey ed saramay agnailaloan a man-Kristiano. Ingen, walay maabig a bengatla ya anengneng nen Jesus ed puso nen Saulo kanian pinili to a manumpal na sakey a nikadkaduman kimey. Bilang resulta, si Saulo et nagmaliw a sakey ed saray sankaaktiboan tan sankasesegan a membro na Kristianon kongregasyon nen inmunan siglo.

⁹ Anto so ibabangat ed sikatayo na eksperiensya nen apostol Pablo? Diad teritorya tayo, nayarin walaray grupo na totoo ya ompatnag a kabusol day mensahe tayo. Anggaman singano mairap a panisiaan a wala ed sikara so magmaliw a tuan Kristiano, nepeg ya ag-itayo ontutundan mikatunongan ed sikara. No maminsan et anggan saramay iisipen tayo ya agbalot mangawat et interesado manaya. Say kimey a niganggan ed sikatayo et mantultuloy a manpulong ed amin, ya ‘ag-ontutunda.’​—Basaen so Gawa 5:42.

Saray Bendisyon a Nagamoran na Saray ‘Ag-ontutundan’ Manpulong

10. Akin et nepeg ya ag-itayo masuyat a manpulong ed totoon makapataktakot so itsura ra? Mangisalaysay kayo pa na saray eksperiensya ed lugar yo.

¹⁰ Nayarin makapalingo so itsura. Alimbawa, si Ignacio * et impaiyaralan na Biblia ed saray Tasi nen Jehova legan a walad prisoan ed sakey a bansa diad Abalaten ya Amerika. Sikatoy tatakotan lapud masebesebeg. Diman et walaray prison manlalako na saray ginawa ran produkto ed kapara ran priso. Si Ignacio so pansisingilen da ed saramay inmutang tan matewer a manbayar. Balet, diad ilalaknab na pikakabat to ed Biblia tan pangiyaaplika to ed naaaralan to, sayan datin maton et nagmaliw lan mauy-uyamo. Anggapo lay manpapasingil ed sikato na saray pautang da, ingen ta malikeliket si Ignacio lapud pinasimbalo na saray katuaan ed Biblia tan espiritu na Dios so personalidad to. Sikatoy misalsalamat met ed ag-impanlabi na saramay Tasi a maan-anos ya angiyaral ed sikato.

11. Akin et nepeg a mantultuloy tayon pawilen iray totoo?

¹¹ Say sakey ed saray rason no akin a mantultuloy  tayon pawilen iray totoon apasabian tayo la na maong a balita et lapud nayarin manguman tan talagan manguuman iray sirkumstansya tan awawey da. Manlapud samay sampot ya inyakar tayo, nayarin arum so graben nansakit, naandian na trabaho, odino inateyan na inad-aro. (Basaen so Eclesiastes 9:11.) Lapud saray nagagawa ed mundo, saray totoo et nayarin onggapo lan mannonot na aralem nipaakar ed arapen da. Saray ontan a nagagawa et nayarin mamakiwas ed sakey a datin ag-interesado, odino masumpa ni ingen, pian ondengel la. Sirin, nepeg ya ag-itayo masuyat ya inabang ed arum so maong a balita kapiganman a matukoy.

12. Panon so nepeg a panmoria tayo ed saray totoon pupulongan tayo, tan akin?

¹² Say too et walaan na tendensian mangibiig tan manhusga ed arum. Ingen, si Jehova et onnenengneng ed sinansakey a totoo. Sikatoy onnenengneng ed maabig iran kalidad na kada too. (Basaen so 1 Samuel 16:7.) Ontan met komon so panggunaetan tayon gawaen diad ministeryo tayo. Ipapanengneng na dakel ya eksperiensya iray maabig a resulta ed pakawalaan na positibon panmoria ed amin a totoon pupulongan tayo.

13, 14. (a) Akin a nagmaliw a negatibo so sakey a payunir ed biin apulongan to? (b) Anto so naaralan tayo ed sayan eksperiensya?

¹³ Si Sandra, a sakey ya agin payunir, so manpupulong ed kabkaabungan diad sakey ya isla ed Caribbean. Diman et akabat toy Ruth, ya aktibon mibibiang ed saray piesta ed karnabal. Si Ruth et amidua lan akoronaan bilang reyna na karnabal diad bansa ra. Balet sanen impatnag to so masimoon ya interes ed mensahe nen Sandra, niyarunsa so pangiyaral ed sikato na Biblia. Oniay nanonotan nen Sandra: “Kaloob ko ed salas, anengneng ko so balbaleg a litrato nen Ruth ya akakawes na panreyna, ontan met iray tropi ya analoan to. Inisip ko a say sakey a toon popular a maong tan aktibon mibibiang ed saray piesta ed karnabal et agmagmaliw ya interesado ed katuaan. Kanian agak la pinmawil ed sikato.”

¹⁴ Kalabas na pigaran panaon, akiaral si Ruth diad Kingdom Hall, tan kayari na aral, tinepetan toy Sandra, “Akin et agmo ak la pinawil pian iyaralan?” Kinmerew na dispensa si Sandra tan inyarunsa ra lamet ya ituloy so panagaral. Maples so inyaligwas nen Ruth, ya inekal to la iramay litrato to ed karnabal, inmatendi la ed amin a pantitipon tan ginmapo lan nampulong, tan indedika to lay bilay to ed si Jehova. Siempre, inaksobi nen Sandra a lingo imay inisip to nen inmuna.

15, 16. (a) Anto so resulta na impanpulong na sakey a manangipalapag ed kanayon to? (b) Akin a say abenegan na sakey a kanayon so agnepeg a manismaya ed sikatayo pian sikatoy pulongan tayo?

¹⁵ Wala met iray maabig a resulta a naeeksperiensya na dakel a makanpantatasi ed agmananisian kakanayon da, anggaman ompatnag ya ag-iraya magmaliw ya interesado. Konsideraen pa so eksperiensya nen Joyce, a sakey a Kristianon agi tayo diad Estados Unidos. Say bayaw to et mabetbet a nipripriso manlapu la nen tin-edyer. “Ibabaga na totoo a nagmaliw ya andi-kakanaan so bilay to, ta sikatoy alanor ed druga, nagmaliw a matakew, tan nanggawa na dakel ni ran mauges a bengatla. Balet, anggano agaylay irap, intultuloy kon innabang ed sikato iray katuaan ed Biblia ed loob na 37 a taon,” so insalaysay nen Joyce. Saray maanos ya impansagpot ton  ontulong ed bayaw to so atumangan na daakan sanen sikatoy impaiyaralan a siansia na Biblia ed saray Tasi nen Jehova tan sigpot ton pinasimbalo so bilay to. Diad agano ni et abautismoan so bayaw nen Joyce diad sakey a distriton kombension ed California, E.U.A., diad edad ton 50. Inkuan nen Joyce: “Akaakis ak lapud liket ko. Malikeliket ak ta agak balot sinmawan nampulong ed sikato!”

¹⁶ Nayarin masuyat mon itongtong iray katuaan na Biblia ed saray kakanayon mo lapud abenegan da. Ingen, si Joyce so agmasuyat a nampulong ed bayaw to. Diad tua, siopa ta so toon makaamta na walad puso na sananey a too? Nayarin masimsimoon a manaanap na tuan relihyon so sakey a too. Kanian, ag-itayo komon masuyat a mangiter ed sikato na pankanawnawa a naromog itan.​—Basaen so Uliran 3:27.

Sakey a Libron Mausausar ed Panagaral na Biblia

17, 18. (a) Anto so ipapanengneng na saray report ed interon mundo nipaakar ed kakanaan na libron Anto so Peteg ya Ibabangat na Biblia? (b) Mangisalaysay kayo pa na makapaseseg ya eksperiensya yo diad impangusar yo na sayan libro.

¹⁷ Ipapanengneng na saray report na saray bansa ed interon mundo a dakel a matuan-impanpuson indibidual so maliket a manaral na Biblia panamegley na libron Anto so Peteg ya Ibabangat na Biblia? Si Penni, a sakey a payunir diad Estados Unidos, so akapangigapo na pigaran panangiyaral panamegley na sayan libro. Duara ed sikara so walaan na saray kaamong a maedad la a debosyonadon membro na relihyon da. Ag-amta nen Penni no panon kasi ikiwas da ed Makasulatan iran katuaan a nidatak diad libron Ibabangat na Biblia. Anggaman ontan, oniay insulat to: “Lapu ed malinlinew, makatunongan, tan simplin inkipresenta na impormasyon, main-inomay dan sinisia a katuaan iray naaaralan da, ya ag-ira sinmuppiat nisay nanduaruwa.”

¹⁸ Si Pat, a sakey a manangipalapag ed Britanya, so ginmapon angiyaral na Biblia ed sakey a biin tinmaynan ed sakey a bansa ed Asia pian naarawian to so peligro. Sayan bii so apaskar ya ontaynan ed bansa ra kayari na puersaan ya impangala na saray rebelden sundalo ed asawa to tan ananak to, tan agto la ran balot apinengnengan. Sikatoy pinagyaw dan pateyen, pinoolan day abung to, tan sikatoy nansusublayan a ni-rape na pigaran lalaki. Lapud saya et inisip ton anggapo lay kakanaan na bilay to, tan aminpiga ton ninonot so manbikkel. Balet, sikatoy awalaan na ilalo sanen impaiyaralan na Biblia. Oniay insulat nen Pat: “Balbaleg so epekto ed sikato na saray simplin eksplinasyon tan ilustrasyon diad libron Ibabangat na Biblia.” Maples so inyaligwas na sayan iyaaralan, kinmualipika a magmaliw ya agbautismadon manangipalapag, tan imbaga to a labay to lay manpabautismo diad ontumbok ya asemblea. Talagan makapaliket so panulong ed saray masimoon a totoo a natalosan  tan naapresya ra so ilalon iyoopresi na Kasulatan!

‘Ag-itayo Komon Onkesaw a Manggawa na Maabig’

19. Akin a nagkalalo lan inkaganatan so kimey a panagpulong?

¹⁹ Diad ilalabas na kada agew et nagkalalo lan inkaganatan so niganggan ed sikatayon kimey a panagpulong tan panaggaway babangatan. Kada taon et nilibon totoo a walaan na dugan awawey na puso so onkikiwas ed panagpulong tayo. Ingen, lapud ‘asingger la so baleg ya agew nen Jehova,’ saramay wala ni ed espiritual a kabilungetan so “mantibakyar a mamapaarap ed panamateyan.”​—Sof. 1:14; Uli. 24:11, NW.

20. Anto so nepeg a determinadon gawaen na kada sakey ed sikatayo?

²⁰ Wala ni pankanawnawa tayo a natulongan iratan a totoo. Balet pian nagawaan itan, importante ya aligen tayo iray inmunan-siglon Kristiano, ya ‘agtinmundan nambabangat tan nampupulong a si Jesus et Kristo.’ (Gawa 5:42) Alig yo so ehemplo ra diad ag-itunda anggaman ed kairapan, diad pangimano ed “dunong [yo] ed panagbangat,” tan diad pampulong ed amin a totoo ya anggapoy nilabi! ‘Ag-itayo sirin komon onkesaw a manggawa na maabig,’ ta no ag-itayo ontunda et manani itayo na daakan a bendisyon lapud panangabobon na Dios.​—2 Tim. 4:2, NW; basaen so Galacia 6:9.

[Paimano ed leksab]

Panon Yon Ebatan?

• Siopa iray onkikiwas ed maong a balita?

• Akin ya agtayo nepeg a husgaan iray totoon pupulongan tayo?

• Antoray resulta ed panguusar tayo na libron Anto so Peteg ya Ibabangat na Biblia?

[Tepetepet Parad Panagaral]

[Saray litrato ed pahina 13]

Onkikiwas so nilibo a matuan-impanpuson indibidual

[Saray litrato ed pahina 15]

Anto so naaralan tayo nipaakar ed impanguman nen apostol Pablo?

[Litrato ed pahina 16]

Saray manangiyabawag na Panarian so agmanhuhusga ed totoo