Say Salita nen Jehova et Mabilay

Saray Pabitar ed Libro a Mateo

SAY unaan a nansulat ed makapainteres a salaysay nipaakar ed bilay tan ministeryo nen Jesus et si Mateo, a maapit a kaulop nen Jesu-Kristo tan datin managsingil na buis. Say Ebanghelyo nen Mateo so orihinal ya insulat ed Hebreo tan diad saginonor et impatalos ed Griego. Satan so akompleto nen manga 41 C.E. tan kinmanan koneksion na Hebreon Kasulatan tan Kristianon Griegon Kasulatan.

Sayan makapatenyeg tan makabkabaliksan ya Ebanghelyo, a mapatnag a manunan nisulat parad saray manbabasan Judio, so anukoy ed si Jesus bilang say insipan a Mesias, say Anak na Dios. No imanoen tayon maong iray mensahe na sayan libro, napabiskeg so pananisia tayo ed tuan Dios, ed say Anak to, tan ed saray sipan To.​—Heb. 4:12.

“SAY PANARIAN NA TAWEN ASINGGER LA”

(Mat. 1:1–20:34)

Say impabitar nen Mateo et say tema a Panarian tan saray bangat nen Jesus, anggaman agnantutumbokan so impangisalaysay to ed satan. Bilang alimbawa, say Sermon ed Palandey et akaunan insalaysay ed sayan libro anggano imbalikas iya nen Jesus diad kapegleyan la na ministeryo to.

Sanen manpupulong si Jesus ed Galilea, sikato so nanggawa na saray milagro, amilin ed saray 12 apostol nipaakar ed ministeryo, angondena ed saray Fariseo, tan angisalaysay ed saray ilustrasyon nipaakar ed Panarian. Insan sikato so inmalis ed Galilea tan linma ed “saray ketegan na Judea ed labas na Jordan.” (Mat. 19:1) Diad dalan, oniay inkuan to ed saray babangatan to: ‘Ontatdang itayo ed Jerusalem tan say Anak na too et dusaen da naani ed ipapatey tan diad komatlon agew sikatoy onoli ed bilay.’​—Mat. 20:18, 19.

Makasulatan Iran Tepet a Naebatan:

3:16​—Diad anton paraan ya ‘alukasan iray tawen’ sanen abautismoan si Jesus? Ompatnag ed sarayan salita ya anonotan la nen Jesus so impanbilay to ed tawen.

5:21, 22​—Kasin mas ambelat nin kasalanan so pangipatnag na sanok nen say panem-em ed satan? Impasakbay nen Jesus ya ambelat a kasalanan so panem-em na pirmin sanok ed agi. Balet, say pangipatnag na sanok diad panmudmora et mas ambelat nin kasalanan, a say sakey so walay eebatan to ed sankatageyan a korte.

5:48​—Talaga kasin posible a magmaliw itayon ‘ayadyari, a singa say mangatatawen ya Ama tayo ya ayadyari’? On, diad relatibon pantalos. Sanen si Jesus et wadia ni ed dalin, siningbat to so nipaakar ed aro, tan imbaga to ed saray ondedengel ya aligen da so Dios pian magmaliw iran ayadyari odino naspot ed aro ra. (Mat. 5:43-47) Panon? Sano aroen da pati saray kakabusol da.

7:16​—Antoran “bunga” so pakabidbiran na tuan relihyon? Say kaiba ed sarayan bunga et aliwa labat lan say ugali tayo, noagta saray sisiaen tayo​—saray bangat a tutumboken tayo.

10:34-38​—Kasin natetel so mensahe na Biblia lapud inkaapag-apag ed pamilya? Andin balot. Imbes, say sengegan na inkaapag-apag et say panmoria na agmananisia iran membro na pamilya. Nayarin agda awaten odino sumpaen da so Inkakristiano kanian nanaapag so pamilya ra.​—Luc. 12:51-53.

11:2-6​—Akin a tinepet ni nen Juan no si Jesus iman so “onla dia” ta amta to la a si Jesus imay Mesias sanen arengel to so boses na impangabobon na Dios? Nayarin tinepet iya nen Juan ta labay ton si Jesus a mismo so mamekder ed saya. Sakey ni, labay a naamtaan  nen Juan no wala ni “sananey” ya onsabi a walaay pakayari ed Panarian tan manumpal ed amin ya iilaloan na saray Judio. Napatnagan ed ebat nen Jesus ya anggapo lay arum ya onsabi.

19:28​—Siopa so irerepresenta na ukomen a “labinduan kailalakan na Israel”? Agda irerepresenta so 12 tribu na espiritual ya Israel. (Gal. 6:16; Apo. 7:4-8) Saramay apostol a katongtong nen Jesus ed saman so kaiba ed espiritual ya Israel, aliwan ukom ed saray membro ra. Si Jesus so akisipanan odino ‘anuro ed sikara parad sakey a panarian’ tan magmaliw iran “panarian tan saserdote nipaakar ed Dios.” (Luc. 22:28-30; Apo. 5:10) Saratan ya espiritual ya Israel et “ukomen da so mundo.” (1 Cor. 6:2) Kanian, mapatnag a say irerepresenta na “labinduan kailalakan na Israel,” ya ukomen na saray walad mangatatawen iran trono et say katooan ed mundo ya aliwan kabiangan na maari tan saserdoten klase, ya ililitrato na 12 tribu diad Agew na Pananakbong.​—Lev., kap. 16.

Saray Leksion ed Sikatayo:

4:1-10. Naaralan tayo ed sayan salaysay a si Satanas et tudtua tan aliwa labat lan kaugsan. Uusaren to so “kilalawan na laman tan kilalawan na mata tan maapan gloria na bilay” pian tuksoen to itayo. Anggaman ontan, say pangiyaplika ed saray prinsipyo ed Biblia so makatulong pian mansiansia itayon matoor ed Dios.​—1 Juan 2:16.

5:1–7:29. Nonot yoy pankaukolan yo ed espiritual. Magmaliw a mikakareenan. Iwaklit ed kanonotan iray imoral a bengatla. Toor yoy salita yo. Sano manpipikasi, unaen iray espiritual aliwan saray materyal a bengatla. Magmaliw a mayaman ed Dios. Anapen nin unona so Panarian tan say inkatunong na Dios. Agmanhuhusga. Gawaen so linawa na Dios. Talagan praktikal iran leksion so Sermon ed Palandey!

9:37, 38. Nepeg itayon onkiwas unong ed kerew tayo ed Katawan a “mangibaki na saray manani ed aanien to,” a maseseg a mibiang ed panaggaway babangatan.​—Mat. 28:19, 20.

10:32, 33. Nepeg ya agtayon balot ontakot ya itongtong so pananisia tayo.

13:51, 52. Sano natalosan tayo iray katuaan nipaakar ed Panarian, wala lay responsabilidad tayo a mangibangat tan ontulong ed arum pian natalosan da met iratan.

14:12, 13, 23. Importante so panaon na pambukbukor parad makabkabaliksan a pandalepdep.​—Mar. 6:46; Luc. 6:12.

17:20. Kaukolan tayo so pananisia pian natalonaan iray singa palandey a babeng a mangaamper ed iyaaligwas tayo ed espiritual, tan pian nadaeg iray irirap. Nepeg ya itultuloy tayon pabiskegen so pananisia tayo ed si Jehova tan ed saray sipan to.​—Mar. 11:23; Luc. 17:6.

18:1-4; 20:20-28. Lapud saray babangatan nen Jesus et ag-ayadyari tan say abangonan dan relihyon et mamapabli ed posisyon, nagmaliw ya importantin maong ed sikara so inkabantog. Pian nadaeg tayo so makasalanan iran tendensia, nepeg tayon paaligwasen so inkamapaabeba tan pansiansiaen so dugan panmoria ed saray pribilehyo tan responsabilidad.

“SAY ANAK NA TOO SO NIYAWAT”

(Mat. 21:1–28:20)

Si Jesus so ‘akakabayo ed sakey ya asno’ sanen linma ed Jerusalem nen Nisan 9, 33 C.E. (Mat. 21:5) Diad tinmumbok ya agew, sikato so linma ed templo tan nilinisan to itan. Nen Nisan 11, sikato so nambangat ed templo, kinondena to iray eskriba tan saray Fariseo, tan diad saginonor et inter to ed saray babangatan to so ‘tanda na isabi to tan say anggaan na mundo.’ (Mat. 24:3) Nen tinmumbok ya agew, oniay inkuan to ed sikara: ‘Amta yo a kalabas na duaran agew onsabi so paskua, et say Anak na too niyawat pian ipasak.’​—Mat. 26:1, 2.

Nisan 14 ed saman. Kayari nen Jesus ya inletneg so Memoryal na asingger lan ipatey to, sikato so intapat, inaresto, sinubok, tan impasak. Diad komatlon agew, sikato so pinaoli. Sakbay na isegep to ed tawen, oniay ingganggan nen apaolin Jesus ed saray papatumbok to:  “Onla kayo sirin, tan manggawa kayo na saray babangatan ed amin a nasyones.”​—Mat. 28:19.

Makasulatan Iran Tepet a Naebatan:

22:3, 4, 9​—Kapigan inter so taloran imbitasyon a mibansal? Niiter so unonan imbitasyon a tiponen so nobyan klase sanen si Jesus tan saray patumbok to et ginmapon nampulong nen 29 C.E., tan nantultuloy itan anggad 33 C.E. Say komaduan imbitasyon et nipasabi manlapud Pentecostes 33 C.E., sanen naawat na saray babangatan so masanton espiritu, anggad 36 C.E. Sarayan imbitasyon et para labat ed saray Judio, Judion proselita, tan Samaritano. Balet, say komatlon imbitasyon et inter ed totoo a walad saray dalan diad paway na syudad, salanti, saray ag-agalsiman a Gentil, manlapud 36 C.E., sanen akomberte so opisyal a Romanon armada a si Cornelio, anggad panaon tayo.

23:15, NW​—Akin a say proselita, odino akomberte, na saray Fariseo et “mamiduan nigana ed Gehenna” nen saray mismon Fariseo? Saray arum ya akomberte na saray Fariseo et nayarin dati lan makaskasalanan. Balet, mas linmoor ni ra sanen akomberte ira ed inkapanatiko na saray Fariseo, a posiblin sinmobra ni ra nen saray naukom lan managbangat da. Kanian, ‘nigana ira ed Gehenna,’ a nagkalalo ni nen saray Judion Fariseo.

27:3-5​—Antoy nagbabawian nen Judas? Anggapoy pakapatnagan a say alikna nen Judas et tuan pagbabawi. Imbes ya onkerew ed Dios na perdona, diad saray pangulo na saserdote tan saray mamasiken so angipatuaan to na kasalanan to. Nepeg labat a sikato so nakonsiensia tan naermenan lapud akagawa na “kasalanan a makapatey.” (1 Juan 5:16) Kanian, say rason na pagbabawi to et lapud desperado lay kipapasen to.

Saray Leksion ed Sikatayo:

21:28-31. Say talagan importante ed si Jehova et say panggawa tayo na linawa to. Singa bilang, nepeg a maseseg itayon manpulong tan manggaway babangatan.​—Mat. 24:14; 28:19, 20.

22:37-39. Talagan malinlinew so inkasegek na duaran sankabalegan a ganggan nipaakar ed kakaukolanen na Dios ed saray mandadayew ed sikato!

[Litrato ed pahina 31]

Kasin maseseg kan mibibiang ed panagani a kimey?

[Credit Line]

© 2003 BiblePlaces.com

[Litrato ed pahina 31]

Impabitar nen Mateo so tema a Panarian