Dedengelen nen Jehova Iray Ey-ey Tayo Parad Tulong

“Saray mata nen Jehova wala ra ed matunong a too, tan saray layag to akalukas ira ed saray akis da.”​—SAL. 34:15.

1, 2. (a) Anto so nalilikna na dakel a totoo natan? (b) Akin ya aliwa lan balo ed sikatayo iya?

 DAKEL ta so pampapagaan tan problema yo? No ontan, agyo bukbukor. Minilyon so manaanos met a mangaarap ed inagew-agew iran desdes na bilay ed sayan marelmeng a sistema. Say sasagmaken ni ingen na arum et singa imposible lan nalampasan. Say nalilikna ra et singa ed samay inkanta nen salmistan David: “Makapkapuy ak tan aranel ak a tuloy: nanaglem ak nisengeg ed agpandeen na pusok. Say pusok mansokbot, say biskeg ko kinmulang ed siak: unong na nipaakar ed liwawa na matak, tinmaynan ed siak met.”​—Sal. 38:8, 10.

² Aliwa lan balo ed sikatayoran Kristiano iray makapaermen a nasasagmakan tayo ed bilay. Natatalosan tayo a say “ermen” et kabiangan ed tanda na kiwawala nen Jesus. (Mar. 13:8; Mat. 24:3) Diad orihinal a Griego, samay salitan nipatalos dia ya “ermen” et manutukoy ed pinasyan sakit a nalilikna na manaanak. Talagan matukotukoy itan a deskripsion ed sobra lan paniirap na totoo natan ed sarayan “maatap,” tan “maruksa” a panaon a mairap a pidenengan!​—2 Tim. 3:1; Kingdom Interlinear.

Natatalosan nen Jehova so Pakakagonigon Tayo

3. Anto so amta la na saray totoo na Dios?

³ Bilang totoo nen Jehova, amta tayo lan naapektaan itayo ed inkaatap na sayan panaon, tan maseguron sayan kipapasen et onloor ni. Nilikud ni ed nasasagmakan tayo iran kairapan a kaslakan la ed katooan, sikatayoran lingkor na Dios et walaan met na ‘kabusol, say Diablo’ a determinadon maneral ed pananisia tayo. (1 Ped. 5:8) Main-inomay so pakalikna ed samay alikna nen David: “Say balaw binetag to so pusok; tan napno ak na belat: et nananap ak na pigara a mangisibeg, balet anggapo a balot; tan saray managligliwa, balet anggapon balot so nalmok”!​—Sal. 69:20.

4. Anto so makaligliwa ed sikatayo sano walaray pakakagonigonan tayo?

⁴ Kasin say labay ya ibaga nen David et anggapo lan balot so ilalo to? Andi. Imanoen pa niray inkanta to ed satan a salmo: “Ta si Jehova dengelen to so saray naukolan, tan agto ra mudmoraen so saray dinakep to [odino saray lingkor to ya adakep].” (Sal. 69:33) Agta no maminsan et say pakalikna tayo et singa tayo la adakep odino abalor na saray pakakagonigonan odino ir-irap tayo? Nayarin liknaen tayon ag-itayo peteg a natatalosan na arum, tan ompano andi met a talaga. Balet, singa si David, naligliwa itayo ed pakaamtan natatalosan a maong nen Jehova so pakakagonigon tayo.​—Sal. 34:15.

5. Matalek si Arin Solomon ed anto?

⁵ Satan a katuaan et impabitar nen Solomon ya anak nen David diad samay dedikasyon na templo ed Jerusalem. (Basaen so 2 Awaran 6:29-31.) Kinerew to ed si Jehova a dengelen To komon so pikakasi na balang matuan-impanpuso a mangiyasingger ed sikato na ‘dili a salot tan dili ya ermen to.’ Panon so ikiwas na Dios ed saray pikakasi na sarayan nagogonigon ya indibidual? Imbalikas nen Solomon so talek to ya aglabat dengelen na Dios iray pikakasi ra, noagta sikatoy onkiwas met pian tulongan ira. Akin ey? Lapud amta to no antoy walad “puso na saray anak na saray totoo.”

6. Panon tayon natalonaan so kapagaan, tan akin?

⁶ Panamegley na pikakasi et niyasingger tayo met ed si Jehova iray ‘dili a salot tan ermen tayo,’  salanti, saray personal a pakakagonigonan tayo. Naliligliwa itayo diad pakaamtan natatalosan to so pakakagonigon tayo tan iyaansakit to itayo. Pinekderan iya nen apostol Pedro sanen inkuan to: “Imatalek yo ya amin ed sikato so kapagaan yo; ta sikato asikasoen to kayo.” (1 Ped. 5:7) Importante ed si Jehova no antoy nagagawa ed sikatayo. Indanet nen Jesus so maaron panangiyansakit nen Jehova, ya inkuan ton: “Agta nalako so duaran anuyaw ed sakey a kuarta? Et ag napelag naani sakey ed sikara ed dalin no agyabuloy nen Ama yo. Et anggan saray buek na ulo yo abilang ira ya amin. Agkayo antakot sirin; ta mamabli kayo nen saray amayamay ya anuyaw.”​—Mat. 10:29-31.

Ompapeg ed si Jehova

7. Segurado itayo ed anton tulong?

⁷ Segurado itayo ya aglabat labay noagta sarag met nen Jehova a tulongan itayo sano makakasagmak itayo na saray makapagonigon a kipapasen. “Say Dios sikato so salimbengan tayo tan biskeg tayo, sikato so sakey a maparparaan a tulong ed gonigon.” (Sal. 34:15-18; 46:1) Panon ya itatarya nen Jehova iyan tulong? Nonoten pa no antoy inkuan na 1 Corinto 10:13: “Say Dios matoor, ta agto kayo paulyan a natukso na onlabas ed nayarian yo; noag ingen pati tukso, manggawa met na dalan a paliisan, ta pian nayarian yo ya itepel.” Tulongan itayo nen Jehova balanglan diad pangimaneobra to ed saray bengabengatla pian naekal so sengegay paniirap tayo, odino diad pangiter to ed sikatayo na biskeg a nakaukolan pian naanosan itan.

8. Panon tayon nagamoran so tulong na Dios?

⁸ Panon tayon nagamoran itan a tulong? Imanoen no antoy nisimbawan gawaen tayo: “Paawit mo ed si Jehova so awit mo.” Kabaliksan na saya ya ipudir tayo ed si Jehova so amin a kapagaan tayo. Ontunda itayo lan manaburido tan maanos itayon manmatalek ya asikasoen to iray pankaukolan tayo. (Mat. 6:25-32) Kaukolan ed saya so inkamapaabeba, ya agtayo mandedependi ed dili tayon biskeg tan kakabatan. Diad pampaabeba tayo ed “silong na makapanyarin limay Dios,” bibidbiren tayo so inkamakabos tayo. (Basaen so 1 Pedro 5:6.) Tan ontulong met iya pian naanosan tayo so antokaman ya iyabuloy na Dios. Nayarin say labay tayo et nainawaan lan tampol, balet manmamatalek itayon amta nen Jehova no antoy sankaabigan a panaon tan paraan a panulong to ed sikatayo.​—Sal. 54:7; Isa. 41:10.

9. Anton klase na aawiten so kaukolan ya ipaawit nen David ed si Jehova?

⁹ Nonoten pa lamet iramay salita nen David ed Salmo 55:22: “Paawit mo ed Jehova so awit mo, et sikato bembenan to ka: agton balot paulyan so matunong a natentenyeg.” Sanen insulat nen David iratan, sikatoy nagogonigon a maong. (Sal. 55:4) Agawa itan sanen sinali na anak ton si Absalom a samsamen so inkaari to. Tan akikomplot met ed si Absalom so managsimbawan panmamatalkan a maong nen David, si Ahitopel. Pian niliktar nen David so bilay to, kinaukolan toy ontaynan ed Jerusalem. (2 Sam. 15:12-14) Balet, anggan diad sarayan makapagonigon a kipapasen, si David so nantultuloy a nanmatalek ed Dios tan sikatoy ag-adismaya.

10. Anto so nepeg tayon gawaen sano walaray pakakagonigonan tayo?

¹⁰ Singa si David, im-importante ya iyasingger tayo met ed si Jehova diad pikakasi so antokaman a pakakagonigonan tayo. Imanoen tayo pa no antoy impaseseg nen apostol Pablo a gawaen tayo nipaakar ed saya. (Basaen so Filipos 4:6, 7.) Anto so resulta na ontan kasimoon a pikakasi? ‘Say deen na Dios, a talonaan to so amin a pakatalos, bantayan to so kapusoan tayo tan saray nonot tayo ed Kristo Jesus.’

11. Panon a proprotektaan na “deen na Dios” so puso tayo tan say abilidad tayon mannonot?

 ¹¹ Nauman kasi na pikakasi so kipapasen yo? Nayarin nauman to. Balet, nepeg tayon tandaan ya aglawas eebatan nen Jehova so pikakasi tayo diad paraan a labay tayo. Anggaman ontan, natulongan itayo na pikakasi pian mansiansian balanse, diad ontan et ag-itayo natalonaan na pakakagonigon tayo. “Say deen na Dios” so mamakalma ed sikatayo sano nabebelatan tayo ed ontan iran liknaan. Singa ed sanbatalyon a sundalo a nitalagan manprotekta ed sakey a syudad manlapud panaglusob, protektaan na say “deen na Dios” so puso tayo tan say abilidad tayon mannonot. Ontulong itan ed sikatayon nadaeg iray duaruwa, takot, tan negatibon kanonotan, tan mangamper ed sikatayon onkiwas a bengatbengat tan agmakabat.​—Sal. 145:18.

12. Iyilustra no panon itayon nawalaan na kareenay nonot.

¹² Panon itayon nawalaan na kareenay nonot anggano wala itayo’d saray kipapasen ya aliwan marakep odino makapagonigon? Imanoen pa iyan ilustrasyon a mipadpara ed situasyon tayo. Walay sakey ya empleyadon say manedyer to et ansakit a mansalita. Balet, sayan empleyado et walaan na pankanawnawan mangibalikas na liknaan to ed makankayarian na kompanya, a maomaong a too, tan makatunongan. Impaseguro na samay makankayarian a natatalosan to so kipapasen tan impaamta to ya agla manbayag et ekalen to la iman a manedyer. Anto kasi alikna na saman ya empleyado ed satan? On, sikatoy apabiskeg a mananos, anggano wala nira bilang so arapen ton problema, lapud panisiaan to itan a panamaseguro tan amta to la no antoy nagawa. Ontan met, amta tayo a natatalosan nen Jehova so situasyon tayo tan papaseguroan to itayon agla manbayag, “say prinsipe na sayan mundo [et] nibantak.” (Juan 12:31) Agaylan makapainawa itan!

13. Nilikud ed pampikasi, anto ni so nepeg tayon gawaen?

¹³ Balet, magenap labat la kasin iyasingger tayo ed si Jehova iray problema tayo panamegley na pikakasi? Andi. Wala ni nepeg a gawaen tayo. Nepeg itayon onkiwas unong ed saray pikakasi tayo. Sanen angibaki si Arin Saul na lalakin mamatey ed si David, oniay impikasi nen David: “Iliktar moak ed saray kakabusol ko, O Dios ko: yagel moak ed saray ontalindeg ya onsumpa ed siak. Iliktar moak ed saray managgawa na kasulitan, tan ilaban moak ed saray napgaay dala a totoo.” (Sal. 59:1, 2) Balet, likud ni ed impanpikasi nen David, wala ni ginawa to. Sikatoy dinmengel met ed asawa to tan nanggaway paraan pian makaliktar. (1 Sam. 19:11, 12) Nayarian tayo met ya ipikasin nawalaan itayo komon na praktikal a kakabatan ya ontulong ed sikatayon mangarap odino mamawas ni ingen ed saray pakakagonigonan tayo.​—Sant. 1:5.

No Panon so Pakawalaan na Biskeg Pian Makapansungdo

14. Anto so makatulong ed sikatayo sano walaray kairapan?

¹⁴ Nayarin agtampol naekal iray irirap tayo. Ompan manbayag ni ingen iratan. No ontan bilang so nagawa, anto so ontulong ed sikatayon makapansungdo? Unona, nepeg tayon tandaan a no mantultuloy itayon matoor a manlingkor ed si Jehova anggano walaray kairapan, napapaneknekan tayoy panangaro tayo ed sikato. (Gawa 14:22) Tandaan imay inyakusa nen Satanas ed si Job: “Diad saman si Satanas inmebat ed Jehova, tan inkuan to, si Job antakot ta ed Dios ya andi-kabaliksan? Agka ta nanggawa na alar ed liberliber to, tan dia ed liberliber na abung to, tan dia ed liberliber na amin a wala ed sikato, ed amin a diking? Benendisyonan mo so kimey na saray lima to, tan say kayarian to minmunat ed dalin. Balet yunat mo so limam natan, tan diwiten mo so amin a wala ed sikato, et ikaindan to ka ed lupam.”  (Job 1:9-11) Lapud impanmatoor nen Job, apaneknekan ton sayan akusasyon et abalbaleg a katilaan. Papaneknekan tayo met a matila si Satanas no mansungdo itayo ed saray mair-irap a kipapasen. Tan bilang resulta, ombiskeg so panag-ilalo tan panagmatalek tayo ed si Jehova.​—Sant. 1:4.

15. Antoran ehemplo so mamabiskeg ed sikatayo?

¹⁵ Komadua, lawas nonoten a ‘saratan a kairapan et nagagawa met ed utel na agagi yo a wala ed mundo.’ (1 Ped. 5:9) On, ‘agkayo nasabian na bengatlan katutukso [subok] noag samay nitepel na ami too.’ (1 Cor. 10:13) Sirin, ombiskeg tan ompakpel kayo met no nodnonoten yo so ehemplo na arum, imbes a say pangiteenan yoy imano et saray dilin problema yo. (1 Tes. 1:5-7; Heb. 12:1) Motektek yo iray ehemplo na saramay kabat yon matoor a nansungdo anggaman ed saray dinalan dan mair-irap iran kipapasen. Sinali yo la kasi nananap na saray nipalapag iran eksperiensya ed bilay a mipara ed naeeksperiensya yo? Maseguron mamabiskeg met itan ed sikayo.

16. Panon itayon papabiskegen na Dios sano makakasagmak itayo na saray subok?

¹⁶ Komatlo, tandaan a si Jehova et “Ama na saray panangasi tan Dios na ami’ ligliwa. A sikato so manligliwa ed sikatayo ed amin a panermenan tayo, pian nayarian tayon ligliwaen so saray wala ed bengatlan panermenan, ed samay ligliwa a diad sikatayon dili, impanligliwa na Dios.” (2 Cor. 1:3, 4) Labay ya ibaga na satan a si Jehova et singa walad dikingan tayo pian mamaseseg tan mamabiskeg ed sikatayo, aliwa labat a diad saray nasasagmak tayo ed kaplesan noagta diad “amin a panermenan tayo.” Saya so ontulong ed sikatayon naligliwa met so arum diad ‘paneermen’ da. Si apostol Pablo et naeksperiensya ton mismo so katuaan na sarayan salita.​—2 Cor. 4:8, 9; 11:23-27.

17. Panon itayon natulongan na Biblia a mangarap ed saray kairapan ed bilay?

¹⁷ Komapat, walaan itayo na Biblia, say Salita na Dios a “maabig a pakaaralan, pakasumalan, pakasimbawaan, tan pakapanontonan a sikato so wala ed katunongan. Pian say too na Dios anggapo komon so pankulangan to, a nabangatan a maong ed amin a gawa a maabig.” (2 Tim. 3:16, 17) No sigpot tayon anamoten so Salita na Dios, ‘anggapo so pankulangan tayo’ tan “nabangatan itayo ed amin a gawa a maabig,” sirin et natulongan itayon mangarap ed saray kairapan ed bilay. Diad orihinal a lenguahe, samay salitan nipatalos dia ya ‘anggapo so pankulangan’ et literal a mankabaliksan na “naikdan na amin a nakaukolan.” Nayarin nausar iya nensaman a panukoy ed sakey a baloton naikdan na amin a nakaukolan parad mabayag a panaglayag, odino ed sakey a makinan sarag ton gawaen so amin ya angigagalaan ed sikato. Diad miparan paraan, itatarya nen Jehova panamegley na Salita to so amin a nakaukolan tayo pian napidenengan tayo so antokaman a situasyon a nadalan tayo. Kanian, nibaga tayon, “No inyabuloy na Dios iya, di nasarag ko sirin, diad tulong to.”

 Kibulos ed Amin a Pakakagonigonan Tayo

18. Antoy pangiteenan tayoy nonot tayo ta pian natulongan itayon makapansungdo a sitotoor?

¹⁸ Komalima, lawas tayon iteen so nonot tayo ed alay abig a katuaan ya agla manbayag et ekalen la nen Jehova so amin a pakapapagaan, paneermenan tan pakakapairapan tayo. (Sal. 34:19; 37:9-11; 2 Ped. 2:9) No nagawa la itan, aliwa labat a saray kaplesan ya aliwliwan kipapasen so pakalukposan tayo, noagta nawalaan itayo met na ilalon manbilay na andi-anggaan, balanglan diad tawen kaiba si Jesus odino diad paraison dalin.

19. Akin a posible so matoor a panagsungdo?

¹⁹ Angga ed satan a panaon, mantultuloy tayon arapen iray aliwan marakep a kipapasen ed sayan mauges a mundo. Talagan pirpirawat tayo lan onsabi imay panaon sano anggapo la iraya! (Sal. 55:6-8) Tandaan tayo a napaneknekan tayon matila so Diablo no matoor itayon mansungdo. Komon ta makala itayo na biskeg ed saray pikakasi tayo, diad Kristianon impanaagi tayo, tan agtayo lilingwanan a saray agagi tayo et makakasagmak met na saray subsubok a singa ed naeeksperiensya tayo. Mantultuloy ya epektibon usaren so Salita na Dios, diad ontan et anggapoy pankulangan yo tan nabangatan kayo ed amin a gawan maabig. Agyon balot aabuloyan ya onkapuy so talek yo ed maaron panangasikaso na “Dios na ami ligliwa.” Nodnonoten lawas a “saray mata nen Jehova wala ra ed matunong a too, tan saray layag to akalukas ira ed saray akis da.”​—Sal. 34:15.

Naebatan Yo Kasi?

• Anto so alikna nen David ed saray adalan ton makapagonigon iran kipapasen?

• Imbalikas nen Solomon so talek to ed anto?

• Anto so makatulong ed sikatayon saragen iray bengatlan iyabuloy nen Jehova?

[Tepetepet Parad Panagaral]

[Litrato ed pahina 13]

Matalek si Solomon ya onkiwas si Jehova pian tulongan iray nagogonigon a totoo To

[Litrato ed pahina 15]

Panamegley na pikakasi, impaawit nen David ed si Jehova so awit to tan kinmiwas unong ed pikakasi to