Say Salita nen Jehova et Mabilay

Saray Pabitar ed Libro a Marcos

SAY Ebanghelyo na Marcos so sankatikeyan ed apatiran Ebanghelyo. Insulat itan nen Juan Marcos manga 30 taon kayari na impatey tan inkioli nen Jesu-Kristo, tan lugan na satan so amayamay a makapainteres ya ebento na talora tan kapalduan taon a ministeryo nen Jesus.

Say libro a Marcos, a mapatnag ya insulat parad saray aliwan Judio, ingen ta nagkalalo lan parad saray Romano, so angipaliwawa nipaakar ed si Jesus bilang say Anak na Dios a managgaway-milagro, a makulikuli ed panagpulong. Say indanet na libro et saray ginawa nen Jesus imbes a saray imbangat to. Say pangimano ed Ebanghelyo nen Marcos so mamabiskeg na pananisia tayo ed Mesias tan mamakiwas ed sikatayon magmaliw a maseseg ed pangipulong na mensahe na Dios diad ministeryo.​—Heb. 4:12.

SAY MATALONAN MINISTERYO DIAD GALILEA

(Mar. 1:1–9:50)

Kayarin insalaysay nen Marcos ed 14 a bersikulo so aktibidad nen Juan a Managbautismo tan say 40 agew nen Jesus ed kalawakan, inggapo to so makapalikliket a salaysay na ministeryo nen Jesus diad Galilea. Say aminpigan impangusar ed salitan “tampol” so mangipapanengneng na inkaganatan na salaysay.​—Mar. 1:10, 12.

Ag-asabi taloy taon et akompleto la nen Jesus so taloran kampanya na panagpulong ed Galilea. Maslak a salaysay so impresenta nen Marcos unong ed impanggegendanan na saray ebento. Anggapo ed libro na Marcos so Sermon ed Palandey tan saray andurukey a paliwawa nen Jesus.

Makasulatan Iran Tepet a Naebatan:

1:15, NW​—Say “aturon panaon” parad anto so asumpal la odino agawa la? Ibabaga nen Jesus a say aturon panaon so agawa la sanen ginapoan to so ministeryo to. Lapud presente la si Jesus ed saman bilang say Aturon Ari, inmasingger la so Panarian na Dios. Saray maptek ed puso a totoo so nepeg a napakiwas ed panagpulong to tan manggawa iray kundang pian naawat da so panangabobon na Dios.

1:44; 3:12; 7:36​—Akin ya aglabay nen Jesus a paibalita ed totoo iray milagro to? Aglabay nen Jesus ya ibase na saray totoo so desisyon da lapud pinasobraan odino pinikewet iran salaysay, noagta, labay ton pruebaan dan mismo a sikato so Kristo, insan sikaray personal a mandesisyon unong ed satan ya ebidensya. (Isa. 42:1-4; Mat. 8:4; 9:30; 12:15-21; 16:20; Luc. 5:14) Puera labat ed samay agawa ed lakin datin aselepan na demonyo diad dalin na Gedareno. Imbaga nen Jesus ed sikato ya onsempet la tan ibalita to so agawa ed saray kakanayon to. Diad satan a pasen, kinerew na totoo ed si Jesus ya ontaynan la, kanian pigpigara odino anggapo ni ingen so apilimogan to ditan. Lapud kiwawala tan say testimonya na samay lakin pinaabig nen Jesus, apaliisan so antokaman a negatibon pantotongtong nipaakar ed impakabalang na saray baboy.​—Mar. 5:1-20; Luc. 8:26-39.

2:28​—Akin a tinawag si Jesus a ‘Katawan na sabaton’? “Say ganggan, wala ed sikato so sakey ya anino na saray penel na bengatla ya onsabi,” so insulat nen apostol Pablo. (Heb. 10:1) Unong ya akasulat ed Ganggan, say Sabaton et kayari na anem agew a trabaho, tan dakel ed saray impamaabig a ginawa nen Jesus et diad satan ya agew. Iyaanino na satan so mareen a pampainawa tan saray arum a bendisyon a nagamoran na totoo diad silong na Sanlibon Taon ya Uley nen Kristo kayari pangangga na maruksan uley nen Satanas. Kanian, say Ari na satan a Panarian et sikato met so “Katawan na sabaton.”​—Mat. 12:8; Luc. 6:5.

3:5; 7:34; 8:12​—Panon a naamtaan nen Marcos iray detalye nipaakar ed liknaan nen Jesus ed nanduruman kipapasen? Si Marcos et agkabiangan  na 12 apostol tan agto met akaiba si Jesus. Papanisiaan a say maapit a kaulop nen Marcos a si apostol Pedro so nanlapuan na dakel ya insulat ton impormasyon.​—1 Ped. 5:13.

6:51, 52​—Anto so kabaliksan na “saray tinapay” ya ag-atalosan na saray babangatan? Pigaran oras labat ni so apalabas, pinakan nen Jesus so 5,000 a lalaki nilikud ni ed saray bibii tan ugugaw panamegley labat na limaran tinapay tan duaran sira. Say kabaliksan na “saray tinapay” ya atalosan komon na saray babangatan ed satan ya agawa et si Jesus so inikdan nen Jehova a Dios na pakayarin manggawa na saray milagro. (Mar. 6:41-44) No atalosan da komon so kabiskeg na pakapanyari a niiter ed si Jesus, ag-ira komon nikelawan ed mamilagron impanakar to ed danum.

8:22-26​—Akin et aliwan pinsanan so impanambal nen Jesus ed bulag a laki? Nayarin satan et lapud konsiderasyon nen Jesus ed saman a laki. Say kalkalnan impangipawil ed pakanengneng na laki ya abaybayag lan nipasal ed ambilunget so akatulong ed sikato pian agnabigla so mata to ed liwawa na agew.

Saray Leksion Parad Sikatayo:

2:18; 7:11; 12:18; 13:3. Impaliwawa nen Marcos iray tradisyon, termino, pananisia, tan lugar a nayarin agkabisado na saray aliwan Judion managbasa. Impalinew to a saray Fariseo et “nanayunal ira.” Impaliwawa to a say korban et sakey a regalo ya “initer ed Dios.” Ontan met, saray Saduceo et “kuandan anggapo so kioli ed bilay,” tan insulat to a say templo et “petek” odino sankabantag manlapud ‘Palandey na saray Olibo.’ Anggapo la ed libro na Marcos so kapolian na Mesias lapud kaslakan et saray Judio labat so interesado ed satan. Si Marcos sirin so angiter na uliran ed sikatayo. Nepeg tayon ikonsidera no siopa iray dumerengel tayo sano mibibiang tayo ed ministeryo odino sano manpapaliwawa itayo ed pantitipon na kongregasyon.

3:21. Saray kakanayon nen Jesus et agmananisia. Kanian, walay empatya to ed saramay lapud pananisia ra et napapasegsegang odino babalawen na saray agmananisian kapamilyaan da.

3:31-35. Sanen abautismoan si Jesus, sikatoy nagmaliw ya espiritual ya Anak na Dios, tan say “Jerusalem a wala ed tagey” so ina to. (Gal. 4:26) Manlapud saman, si Jesus et mas lalon apaapit tan mas apabli to so espiritual a pamilya to nen say kakanayon to. Ibabangat na saya ed sikatayo a kaukolan ya unaen iray espiritual a bengatla ed bilay tayo.​—Mat. 12:46-50; Luc. 8:19-21.

8:32-34. Sano walaray mankuankuanan a mangiyaansakit ed sikatayo, kaukolan a tampol tayon natebek tan ipulisay iratan. Say sakey a patumbok nen Kristo so nepeg ya akaparaan a ‘mangibeneg ed inkasikato,’ salanti, say pangikibot ed inkasikato tan pangipulisay ed saray makasarilin pilalek tan ambisyon. Sikatoy kaukolan a mabulos a “manakbat na panamairapan a kiew to”​—anggano manirap no kaukolan, napabpabaingan, napasegsegang odino anggan pateyen ni  ingen lapud pagmaliw ton Kristiano. Tan nepeg a sikatoy “mantultuloy ya ontumbok” ed si Jesus, tan mangitunos ed bilay to unong ed pananontonan nen Jesus. Say pagmaliw a babangatan nen Kristo Jesus et mankaukolay pamabulaslas tan pamasiansia tayo ed masakripisyon espiritu a singa ginawa To.​—Mat. 16:21-25; Luc. 9:22, 23.

9:24. Agtayo sirin ombabaing ya ibaga so pananisia tayo odino manpikasi parad mas mabiskeg a pananisia.​—Luc. 17:5.

SAY UNOR LAN BULAN

(Mar. 10:1–16:8)

Sanen mansamposampot lay 32 C.E., linma si Jesus ed “ketegan na Judea tan labas na Jordan,” tan dakel a totoo lamet so linma ed sikato. (Mar. 10:1) Kayari ton nampulong ditan, sikatoy linma ed Jerusalem.

Nen Nisan 8, si Jesus et walad Betania. Legan a sikatoy akarungo ed pananganan, inmasingger so sakey a bii tan inkalbo to ed ulo nen Jesus so ambalingit a larak. Saray agawa manlapud matalonan inloob nen Jesus ed Jerusalem ya anggad inkioli to so deneskribe unong ed impantutumbokan na saratan.

Makasulatan Iran Tepet a Naebatan:

10:17, 18​—Akin a kinorehi nen Jesus so sakey a laki ya anawag ed Sikato na “Maong a Managbangat”? Diad ag-impangawat nen Jesus ed sayan makapadinayew a titulo, inter toy dayew ed si Jehova tan impanengneng to a say Dios so nanlapuan na amin a maong a bengatla. Sakey ni, impaimano nen Jesus so manunan katuaan a say Manamalsa na amin a bengatla, si Jehova a Dios, et Sikato labat so walaay kanepegan a mangiletneg na estandarte parad maong tan mauges.​—Mat. 19:16, 17; Luc. 18:18, 19.

14:25​—Antoy labay ya ibaga nen Jesus sanen inkuan to ed saray matoor ya apostol to: “Agak la oninum ed bunga na ubas, angga ed saman ya agew sano inumen ko a balo dia ed panarian na Dios”? Ag-ibabaga nen Jesus a wala so literal ya alak ed tawen. No maminsan say alak et mangisisimbolo na panliliket, balet say tutukoyen dia nen Jesus et say liket a nakaiba to iray apaolin alanaan a papatumbok to ed Panarian ​—Sal. 104:15; Mat. 26:29.

14:51, 52​—Siopa so tobonbalon laki a “binmatik a lakseb”? Si Marcos labat so analambit ed saya, kanian nibaga tayo a sikaton mismo itan.

15:34​—Kasin say impangibaga nen Jesus na “Dios ko, Dios ko, akin et inkaindan mo ak?” so mangipanengneng a sikatoy kinmulang na pananisia? Andi. Anggaman agtayo naseguro so motibo nen Jesus ed impangikuan to ed saya, nayarin ipapanengneng na saray salita to ya amoria ton inekal la nen Jehova so proteksion To ed sikato pian say katooran na Anak To et naspot a nasubok. Say sakey nin posibilidad no akin ya imbaga nen Jesus iya et pian nasumpal so impropesiya ed Salmo 22:1 nipaakar ed sikato.​—Mat. 27:46.

Saray Leksion Parad Sikatayo:

10:6-9. Gagala na Dios ya agmansian so sanasawa. Sirin, imbes a tamtampol ya isipen so pandeborsyo, panseetan na sanasawa ya iyaplika iray prinsipyo na Biblia pian natalonaan iray problema ed panamaley a nayarin onsabi.​—Mat. 19:4-6.

12:41-44. Say ehemplo na bii a balo so mangibabangat ed sikatayo a nepeg ya agtayo masiblet diad panuporta ed tuan panagdayew.

[Litrato ed pahina 29]

Akin ya impaibalita nen Jesus ed sayan laki so amin ya agawa ed sikato diad saray kakanayon to?