Magmaliw a Mapalugar Diad Balansin Paraan

“Ipanonot mo ed sikara a . . . maong komon so linawa ra [“mapalugar,” NW].”​—TITO 3:1, 2, ftn.

1, 2. Anto so ibabaga na Biblia nipaakar ed pagmaliw a mapalugar, tan akin a matukoy itan?

 SI Jehova, say maaron Ama tayo ed tawen, so sankarunongan ed amin. Lapud pinalsa to itayo, paigigiya itayo ed sikato. (Sal. 48:14) Imbaga na Kristianon babangatan a si Santiago a “say kakabatan a wala a manlapu ed tagey, unona, sikato so malinew, insan mareen, masimpit [“makatunongan” odino “mapalugar,” NW], tan mainomay a pikasian, napno na panangasi tan maong iran bunga, andi-labien tan andi-pankunkunwari.”​—Sant. 3:17.

² Oniay imbilin nen apostol Pablo: “Nakabatan komon na amin a totoo so kasungdoan [“inkamakatunongan,” NW] yo.” * (Fil. 4:5) Si Kristo Jesus so Katawan tan Ulo na Kristianon kongregasyon. (Efe. 5:23) Talagan importante a balang sakey ed sikatayo et magmaliw a makatunongan odino mapasakop ed panangigiya nen Kristo, tan mapalugar odino makonsidera ed pidedeneng ed arum!

3, 4. (a) Sano manpalugar itayo, antoray nagunggona? Iyilustra. (b) Anto iray pantongtongan tayo?

³ Nagunggonaan itayo sano mabulos itayon manpalugar diad balansin paraan. Bilang ilustrasyon: Kayarin adiskobre ed Britanya so sakey a papanisiaan a pakana na saray terorista, maslak ed saray pasahero na eroplano so aliston mangunor ed saray totontonen a manesebel ed pangilugan na saray bengatla a dati et nayarin awiten. Tinulok da itan pian naprotektaan ira. Sano manmamaneho itayo ed nansangaan, nepeg tayon palugaran so arum a drayber pian naseguron anggapoy nagawan aksidente tan agtayo naabala ed dalan.

⁴ Parad maslak ed sikatayo, mairap so manpalugar. Pian natulongan itayo, pantongtongan tayo so taloran aspekto na panagpalugar, salanti, say motibo tayo, say pidedeneng tayo ed autoridad, tan no kasin walay limitasyon na panagpalugar.

Akin a Magmaliw a Mapalugar?

5. Unong ed Mosaikon Ganggan, anto so mamakiwas ed sakey ya aripen a pilien toy mansiansia ed amo to?

⁵ Nen panaon na saray Israelita, impalinew na sakey ya alimbawa no anto so dugan motibo ed panagpalugar. Unong ed Mosaikon Ganggan, saray Hebreo a nagmaliw ya aripen so bulos la diad komapiton taon na impanserbi ra odino diad taon na Jubileo, dinanman so makauna. Balet walad sikara itan no labay day mansiansian aripen. (Basaen so Exodo 21:5, 6.) Anto so mamakiwas ed sakey ya aripen pian mandesisyon na onia? Say panangaro ed makonsideran amo to.

6. Panon a mikonektaan so panangaro ed panagpalugar tayo?

⁶ Diad ontan met a paraan, say panangaro tayo ed si Jehova so mamakiwas ed sikatayon idedika so bilay tayo ed sikato tan manbilay unong ed dedikasyon tayo. (Roma 14:7, 8) “Saya so aro na Dios, a sumpalen tayo so saray ganggan to: tan saray ganggan to aliwa ran ambelat,” so insulat nen apostol Juan. (1 Juan 5:3) Sayan panangaro et agto iimanoen so dilin pankaabigan to. (1 Cor. 13:4, 5) Sano midedeneng itayo ed arum, say aro ed kaparan too so mamakiwas ed sikatayon manpalugar tan mangiyuna ed pankaabigan da. Imbes a sibletan so arum, ikonsidera tayo so pankaabigan da.​—Fil. 2:2, 3.

7. No nipaakar ed ministeryo tayo, anto so nitulong na konsiderasyon?

⁷ Kaukolan ya agmakatiror ed arum so panagsalita odino kakikiwas tayo. (Efe. 4:29) Kanian,  pakiwasen itayo na panangaro ed saray totoon nandurumay kipapasen tan kultura ra pian agmanggawa na bengatla a mangamper ed iyaaligwas da diad panaglingkor ed si Jehova. Kaslakan a kakaukolanen ed satan so pagmaliw tayon makonsidera. Bilang alimbawa, anggaman walaray misionaryon bibii ya apasal lan man-make-up odino man-stocking, agda ipasoot itan no lapud satan et ipasen na totoo ya imoral ira tan satan so pakatiroran na arum.​—1 Cor. 10:31-33.

8. Panon a makatulong so panangaro ed Dios pian onkiwas tayo a singa “kamelagan”?

⁸ Makatulong so panangaro tayo ed si Jehova pian ag-itayo manlastog. Kayarin nansasangsangan iray babangatan no siopa’d sikara so sankatageyan, pinaalagey nen Jesus so melag ya ugaw ed pegley da. Impaliwawa to: “Anggan siopa a mangawat na sayan melag ya ugaw ed ngaran ko awaten to ak; et anggan siopa a mangawat ed siak awaten to so angibaki ed siak; ta say kamelagan ed sikayo ya amin, sikato lanlamang so baleg.” (Luc. 9:48; Mar. 9:36) Bilang indibidual et ompan agaylay irap parad sikatayo so magmaliw a mapaabeba odino “kamelagan.” Say atawir ya ag-inkaperpekto tan say tendensia tayon manpaatagey so sengegan na pampirawat tayon magmaliw a prominente, balet say inkamapaabeba so ontulong ed sikatayo a manpalugar.​—Roma 12:10.

9. Pian magmaliw a mapasakop, anto so nepeg tayon bidbiren?

⁹ Pian magmaliw a mapasakop, nepeg tayon bidbiren so autoridad na saramay tinuro na Dios. Bibidbiren na amin a tuan Kristiano so importantin prinsipyo na inkaulo. Oniay malinew ya imbaga nen apostol Pablo ed saray taga Corinto: “Labay ko komon a kabaten yo a say ulo na balang laki si Kristo; tan say ulo na balang bii say laki; tan say ulo nen Kristo say Dios.”​—1 Cor. 11:3.

10. Anto so ipapanengneng na panagpasakop tayo ed autoridad nen Jehova?

¹⁰ Say panagpasakop tayo ed autoridad na Dios et mangipapanengneng a manisia tan manmamatalek itayo ed sikato bilang maaron Ama tayo. Amta to so amin a nagagawa tan tumangan to itayo unong ed satan. Kanian, no walay agnanrespeto ed sikatayo odino pinmetang so ulo ra tan nampasnok ira, makatulong so pannonot ed saya. Insulat nen Pablo: “No nayari, dia ed anganggaan na nayarian yo, manayam kayo ed kareenan ed ganaganay totoo.” Satan a bilin so indanet nen Pablo ed sayan ganggan: “Aleg a sikayo a dili so ombales, inararo, noag ingen ikdan na pasen so sanok na Dios: ta nisulat; siak so akankien na panamales; siak so ontumang naani, kuan na Katawan.”​—Roma 12:18, 19.

11. Panon tayon nipanengneng a manpapasakop itayo ed inkaulo nen Kristo?

¹¹ Say autoridad na saramay tinuro na Dios ed Kristianon kongregasyon et nepeg tayo met a respetoen. Diad Apocalipsis kapitulo 1 et tinukoy si Kristo Jesus ya eegnaan to ed kawanan a lima to iray “bitewen” na kongregasyon. (Apo. 1:16, 20) Nibaga met a sarayan “bitewen” so mangirerepresenta ed ulop na mamatatken, odino saray manangasikaso ed saray kongregasyon. Sarayan tinuron manangasikaso et manpapasakop ed panangidaulo nen Kristo tan mangaalig ed maabig a pidedeneng to ed arum. Ontan met, amin a  membro na kongregasyon so manpapasakop ed ginawa nen Jesus ya uksoyan a saray “matoor tan makabat ya aripen” et mangitarya na espiritual a tagano ed dugan panaon. (Mat. 24:45-47) Natan, nibagan personal itayon manpapasakop ed inkaulo nen Kristo no mabulos tayon aralen tan iyaplika iyan artikulo, a makatulong ed kareenan tan pankakasakey tayo.​—Roma 14:13, 19.

Wala tay Limitasyon na Panagpalugar Odino Panagpasakop?

12. Akin a walay limitasyon na panagpasakop?

¹² Balet sano manpapasakop itayo, agto kabaliksan ya ikokompromiso tayo lay pananisia odino maptek iran prinsipyo tayo. Anto so talindeg na saray inmunan Kristiano sanen papatundaen ira na saray lider na relihyon a manbangat ed ngaran nen Jesus? Onia so makpel ya imbaga nen Pedro tan saray arum ya apostol: “Nakaukolan ya unoren mi so Dios, nen saray totoo.” (Gawa 4:18-20; 5:28, 29) Ontan met natan, no saray manuuley ed gobierno et patundaen da itayon mangipulong ed maong a balita, ag-itayo ontunda. Balet, nayari tayon umanen iray paraan tayo pian mataktika tayon napidenengan so situasyon. Sano sesebelan itayon mankabkaabungan, manggawa itayo na arum a paraan a nakatongtong iray akan-abung tan mantultuloy itayon mangunor ed kimey ya inter na Dios ed sikatayo. Ontan met, sano sesebelan na “saray atagtagey a pakauley” so pantitipon tayo, maalwar tayon gawaen itan ed melag iran grupo.​—Roma 13:1; Heb. 10:24, 25.

13. Anto so imbaga nen Jesus nipaakar ed panagpasakop ed saramay walad autoridad?

¹³ Diad Sermon ed Palandey, impaamta nen Jesus a kaukolan so pampasakop ed autoridad: “No siopan too mikolkolan ed sika, tan alaen toy kawes mo, paulyan mon walad sikato met so kolibenben mo. Tan say siopaman a mamasoot ed sika ya onla ed sakey a milya, miulop ka ed sikato ed duaran milya.” (Mat. 5:40, 41) * Say pangikonsidera ed arum tan say pilalek ya ontulong ed sikara so mamakiwas ed sikatayo a miulop ed duaran milya, odino manggawa na mas dakel ni nen say iilaloan ed sikatayo.​—1 Cor. 13:5; Tito 3:1, 2.

14. Akin ya agtayon balot palugaran so apostasya?

¹⁴ Anggaman labalabay tayoy manpalugar, agtayon balot mikokompromiso ed saray apostata. Kaukolan so malinew tan mapekder a talindeg ed sayan pamaakaran pian napansiansia tayo so kalinisan na katuaan tan pankakasakey ed kongregasyon. Nipaakar ed saray “aliwan tua ya agagi,” oniay insulat nen Pablo: “Anggan dia ed leleg na sakey oras agmi ra inaabobonan ya inunor, pian say katuaan na ebanghelyo magnayon ed sikayo.” (Gal. 2:4, 5) No bilang ta onlesa so apostasya, saray matoor a Kristiano so determinadon ondapag ed duga.

Nepeg a Mapalugar Iray Manangasikaso

15. Sano mantitipon iray manangasikaso, panon iran magmaliw a mapalugar?

¹⁵ Sakey ed saray kualipikasyon pian makapanlingkor bilang tinuron manangasikaso et say mabulos a panagpalugar. Insulat nen Pablo a say manangasikaso et nakaukolan a “maong so ugali to [“makatunongan” odino “mapalugar,” NW].” (1 Tim. 3:2, 3) Lalon importante itan no saray tinuron lalaki et mantitipon pian pantongtongan iray nipaakar ed kongregasyon. Antis a mandesisyon iray mamatatken, bulos iran mangibaga ed nononoten da, anggaman agkaukolan a mankomento so balang sakey. Legan dan mantotongtong, nayarin manguman so panmoria na sakey no narengel ton sinalambit iray matukoy a prinsipyo ed Biblia. Imbes a kontraen so opinyon na arum tan ipilit so personal iran panmoria, say matatken ed espiritual a manangasikaso et manpalugar la. Nayarin diad gapo et mandurumaan iray opinyon, balet makatulong so pandalepdep a tinekepay pikakasi pian mankakasakey iray mapaabeba tan mapalugar a mamatatken.​—1 Cor. 1:10; Basaen so Efeso 4:1-3.

16. Anton ugali so kaukolan ya ipanengneng na saray Kristianon manangasikaso?

¹⁶ Diad amin a kimey na Kristianon matatken, nepeg a sikatoy maseet a manuporta ed teokratikon uksoyan. Satan ya ugali so kaukolan ton ipatnag anggan diad panagpastol ed pulok, tan satan so makatulong pian nipanengneng to so konsiderasyon tan kaabigan ed arum. “Pastolan yo so saray pulok na Dios a wala ed sikayo,” so insulat nen Pedro, “pampagaan yo ra ya ag-iparalan ed  kabiskegan, noag dia ed kalakal a mabulos unong ed linaway Dios; aliwa a lapud mabanday a pananubo noag lapu ed ataryan kalakal.”​—1 Ped. 5:2.

17. Panon a nipanengneng na amin a membro na kongregasyon so panagpalugar tan panagpasakop diad pidedeneng ed arum?

¹⁷ Misalsalamat iray maedad lan membro na kongregasyon ed baleg a tulong na saray kalangweran tan iikdan day dignidad irayan mas ugugaw ni. Ontan met, gagalangen na sarayan kalangweran iray maedad la ya abayag lan manlilingkor ed si Jehova. (1 Tim. 5:1, 2) Saray Kristianon mamatatken so manaanap na kualipikado iran lalaki a napangipiyaan da na pigaran responsabilidad tan nibangat dan ontulong a mangasikaso ed pulok na Dios. (2 Tim. 2:1, 2) Nepeg a pablien na balang sakey a Kristiano so apuyanan a bilin nen Pablo: “Ontulo’kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo, a singa sikara so mangiter naani pipapalinewan: pian sikato ya so gawaen da a sigagayaga, tan aliwa a sieermen: ta saya agmakapaabig ed sikayo.”​—Heb. 13:17.

Membro na Pamilya a Manpapalugaran

18. Akin ya importante ed pamilya so panpapalugaran?

¹⁸ Nepeg met a manpapalugaran so membro na pamilya. (Basaen so Colosas 3:18-21.) Nabasa ed Biblia iray responsabilidad na balang sakey a membro na Kristianon pamilya. Say ama et ulo na asawa to tan manunan responsable a mangigiya ed ananak. Nepeg a bidbiren na asawan bii so autoridad na masiken to. Tan gawaen na ananak so anggaay nayarian dan magmaliw a matulok, ta satan so talagan makapaliket ed Katawan. Balang sakey a membro na pamilya so makatulong ed pankakasakey tan kareenan ed sankaabungan diad panamegley na panagpalugar ed balanse tan dugan paraan. Makatulong so pigaran alimbawa ed Biblia pian iyilustra iya.

19, 20. (a) Nipaakar ed pagmaliw a mapalugar, pankomparaen so alimbawa nen Eli tan say alimbawa nen Jehova. (b) Antoray naaralan na atateng ed sarayan alimbawa?

¹⁹ Sanen ugaw ni si Samuel, si Eli so atagey a saserdote ed Israel. Balet, saray anak nen Eli, a si Hopni tan Phinehas, so “mabanday a lalaki” ya “agda amta nensaman si Jehova.” Abalitaan nen Eli so mauges a gagawaen da, kaiba la’d satan so pilalawanan odino agmanepeg a pisesekso ra ed saray bibiin manlilingkor ed lolooban na tolda a pantitiponan. Antoy reaksion nen Eli? Inkuan to a no mankasalanan ira ed si Jehova, anggapoy mangipikasi ed sikara. Balet agto met lanlamang ira impetek tan dinisiplina. Bilang resulta, intuloy na ananak to so gagawaen dan mauges. Lapud satan, nepeg labat a sentensiaan ira nen Jehova na dusan ipapatey. Sanen abalitaan nen Eli so impatey  da, sikato met so inatey. Talagan makapaermen itan ya agawa! Malinew sirin a say agmanepeg ya impanpalugar nen Eli ed mauges a kagagawa na saray anak to, salanti, say impangonsinti to ed sikara, et aliwan duga.​—1 Sam. 2:12-17, 22-25, 34, 35; 4:17, 18.

²⁰ Diad pidumaan, konsideraen pa so pidedeneng na Dios ed saray ananak ton anghel. Walay makatantandan pasingawey nen propeta Micaya nipaakar ed pantitipon nen Jehova tan saray anghel To. Tinepet nen Jehova no siopa ed saray anghel so mamalikdo ed mauges ya ari na Israel a si Ahab pian sikato so natalo. Dakel ya anghel so angisuheri tan dinengel iratan nen Jehova. Insan sakey ya anghel so angibaga a gawaen to itan. Tinepet nen Jehova ed sikato no panon. Lapud aliketan si Jehova ed ebat to, ingganggan To iyan anghel a manumpal ed satan. (1 Ara. 22:19-23) Agta makaaral met iray membro na pamilya ed satan a salaysay nipaakar ed panagpalugar? Maabig no ikonsidera na Kristianon asawan laki tan ama so ideya tan suhestion na asawa tan ananak to. Diad biek a dapag, seguroen na asawan bii tan ananak a sano mangibaga ira na opinyon da odino panlabayan da, kaukolan iran manpasakop bilang respeto ed panangigiya na ama ya inikdan na Kasulatan na autoridad a mandesidi.

21. Anto so pantongtongan tayo ed ontumbok ya artikulo?

²¹ Talagan misalsalamat tayo ed saray maaro tan makabat a panonot nen Jehova nipaakar ed panagpalugar tan panagpasakop! (Sal. 119:99) Diad ontumbok ya artikulo et pantongtongan tayo no panon a say panagpalugar tan panagpasakop diad balansin paraan so makatulong pian napagmaliw a maliket so panamaley.

[Saray paimano ed leksab]

Anto so Ebat Yo?

• Antoray maong a resulta na panagpalugar?

• Panon a nipanengneng na saray manangasikaso so panagpalugar?

• Akin ya importante ed pamilya so pagmaliw a mapalugar tan mapasakop?

[Tepetepet Parad Panagaral]

[Litrato ed pahina 4]

Aaligen na mamatatken so maabig a pidedeneng nen Kristo ed arum

[Litrato ed pahina 6]

Sano mantitipon iray mamatatken, makatulong ed pankakasakey so panpapalugaran tan panagdalepdep a tinekepay pikakasi