Manakar ed Saray Basbas nen Jehova

“Mapalar [odino, maliket] so balang sakey ya ontakot ed Jehova, a manakar ed saray basbas to.”​—SAL. 128:1.

1, 2. Akin a naseseguro tayo a posible so pagmaliw a maliket?

 LIKET​—kalkaliktan na amin itan. Siempre, sano manseseet itayon magmaliw a maliket, agto kabaliksan a maliket itayo la.

² Anggaman ontan, posible so pagmaliw a maliket. Oniay inkuan na Salmo 128:1: “Mapalar [odino, maliket] so balang sakey ya ontakot ed Jehova, a manakar ed saray basbas to.” Magmaliw itayon maliket no dayewen tayo so Dios tan manakar ed saray basbas to panamegley na panggawa ed linawa to. Anto so epekto na saya ed kiwas tan inkatoo tayo?

Napanmatalkan Kayo Komon

3. Panon a mankonektaan so pagmaliw a napanmatalkan tan say dedikasyon tayo ed Dios?

³ Saramay ontatakot ed si Jehova et napanmatalkan, a singa sikaton mismo. Tinoor nen Jehova so amin a sipan to ed Israel nensaman. (1 Ara. 8:56) Say dedikasyon tayo ed Dios so sankaimportantian a sipan a nagawaan tayo, tan makatulong so mabetbet a pampikasi pian natoor tayo itan. Nayari itayon manpikasi a singa si salmistan David: “Sika, O Dios, dinengel mo so saray malet a sipan ko. . . . Ontan so pankantak na pandayew ed ngaran mo lawas, pian nasumpal ko ya agew-agew so malet a sipasipan ko.” (Sal. 61:5, 8; Ecl. 5:4-6) Pian magmaliw itayon kaaro na Dios, kaukolan a napanmatalkan itayo.​—Sal. 15:1, 4.

4. Panon ya impasen nen Jefte tan say marikit to so sipan to ed si Jehova?

⁴ Nen panaon na saray Ukom ed Israel, masimsimoon ya insipan nen Jefte a no sikatoy  panaloen nen Jehova ed saray Amonita, iter to bilang “bagat a poolan” so unonan onabet ed sikato kapawil to manlapud bakal. Et agawa a say inmabet ed sikato et say marikit to, a saksakey ya anak to. Lapud si Jefte tan say marikit to so manmamatalek ed si Jehova, tinoor da itan a sipan. Anggaman papablien a maong so panangasawa tan panag-ilalak ed Israel, mabulos a pinili na marikit nen Jefte so agla piasawa tan sikatoy apribilehyoan a mibiang ed sagradon panaglingkor diad santuaryo nen Jehova.​—Uko. 11:28-40.

5. Panon a nibagan napanmatalkan si Ana?

⁵ Say matunong a bii a si Ana et napanmatalkan. Kaamong to so Levitan masiken to a si Elkana tan say sananey nin asawa na masiken to a si Penina diad mapalandey a rehyon na Efraim. Dakel so anak nen Penina, kanian mumudmuraen to si Ana, lalo la no oonla iran pamilya ed tabernakulo. Diad sakey ed sarayan inkagawa, masimoon ya insipan nen Ana a no sikatoy nawalaan na anak a laki, iter to itan ed si Jehova. Ag-abayag, sikatoy nanlukon tan angiyanak na laki ya inngaran a Samuel. Sanen apakso la si Samuel, sikatoy imparungtal nen Ana ed Dios diad Siloh, ya impabayes to so ugaw ed si Jehova “ed saray amin ya agew na bilay to.” (1 Sam. 1:11) Tinoor to sirin so sipan to anggaman agto amta ed saman a sikatoy mananak ni.​—1 Sam. 2:20, 21.

6. Panon ya apatnagan a napanmatalkan si Tiquico?

⁶ Si Tiquico, a Kristiano nen inmunan siglo, so napanmatalkan a laki tan “matoor a ministro.” (Col. 4:7) Sikatoy nambaroy a kaiba nen apostol Pablo manlapud Gresya a dinmalan ed Macedonia paonla ed Asia Minor, tan posiblin anggad Jerusalem. (Gawa 20:2-4) Nayarin sikato imay “agi” ya angiba ed si Tito a mangorganisa na tulong parad saray mankaukolan a Kristiano diad Judea. (2 Cor. 8:18, 19; 12:18) Diad samay inmunan impakapriso nen Pablo ed Roma, si Tiquico so napanmatalkan a representanti to a mangitutulor na sulsulat ed saray Kristiano diad Efeso tan Colosas. (Efe. 6:21, 22; Col. 4:8, 9) Sanen mikaduan nipriso si Pablo ed Roma, imbaki to si Tiquico ed Efeso. (2 Tim. 4:12) No napanmatalkan itayo, naikdan itayo met na saray asainmin diad panaglingkor ed si Jehova.

7, 8. Akin a nibaga tayo a peteg a sankaaro si David tan Jonatan?

⁷ Iilaloan na Dios a napanmatalkan itayon kakaaro. (Uli. 17:17) Say ilalak nen Arin Saul a si Jonatan et nagmaliw a kaaro nen David. Sanen akabatan nen Jonatan a si David so amatey ed si Goliat, “say kamarerwa nen Jonatan nisiglaot ed kamarerwa nen David, et sikato so inaro nen Jonatan a singa dili a kamarerwa to.” (1 Sam. 18:1, 3) Pinasakbayan ni ingen nen Jonatan si David sanen sikatoy getman pateyen nen Saul. Sanen binmatik si David, si Jonatan so akibana tan akisipanan ed sikato. Lapud impitongtong to ed si David, si Jonatan so dawdawit ya apatey nen Saul. Anggaman ontan, nannengneng lamet so sankaaro tan lalo dan pinaelet so pankaaro ra. (1 Sam. 20:24-41) Diad unor ya impannengneng da, pinabiskeg nen Jonatan si David nipaakar “ed Dios.”​—1 Sam. 23:16-18.

⁸ Inatey si Jonatan legan a mibabakal ed saray Filisteo. (1 Sam. 31:6) Panamegley na tagleey et oniay inkanta nen David: “Maermen ak nipaakar ed sika, agik a Jonatan. Makapaliket ka a tuloy nensaman ed siak. Say arom ed siak sikato nensaman so makapakelaw, a talonaan to so aro na saray bibii.” (2 Sam. 1:26) Siempre, sayan panangaro et aliwan romantiko noagta puron aroan  na sankaaro. Si David tan Jonatan et peteg a sankaaro.

Mansiansian “Mapaabeba ed Kanonotan”

9. Diad Uko-ukom kapitulo 9, panon a nipanengneng ya importante so panagpaabeba?

⁹ Pian magmaliw a kaaro na Dios, nepeg itayon “mapaabeba ed kanonotan.” (1 Ped. 3:8; Sal. 138:6) Diad Uko-ukom kapitulo 9 et nipanengneng ya importante so panagpaabeba. Oniay inkuan na anak nen Gideon a si Joatam: “Saray kiew linma ra ed aminsan a panaon a nilanaan da so ari ed sikara.” Asalambit so kiew na olibo, higos, tan ubas. Irerepresenta na saratan iray totoon makanepegan ya agda pinilalek ya uleyan iray kapara ran Israelita. Balet, say masabit a tanaman a panagparlang labat, so mangirerepresenta ed mapaatagey a pananguley nen Abimelec, ya amatey na dakel a too tan manggugunaet a mandomina ed arum. Anggaman ipapasen toy inkasikato a “prinsipe ed Israel ed taloy taon,” sikato so asakbay ya inatey. (Uko. 9:8-15, 22, 50-54) Talagan maabig no say sakey et “mapaabeba ed kanonotan”!

10. Anto so naaral yo ed ‘ag-impangiter nen Herodes na galang ed Dios’?

¹⁰ Nen inmunan siglo C.E., walay linmesan problema ed baetan na mapaatagey ya ari na Judea a si Herodes Agripa ed saray taga Tiro tan Sidon. Kanian, sikaray miaareglo ed sikato. Aminsan, sanen manpapaliwawa si Herodes ed publiko, oniay inkelyaw da: “Say boses na dios, ya aliwa a say boses na sakey a too.” Agkinontra nen Herodes itan a panaglarog, kanian sikatoy kinabil na anghel nen Jehova. Diad ontan et makapataktakot so impatey to “lapud agto angiter na galang ed Dios.” (Gawa 12:20-23) Panon to no medyo maong itayon manpaliwawa odino manbangat ed saray katuaan na Biblia? Sirin et iter tayo so dayew ed Dios lapud iyaabuloy to iratan a nagagawaan tayo.​—1 Cor. 4:6, 7; Sant. 4:6.

Manpakpel tan Manpabiskeg

11, 12. Panon ya ipapanengneng na eksperiensya nen Enoc ya iikdan nen Jehova iray lingkor to na pakpel tan biskeg?

¹¹ No mapaabeba itayon manakar ed saray basbas nen Jehova, ikdan to itayo na pakpel tan biskeg. (Deu. 31:6-8, 23) Si Enoc, a komapito ed kailalakan nen Adan, so makpel a nanakar a kaiba na Dios diad impansiansia ton maptek anggaman marelmeng iray totoo ed kaliberliber to. (Gen. 5:21-24) Sikatoy pinabiskeg nen Jehova pian ibaga so ansakit a mensahe ed totoo lapud saray pananalita tan kagagawa ra et marelmeng. (Basaen so Judas 14, 15.) Kasin makpel kayon mangiyabawag ed saray panangukom na Dios?

¹² Impaakseb nen Jehova so panangukom to ed saramay marelmeng a totoo sanen adelap so interon mundo diad panaon nen Noe. Anggaman ontan, say propesiya nen Enoc so makapaseseg ed sikatayo lapud saray marelmeng a totoo natan so magano lan deralen na libo-libon masanton anghel na Dios. (Apo. 16:14-16; 19:11-16) Bilang ebat ed saray pikakasi tayo, iikdan itayo nen Jehova na pakpel ya iyabawag so mensahe to​—balanglan nipaakar itan ed panangukom to odino panamendisyon to diad pananguley na Panarian.

13. Akin a segurado itayo a sarag ya iter na Dios so pakpel tan biskeg a kaukolan tayo pian nitepel tan natalonaan iray makapagonigon a problema?

¹³ Kaukolan tayo so pakpel tan biskeg ya iiter na Dios pian nitepel tan natalonaan tayo iray makapagonigon a problema. Sanen angasawa si Esau na duaran Jeteo a bibii, “sikaraya nensaman so panpagpagaan [na atateng to a] di Isaac tan Rebeca.” Onia ni ingen so inreklamo nen Rebeca ed si Isaac: “Maalipanes ak ed bilay ko nisengeg ed saray bibii ya anak nen Jet. No [say anak ta a] si Jacob et mangasawa na sakey ed saray bibii ya anak nen Jet, a singa saraya so bibii ya anak a taga diad ed sayan dalin, anto so kaabigan a gawaen to ed siak na sayan bilay ko?” (Gen. 26:34, 35; 27:46) Kinmiwas si Isaac tan imbaki to si Jacob a mananap na naasawa diad limog na saray mandadayew ed si Jehova. Anggaman agla nauman nen Isaac tan Rebeca so ginawa nen Esau, inikdan ira na Dios na karunongan, pakpel, tan biskeg pian makapansiansian matoor ed Sikato. No onkerew itayo ed si Jehova na kaukolan a tulong, iter to met itan ed sikatayo.​—Sal. 118:5.

14. Panon ya impanengneng na Israelitan ugaw a bii a sikatoy makpel?

¹⁴ Kayari pigaran siglo, sakey ya Israelitan ugaw a bii so inala na saray onaatakin matakew tan sikatoy nagmaliw ya aripen ed abung na akating ya hepe na armada na Sirya a si Naaman. Lapud amta na ugaw so nipaakar ed saray milagron ginawa na Dios panamegley nen propeta Eliseo,  oniay makpel ton imbaga ed asawa nen Naaman: ‘No onla so katawan ko a laki ed Israel, paabigen na propeta nen Jehova so kating to.’ Kanian linma si Naaman ed Israel, tan sikatoy mamilagron inmabig. (2 Ara. 5:1-3) Talagan ehemplo iman ya ugaw ed saray kalangweran a manmamatalek a sikaray ikdan nen Jehova na pakpel pian makapantasi ed saray maestra ra, kaeskuelaan da, tan ed arum ni!

15. Anto so makpel a ginawa na mayurdomo nen Ahab a si Obadias?

¹⁵ Ontulong ed sikatayo so pakpel ya iiter na Dios pian nasungdoan so panamasegsegang. Alaen pan alimbawa si Obadias a mayurdomo nen Arin Ahab tan kapanaonan nen propeta Elias. Sanen ingganggan nen Reyna Jezabel so pamatey ed saray propeta na Dios, sanlasus ed saray propeta so inyamot nen Obadias “a tunggal limamplo dia ed ungib.” (1 Ara. 18:13; 19:18) Singa si Obadias a tinmulong ed saray propeta nen Jehova, kasin makpel kayo met ya ontulong ed saray napapasegsegang a kaparan Kristiano?

16, 17. Antoy reaksion di Aristarco tan Gayo ed panamasegsegang?

¹⁶ No napapasegsegang itayo, seguradon ag-itayo paulyanan nen Jehova. (Roma 8:35-39) Diad sakey a teatro ed Efeso, si Aristarco tan Gayo a kaiba nen Pablo a komikimey so inerel na saray libo-libon pangkat. Si Demetrio a platiro so angisugsog ed satan a gulo. Sikato tan saray kapara ton platiro so manggagawa na pilak ya altar na diosan Artemis. Sayan maaligwas a negosyo ra so ngalngali la nalugi lapud sanen pinulongan nen Pablo iray manaayam ed syudad, dakel ed sikara so tinmunda lan mandayew ed saray talintao. Inggayugoy na pangkat ed loob na teatro si Aristarco tan Gayo tan paulit-ulit dan inyeyag: “Baleg si Diana [“Artemis,” NW] na saray taga Efeso!” Nayarin inilaloan di Aristarco tan Gayo a sikara lay pateyen ed saman, balet apadeen na sekretaryo na syudad so dakel a totoo.​—Gawa 19:23-41.

¹⁷ No ontan so asagmak yo, kasin mas pilien yo lay aliwan komplikadon bilay? Anggapoy pakapatnagan a pinmayakot si Aristarco tan Gayo. Si Aristarco et taga Tesalonica tan diad imbeneg et walay agawan gulo sanen nampulong si Pablo ed lugar da. Kanian amta to a nayarin pansengegan na panamasegsegang so pangiyabawag na maong a balita. (Gawa 17:5; 20:4) Lapud tinulok di Aristarco tan Gayo si Jehova, inikdan To ira na biskeg tan pakpel pian nasungdoan da so panamasegsegang.

Imanoen so Pankaabigan na Arum

18. Panon a ‘ninengneng’ odino inimano nen Prisca tan Aquila so pankaabigan na arum?

¹⁸ Balanglan napapasegsegang itayo natan odino andi, nepeg tayon iyansakit iray kaparan Kristiano. Say napanuliranan a sanasawa a si Prisca tan Aquila so ‘ninmengneng’ odino angimano ed pankaabigan na arum. (Basaen so Filipos 2:4.) Pinarawes da si Pablo diad Efeso, say pasen ya angisugsogan na platiro a si Demetrio na gulo ya asalambit nen niman. Diad satan a situasyon, nibagan ‘inyan di Aquila tan Prisca so beklew da’ ed kapeligroan parad si Pablo. (Roma 16:3, 4; 2 Cor. 1:8) Natan, lapud iyaansakit tayo met iray napapasegsegang ya agagi tayo, sikatayo so maalwar, odino ‘mankalkalakal a singa saray uleg.’ (Mat. 10:16-18) Maalwar tayon itutultuloy a gagawaen so kimey tayo tan agtayo ira tratraidoren panamegley na pangibaga ed kangaranan da odino arum nin impormasyon ed saray mamapasegsegang.

19. Antoran kamaongan so ginawa nen Dorcas ed arum?

¹⁹ Walaray nanduruman paraan na pangimano ed pankaabigan na arum. Pigara ed saray agagi  tayo et walaray pankaukolan da tan ompan sarag tayo ran tulongan. (Efe. 4:28; Sant. 2:14-17) Diad inmunan siglon kongregasyon ed Joppe, walay sakey a mabunlok a bii a manngaran na Dorcas. (Basaen so Gawa 9:36-42.) Sikato so “napno na saray maong a gawa tan payabol,” a kaiba lay impanggagawa to na kawekawes parad saray bibiin balo tan mairap-bilay. Sanen sikatoy inatey nen 36 C.E., nanermen iray balo. Inusar na Dios si apostol Pedro a mamaoli ed si Dorcas. Tan say nakekeran bilay nen Dorcas diad dalin et mapatnag ya inusar to diad maliket ya impangipulong ed maong a balita tan impanggaway kamaongan ed arum. Agaylay pisasalamat tayo natan ta walaray agmasiblet a Kristianon bibii ed limog tayo!

20, 21. (a) Antoy koneksion na panamaseseg tan pangimano ed pankaabigan na arum? (b) Anto so nagawaan yo pian magmaliw kayon makapaseseg?

²⁰ Iimanoen tayoy pankaabigan na arum diad pamaseseg ed sikara. (Roma 1:11, 12) Si Silas a kaiban komikimey nen Pablo et lapuan na panamaseseg. Kayarin niiter so desisyon nipaakar ed panagsegat ya isyu nen manga 49 C.E., imbaki na mananguley ya ulop ed Jerusalem iray representanti a mangitulor na sulat ed saray Kristiano diad nanduruman pasen. Inawit itan nen Silas, Judas, Bernabe, tan Pablo ed Antioquia. Ditan et “niligliwa [di Silas tan Judas] so agagi ed dakel a salita, tan pinaletan da ra.”​—Gawa 15:32.

²¹ Diad saginonor et apriso si Pablo tan Silas ed Filipos, balet ta nibulos ira sanen yinmegyeg. Seguradon manlikliket ira sanen apulongan da tan naimatonan dan nagmaliw a mananisia imay guardia na prisoan tan say pamilya to! Antis a taynan di Silas tan Pablo so syudad, pinaseseg da ni iray agagi. (Gawa 16:12, 40) Singa si Pablo tan Silas, panggunaetan yon pasesegen so arum panamegley na saray komento, paliwawa, tan maseseg a panagpulong yo. Tan sano walaan kayo na “salita a panamilin” odino panamaseseg, “ibaga yo” labat itan.​—Gawa 13:15.

Itultuloy so Panakar ed Saray Basbas nen Jehova

22, 23. Panon itayon sigpot a nagunggonaan ed saray salaysay na Biblia?

²² Agaylay pisasalamat tayo ed saray tudtuan salaysay ya akasulat ed Salita nen Jehova, say “Dios a panlalapuay amin a panamaseseg”! (2 Cor. 1:3, Byington) Pian minabang ed saratan ya eksperiensya, nepeg tayon iyaplika ed bilay tayo iray naaralan tayo ed Biblia tan paiwanwan ed masanton espiritu na Dios.​—Gal. 5:22-25.

²³ Natulongan itayo na pandalepdep ed saray salaysay na Biblia pian nipanengneng tayo ray maabig a kalidad. Satan so mamaelet na relasyon tayo ed si Jehova, a mangiiter ed sikatayo na “kakabatan, tan pakatalos, tan liket.” (Ecl. 2:26) Say resulta et napaliket tayo so maaron puso na Dios. (Uli. 27:11) Komon ta determinado tayon gawaen itan diad pantultuloy a panakar ed saray basbas nen Jehova.

Anto so Ebat Yo?

• Panon yon nipanengneng a napanmatalkan kayo?

• Akin a nepeg itayon magmaliw a “mapaabeba ed kanonotan”?

• Panon a makatulong iray salaysay na Biblia pian magmaliw itayon makpel?

• Diad antoran paraan a naimano tayo so pankaabigan na arum?

[Tepetepet Parad Panagaral]

[Litrato ed pahina 8]

Say napanmatalkan a si Jefte tan say marikit to so anumpal ed sipan to anggaman mairap itan

[Litrato ed pahina 10]

Sikayo ran kalangweran, anto so naaralan yo ed ugaw ya Israelita?

[Litrato ed pahina 11]

Panon ya intarya nen Dorcas iray pankaukolan na kapara ton Kristiano?