Panangipulong ed Maong a Balita Diad Kapalandeyan na Andes

AMIN mi a 18 so akarukol ed maringot a datal. Manggiwgiw kamin akakukot ed saray awit min ugipan legan min dedengelen so balasubos na uran ed yero na tinuloyan min alolong. Lapud itsura na satan, anganko et sikami ni labat so toon naugip ditan.

Akin kasi et linma kami ed sayan nisulinek a teritorya na Andes diad Bolivia? Lapud pilalek min tooren so ganggan nen Jesus ya ipulong so maong a balita “angga ed kasampotan na dalin.”​—Gawa 1:8; Mat. 24:14.

Kakaonla Ditan

Say unonan problema et no panon kamin makasabi ditan. Naamtaan min anggapoy eksakton oras na biahe na luganan ed saratan a sulinek a pasen. Sanen nitan lay bus, melag manaya itan kanian kaukolan ya onalagey so arum ed sikami. Balet, akasabi kamin siansia ed laen mi.

Say gagala mi et pulongan iramay baryo diad kapalandeyan na Andes ed Bolivia. Kanian kayari na biahe mi, sikamin grupo so tinmatdang a nantataluntonan diad basbas ed palandey, ya awi-awit mi ray suplay.

Anggaman singa angkekelag labat iray baryo, nan-aarawian a maong iray kaabungan kanian pigay oras a nasumpal so sakey a baryo. Anggan  panon lan kaarawi so inakar mi, singa walan-wala ni abung a nabantag. Tan mabetbet kamin nababalang ed palikolikon basbas ed kaumaan.

“Akin et Natan Ki Labat?”

Sakey a bii so mandinayew a maong ed kaarawi na inakar mi kanian impausar toy kusina to tan inikdan to kami na itutungo a pangilutoan mi na pangugtoan. Sanen naamtaan na sakey a laki so ibabangat na Biblia nipaakar ed kipapasen na inaatey, oniay intepet to, “Akin et natan ki labat?” Mapatnag a sikatoy interesadon maong lapud sanen taynan mi lay baryo ra, impatnubang to kami pian dakel ni nitepet to ed dalan. Wala ni sakey a laki ya agton balot abalbalitaan iray Tasi nen Jehova tan agusgustoan to iray publikasyon tayo. Ontan lay pisasalamat to ed inyakar mi, kanian inter toy tumbok na alolong to a pamalabasan mi na sanlabi.

Aminsan a labi, lapud ambilbilunget et nilira mi tolda ed pegley na abung na saray angkakabaleg tan andereket a gilata. Diad syodot da et kineketket da kami. Balet, agkami ginmalagalaw ta abaldak kami la’d kesaw, maong labat ta tinundaan da kami lanlamang.

Nen unaan, ansakit so benebeneg tan tagtaglang mi lapud indukol mi ed dalin, balet sanlegan na labi et nipasal mi la itan. Kasabi kabuasan, nalingwanan mi so amin a sakit tan ot-ot no nanengneng mi la ray marakdakep a lawak a singa kukurongay  lurelurem so kaliberliber da tan nabantag mi ray balibalin toktok na kapalandeyan ya asakbongay yelo. Anggapo lay arum a narengel noag say galasugos na ilog tan uni na saray siwit.

Kayari min manames ed ilog, singbaten min saniiba so teksto ed Biblia, mangalmusal, insan mi la sinegep so sananey ni ran baryo ya ararawi tan ataragey. Abawbawi mi so insegep mi. Akabat mi sakey ya akulaw ya akaakis sanen naamtaan ton say ngaran na Dios a Jehova et walad Biblia. Agaylay liket to, ta natan et sarag to lan usaren so ngaran na Dios ed pikakasi to!

Walay masiken ya angibagan sikatoy anonotan na Dios, tan bigla ton inkansion ya imbaki kami na saray anghel. Sakey nin laki ya agla makakaalis ed abung to lapud sakit, so angikuan a sikatoy agpapasyaren na saray kabaryoan to. Kanian pandinayewan toy impakaamtan nanlapu kami ni ed La Paz. Sananey nin laki so mandinayew a maong ed iyaakar na saray Tasi nen Jehova ed mismon kaabungan da, ta saray arum a relihyon et babatangtangen da labat lay kampana ra sano labay da iran tawagen.

Anggapoy kuryente ed saratan a pasen, kanian onugip la ray totoo no ambilunget la, tan ombangon la ra no ombutay lay banwa. Kanian pian nabanaan mi ray totoo ed kaabungan da et onggagapo kami lan manpulong ed alas sais na kabuasan. Ta no andi, maslak ed sikara et wala la ed kaumaan. Sano mantratrabaho la ira, sikara so ontutunda pian ondengel ed mensahe na Salita na Dios, diad ontan et makapainawa met so pambabaka ran ayep. Maslak ed saray nababanaan mi ed kaabungan et mangibilkag na katat na karnero pian napanlespakan mi, insan da tawagen so interon pamilya ra pian ondengel. Lapud pisasalamat na arum a dumaralos ed saray intilak min literatura ed Biblia, sikaray angidonasyon na pigaran bag na mais.

“Agyo Ak Nilingwanan”

Siempre, pian ondakel so kakabatan na totoo ed Biblia, kaukolan iran pawil-pawilen. Dakel so akikasi ed sikami a laen mi ra lamet a bangatan. Kanian, aminpiga kamin linma ed sayan parte na Bolivia.

Diad agano nin impawil mi, manliket so sakey ya akulaw, a kuanton: “Singa ta ki la ananak. Agyo ak nilingwanan.” Akisalamatan na sakey a laki so pankikimey mi tan inyopresi toy abung to a tuloyan mi sano ompawil kami. Say sankarakpan a gunggona ed impansasagpot mi et sanen abalitaan mi a sakey a biin apulongan mi, so inmalis ed syudad tan natan et sakey met lan manangipulong ed maong a balita.

Diad samay unaan ya inyakar mi’d man, naupotan kami na gas a panlutoan ed sampot lan agew, tan ngalngali met la naupot so tagano mi. Kanian nankiew kami pian niluto mi unor lan kanen mi. Insan kami la nanakar na pigaran kilometro pian onla’d baley a kawalaan na bus. Akasabi kamin siansia, balet ta alabian kami la.

Kakasempet

Walay irap-irap na insempet mi ta aderal so bus a niluganan mi. Ag-abayag, akapilugan kami ed trak ya aseksek na totoo. Lapud satan et apulongan mi iramay kaluganan mi a mankelaw no akin a wadman kami. Anggaman sipor lan mabaing iray totoo ed saraman a pasen, karaklan ed sikara so makaaro.

Kayari siameran oras a biahe ed trak, akasabi kamin siansia ed kaabungan mi, ya ambasa tan aketel. Anggaman ontan, baleg so kaabigan na biahe mi. Diad dalan et niyuksoy mi so panagaral na Biblia ed sakey a bii a manaayam ed syudad.

Talagan pribilehyon iyabawag so maong a balita ed saray totoon walad saratan a sulinek a pasen. Apulongan mi so apatiran baryo tan dakel a simsimpok. Nanonotan mi laingen irayan salita: “Agayla so kalimgasan ed tapew na saray palandey so saray sali na mangiyakar na saray maong a balita, a mangibawag na deen, a mangiyakar na saray maong a balita na kaabigan, a mangibawag na kilalaban.”​—Isa. 52:7; Roma 10:15.

[Litrato ed pahina 17]

Akaparaan a mangipulong ed maong a balita