Si Jesu-Kristo​—Say Sankatalonggaringan a Misionaryo

“Nanlapu ak ed sikato, tan imbaki to ak.”​—JUAN 7:29.

1, 2. Anto so sakey a misionaryo, tan siopa so nayarin natawag a sankatalonggaringan a Misionaryo?

 ANTOY onla’d nonot mo sano narengel moy salitan “misionaryo”? Arum so manisip ed saray misionaryo na Kakristianoan, a dakel ed sikara et mibabali ed saray pamaakaran na politika tan ekonomya na saray bansan panlilingkoran da. Balet, bilang sakey ed saray Tasi nen Jehova, nayarin say nanonotan mo et saramay misionaryo ya ibabaki na Mananguley ya Ulop pian mangipulong na maong a balita ed dakel a daldalin diad sankamundoan. (Mat. 24:14) Sarayan misionaryo so mabulbulos a manguusar na panaon tan sagpot da ed say mapagalang a kimey a panulong ed totoo ya onapit ed si Jehova a Dios tan nawalaan na espisyal a pisisiglaotan ed sikato.​—Sant. 4:8.

² Saray salitan “misionaryo” tan “saray misionaryo” et agnabasa diad mismon teksto na Pangasinan a Biblia. Balet, diad Efeso 4:11, isusuheri na samay Griegon salita a nipatalos ditan a “saray . . . manangipulong na maabig a pakabat,” odino saray ebanghelisador, a nayarin mankabaliksan met itan na “saray misionaryo.” Si Jehova so sankatalonggaringan ya Ebanghelisador, balet sikatoy agnatawag a sankatalonggaringan a Misionaryo, lapud sikatoy agbalot imbaki na siopaman. Balet, oniay inkuan nen Jesu-Kristo nipaakar ed mangatatawen ya Ama to: “Nanlapu ak ed sikato, tan imbaki to ak.” (Juan 7:29) Bilang panangipatnag na baleg a panangaro nen Jehova ed katooan, imbaki to so bogbogtong ya Anak to diad dalin. (Juan 3:16) Si Jesus et nayarin natawag a sankatalonggaringan a Misionaryo tan sankamaongan a Misionaryo, lapud say sakey a gagala na impangibaki ed sikato diad dalin et pian “tasian [to] so katuaan.” (Juan 18:37) Sikatoy sigpot a tinmalona ed panangiyabawag na maong a balita na Panarian, tan anggad natan et nagugunggonaan itayo ni ed ministeryo to. Alimbawa, nayarian tayon iyaplika ed ministeryo tayo iray metodo to ed panagbangat, misionaryo itayo man odino andi.

3. Antoran tepet so konsideraen tayo?

³ Say betang nen Jesus bilang manangiyabawag na Panarian so mamapawala na saray tepet a singa saraya: Anto so naeksperiensya nen Jesus diad dalin? Akin ya epektibo so panagbangat to? Tan akin a nibagan matalona so ministeryo to?

Mabulbulos a Nampulong Diad Balo Iran Kaliberliber

4-6. Antoray pigaran pananguman ya inarap nen Jesus sanen nibaki diad dalin?

⁴ Saray misionaryo natan tan say arum a Kristiano ya oonla ed saray lugar a babaleg so pankaukolan parad saray manangipulong na Panarian et kaukolan day onadapta ed saray kipapasen a say panagbilay et mas mairap nen say ed apasalan  da. Balet agtayo anggan naisip so pandumaan na saray kipapasen nen Jesus diad dalin tan kipapasen na saramay walad tawen a nanayaman to kaibay Ama to diad limog na saray anghel a manlilingkor ed si Jehova tekep na puron motibo. (Job 1:6; 2:1) Agaylan miduma so pakapilimog ed makasalanan iran totoo diad sakey a mauges a mundo! (Mar. 7:20-23) Kinaukolan ni ingen nen Jesus a pidenengan so panlalaslasan ed limog na saray apostol to. (Luc. 20:46; 22:24) Siempre, nasnaspot so inkiwas to ed amin a naeksperiensya to diad dalin.

⁵ Si Jesus so agmamilagron akapansalita na lenguahe na too, noagta ginapoan to itan ya inaral bilang sakey a kapangiyanak. Agaylan nauma-uman so kipapasen to, lapud diad tawen et sikatoy manangimando ed saray anghel! Diad dalin si Jesus so angusar na sakey ed saray “[lenguahe] na totoo.” Nidumaduma itan ed ‘saray salita na saray anghel.’ (1 Cor. 13:1) Balet, no nipaakar ed abilidad ed panagsalita, anggapon balot so toon akapipara ed si Jesus.​—Luc. 4:22.

⁶ Konsideraen pa so arum nin aspekto ya anguma-uman iray kipapasen na Anak na Dios sanen sikatoy linma diad dalin. Anggaman ag-akatawir si Jesus na kasalanan ed si Adan, Sikatoy nagmaliw a sakey a too, a singa saramay diad saginonor et magmaliw ya “agagi,” odino alanaan a papatumbok to. (Basaen so Hebreos 2:17, 18.) Diad samay unor lan labi na bilay nen Jesus diad dalin, agto anggan kinerew ed mangatatawen ya Ama to so pangibaki na “masulok a labinduan lehyon na angheles.” Balet ta, isipen pa lambengat so kinarakel na anghel a walad autoridad to bilang si Miguel ya Arkanghel! (Mat. 26:53; Jud. 9) Sakey ni, si Jesus et nanggawa na saray milagro; ingen, saray ginawa to legan a wadia ed dalin et dagdaiset no ikompara ed saray nagawaan to komon no sikatoy walad tawen.

7. Panon so inkiwas na saray Judios ed Ganggan?

⁷ Sakbay a nagmaliw a too si Jesus bilang “say Salita,” nayarin sikato imay Pinagkasangiyan na Dios ya angiwanwan ed saray Israelita diad kalawakan. (Juan 1:1; Exo. 23:20-23) Saray Israelita so ‘angawat ed ganggan, a singa say bilin na saray angheles, balet ta agda itan inunor.’ (Gawa 7:53; Heb. 2:2, 3) Diad tua, saray lider na relihyon nen inmunan siglo so ag-akatebek ed peteg a kabaliksan na say Ganggan. Alimbawa, konsideraen pa so ganggan nipaakar ed Sabaton. (Basaen so Marcos 3:4-6.) Saray eskriba tan Fariseo et ‘agda sinumpal iray ambelbelat a pamaakaray katunongan [Ganggan], salanti, kaalasan tan panangasi tan pananisia.’ (Mat. 23:23) Anggaman ontan, agtinmunda si Jesus ya angiyabawag na katuaan.

8. Akin a natulongan itayo nen Jesus?

⁸ Si Jesus et walaan na mabulos ya espiritu. Sikatoy apakiwas lapud panangaro ed totoo tan labalabay toran tulongan. Agbalot naandi ed sikato so seseg ed panag-ebanghelyo. Tan lapu ed katooran to ed si Jehova legan a wadiad dalin, si Jesus so ‘akapanggawa na andi-anggaan a kilalaban ed saray amin ya ontulok ed sikato.’ Niarum ni, ‘lapud sikatoy nantepel na [subsubok], nayarian to a tulongan so saray [nasubok a singa sikatayo].’​—Heb. 2:18; 5:8, 9.

Nipasal a Maong Bilang Managbangat

9, 10. Anton panangipasal so naawat nen Jesus antis a nibaki diad dalin?

⁹ Sakbay ya ibaki a manmisionaryo iray Kristiano natan, iyuuksoy na Mananguley ya Ulop so pangipasal ni ed sikara. Komusta balet si Jesu-Kristo, kasin sikatoy akaawat na panangipasal? On, balet sikatoy agnanaral ed saray rabinikon eskuelaan antis ya alanaan bilang Mesias, tan agmet binangatan na saray prominentin lider na relihyon. (Juan 7:15; ikompara so Gawa 22:3.) Sirin, akin a nibagan si Jesus et talagan kualipikado a manbangat?

¹⁰ Antokaman so naaralan nen Jesus ed ina ton si Maria, tan ed pinagka-ama ton si Jose, say manunan angipasal ed sikato parad ministeryo et si Jehova a mismo. Oniay inkuan nen Jesus nipaakar ed saya: “Agak mansalita manlapu ed inkasiak, ingen say Ama ya angibaki dia ed siak, inikdan to ak na sakey a ganggan, no anto so nepeg kon ibaga, tan anto so nepeg kon salitaen.” (Juan 12:49) Imanoen a say Anak et naikdan na espisipikon instruksion no anto so ibangat to. Sakbay a linma diad dalin si Jesus, andi-duaruwan sikatoy angusar na dakel a panaon a dinmengel ed instruksion na Ama to. Wala ta ni magmaong a panangipasal a naawat to?

11. Panon so impangalig nen Jesus ed awawey nen Ama to ed katooan?

 ¹¹ Manlapud inkapalsa na Anak, sikatoy walaan la na maapit a relasyon ed Ama to. Sakbay a nagmaliw a too, atebek nen Jesus so awawey na Dios ed totoo diad impangobserba to ed pidedeneng nen Jehova ed sikara. Say panangaro na Dios ed katooan et talagan naalig a maong na sayan Anak, ta bilang personipikasyon na kakabatan et sarag ton ibagan: “Say panggayagaan ko wala nensaman ed saray anak na totoo.”​—Uli. 8:22, 31.

12, 13. (a) Panon ya akaaral si Jesus ed impangobserba to ed impideneng nen Ama to ed saray Israelita? (b) Panon ya inyaplika nen Jesus so panangipasal a naawat to?

¹² Say impangobserba na Anak ed no panon ya inasikaso nen Ama to iray mairap a kipapasen et sakey met a panangipasal ed sikato. Alimbawa, konsideraen pa so impideneng nen Jehova ed saray matungangan Israelita. Oniay ibabaga na Nehemias 9:28: “Kayari ya awalaan ira na painawa, nanggawa ra na mauges lamet ed arap mo [Jehova]; kanian pinaulyan mo ra ed lima na saray kabusol da, dia ed ontan a walaan ira na pakauley ed sikara: anggan ontan sanen nampataoli ra, tan naningel ira ed sika, dinmengel ka, a nanlapu ed tawen; et inlaban mo ra ed saray dakel a panaon unong ed saray panangasim.” Diad impikimey tan impangobserba nen Jesus ed si Jehova, abayuboan to so mipadparan panangabagey ed totoo diad teritoryan nampulongan to.​—Juan 5:19.

¹³ Inkana nen Jesus iyan inkipasal to panamegley na maabagey ya impideneng to ed saray babangatan to. Diad samay labi antis na impatey to, sikatoy ‘tinaynan tan imbatikan’ na amin a pinabpabli ton apostol. (Mat. 26:56; Juan 13:1) Sikatoy amitlo ni ingen ya imburi nen apostol Pedro! Anggaman ontan, inikdan nin siansia nen Jesus iray apostol to na pankanawnawan ompawil ed sikato. Oniay inkuan to’d si Pedro: “Impikasi ta ka, pian say pananisiam ag-onkulang; et sika, sano makapagbabawi ka la, pabiskegen mo so saray agagim.” (Luc. 22:32) Say espiritual ya Israel et matalonan niletneg ed “saray apostoles tan saray propetas,” tan diad saray baton angiletnegan ed bakor na Balon Jerusalem et nisulat so kangaranan na 12 matoor ya apostol na Kordero, si Jesu-Kristo. Anggad sayan panaon, saray alanaan a Kristiano, pati saray dedikado a kakaiba ra ya ‘arum a karnero,’ so onaaligwas ed kimey da a panangipulong na Panarian a naoorganisa diad tulong na Dios tan panangidaulo na inad-aro ton Anak.​—Efe. 2:20; Juan 10:16; Apo. 21:14.

No Panon so Impanbangat nen Jesus

14, 15. Diad antoran paraan a midumaan so panagbangat nen Jesus ed panagbangat na saray eskriba tan Fariseo?

¹⁴ Panon so impangiyaplika nen Jesus ed inkipasal to sanen binangatan to iray patumbok to? Sano ikompara tayo ed panagbangat na saray Judion lider na relihyon so panagbangat nen Jesus, mabitabitar tayon nanengneng so inkasuperyor na paraan nen Jesus. Saray eskriba tan Fariseo et ‘ginawa ran andi-kakanaan so salita na Dios nisengeg ed ugali,’ odino tradisyon da. Diad pidumaan, saray sinalita nen Jesus et agnanlapu ed sikaton dili; sikatoy lawas angibangat ed salita, odino mensahe na Dios. (Mat. 15:6; Juan 14:10) Ontan met so kaukolan tayon gawaen.

¹⁵ Wala so sakey nin aspekto a talagan nidumaduma si Jesus ed saray lider na relihyon. Nipaakar ed saray eskriba tan Fariseo, oniay inkuan to: “Amin a bengabengatla . . . ya ibaga ra naani ed sikayo, gawaen yo tan imanoen yo; ingen agkayo manggawa na unong ed saray gawa ra; ta ibaga ra, et agda gawaen.” (Mat. 23:3) Ginawa a mismo nen Jesus so imbangat to. Konsideraen tayo pa so sakey ya alimbawa a mamapaneknek a tua iya.

16. Akin a nibagam a nambilay si Jesus unong ed saray salita to a nisulat diad Mateo 6:19-21?

¹⁶ Pinaseseg nen Jesus iray babangatan to a ‘mantipon na kaykayamanan ed tawen.’ (Basaen  so Mateo 6:19-21.) Kasin nambilay a mismo si Jesus unong ed satan a simbawa? On, lapud oniay sarag ton ibaga nipaakar ed inkasikato: “Saray kuyangen walay ungib da, tan saray manok ed tawen walaan ira na ubong; balet say Anak na too andian na napangisaralan to ed ulo to.” (Luc. 9:58) Simpli so impanbilay nen Jesus. Say kimey to et niyapasakey ed panangiyabawag na maong a balita na Panarian, tan impatnag to no anto so kabaliksan na pagmaliw a bulos ed saray kapagaan a resultay panagtipon na kaykayamanan diad dalin. Impabitar nen Jesus a mas maong nin aminpigapiga so pantipon na kaykayamanan ed tawen, a “diman [et] agderalen na saray bokbok tan lati, tan diman [et] agkotkoten tan agtakewen na saray matakew.” Kasin uunoren mo so simbawa nen Jesus a mantipon na kaykayamanan ed tawen?

Saray Kalidad nen Jesus a Sengegay Impamabli na Totoo ed Sikato

17. Antoran kalidad nen Jesus so nanggawa ed sikaton matalonggaring ya ebanghelisador?

¹⁷ Antoray kalidad nen Jesus a nanggawa ed sikaton matalonggaring ya ebanghelisador? Say sakey et say awawey to ed saray totoon tinulongan to. Arum ed saray maabig a kalidad nen Jehova ya inalig nen Jesus et say kapaabebaan, panangaro, tan panangabagey. Imanoen no panon ya apaapit so dakel a totoo ed si Jesus lapud sarayan kalidad.

18. Akin a nibaga tayo a mapaabeba si Jesus?

¹⁸ Diad impangawat nen Jesus ed asainmin ya onla’d dalin, “nilukpos to so inkasikato, ya inala to so ereng na sakey ya aripen, ya agawan kaulibay na saray totoo.” (Fil. 2:7) Sakey itan a panangipatnag na kapaabebaan. Niarum ni, agminelmelag nen Jesus iray totoo. Agto imbaga ed sikaran, ‘dengel yo ak, ta diad tawen ni nanlapuan ko.’ Aliwan singa saray mankuankuanan a totoo ya ibabaga ran sikaray mesias, ag-imbanbando nen Jesus a sikato so tuan Mesias. Walaray pankanawnawa ingen a binilin to iray totoo ya agda ibabaga ed arum so pakabidbiran to odino saray ginawa to. (Mat. 12:15-21) Labay nen Jesus a mandesisyon iray totoo ya ontumbok ed sikato unong ed naiimatonan dan mismo. Talagan baleg a bendisyon ed saray babangatan to ya ag-ira inilaloan na Katawan dan magmaliw a singa saray ayadyarin anghel ya akalimog to ed tawen!

19, 20. Panon ya amakiwas ed si Jesus so panangaro tan panangabagey pian tulongan so totoo?

¹⁹ Impatnag met nen Jesu-Kristo  so panangaro, salanti, say sankatalonggaringan a kalidad na mangatatawen ya Ama to. (1 Juan 4:8) Panangaro so amakiwas ed si Jesus pian bangatan iray dumerengel to. Singa bilang, imanoen pa so alikna to ed sakey a mayaman a manuley. (Basaen so Marcos 10:17-22.) ‘Sikatoy inaro’ nen Jesus tan kinaliktan to a tulongan, balet agnataynan na mayaman a manuley so dakel a kaykayarian to pian magmaliw a patumbok nen Kristo.

²⁰ Say sakey nin makasagyat a kalidad nen Jesus et say inkamaabagey to. Saramay kinmiwas ed panangibangat to so nadedetdetan ed saray problema, a singa met ed saray amin ya ag-ayadyarin totoo. Lapud amta itan nen Jesus, sikato so maabagey tan mapangasin angibangat ed sikara. Singa bilang: Aminsan et nagmaliw ya okupadon maong si Jesus tan saray apostoles to ya agda la naarap so anggan mangan. Anggaman ontan, panoy inkiwas nen Jesus sanen anengneng ton nantitipon iray totoo? ‘Naabagey to ira, lapud singa ra karnero ya andian na managpastol. Tan ginapoan to ran binangatan na amayamay a bengatla.’ (Mar. 6:34) Naimano nen Jesus so pakaskasin kipapasen na totoo diad teritorya to kanian inusar toy biskeg to pian bangatan ira tan nanggawa na saray milagro ya angunggona ed sikara. Walaray asagyat ed maabig iran kalidad to, atenyeg ed saray imbaga to, tan nagmaliw a babangatan to.

21. Anto so singbaten tayo diad onsublay ya artikulo?

²¹ Dakdakel ni so naaralan tayo nipaakar ed ministeryo nen Jesus diad dalin, unong ya ipabitar na onsublay ya artikulo. Diad anto niran paraan a naalig tayoy Jesu-Kristo, say sankatalonggaringan a Misionaryo?

Panon Yon Ebatan?

• Anton panangipasal so agamoran nen Jesus sakbay a linma diad dalin?

• Panon a mas maong nin aminpigapiga so panagbangat nen Jesus no ikompara ed panagbangat na saray eskriba tan Fariseo?

• Antoran kalidad nen Jesus so sengegay impamabli na saray totoo ed sikato?

[Tepetepet Parad Panagaral]

[Litrato ed pahina 15]

Panon a binangatan nen Jesus iramay nantitipon a totoo?