Kasin Mipara ed si Jehova so Panmoriam ed Arum?

“Anggapo so pansisian ed laman . . . Saray kabiangan wala so dili a panagpaga ra ed sakey tan sakey.”​—1 COR. 12:25.

1. Anto so aliknam sanen nagmaliw ka lan kabiangan na espiritual a paraiso?

 SANEN sinmian itayo ed sayan mauges a mundo tan akiulop itayo la ed totoo nen Jehova, agusgustoan tayoy ampetang ya aroan tan panangiyansakit da. Agaylan midumaan itan ed maruksa, makapaingongot, tan makolkol iran totoo a kontrolado nen Satanas! Sikatayo so nagmaliw lan kabiangan na espiritual a paraiso a napnoy kareenan tan pankakasakey.​—Isa. 48:17, 18; 60:18; 65:25.

2. (a) Anto so mangiimpluensya ed panmoria tayo ed arum? (b) Anto so nepeg tayon gawaen?

² Balet diad ilalabas na panaon, ompan magmamaliw lan negatibo so pakanengneng tayo ed saray agagi lapud ag-inkaperpekto. Imbes a say nengnengen tayo et saray espiritual a kalidad da, ompan pabalegen tayo ni ingen iray lingo ra. Diad simplin panangibaga, nalilingwanan tayo iran moriaen unong ed panmoria nen Jehova. No ontan so nagagawa, panaon la pian surien so panmoria tayo, tan ipara itan ed malinew a panmoria nen Jehova.​—Exo. 33:13.

No Anto so Panmoria nen Jehova ed Saray Agagi Tayo

3. Anto so angikomparaan na Biblia ed Kristianon kongregasyon?

³ Diad 1 Corinto 12:2-26, say kongregasyon na alanaan iran Kristiano et inkompara nen apostol Pablo ed laman a walaay “dakel iran kabiangan.” No panon a manduruma  iray kabiangan na laman, ontan met a saray membro na kongregasyon et nandurumay personalidad tan abilidad da. Anggaman ontan, aawaten, aaroen, tan aapresyaen nen Jehova so kada membro na kongregasyon. Kanian, amin tayo et sisimbawaen nen Pablo a nepeg a ‘wala so dili a panagpaga tayo ed sakey tan sakey.’ Nayarin mairap a gawaen iya ta nandurumay personalidad tayo.

4. Akin a kaukolan tayon umanen so panmoria tayo ed saray agagi?

⁴ Nayarin walay tendensia tayon onnengneng ed kakapuyan na agagi. No ontan, singa itayo sakey a too ya onnenengneng labat ed melag a kabiangan na litrato. Balet, mas malaknab so panmoria nen Jehova ta say nenengnengen to et say interon litrato. Walay tendensia tayon kuninengen iray agtayo labay, bangta say nenengnengen nen Jehova et say interon inkatoo, kabiangan lay maong iran ugali na indibidual. No lalo tayon panggunaetan ya aligen si Jehova, mas makatulong itayo ed aroan tan pankakasakey na kongregasyon.​—Efe. 4:1-3; 5:1, 2.

5. Akin et agmanepeg ya ukomen so arum?

⁵ Amta nen Jesus a saray ag-ayadyarin totoo et walay tendensia ran manhusga, kanian oniay insimbawa to: “Agkayo mangukom, pian agkayo naukom.” (Mat. 7:1) Imanoen a say imbaga nen Jesus diad orihinal a lenguahe et “Tundaan yoy mangukom,” imbes ya “Agkayo mangukom” unong ya impatalos na Pangasinan a Biblia. Amta to a maslak ed saray dumerengel to et apasal lan mankritiko ed kapara ran too. Kasin nipasal tayo met la itan? Sirin, panggunaetan tayo so manguman, pian ag-itayo naukom. Anto so kanepegan tayon manhusga ed sakey ya uusaren tan tinuro nen Jehova? Odino siopa itayon mangibaga a sikatoy agnepeg a kabiangan na kongregasyon? Nayarin walaray kakapuyan to, balet no sikatoy siansia nin aawaten nen Jehova, makanepegan kasi a sikatoy ipulisay tayo? (Juan 6:44) Talaga kasin manisia itayo a si Jehova so mangidadaulo ed organisasyon to, tan no kaukolay pananguman et sikatoy onkiwas diad dugan panaon to?​—Basaen so Roma 14:1-4.

6. Panon a momoriaen nen Jehova iray lingkor to?

⁶ Say sakey a pandinayewan ed si Jehova et say inkaabig ton onnengneng ed potensyal na balang sakey a Kristiano sano magmaliw la ran perpekto diad balon mundo. Amta to met so inaligwasan da la diad pangiyaaplika ed saray nanaaral da ed Biblia. Kanian, agto isesentro so imano to ed kada kakapuyan da. Onia so nabasa tayo ed Salmo 103:12: “Unong na kaarawi’ letakan a manlapu ed seselekan, ontan so kaarawi angibantakan to ed saray impakasumsumpa tayo ya inekal to ed sikatayo.” Talagan pisalamatan tayo itan!​—Sal. 130:3.

7. Antoy naaralan tayo ed panmoria nen Jehova ed si David?

⁷ Nabasa ed Biblia a si Jehova et maong ya onnenengneng ed kamaongan na sakey a too. Deneskribe na Dios si David ya “aripen ko a David ya angunor ed saray ganggan ko, tan tinumbok  to ak ed simoon a puso to, pian gawaen to lambengat so matunong ed imaton ko.” (1 Ara. 14:8) Tua, walaray makapuy a ginawa nen David. Balet, siansia ni a say inimano nen Jehova et saray maabig ya ugali to lapud amta To a matunong so puso nen David.​—1 Awa. 29:17.

Ipara Yo ed si Jehova so Panmoria Yo ed Agagi

8, 9. (a) Panon tayon naalig si Jehova? (b) Panon so impangiyilustra ed saya, tan anto so naaralan tayo?

⁸ Si Jehova et makabasa na puso, balet agtayo itan nagawaan. Sikato’ya so maabig a rason no akin ya agtayo manhusga ed arum, ta agtayo amta so amin a motibo na too. Nepeg tayon aligen si Jehova diad agpangimano ed ag-inkaperpekto, ta naandi met lanlamang itan. Agta maabig no gawaen tayon kalat so pangalig ed si Jehova, tan agtayo piimano so kakapuyan na arum? Baleg so nitulong na satan pian mareen so relasyon tayo ed saray agagi.​—Efe. 4:23, 24.

⁹ Bilang ilustrasyon et walay sakey ya abung a nadederal la​—saray alula et napepelag, saray bintana et abetag-betag, tan saray gubida et atalem na danum. Ompan maslak a totoo so mangibaga a deralen la itan ta aliwliwan nengnengen. Balet, walay sakey a too a duma so panmoria to. Aliwan say itsura na abung so inimano to, noagta anengneng to a malet ni itan tan nayari nin apigeren. Sinaliw to so abung, insan to inapiger iray depekto tan pinarakep to itan. Insan, nibaga na saray ondadalan a marakdakep so abung. Kasin singa itayo samay too ya angapiger odino amarakep ed abung? Imbes ya imanoen tayo iray mapatnag a kaleteyan na saray agagi, akin ta no say imanoen tayo et saray kamaongan da tan say potensyal dan onaligwas ed espiritual? No ontan, aaroen tayo iray agagi tayo lapud espiritual a kalidad da, a singa gagawaen nen Jehova.​—Basaen so Hebreos 6:10.

10. Panon a makatulong ed sikatayo so simbawan nabasa ed Filipos 2:3, 4?

¹⁰ Angiter si apostol Pablo na pigaran simbawa a makatulong ed sikatayo diad pidedeneng tayo ed interon kongregasyon. Onia so impaseseg to ed saray Kristiano: “Anggapon balot komon so gawaen yo a lapud kasusumpa o pampasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili. Agnengnengen na balang sakey ed sikayo so kayarian ton dili, noag balang sakey ed sikayo nengnengen to met so saray bengatlan kayarian na saray arum.” (Fil. 2:3, 4) Makatulong ed sikatayo so inkamapaabeba pian nawalaan tayoy dugan panmoria ed arum. No ipanengneng tayon interesado itayo ed sikara tan imanoen tayo so kamaongan da, ontulong itan ed sikatayo pian naalig tayo so panmoria nen Jehova ed sikara.

11. Antoran pananguman so nagagawa ed dakel a kongregasyon?

¹¹ Diad sayan panaon, lapud pananguman ed mundo et dakel a totoo ed nanduruman bansa so onaalis pian manayam ed arum a syudad. Arum ed saray dinmayo et interesado ed katuaan na Biblia, tan kaiba tayo met la ran mandadayew ed si Jehova. Saraya et “nanlapu ed balang nasyon tan amin na saray kailalakan, tan binaleybaley, tan salita.” (Apo. 7:9) Kanian, dakel ed saray membro na kongregasyon et nanlapu ed nanduruman poli.

12. Anton panmoria ed balang sakey so nepeg tayon pansiansiaen, tan akin a mairap iya no maminsan?

¹² Nayarin diad kongregasyon tayo et nagkalalo lan kaukolan a pansiansiaen so dugan panmoria ed balang sakey. Naynay sirin a nonoten so simbawa nen apostol Pedro ya ipatnag so agkunkunwari odino “agnaumas ya aroan na sanaagi” tan ‘manaroan na malet ya angga ed utel na puso.’ (1 Ped. 1:22) Say pamayubo na tuan aro tan panamabli et medyo mairap diad kongregasyon a nanduruma so poli na saray agagi. Say kultura ra et talagan midumaan ed sikatayo, ontan met ed say edukasyon, panagbilay, tan binalegan da. Kasin mairap mon talosan so kanonotan tan reaksion da? Ompan ontan met so nalilikna ra ed sika.  Anggaman ontan, bibilinen itayon amin ya: “Aroen so interon ulop na agagi.”​—1 Ped. 2:17, NW.

13. Antoy nepeg tayon umanen ed panagnonot tayo?

¹³ Ompan kaukolan ya umanen so panagnonot tayo pian ombaleg odino napalaknab so panangaro ed amin ya agagi. (Basaen so 2 Corinto 6:12, 13.) Kasin nibabaga tayo met so onia, “Anggapoy lalabien ko, balet . . . ” insan la mangibaga na saray negatibon ugali ya ipapasen tayon maslak a kagagawa na satan a poli? Ipapanengneng na ontan iran liknaan a kaukolan tayon ekalen so panaglabi a walad utel na puso tayo. Nayarin tepetan tayoy inkasikatayo, ‘Kasin naynay kon panggugunaetan a nakabat iray totoon duma so kultura ra?’ Say ontan a panag-usisa ed dili so ontulong ed sikatayo pian napaapit ed agagin nanlapud nanduruman pasen.

14, 15. (a) Mangiter na saray alimbawa ed Biblia ya inuman day panmoria ra ed arum. (b) Panon tayo iran naalig?

¹⁴ Nabasa ed Biblia iray maabig ya alimbawa na totoon inuman day panmoria ra ed arum, sakey ed sikara si apostol Pedro. Bilang sakey a Judio, nayarin ag-onloloob si Pedro ed abung na Gentil. Isipen pa labat so alikna to sanen sikatoy imbakin onla ed abung na ag-asegat a Gentil a si Cornelio! Inuman nen Pedro so panmoria to lapud atebek to a linawa na Dios a saray totoo ed amin a nasyon et magmaliw a kabiangan na Kristianon kongregasyon. (Gawa 10:9-35) Si Saulo, a diad saginonor et nagmaliw ya apostol Pablo, so anguman met tan tinundaan toy panaglabi. Inamin to ya agaylay pankabusol to ed saray Kristiano, ya inkuanto: ‘Inuusilan ko nensaman so iglesia na Dios, tan inpabagbag ko.’ Balet, sanen si Pablo so kinorihe nen Jesus, baleg so impanguman to tan inawat to ni ingen so panangiwanwan na saramay datin pinasegsegang to.​—Gal. 1:13-20.

¹⁵ Andi-duaruwa a sarag tayon umanen so ugali tayo diad tulong na espiritu nen Jehova. No nalilikas tayon medyo wala lay lalabien tayo, panggunaetan tayon tundaan la iya tan “imatonan so pankakasakey na espiritu ed balor na kareenan.” (Efe. 4:3-6) Say Biblia et mamapaseseg ya “ikawes [tayo] so aro, a sikato so singer [tayo] ed inkayadyari.”​—Col. 3:14.

Aligen si Jehova Diad Ministeryo Tayo

16. Anto so gagala na Dios nipaakar ed totoo?

¹⁶ “Anggapo so pandurumaan na too ed arap na Dios,” so insulat nen apostol Pablo. (Roma 2:11) Gagala nen Jehova a saray totoo ed amin a nasyon et mandayew ed sikato. (Basaen so 1 Timoteo 2:3, 4.) Pian nasumpal itan a gagala,  inyuksoy to a say “andi-angga a maabig a balita” so ipulong “diad balang nasyon tan poli tan salita tan baley.” (Apo. 14:6) Oniay imbaga nen Jesus: “Say uma sikatoy mundo.” (Mat. 13:38) Anto so kabaliksan na saya ed sika tan diad pamilyam?

17. Panon tayon natulongan so amin a klase na totoo?

¹⁷ Aliwan amin et makaonla ed arawin pasen pian ipulong so mensahe na Panarian. Anggaman ontan, nayarian tayon pulongan iray totoo a nanlapud arum a pasen a manaayam la natan ed teritorya tayo. Aanamoten tayo kasi iray pankanawnawan pulongan so amin a klase na totoo, ya aliwa labat lan saramay totoon pigay taon tayo lan napupulongan? Akin ta no panseetan yon katongtongen iray totoon mataltalag a napulongan?​—Roma 15:20, 21.

18. Panon ya impatnag nen Jesus so panangiyansakit ed totoo?

¹⁸ Talagan alikna nen Jesus a kaukolan a tulongan so amin a totoo, kanian aliwan saksakey a pasen so nampulongan to. Ibabaga na sakey a salaysay na Biblia a “niliberliber to ray amin a syudad tan balbaley.” Insan, “sanen anengneng to ray dakerakel a totoo, inabagey to ra” tan imbaga to a nepeg a sikaray natulongan.​—Mat. 9:35-37.

19, 20. Antoray paraan a naalig tayoy panangiyansakit nen Jehova tan Jesus ed amin a klase na totoo?

¹⁹ Panon tayo met a nipanengneng so ontan ya awawey? Nanggunaetan na arum so nampulong ed saray teritorya ran mataltalag a nakobrian. Kabiangan ed saya iray pasen na negosyo, parki, paradaan, tan arap na saray panaayaman a bilding a sebel so onloob. Saray arum et nanaral na balon lenguahe pian napulongan da iramay dayo a manaayam ed lugar da odino saray grupo na totoon mataltalag a napulongan nensaman. No aralen yon ibano ira diad mismon lenguahe ra, nayarin nipalikna yo a talagan interesado kayo ed pankaabigan da. No agtayo makapanaral na balon lenguahe, kasin papasesegen tayo iramay manaaral? Sirin et agtayo dismayaen odino kuestionen so motibo na saramay mansasagpot a pulongan iray totoon dinmayo ed lugar tayo. Say bilay na amin a totoo et mabli ed Dios, tan labay tayon ontan met so panmoria tayo.​—Col. 3:10, 11.

²⁰ No say panmoria tayo ed totoo et mipara ed Dios, nepeg tayon pulongan so amin, antokaman so kipapasen da. Nayarin saray arum et anggapoy abung da, maringot ira, odino imoral so kabibilay da. No walay makapuy a ginawa na sakey a too, aliwan sikato tay rason pian mangibaga tayoy negatibo ed nasyonalidad da odino diad interon poli ra. Aliwliwa so impideneng na arum ed si Pablo, balet agto itan inabuloyan a mangamper ed sikato pian pulongan ira. (Gawa 14:5-7, 19-22) Inilaloan to a walay mangawat na mensahe to.

21. Panon a makatulong ed sika so pangalig ed panmoria nen Jehova ed arum?

²¹ Malinlinew a say dugan panmoria​—say panmoria nen Jehova​—et kaukolan diad pidedeneng tayo ed saray agagin binmaleg ed lugar tayo, saray agagin nanlapu ed arum a poli o bansa, tan saray totoo ed teritorya tayo. No lalo tayon ipapatnag so panmoria nen Jehova, mas makatulong itan ed kareenan tan pankakasakey tayo. Ontan met, lalo tayo iran natulongan a mangaro ed si Jehova, say Dios ya ‘agmanlalabi’ noagta mamapabli ed amin “ta sikara ya amin sikara so gawa na saray lima to.”​—Job 34:19.

Kasin Naebatan Mo?

• Anton panmoria ed agagi so nepeg tayon paliisan?

• Panon tayon naalig so panmoria nen Jehova ed saray agagi?

• Antoray naaralan mo nipaakar ed panmoria tayo ed agagi a nanlapud nanduruman pasen?

• Panon tayon naalig so panmoria nen Jehova sano manpupulong itayo?

[Tepetepet Parad Panagaral]

[Litrato ed pahina 26]

Panon tayon nakabat so totoon dumay kultura ra?

[Saray litrato ed pahina 28]

Antoray paraan a napasabian na maong a balita so mas dakel nin totoo?