Naynay Yon Ipasen si Jehova ed Arapan Yo
Naynay Yon Ipasen si Jehova ed Arapan Yo
“Impasen ko a naynay si Jehova ed unaan ko.”—SAL. 16:8.
1. Anto so epekto ed sikatayo na saray salaysay ed Biblia?
AKASULAT ed Biblia so alay abig a rekord nipaakar ed impideneng nen Jehova ed katooan. Tinukoy na satan so dakel a totoo a walaan na kabiangan ed kasumpalan na gagala na Dios. Siempre, saray imbaga tan ginawa ra so aliwa lambengat ya istorya ya insulat ed Biblia ta pian panliketan tayon basaen. Imbes, saratan a salaysay so lalon mamaapit ed sikatayo ed Dios.—Sant. 4:8.
2, 3. Anto so kabaliksan na saray salita ed Salmo 16:8?
2 Amin tayo so makaaral a maong ed saray eksperiensya na saray kabkabat ya indibidual ed Biblia—si Abraham, Sarah, Moises, Rut, David, Ester, apostol Pablo, tan arum ni ra. Balet, nagunggonaan itayo met ed saray salaysay nipaakar ed saray agtanton kabkabat ya indibidual. Say pandalepdep ed saray salaysay ed Biblia so makatulong ta pian saray kiwas tayo et mitunosan ed saray salita na salmista: “Impasen ko a naynay si Jehova ed unaan ko: lapu ed sikato et wala ed nikawanan ko, agak natenyeg.” (Sal. 16:8) Anto so kabaliksan na sarayan salita?
3 Kaslakan et say kawanan a lima so pamebemben na sakey a sundalo ed espada to, kanian ag-itan naprotektaan na samper a sankabembenan na kawigin lima to. Ingen, sikato so protektado no walay kaaron milalaban ed nikawanan to. Ontan met, sikatayo so protektaan nen Jehova no sikato so naynay a sankanonot tayo tan gawaen tayo so linawa to. Kanian, imanoen tayo no panon a napabiskeg so pananisia tayo diad pangikonsidera ed saray salaysay na Biblia ta pian “lawas tayon ipasen si Jehova ed arapan [tayo].”—Byington.
Eebatan nen Jehova Iray Pikakasi Tayo
4. Mangiter na sakey ya alimbawa ed Biblia a mangipapanengneng ya eebatan na Dios iray pikakasi.
4 No naynay tayon ipasen si Jehova ed arapan tayo, ebatan to iray pikakasi tayo. (Sal. 65:2; 66:19) Naamtaan tayo so prueba ed saya diad kipapasen na sankatatkenan lan aripen nen Abraham, a nayarin si Eliezer. Sikato so imbaki nen Abraham ed Mesopotamia ta pian mananap na sakey a matakot-ed-Dios a naasawa nen Isaac. Kinmerew si Eliezer na panangigiya na Dios tan naamtaan ton sikato so inebatan sanen pinainum nen Rebeca iray kamelyo to. Lapud masimoon a nampikasi si Eliezer, aromog to imay nagmaliw a pinabpablin asawa nen Isaac. (Gen. 24:12-14, 67) Tua, nikadkaduma so misyon na lingkor nen Abraham ed saman. Balet, agta nepeg met a segurado itayo a dedengelen nen Jehova iray pikakasi tayo?
5. Akin a nibaga tayo ya epektibo so anggan antikey tan mareen a pikakasi ed si Jehova?
5 No maminsan, ompan nakaukolan ya antikey labat so pikakasi tayo sano onkekerew itayo na tulong ed Dios. Diad sakey ya inkagawa, naimano nen Arin Artajerjes na Persia a maer-ermen so manag-awit na kopa to a si Nehemias. “Anto so kerewen mo?” so intepet na ari. “Dia ed ontan akikasi [si Nehemias] ed Dios ed tawen.” Kinaukolan ya antikey labat iman a mareen a pikakasi nen Nehemias. Ingen, inebatan itan na Dios, lapud sikato so sinuportaan na ari a mangipaalagey lamet ed saray padir na Jerusalem. (Basaen so Nehemias 2:1-8.) On, epektibo so anggan antikey tan mareen a pikakasi.
6, 7. (a) Nipaakar ed pikakasi, anton alimbawa nen Epafras so aligen tayo? (b) Akin a nepeg tayon ipikasi so arum?
6 Papasesegen itayo ya ‘ipikasi so sakey tan sakey,’ anggaman agtayo tampol nanengneng so ebidensya a naeebatan iratan a pikakasi tayo. (Sant. 5:16) Si Epafras, “sakey a matoor a ministro nen Kristo,” so masimoon ya angipikasi ed saray kapananisiaan to. Oniay insulat nen Pablo sanen sikatoy walad Roma: “Si Epafras, a sikato so sakey ed sikayo [saray taga-Colosas], sakey ya aripen nen Kristo Jesus, lugayan to kayo, ya andi-ebas so panseseet to ed kaabigan yo ed saray pikakasi to, pian magnayon kayo ya ayadyari tan napasekderan kayo ed amin a linaway Dios. Ta sikato so tasian ko, a dakel so sagpo’to nipaakar ed sikayo tan dia ed saray taga-Laodicea, tan dia ed saray taga-Hierapoles.”—Col. 1:7; 4:12, 13.
7 Saray syudad na Colosas, Laodicea, tan Hierapoles et walad parehon pasen diad Asia Minor. Saray Kristiano ed Hierapoles et manaayam ed kawalaan na saray mandadayew ed diosan Cybele. Bangta saray Kristiano ed Laodicea et apaliberan na materyalistikon totoo. Tan saramay walad Colosas et naiimpluensyaan na pilosopiya na too. (Col. 2:8) Agpankelawan sirin a si Epafras, a taga-Colosas, so ‘nanseet ed saray pikakasi to’ parad saray mananisia ed satan a syudad! Ag-isasalaysay na Biblia no panon a naebatan iray pikakasi nen Epafras, balet agto tinmundan angipikasi ed saray kapananisiaan to. Ontan met so gawaen tayo. Anggaman agtayo ‘pibibiangan so gagawaen na arum a too,’ nayarin amta tayo a walay membro na pamilya odino kaaro a nasusubok a maong so pananisia to. (1 Ped. 4:15) Agaylan matukoy sirin so pangipikasi ed sikato! Si Pablo so atulongan lapud saray inyey-ey a pikakasi na arum, tan baleg met so nagawaan na saray pikakasi tayo.—2 Cor. 1:10, 11.
8. (a) Panoy pakaamta tayo ya importante ed saray mamatatken ed Efeso so pikakasi? (b) Akin a nepeg tayon aligen iray Kristianon mamatatken ed Efeso?
8 Kasin ipapasen itayo na arum a mapikasi? Kayari na impitipon nen Pablo ed saray mamatatken ed Efeso, sikato so ‘tinmalimukor tan nampikasi a pati sikara ya amin.’ Insan, “sikara ya amin nannangis ira na baleg, et nilakap da ed beklew si Pablo, tan sikato so inangoban da, a nanermen ira ya amin na mapalalo lapu ed salita ya imbaga to ya agda la nanengneng naani so lupa to.” (Gawa 20:36-38) Agtayo amta so kangaranan na amin na saraman a mamatatken, balet mapatnag a parad sikara et importante so pikakasi. Seguradon nepeg tayo met a pablien so pribilehyon manpikasi ed Dios tan ‘itagey so malinis a kalimaan’ tayo, a matalek ya ebatan na mangatatawen ya Ama tayo iray pikakasi tayo.—1 Tim. 2:8.
Sigpot ya Unoren so Dios
9, 10. (a) Anto so ehemplo na saray bibiin ananak nen Salfaad a maabig ya aligen? (b) Panon a say katutulok na bibiin ananak nen Salfaad so mangimpluensya ed panmoria na sakey a Kristiano ya andian ni na asawa?
9 Say naynay a pannonot ed si Jehova so makatulong pian sikato so natulok tayo, tan bilang resulta et nagamoran tayo ray bendisyon. (Deu. 28:13; 1 Sam. 15:22) Kakaukolanen na saya so pagmaliw a matulok. Nodnonoten pa so awawey na limaran sanaagin bibii, saray anak nen Salfaad, a nambilay ed panaon nen Moises. Diad kustombre na saray Israelita, saray anak a lalaki so mangaawat na tawir ed saray ama ra. Si Salfaad et inatey ya andian na anak a laki, tan ingganggan nen Jehova a say limaran anak ton bibii so mangawat ed amin a tawir da, diad sakey a kondisyon. Kinaukolan a miasawa ira ed saray ilalak nen Manases ta pian say tinawir dan kaykayarian so mansiansia ed tribu ra.—Num. 27:1-8; 36:6-8.
10 Matalek iray bibiin ananak nen Salfaad a maabig so pansumpalan na saray bengatla no unoren da so Dios. “Unong na ingganggan nen Jehova ed kinen Moises, ontan so ginawa na saray bibii ya anak nen Salfaad,” so kuan na Biblia. “Ta si Maala, Tersa, tan Hegla, tan Melca, tan Noa, a bibii ya anak nen Salfaad, akiasawa ra ed saray lalaki ya anak na agagi na saray ama ra. Sikara so akiasawa ed saray pamilya na lalaki ya anak nen Manases a laki ya anak nen Jose; tan say tawir da nansiansia ed barangay na pamilya na ama ra.” (Num. 36:10-12) Inunor na sarayan matulok a bibii so ingganggan nen Jehova. (Jos. 17:3, 4) Diad sayan panaon, saray matatken ed espiritual a Kristiano ya andian ni na asawa so matalek met ya ontutulok ed Dios diad pangasawa odino piasawa “ed linawa na Katawan lambengat.”—1 Cor. 7:39.
11, 12. Panon ya impatnag nen Caleb a sikato so nanmatalek ed Dios?
11 Nakaukolan a sigpot tayon unoren si Jehova, a singa ginawa na Israelitan si Caleb. (Deu. 1:36) Sanen akapaway la ed Ehipto iray Israelita nen koma-16 a siglo B.C.E., angibaki si Moises na 12 a lalaki a man-espiya ed Canaan, balet duara lambengat ed saray espiya—si Caleb tan Josue—so amaseseg ed saray totoo a sigpot a manmatalek ed Dios tan onloob ed Insipan a Dalin. (Num. 14:6-9) Linmabas so apataplon taon et mabilay ni si Josue tan Caleb tan siansia nin sigpot dan uunoren si Jehova, insan inusar na Dios si Josue a mangidaulo ed saray Israelita ya onloob ed Insipan a Dalin. Balet, say andiay-pananisia a samploran espiya so inatey legan na 40 a taon ya impanteyengteyeng na saray Israelita diad kalawakan.—Num. 14:31-34.
12 Bilang sakey ed saramay akaliktar ed impanteyengteyeng na Israel diad kalawakan, makatalindeg si Caleb ed arap nen Josue tan nibaga ton: “Inunor ko a masimoon si Jehova a Dios ko.” (Basaen so Josue 14:6-9.) Inkerew na 85-años a si Caleb ya alaen to la imay mapalandey a rehyon ya insipan na Dios ed sikato, anggaman walaray manaayam a kakabusol ed saratan a baleg tan abakoran a syudad.—Jos. 14:10-15.
13. Anggaman walaray subok, anto so gawaen tayo ta pian nabendisyonan itayo?
13 Singa say matoor tan matulok a si Caleb, nabendisyonan itayo no sigpot odino ‘masimoon tayon unoren si Jehova.’ No walaray angkakabaleg a problema, natulongan itayo no ‘masimoon tayon unoren si Jehova.’ Balet, say panggawa ed satan diad interon bilay tayo, a singa ginawa nen Caleb, et aliwan mainomay. Si Arin Solomon et tinmulok ni ed gapo balet ta sikato so atangguyor na saray asawa to a manlingkor ed palson dirios sanen sikatoy tinmakken la, tan sikato so “agtinmumbok a nasnaskey ed Jehova, a singa ginawa nen David ya ama to.” (1 Ara. 11:4-6) Antokaman iray subok ed sikatayo, komon ta lawas tan sigpot tayon unoren so Dios tan sikato so naynay ya ipasen tayo ed arapan tayo.
Naynay a Manmatalek ed si Jehova
14, 15. Unong ed saray eksperiensya nen Noemi, anto so naaralan yo ed no akin a kaukolan so panmatalek ed Dios?
14 Nakaukolan itayon manmatalek ed Dios nagkalalo la no naeermenan itayon maong lapud singa anggapo lay ilalo tayo. Nodnonoten pa so akulaw lan si Noemi, ya inatey so masiken to tan say duaran anak ton lalaki. Sanen sikatoy pinmawil ed Juda manlapud Moab, oniay innangis to: “Agyo ak tatawagen na Noemi [“Say Inkaliket Ko”], tawagen yo ak na Maria [“Ampait”], ta say Makapanyarin-amin nan-agamil na ampaipait ed siak. Pinmaway ak a napno, et si Jehova impawil to ak ed abung a paoypaoy. Akin et tawagen yo ak na Noemi, anta si Jehova nantasi a sumpa ed siak, tan say Makapanyarin-amin pinaermen to ak?”—Rut 1:20, 21.
15 Diad maalwar a pambasa tayo ed libro na Rut, naimano tayo a si Noemi so nantultuloy a nanmatalek ed si Jehova anggaman sikato so nanermen a maong. Tan talagan anguma-uman so kipapasen to! Say abalon manugang nen Noemi a si Rut so inasawa nen Boaz tan angiyanak na sakey a laki. Si Noemi so nagmaliw a managkomis ed saman ya ugaw, tan oniay kuan na salaysay: “Saray bibii a kaabay to angiter ira ed sikato na ngaran, ya inkuan da, Wala so sakey ya anak a laki a nianak ed Noemi; et tinawag da so ngaran to ya Obed: sikato so ama nen Jesse, ya ama nen David.” (Rut 4:14-17) Sano napaoli si Noemi diad dalin, naamtaan to a si Jesus a Mesias so nanlapud boleg nen Rut, a napaoli met. (Mat. 1:5, 6, 16) Singa si Noemi, agtayo amta no anto so pansumpalan na sakey a makapaermen a situasyon. Kanian, lawas itayon manmatalek ed Dios, a singa insimbawa ed sikatayo na Uliran 3:5, 6: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.”
Manmatalek ed Masanton Espiritu
16. Panon a tinulongan na masanton espiritu na Dios iray mamasiken ed Israel nensaman?
16 No naynay tayon ipasen si Jehova ed arapan tayo, igiya to itayo panamegley na masanton espiritu to. (Gal. 5:16-18) Say espiritu na Dios so angigiya ed apilin 70 a mamasiken pian ontulong ed si Moises a ‘miatangan ed saray awit na katooan’ na Israel. Si Eldad tan Meldad lambengat so asalambit, balet say masanton espiritu so tinmulong ed sikaran amin ta pian nagawaan da iray kimey da. (Num. 11:13-29) Seguradon kualipikado, matakot ed Dios, napanmatalkan, tan matua ira a singa saramay akadkauna lan apili. (Exo. 18:21) Onia met iran kalidad so ipapatnag na saray Kristianon mamatatken natan.
17. Anto so betang na masanton espiritu nen Jehova sanen ipapaalagey so tabernakulo?
17 Walay importantin betang na masanton espiritu nen Jehova sanen ipapaalagey so tabernakulo diad kalawakan. Tinuro nen Jehova si Besaleel bilang say manunan managdesinyo tan managpaalagey na tabernakulo. Insipan nen Jehova a si Besaleel et ‘panoen To na espiritu To, karunongan tan pikakabat, tan amin a nengneng na panagkimey.’ (Exo. 31:3-5) Saray lalakin “makalakal” so akikimey ed si Besaleel tan ed say katambayan ton si Ooliab diad impanumpal ed satan ya alay abig ya asainmin. Niarum ni, say espiritu nen Jehova so amakiwas ed saray totoon walaay ‘mabulos a puso’ a mabunlok a mandonasyon. (Exo. 31:6; 35:5, 30-34) Satan met ya espiritu so mamapakiwas ed saray lingkor na Dios natan pian gawaen da so amin a nayarian dan mangiyuna ed Panarian. (Mat. 6:33) Nayarin walaray abilidad tayo, balet nakaukolan itayon onkerew na masanton espiritu tan paiwanwan ed satan ta pian nasumpal tayo so pagagawa nen Jehova ed sikatayo ran totoo to natan.—Luc. 11:13.
Lawas Pagalangan si Jehova na Saray Ehersito
18, 19. (a) Anton klase na awawey so pawalaen ed sikatayo na masanton espiritu na Dios? (b) Anto so naaralan yo ed saray ehemplo nen Simeon tan Ana?
18 Say masanton espiritu so mamawala ed sikatayo na mapagalang ya awawey ta pian naynay tayon nipasen ed arapan tayo si Jehova. Onia so ingganggan ed saray totoo na Dios nensaman: “Si Jehova na saray Ehersito so nepeg mon pagalangan lapud sikatoy masanto.” (Isa. 8:13, Byington) Nen inmunan siglo et walay mapagalang a masiken tan akulaw diad Jerusalem—si Simeon tan Ana. (Basaen so Lucas 2:25-38.) Si Simeon so nanmatalek ed saray propesiya nipaakar ed Mesias tan ‘inalagar to so ligliwa na Israel.’ Inikdan na Dios na masanton espiritu si Simeon tan sikatoy pinaseguroan Ton manbilay ni ta pian nanengneng to so Mesias. Tan ontan so peteg ya agawa. Sakey ya agew nen taon 2 B.C.E., say ugaw nin Jesus so inawit na ina ton si Maria tan say pinagka-ama ton si Jose diad templo. Lapud pinakiwas na masanton espiritu si Simeon, imbalikas to iray propesiya nipaakar ed Mesias tan impasakbay to so panermen a maong nen Maria sano si Jesus so ipasak ed panamairapan a kiew. Balet, isipen pa so panlikliket nen Simeon sanen inampopo to so ‘Kristo na Katawan’! Tan agaylan abig ya ehemplo na panamagalang so impatnag nen Simeon ed saray lingkor na Dios natan!
19 Say mapagalang ya 84-años a balo a si Ana so “agla onaalis [odino agbalot onliliwat] ed templo.” Sikato so nanggawa na sagradon panaglingkor ed si Jehova diad agew tan labi tekep na “panag-ayunal tan pikakasi.” Si Ana so wadman met ed templo sanen inawit diman so ugaw nin Jesus. Agaylay panlikliket to sanen anengneng to ed saman so magmaliw a Mesias! On, sikato so “akisalamat ed Dios, et nansalita nipaakar ed ugaw ed saray manaalagar na karondon na Jerusalem.” Agnayarian nen Ana ya iyamot iyan maong a balita ed arum! Singa si Simeon tan Ana, saray maedad lan Kristiano natan so malikeliket lapud anggano matatken la ra et sarag da ni manlingkor ed si Jehova bilang saray Tasi to.
20. Antokaman so edad tayo, anto so nakaukolan tayon gawaen, tan akin?
20 Antokaman so edad tayo, nakaukolan a naynay tayon ipasen si Jehova ed arapan tayo. Diad ontan et bendisyonan to iray simplin nagagawaan tayo ya ibaga ed arum so nipaakar ed panuuley to tan saray makapakelaw a gawa to. (Sal. 71:17, 18; 145:10-13) Balet, nepeg tayon ipatnag iray maridios a kalidad ta pian napagalangan tayo si Jehova. Anto so naaralan tayo ed saratan a kalidad no usisaen tayo so kaaruman iran salaysay na Biblia?
Panon Yon Ebatan?
• Panoy pakaamta tayo a dedengelen nen Jehova iray pikakasi?
• Akin a sigpot tayon unoren so Dios?
• Anggano naeermenan itayon maong, akin a naynay tayon panmatalekan si Jehova?
• Panon a tutulongan na masanton espiritu na Dios iray totoo to?
[Tepetepet Parad Panagaral]
[Litrato ed pahina 4]
Epektibo so pikakasi nen Nehemias ed si Jehova
[Litrato ed pahina 5]
No nodnonoten tayo iray bendisyon ya agamoran nen Noemi, natulongan itayo met a manmatalek ed si Jehova