Aligen so Sankatalonggaringan a Misionaryo

“Mialig kayo komon ed siak, singa siak met ed Kristo.”​—1 COR. 11:1.

1. Akin a nepeg tayon aligen si Jesu-Kristo?

 INALIG nen apostol Pablo so sankatalonggaringan a Misionaryo, si Jesu-Kristo. Onia met so impaseseg nen Pablo ed saray kapara ton Kristiano: “Mialig kayo komon ed siak, singa siak met ed Kristo.” (1 Cor. 11:1) Kayari nen Jesus ya inurasan so kasalian na saray apostol to, bilang panangipanengneng na aktual ya alimbawa na inkamapaabeba, oniay imbaga to ed sikara: “Inikdan takayo na sakey a pangaligan, pian sikayo gawaen yo met so singa ginawak ed sikayo.” (Juan 13:12-15) Bilang Kristiano natan, obligasyon tayon aligen si Jesu-Kristo diad salita tan gawa, ontan met ed saray kalidad ya ipapatnag tayo.​—1 Ped. 2:21.

2. Anggano agka tinuro na Mananguley ya Ulop a manmisionaryo, anton espiritu so sarag mon pawalaen?

² Diad akaunan artikulo, naaralan tayo a say misionaryo et sakey a nibakin manag-ebanghelyo, salanti, sakey a manangipasabi na maong a balita ed arum. Nipaakar ed saya, walaray makapainteres ya intepet nen Pablo. (Basaen so Roma 10:11-15.) Imanoen ya oniay intepet na apostol: “Panon so pakadngel da no anggapo so manangipulong?” Insan to inaon irayan balikas manlapud propesiya nen Isaias: “Alay karakpan na saray sali na saray mangitarok na saray magayaga a balita na saray maong a bengatla!” (Isa. 52:7) Anggano agka nin balot tinuro tan nibakin manmisionaryo ed arum a bansa, sarag moy nawalaan na espiritu na panag-ebanghelyo, ya aligen si Jesus bilang sakey a maseseg a manangiyabawag na maong a balita. Katantaon et 6,957,852 a manangipalapag na Panarian so ‘nanggawa ed gawa na ebanghelista’ diad 236 a bansa.​—2 Tim. 4:5.

“Tinaynan Mi ya Amin, tan Tinumbok Mi Ka”

3, 4. Antoy intalirak nen Jesus ed tawen, tan antoy nepeg tayon gawaen pian magmaliw a papatumbok to?

³ Pian nasumpal nen Jesus so nipabtang a kimey  to diad dalin, “nilukpos to so inkasikato, ya inala to so ereng na sakey ya aripen,” a tinaynan toy mangatatawen a bilay tan gloria to. (Fil. 2:7) Antokaman so gawaen tayo bilang panangalig ed si Jesu-Kristo, agbalot itan makapipara ed ginawa to sanen linma diad dalin. Balet, sarag tayoy makapansiansian matoor bilang papatumbok to, ya agtayo kakawananen iray intalirak tayo la ed mundo nen Satanas.​—1 Juan 5:19.

⁴ Aminsan et oniay imbaga nen apostol Pedro ed si Jesus: “Nia, sikami tinaynan mi ya amin, tan tinumbok mi ka.” (Mat. 19:27) Tampol a tinaynan di Pedro, Andres, Santiago, tan Juan iray iket da sanen inimbitaan ira nen Jesus ya ontumbok ed sikato. Tinaynan day negosyo ran panagsigay tan ginawa ran manunan kimey so ministeryo. Unong ed Ebanghelyo nen Lucas, oniay imbaga nen Pedro: “Nia, pinaulyan mi kayarian mi, et tinumbok mi ka.” (Luc. 18:28) Agkinaukolan a taynan na maslak ed sikatayo so amin a ‘kayarian tayo’ pian makatumbok ed si Jesus. Anggaman ontan, talagan kinaukolan tayon ‘ibeneg so inkasikatayo’ pian magmaliw a patumbok nen Kristo tan sigpot-puson makapanlingkor ed si Jehova. (Mat. 16:24) Sayan kurang et angitarok na daakan a bendisyon. (Basaen so Mateo 19:29.) Say pangalig ed si Kristo diad pangipatnag na espiritu na panag-ebanghelyo so mamapaliket ed sikatayo, nagkalautla sano walay anggan melag labat a nitulong tayo ed sakey a too pian onapit ed Dios tan ed inararo ton Anak.

5. Mangisalaysay na eksperiensya a mangipapanengneng no antoy nayarin desidien na sakey ya imigrante sano naaral toy katuaan ed Biblia.

⁵ Si Valmir, a tubo ed Brazil ingen ta manaayam ed nisulinek na Suriname et sakey a managminas na balitok. Sikatoy buanges tan imoral. Aminsan, sanen walad syudad, sikatoy ginapoan ya inyaralan ed Biblia na saray Tasi nen Jehova. Si Valmir so nanaral ya inagew-agew, nanggawa na dakel a pananguman, tan agnambayag et nampabautismo. Sanen atebek ton sikatoy napupugeran na anapan to a mangiyaplika ed saray bangat na Biblia, inlako toy maasenson negosyo to, tan pinmawil ed Brazil pian tulongan so pamilya ton makaromog met ed espiritual iran kayamanan. Dakel iran imigrante so anaynan na anapan da ed mayaman iran bansa sanen naaralan day katuaan ed Biblia tan pinmawil ed bansan nianakan da pian tulongan ed espiritual iray kakanayon da tan arum nira. Saray ontan a manangipalapag na Panarian et mangipapatnag na tuan espiritu na panag-ebanghelyo.

6. Anto so sarag tayon gawaen no agtayo makaalis pian manlingkor ed saray lugar a babaleg so pankaukolan parad manangipulong na Panarian?

⁶ Walaray Tasi a linman manlingkor ed saray lugar a babaleg so pankaukolan parad manangipulong na Panarian. Say  arum ni ingen et diad arum a bansa. Nayarin anggapo itayo’d kipapasen pian gawaen so ontan, balet ta sarag tayon aligen si Jesus diad lawas panggawa tayoy sankaabigan ed ministeryo.

Itatarya nen Jehova so Panangipasal a Nakaukolan

7. Antoran eskuelaan so inggagalan mangipasal ed saramay malabay a mamaaligwas ed abilidad da bilang manangiyabawag na Panarian?

⁷ No panon a si Jesus et akaawat na panangipasal manlapud Ama to, nagunggonaan itayo met ed panangibangat ya itatarya nen Jehova natan. Onia so inkuan a mismo nen Jesus: “Nisulat ed saray propetas, Et nabangatan ira ya amin [nen Jehova].” (Juan 6:45; Isa. 54:13) Natan et walaray eskuelaan a nagkalautlan inggagalan manginlong ed sikatayo bilang manangiyabawag na Panarian. Seguradon amin tayo et agunggonaan la ed Teokratikon Eskuelaan Parad Ministeryo diad kongregasyon tayo. Pribilehyo na saray payunir so pakaatendi ed Pioneer Service School. Nanggayagaan na arum ya abayag lan payunir so pakapanaral lamet ed satan ya eskuelaan. Saray mamatatken tan ministeryal a lingkor so onaatendi ed Kingdom Ministry School pian napaaligwas so abilidad dan manbangat tan say paraan na panaglingkor da ed saray kapananisiaan. Dakel a balolakin mamatatken tan ministeryal a lingkor so akapanaral la ed Ministerial Training School, ya angipasal ed sikaran ontulong ed arum diad panagpulong. Tan dakel met ed saray agagin lalaki tan bibii ya akaawat na asainmin a manmisionaryo so nipasal diad Watchtower Bible School of Gilead.

8. Antoray mabulos ya isakripisyo na saray agagi pian makagamor iray panangipasal ya itatarya nen Jehova?

⁸ Dakel iran Tasi nen Jehova so nanggawa na saray pananguman pian makaatendi ed sarayan eskuelaan. Singa bilang si Yugu. Sikatoy ag-inabuloyan na amo to a makapanbakasyon, kanian inmekal ed trabaho to pian makaatendi ed Ministerial Training School. Oniay inkuan nen Yugu: “Agko iman pagbabawian. Ta diad tua, no inikdan da ak na pabor a makapanbakasyon, ompan ilaloan da laingen ya agak lan balot onekal ed kompanya. Balet natan et bulos ak a mangawat na antokaman a kimey manlapud si Jehova.” Pian naanamot so panangipasal ya itatarya na Dios, dakel so angisakripisyo ed saray bengatlan datin papablien dan maong.​—Luc. 5:28.

9. Mangisalaysay na eksperiensya a mangipanengneng ed inkaepektibo na Makasulatan a panagbangat tan magunaet a panagsagpot.

⁹ Say Makasulatan a panagbangat tan inkagunaet et epektibon maong. (2 Tim. 3:16, 17) Konsideraen pa so agawa ed si Saulo a taga Guatemala. Sikatoy nianak a medyo walaay deperensya ed isip. Kanian oniay imbaga na sakey a maestra to ed si nanay to, ‘Agmo la pipiliten a manaral a manbasa so anak mo ta nadismaya labat.’ Kanian tinmunday Saulo a naneskuela ya agto makabasa. Balet, sakey a Tasi so angibangat ed sikato a manbasa, diad tulong na brosyur ya Apply Yourself to Reading and Writing. Agnambayag, inmaligwas lan inmaligwas si Saulo ya anggad sarag to lay manpaliwawa ed Teokratikon Eskuelaan Parad Ministeryo. Diad saginonor, sanen nampulong ed kabkaabungan so nanay nen Saulo, akatongtong to imay maestra. Nen akabatan na saman a maestra a makabasa lay Saulo, impaipila to si Saulo ed ontumbok a simba. Diad tinmumbok a simba, oniay intepet na maestra nen Saulo ed sikato, “Antoy ibangat mo’d siak ey?” Ginapoan nen Saulo ya imbasa so sakey a parapo ed libron Anto so Peteg ya Ibabangat na Biblia? Say kuanto’may maestra et “Agak makapanisian sika lay mangibabangat ed siak natan.” Lapud agto la napokpokan so lua to, nilakap toy Saulo.

Panagbangat a Mamapakiwas ed Puso

10. Anton alay-abig a katulongan so nausar tayo ed pangibangat ed katuaan na Biblia?

¹⁰ Saray imbangat nen Jesus et imbase to ed imbangat ed sikato nen Jehova a mismo tan ed saray panangigiyan naromog ed nisulat a Salita na Dios. (Luc. 4:16-21; Juan 8:28) Naalig tayo si Jesus diad pangiyaplika tayo ed saray simbawa to tan diad pambangat tayo base ed Kasulatan. Kanian mantutunosan so ibabaga tan iisipen tayon amin, tan ontutulong iya ed pankakasakey tayo. (1 Cor. 1:10) Agaylay pisalsalamat tayo ta say “matoor tan makabat ya aripen” et mangitatarya na saray publikasyon a nibase ed Biblia a makatulong ed sikatayon napansiansia so pankakasakey tayo ed panagbangat tan ed panumpal ed kimey tayo bilang ebanghelisador! (Mat. 24:45; 28:19, 20) Sakey ed  sarayan publikasyon so libron Ibabangat na Biblia, a wala la natan ed 179 a lenguahe.

11. Panon ya atalonaan na sakey ya agin bii ed Etiopia so isusumpa diad impangusar to ed libron Ibabangat na Biblia?

¹¹ Say panaral ed Kasulatan, ya uusaren so libron Ibabangat na Biblia so makapanguman ni ingen ed puso na saray onsusumpa. Alaen pan alimbawa si Lula a payunir ed Etiopia. Aminsan, sanen sikatoy mangiyaaral na Biblia, biglan sinmabi so sakey a biin kanayon na iyaaralan to, a masanok ya angibagan agda la kaukolan so ontan nin panag-aral. Kalmadon akikatunongan si Lula ed sikato, panamegley na samay ilustrasyon nipaakar ed peken kuarta diad kapitulo 15 na libron Ibabangat na Biblia. Kinmalma imay bii tan inabuloyan to laran mangituloy ed panaaral da. Sikatoy ni ingey wadman diad tinmumbok a panagaral tan impaiyaralan met la na Biblia, tan imbaga ton anggano manbayar ni! Ag-abayag et mamitlo la’d sakey simba so panaaral da tan alay-abig so inyaligwas to ed espiritual.

12. Mangiter na alimbawa a mangipanengneng no panon ya epektibon nibangat na saray kalangweran iray katuaan ed Biblia.

¹² Nausar met na saray kalangweran so libron Ibabangat na Biblia pian makatulong ed arum. Sanen say 11-años a si Keanu, a taga Hawaii et mamabasa ed sayan libro diad eskuelaan, sikatoy tinepeten na sakey a kaklase to, “Akin et agkayo manseselebra na holiday?” Imbasa nen Keanu so ebat manlapud mismon apendise ya atemaan na “Nepeg Tayo Kasin Selebraan Iray Holiday?” Insan to impanengneng ed sikato so listaan na saray teman lugan na libro tan tinepetan to imay kaklase to no dinan so paninteresan ton maong, tan nigapo so panangiyaral na Biblia. Nen imbeneg a serbisyon taon, akapangikondukta iray Tasi nen Jehova na 6,561,426 a panangiyaral na Biblia, tan dakel ed sikara so angusar ed libron Ibabangat na Biblia. Kasin uusaren yo iyan katulongan ed panangiyaral?

13. Diad anton paraan a say panaral ed Biblia et makaimpluensyan maong ed totoo?

¹³ Say panaral ed Kasulatan ya usaren so libron Ibabangat na Biblia so makaimpluensyan maong ed saramay malabay a manggawa ed linawa na Dios. Sakey a sanasawan espisyal payunir ed Norway so akapangigapo na panangiyaral na Biblia ed sakey a pamilyan nanlapu ed Zambia. Sayan sanasawan taga Zambia et walaan lay taloran ananak a bii tan agda la labay so manilalak. Kanian sanen nanlukon imay asawan bii, dineside ran paekal itan. Balet, pigaran agew antis a manpakonsulta ed doktor iyan sanasawa, inaral da so kapitulon apauloan na “Ipasen so Bilay Unong ed Panangipasen na Dios ed Satan.” Atenyeg a maong iyan sanasawa ed samay litrato na agni nianak ya ugaw ed saman a kapitulo kanian nandeside iran agla ipaekal so lukon. Sikaray nantultuloy ya angipanengneng na maabig ya iyaaligwas ed espiritual tan sanen niyanak imay ugaw, say inggaran da ed sikato et samay ngaran na asawan lakin angiyaral.

14. Iyilustra no panon a manreresulta ed maabig so pambilay unong ed no antoy ibabangat tayo.

¹⁴ Sakey ya importantin aspekto na panagbangat nen Jesus et say impanbilay to unong ed no  antoy imbangat to. Pandinayewan na dakel a totoo so maabig a kondukta na saray Tasi nen Jehova, a mangaalig ed si Jesus ed sayan pamaakaran. Walay negosyante ed New Zealand ya aloobay kotse to tan atakew so porpolyo to. Inreport to iya ed pulis ya angikuan ed sikaton: “Nipawil labat ed sika so abalang mo no say akalmo et sakey a Tasi nen Jehova.” Samay porpolyo et aromog na sakey a Tasin mandidiliber na dyaryo. Sanen akabatan itan na samay akankayarian, sikatoy linma ed abung na agi. Nainawaan iyan negosyante sanen anengneng ton wadman imay dokumenton importantin maong ed sikato. Oniay imbaga ed sikato na agin bii, “Manepeg labat ya ipawil ko itan, nagkalautla ta sakey ak a Tasi nen Jehova.” Nandinayew imay negosyante ta anonotan to imay imbaga ed sikato na pulis ed saman lanlamang a kabuasan. Petepeteg a saray tuan Kristiano et manbibilay unong ed saray bangat na Biblia tan aaligen da si Jesus.​—Heb. 13:18.

Aligen so Awawey nen Jesus ed Totoo

15, 16. Panon tayon nasagyat iray totoo ed mensahen ipupulong tayo?

¹⁵ Lapud awawey ya ipapatnag nen Jesus ed saray totoo, sikaray asagyat ed mensahe to. Alimbawa, lapud panangaro tan inkamapaabeba to, apaapit iray ordinaryon totoo ed sikato. Impanengneng toy panangabagey ed saramay inmasingger ed sikato tan niligliwa to ra panamegley na makatambayo iran salita, a dakel so pinaabig ton mansasakit ed pisikal. (Basaen so Marcos 2:1-5.) Agtayo makapanggawa na saray milagro, balet sarag tayoy mangipanengneng na panangaro, inkamapaabeba, tan panangabagey​—kalidades ya ontulong ed totoon nasagyat ed katuaan.

¹⁶ Walay agawaan na panangabagey ya impatnag nen Tariua, sakey ya espisyal payunir, sanen sikatoy tinmoktok ed abung na sakey a masiken a manngaray Beere, a manaayam ed sakey ed saray mas arawin isla na Kiribati dia ed Abalaten a Pasipiko. Anggano impatnag nen Beere a sikatoy ag-interesadon ondengel, naimano nen Tariua a walay parte na laman to ya abaldado tan sikatoy naabagey to. “Nandngelan yo ta la no antoy isisipan na Dios ed saray totoon mansasakit tan maedad la?” so intepet nen Tariua. Insan to imbasa so pigara ed saray propesiya nen Isaias. (Basaen so Isaias 35:5, 6.) Nikelawan so masiken kanian oniay inkuan to, “Pigay taon ak lan manbabasay Biblia tan pigay taon ak lan bibisitaen na sakey a misionaryo ed relihyon mi, balet ta agko nin balot abasa itan ed Biblia.” Nigapo so panangiyaral na Biblia ed si Beere, tan alay abig so inyaligwas to ed espiritual. On, walay abaldadon kabiangan na laman to, balet ta sikatoy abautismoan la natan, mangidadaulo la ed panangasikaso ed sakey a grupo ed saman ya isla, tan nasasarag ton liberen so interon isla pian ipulong so maong a balita.

Itultuloy ya Aligen si Kristo

17, 18. (a) Panon kayon magmaliw a matalonan manag-ebanghelyo? (b) Anto so naeksperiensya na saramay ipapapuso ray ministeryo ra?

¹⁷ Unong ya aminpiga lan ipapanengneng na saray makapaliket ya eksperiensya ed ministeryo, magmaliw itayo met ya epektibon manag-ebanghelyo no bayuboan tan ipatnag tayoray kalidad ya impanengneng nen Jesus. Agaylan matukoy sirin ya aligen tayo si Kristo bilang maseseg iran manag-ebanghelyo!

¹⁸ Sanen walaray nagmaliw a babangatan nen Jesus nen inmunan siglo, oniay intepet nen Pedro: “Anto sirin so wala naani ed sikami?” Et inmebat si Jesus: “Balang sakey a tinaynan to ray kaabungan, ono agagi a lalaki, ono bibii, ono ama, ono ina, ono saray anak, ono daldalin, nisengeg ed ngaran ko, makaawat naani maminlasus, tan tawiren to naani so bilay a maando.” (Mat. 19:27-29) Seguradon ontan so naeksperiensya tayo no itultuloy tayon aligen so sankatalonggaringan a Misionaryo, si Jesu-Kristo.

Panon Yon Ebatan?

• Panon itayon ipapasal nen Jehova a magmaliw ya ebanghelisador?

• Akin ya epektibo ed ministeryo tayo so libron Ibabangat na Biblia?

• Panon tayon naalig si Jesus diad awawey tayo ed totoo?

[Tepetepet Parad Panagaral]

[Litrato ed pahina 17]

Sanen inimbitaan nen Jesus ira di Pedro, Andres, Santiago, tan Juan ya ontumbok ed sikato, kinmiwas iran tampol

[Litrato ed pahina 19]

Saray publikasyon a singa say libron “Ibabangat na Biblia” et ontutulong ed sikatayon mansiansian nankakasakey ed panagbangat