Walay Im-importantin Pinengnengan Ko

WALAY im-importantin pinengnengan ko. Sakey ak ya ugaw nin ina a taga España sanen akitarato ak a minengnengan, tan istoryaen ko pa’d sikayo no akin a ginawak itan.

Anggapoy deen tan pantutunosan diad abung mi. Nanermen a maong so pamilya mi sanen inatey so agik lapud makapasinagem ya aksidente nen apat taon to ni labat. Ontan met, lapud aliwliwa iran kagagawa nen tatay, agtanton maliket si nanay ed impiasawa to. Balet, ag-itan nagmaliw a rason pian agla ipurek nen nanay so maong iran ugali ed siak tan ed si kuyak.

Asabi panaon, angasaway kuyak, tan akiasawa ak met la. Agnambayag et nalmoan na doktor a walay kanser nen nanay, tan satan met lay inateyan da. Balet, antis dan nampatanir, intilakan da kami na sakey a bengatlan ipapasen mi a kayamanan.

Intongtong na sakey a kaaro nen nanay ed sikato so nipaakar ed Makasulatan ya ilalon kioli’d bilay, tan inawat to so opresi na sayan kaaro to a panag-aral na Biblia. Legan na kaunoran iran taon na bilay nen nanay, satan a mensahe na Biblia so angiter na kabaliksan ed bilay to tan akatulong ed sikaton magmaliw a maliket.

Sanen anengneng mi nen kuyak so positibon epekto na mensahe na Biblia ed si nanay, nanaral kami met lay Salita na Dios. Nampabautismo ak bilang Tasi nen Jehova sakey bulan antis kon inyanak so komaduan ana’ko, a magangganan ugaw a nginaranan mi na Lucía.

Im-importantin maong ed siak iman ya agew na bautismok. Say sakey a rason no akin a nibagak itan et lapud nagmaliw ak lan kayarian nen Aman Jehova, ta indedikak lay bilay ko ed sikato pian sikatoy panlingkoran ko ed andi-angga. Say sakey nin rason et sarag ko la’d satan ya inabang so pananisiak ed inad-arok iran anak a laki tan bii.

Balet ta ag-abayag, satan a liket kon inabang komon so katuaan ed saray ana’ko et asaletan na ermen. Sanen apat taon la nen Lucía, sikatoy ginmapon nanlikna na graben sakit na eges. Kayari na piga-pigaran impan-eksamin, impaliwawa ed sikami na nampanengnengan min espisyalista a walay tinmubon laman ed altey nen Lucía a singa kabaleg na kahil. Imbaga na saman a doktor a walay neuroblastoma nen Lucía, salanti, tumor a maples ya ombabaleg lapud kanser. Ditan la ginmapo so pitoy taon ya impilaban nen Lucía ed satan a sakit tan aminpigapigan impanbayag to ed ospital.

Masakripisyo

Saraman a panaon et mair-irap a tuloy balet ta si Lucía ni ingen so amabiskeg a lanang ed liknaan ko panamegley na maar-aro iran lakap tan angob to. Pandinayewan met na saray empleyado ed ospital so positibon awawey to anggaman sikatoy naiirapan. Labalabay ton tulongan iray nars, ya iibaan toran mangiyakar na yogurt, juice tan arum niran bengatla diad saray ugugaw a pasyente ya asingger ed kuarto to. Inikdan ni ingen na saray nars si Lucía na amputin unipormi tan badge a walay akasulat ya “asistant na nars.”

Oniay inkomento na sakey ya empleyado na ospital: “Atenyeg so pusok ed si Lucía. Maligligsa tan maabilidad iman ya ugaw, tan labalabay toy mandrowing. Maalinyada, amta ton ibalikas so liknaan to tan sano onkiwas et singa no matatken la.”

Say Salita na Dios so panlalapuan na biskeg tan inkakalmado nen Lucía. (Heb. 4:12) Sikatoy mataletalek a diad balon mundo et “anggapo la naani ipatey tan anggapo la naani onnangis o dageyem, o ot-ot,” a singa isisipan na Salita na Dios. (Apo. 21:4) Sikatoy interesado ed pankaabigan na arum kanian inanamot to so amin a pankanawnawa pian inabang so mensahe na Biblia. Say mabiskeg a pananisia nen Lucía ed ilalon kikioli so tinmulong ed sikaton mansiansian balanse tan  maliket anggaman melmelag lay tsansa ton onabig. (Isa. 25:8) Ontan so awawey to anggad samay agew na impatey to.

Diad saman a mismon agew ak akitarato a minengnengan. Ngalngali agla nilukas nen Lucía iray mata to. Saray lima to et sankabembenan mi nen masiken ko. “Agka mapaga, wadia ak labat ed abay mo,” so inyesaes ko. “Basta kalkalna ka labat ya onengas. Kabangon mo, inmabig ka la. Agka lan balot nairapan lamet, tan abeten ta ka.”

Nepeg kon tooren itan a sipan ko. Amtak ya aliwan mainomay so panalagar ed kioli to. Balet ta amtak met a no siaanos ak a manmatalek ed si Jehova tan mansiansia ak a matoor ed sikato, wadman ak ya onabet ed si Lucía diad kioli to.

Say Intilak nen Lucía a Pakanodnonotan

Say alimbawa nen Lucía ed inkakpel tan say maaron suporta na kongregasyon so awalaan na baleg ya epekto ed masiken ko, ya agko kapananisiaan. Diad samay agew na impatey nen Lucía, imbaga to ed siak a kaukolan ton nonoten lamet iray bengabengatla. Kalabas na pigaran simba, kinerew to ed sakey a matatken ed kongregasyon mi a sikatoy iyaralan na Biblia. Agnambayag et inatendian to lan amin iray pantitipon. Diad tulong nen Aman Jehova, intunda to met lay panagsigarilyo to, bengatlan agton balot agawaan nensaman.

Agni sigpot a nakal so naliliknak ya ermen lapud impatey nen Lucía. Anggaman ontan, misalsalamat ak ed si Jehova lapud pakanodnonotan ya intilak nen Lucía. Liligliwaen mi nen masiken ko so sakey tan sakey panamegley na alay abig ya ilalon kikioli, tan ililitrato mi ni ingen ed nonot mi imay panaon a nanengneng mi lamet si Lucía​—say maligligsa tan malikliknew iran mata to, tan saray aping to a de-dimpel sano onimis.

Sayan makapasinagem ya agawa ed ana’ko so awalaan met na epekto ed sakey a kabandaan mi. Aminsan a Sabado’y kabuasan ya onuuran, walay biin pinmasyar ed abung a say anak ton laki et kaeskuela nen Lucía. Say sakey nin anak to a laki ya 11 años ni labat et inatey met ed kanser. Naamtaan toy kawalaan na abung mi sanen akabatan toy agawa’d si Lucía, kanian nila to ak pian amtaen no panon kon natatalonaan itan. Insuheri to a mamorma kami na grupon ontulong a manligliwa ed saray kainaan a kapara mi na asagmak.

Impaliwawak ed sikato a say akaromogan ko na peteg a ligliwa et say sipan na Biblia, ligliwa a mas maabig nin tuloy nen say antokaman a niiter na too. Sanen imbasak ed sikato iramay salita nen Jesus a walad Juan 5:28, 29 et linmiwaway lupa to. Inawat to so panag-aral na Biblia tan agnambayag et alikna to so ‘deen na Dios, a manatalona ed amin a pakatalos.’ (Fil. 4:7) Mabetbet la itay sano manaaral kami na Biblia et ontunda kamin magano pian ilitrato ed nonot mi so eksenan aabeten mi iray inad-aro min anak diad kioli ra ed balon mundo.

Tua, antikey labat so impanbilay nen Lucía, balet ta sikatoy angitilak na pakanodnonotan a mansiansia lawas. Say pananisia to et tinmulong pian mankasakey so pamilya mi diad panaglingkor ed Dios tan lapu met ed satan et mas determinado ak a mansiansian mabiskeg ed pananisia. Segurado ak a balang sakey ed sikatayon inateyan na inad-aron manaalagar na kioli ed arapen et walay im-importantin pinengnengan to.

[Litrato ed pahina 20]

Onia so impangidrowing nen Lucía ed Paraiso