Kalangweran, Nonot Yo Natan so Matalonggaring a Manamalsa Yo

“Nonoten mo met so Manamalsam dia ed saray agew na inkaugaw mo.”​—ECL. 12:1.

1. Panon ya impatnag nen Jehova so kompiyansa to ed saray kalangweran a mandadayew ed sikato?

 PAPABLIEN nen Jehova iray kalangweran tan momoriaen to ran singa saray makarepreskon tedter na linaew. Kanian, impasakbay to a diad agew na militar a ‘pakayari’ na Anak to, saray kalangweran a lalaki tan bibii et “yapay da so inkasikara a mabulbulos” a manlingkor ed si Kristo. (Sal. 110:3) Nagawa itan a propesiya sano maslak a totoo et ag-interesado ed Dios, bangar, tan say pinonot da et say panlabayan da tan say kuarta. Balet, amta nen Jehova a midumaan iray kalangweran a mandadayew ed sikato. Talagan walay kompiyansa to ed sikayo ran kalangweran ya agagi!

2. Anto so kabaliksan na pannonot ed si Jehova?

² Isipen pa labat so liket na Dios sano naiimatonan ton sikatoy nononoten na saray tobonbalo bilang Manamalsa ra. (Ecl. 12:1) Siempre, say pannonot ed si Jehova et agmankabaliksan na basta labat panisip ed sikato. Noagta kabaliksan na satan ya onkiwas itayo​—gawaen tayo so makapaliket ed sikato, tan paiwanwan itayo ed saray ganggan tan prinsipyo to diad inagew-agew a kabibilay tayo. Kabaliksan met na satan a manmamatalek itayo ed si Jehova lapud amta tayon sikato so mangiyaansakit ed sikatayo. (Sal. 37:3; Isa. 48:17, 18) Ontan kasi so naliliknam ed Matalonggaring a Manamalsam?

“Manmatale’ka ed Jehova ed Simoon a Pusom”

3, 4. Panon ya impanengneng nen Jesus a sikatoy nanmatalek ed si Jehova, tan akin ya importante a panmatalekan tayo si Jehova natan?

³ Say sankaabigan ya ehemplo na sakey a nanmatalek ed Dios et si Jesu-Kristo. Ginawa to imay akasulat ed Uliran 3:5, 6: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Ag-abayag kayarin abautismoan si Jesus, sikatoy inasinggeran nen Satanas, ya anukso ed sikaton mangawat na gloria tan pakayari ed mundo. (Luc. 4:3-13) Si Jesus so ag-apalikdo. Amta to a say tuan “kayamanan, tan dayew, tan bilay” so “tumang na kauyamoan tan say takot ed Jehova.”​—Uli. 22:4.

⁴ Kasmak la natan so inkaagum tan inkasiblet ed saray totoo. Lapud ontan iray akapaliber ed sikatayo, makabat so pangalig ed alimbawa nen Jesus. Nonoten met a gawaen nen Satanas so anggaay nayarian ton sagyaten iray lingkor nen Jehova pian ag-ira makaloob ed mainget a dalan a paonla’d bilay. Labay ton nanengneng a mamaarap iran amin ed maawang a dalan a paonla’d kadederal. Agka patutukso ed sikato! Imbes, anggan antoy nagawa et nonot mo so Matalonggaring a Manamalsam. Sigpot kan manmatalek ed Sikato, tan bembenan mon maong so “bilay a peteg,” a seguradon onsabin tampol.​—1 Tim. 6:19.

Kalangweran, Magmaliw a Makabat!

5. Anto so nibagam ed arapen na sayan mundo?

⁵ Mas makabat iray kalangweran a mannononot ed Matalonggaring a Manamalsa ra nen saray arum a kaedaran da. (Basaen so Salmo 119:99, 100.) Lapud aaligen da so panmoria na Dios, amta ran magano lan manampot iyan mundo. Anggan ugugaw kayo ni, seguradon naiimano yo lan maslak a totoo natan so mas natatakot tan napapagaan  ed arapen. Nayarin naaralan yo ed eskuelaan so nipaakar ed polusyon, ipepetang na klima diad dalin, nakakalbon katakelan, tan arum ni ran problema. Napapagaan lan maong iray totoo ed sarayan nagagawa, balet saray Tasi nen Jehova labat so talagan makaamta a kabiangan iraya na tanda a mangipapanengneng ed panampot na mundo nen Satanas.​—Apo. 11:18.

6. Panon ya apalikdo iray kalangweran?

⁶ Makapaermen ta arum a tobonbalo a manlilingkor ed Dios et agla nantultuloy a nan-alerto. Nilingwanan dan antikey la so panaon na sayan mundo. (2 Ped. 3:3, 4) Arum so atukson nanggawa na graben kasalanan lapud pibabarkada tan pornograpiya. (Uli. 13:20) Natan ta asingger tayo la ed anggaan, talagan makapaermen no naandi so panangabobon nen Jehova! Komon ta makaaral kayo ed agawa ed saray Israelita sanen nankampo ira ed Patar na Moab. Taon 1473 B.C.E. ed saman, tan maganggano la ran onloob ed Insipan a Dalin. Anto so agawa?

Atukso Ira Sanen Wala La Ra ed Ketegan

7, 8. (a) Anton taktika so inusar nen Satanas ed Patar na Moab? (b) Anton taktika so uusaren nen Satanas natan?

⁷ Diad saman et mapatnag a labay nen Satanas ya agnagamoran na saray Israelita so insipan a tawir da. Sanen agtinmalona so samba ya impagawa to ed si Balaam, si Satanas so angusar na mas masilib a taktika. Tinukso to ra pian agla ra abobonan tan bendisyonan nen Jehova. Inusar nen Satanas iray makapasagyat a bibii ed Moab a manukso ed saray Israelita. Tan sikato so tinmalona lapud saray Israelita so imoral ya akirelasyon ed saray Moabita tan tinmuek ed Baal na Peor! Anggaman asingsingger la ra ed mablin tawir da, say Insipan a Dalin, inatey so 24,000 ed sikara. Talagan sakey itan a trahedya!​—Num. 25:1-3, 9.

⁸ Natan, maples itayo met lan onaasingger ed mas maabig ya insipan a dalin, salanti, say balon sistema na bengabengatla. Singa nensaman, uusaren lamet nen Satanas so seksual ya imoralidad pian impluensyaan so totoo na Dios. Inmabeba lan maong so estandarte ed moral na saray totoo kanian ipapasen a normal labat so pilalawanan, tan say pagmaliw a bakla o tomboy et kuan dan personal a desisyon labat. Onia so inkuan na sakey ya agin bii: “Dia labat ed abung tan diad Kingdom Hall so pakakaaralan na saray anak ko a say pagmaliw a bakla o tomboy tan say pisesekso ed ag-asawa so mauges ed pakanengneng na Dios.”

9. Anto so nayarin nagawa legan na panaon sano maksil so pakalikna na kalangweran ed sekso, tan anto so makatulong pian natalonaan to iya?

⁹ Saray kalangweran a mannononot ed Matalonggaring a Manamalsa ra so makaamta a say seksual a relasyon et sagradon regalo a mikonektaan ed bilay tan panag-ilalak. Kanian, bibidbiren dan nepeg a tumboken na sakey so panangiwanwan nen Jehova nipaakar ed seksual a relasyon, a  para labat itan ed sanasawa. (Heb. 13:4) Balet legan na panaon sano maksil so pakalikna na sakey ed sekso, nayarin pikeweten na satan so panagnonot na kalangweran kanian mairap so pansiansian malinis. Anto so gawaen mo sano walay nanonotan mon mabanday? Masimoon a manpikasi ed si Jehova pian natulongan to kan nonoten iray malinis a bengatla. Naynay a dedengelen nen Jehova iramay masimoon ya onkekerew ed sikato na tulong. (Basaen so Lucas 11:9-13.) Makatulong met so makapabiskeg a pantotongtong pian say nonoten la na sakey et saray malinis a bengatla.

Makabat a Pilien Iray Prayuridad Mo!

10. Anton negatibon ugali so labay tayon paliisan, tan antoray itepet tayo ed inkasikatayo?

¹⁰ Say sakey a rason no akin a dakel a kalangweran ed mundo so agla nakontrol tan manbibilay la ra unong ed pilalek na laman da et lapud anggapo’d sikara so panangiwanwan na Dios odino anggapoy seguradon ilalo ra ed arapen. Kapara ra iramay Israelita ed panaon nen Isaias ya ag-interesado ed Dios tan nambilay parad “liket tan kagayagaan, . . . panangan na laman tan pan-inum na alak.” (Isa. 22:13) Imbes ya ibegan tayo iratan a totoo, akin ta no nodnonoten tayo so mablin ilalo ya intarya nen Jehova parad saray manmamatoor ed sikato? Bilang malangwer a lingkor na Dios, labalabay mo la kasin onsabi so balon mundo? Panseseetan mo kasi ‘manbilay ed sayan panaon a sidarangka tan alagden mo so ilalo’ a maliket, ya impasen nen Jehova ed arapan mo? (Tito 2:12, 13) Say ebat mo so mangimpluensya ed saray planom tan prayuridad mo.

11. Akin a kaukolan a makulin manaral iray kalangweran a Kristianon maneeskuela ni?

¹¹ Labay na sayan mundo ya iyupot na saray kalangweran so biskeg da ed panagaral tan panagtrabaho. Siempre, sikayoran maneeskuela ni et nepeg a mankuli pian makaaral kayo. Tandaan, say gagala yo et aglabat mananap na matukoy a trabaho noagta magmaliw met a mausar ed kongregasyon tan mabungan manangipalapag na Panarian. Pian nagawaan itan, nepeg a maong kayon mitongtong, malinew so panagnonot yo, marespeto, tan kalmadon mikatunongan ed arum. Anggaman ontan, nagamoran na saray kalangweran so sankaabigan ya edukasyon diad panaral na Biblia tan pangiyaplika ed prinsipyo na satan ed bilay da. Pundasyon met itan parad matalona tan andi-anggaan ya arapen.​—Basaen so Salmo 1:1-3. *

12. Anton ehemplo so kaukolan ya aligen na saray Kristianon pamilya?

¹² Diad Israel, say edukasyon na ananak so prayuridad na atateng. Ipapasal na atateng iray anak da ed amin lawari ya aspekto na bilay, nagkalalo la ed espiritual. (Deu. 6:6, 7) Sirin, saray kalangweran ya Israelitan manguunor ed atateng da tan ed arum nin matakot ed Dios a mamatatken et aglabat akagamor na pikakabat, noagta karunongan, pakatebek, pakatalos, tan abilidad a mannonot. Saraya et matalag a kalidad a niiter na edukasyon manlapud Dios. (Uli. 1:2-4; 2:1-5, 11-15) Kaukolan met ya ontan so pangimano na saray Kristianon pamilya natan ed edukasyon.

Dengel Ka’d Saramay Mangaaro ed Sika

13. Anton klase na bilin so naaawat na arum a tobonbalo, tan akin a kaukolan day manalwar?

¹³ Saray tobonbalo so nabibilin na nanduruman klase na totoo​—kaiba la ray guidance counselor ed eskuelaan, a kaslakan lan say bilin da ed estudyante et no panon iran onaligwas ed mundo. Sano babalansien mo iratan a bilin, komon ta manpikasi ka, usisam so Salita na Dios tan saray publikasyon ya intarya na matoor tan makabat ya aripen. Naaral mo’d Biblia a saray ugugaw ni tan agni tanton eksperiensyado so manunan puntirya nen Satanas. Bilang alimbawa, diad hardin na  Eden, say kulang na eksperiensyan si Eva so dinmengel ed si Satanas, sakey ya agto kabat tan agbalot angipanengneng na anggan melag a panangaro ed sikato. Nidumaduma komon so resulta no dinmengel labat si Eva ed si Jehova, ya angaro ed sikato diad dakel a paraan!​—Gen. 3:1-6.

14. Akin a nepeg tayon dengelen si Jehova tan saray mananisian ateng tayo?

¹⁴ Inaro ka met na Matalonggaring a Manamalsam, tan talagan malinis so intension na panangaro to. Labay to kan magmaliw a maliket aliwa labat lan natan, noagta diad andi-anggaan! Sirin, lapud panangaro to bilang mangiyaansakit ya ateng, oniay ibabaga to ed sika tan diad amin a mandadayew ed sikato: “Saya so dalan, ondalan kayo ed sikato.” (Isa. 30:21) No Tasi iray ateng mo a peteg a mangaaro ed si Jehova, kaaruman itan a bendisyon ed sika. Magalang ya ondengel ed saray bilin da sano manplaplano ka odino walay labay mon iprayuridad. (Uli. 1:8, 9) Labay dan nagamoran mo so bilay, a say kakanaan na satan et agnaparaan na kayamanan odino kabantogan.​—Mat. 16:26.

15, 16. (a) Akin a matalek itayo ed si Jehova? (b) Anto so importantin naaralan tayo ed eksperiensya nen Baruc?

¹⁵ Saramay manonot ed Matalonggaring a Manamalsa ra et pansiasiansiaen dan simpli so bilay da. Matalek ira ya anggan antoy nagawa et ‘agto ira taynan tan agto ira ikaindan.’ (Basaen so Hebreos 13:5.) Lapud midumaan iyan maabig ya ugali ed kanonotan na totoo ed mundo, nepeg tayon manalwar pian ag-itayo naimpluensyaan na espiritu na mundo. (Efe. 2:2) Nipaakar ed saya, ikonsidera tayo pa so alimbawa na sekretaryo nen Jeremias a si Baruc, a nambilay legan na mairap a kaunoran iran agew ed Jerusalem sanen magano lay 607 B.C.E, say taon ya aderal so syudad.

¹⁶ Nayarin labay nen Baruc so onyaman. Naimano iya nen Jehova kanian maaro ton pinasakbayan si Baruc ya agla manaanap na “saray baleg a bengatla” parad sikato. Nampaabeba tan nagmaliw a makabat si Baruc lapud dinengel to si Jehova tan sikatoy akaliktar sanen aderal so Jerusalem. (Jer. 45:2-5) Balet, walaray kapanaonan nen Baruc a nantipon na “saray baleg a bengatla” odino nampayaman, tan agda inyuna so panagdayew ed si Jehova. Naandi met lanlamang iratan ya amin sanen sinakop na saray Caldeo (taga Babilonia) so Jerusalem. Dakdakel met ed saman so inatey. (2 Awa. 36:15-18) Makatulong so eksperiensya nen Baruc pian nanengneng tayo a say maong a relasyon ed Dios et mas importante ni nen say kayamanan tan inkaprominente ed sayan mundo.

Aligen iray Sankaabigan ya Ehemplo

17. Akin a sankaabigan ya ehemplo si Jesus, Pablo, tan Timoteo ed saray manlilingkor ed si Jehova natan?

¹⁷ Pian natulongan itayon mamaarap ed bilay, say Salita na Dios so angiter na dakel a maabig ya ehemplo. Bilang alimbawa, si Jesus so sankamaabilidaran a toon nambilay, balet inusar toy biskeg to ed pangipulong na “ebanghelyo na panariay Dios” a lawas makatulong ed saray totoo. (Luc. 4:43) Ontan met, imbeneg nen apostol Pablo so atagey a propesyon to tan inusar toy panaon tan biskeg to a mangiyabawag na maong a balita pian niiter to so sankaabigan ed si Jehova. Say sakey nin  alimbawa et si Timoteo, sakey a ‘matuan anak ed pananisia,’ ya angalig ed maabig ya alimbawa nen Pablo. (1 Tim. 1:2) Kasin nagbabawian nen Jesus, Pablo, tan Timoteo so paraan na impanbilay da? Andin balot! Diad tua et imbaga nen Pablo ya impasen to so amin a bengatlan iyoopresi na mundo bilang “andi-kakanaan a dutak” no ikompara ed pribilehyo a manlingkor ed Dios.​—Fil. 3:8-11.

18. Antoran baleg a pananguman so ginawa na sakey a kalangweran ya agin laki, tan akin ya anggapoy pagbabawian to?

¹⁸ Aaligen na dakel a Kristianon kalangweran natan so pananisia nen Jesus, Pablo, tan Timoteo. Singa bilang, oniay insulat na sakey a kalangweran ya agin laki a dati et walay trabaho ton atagey so sueldo: “Lapud iyaaplikak iray prinsipyo ed Biblia, agangganon inmatagey so posisyon ko. Anggaman makatulong itan ed pinansyal, aliknak a singa ak labat manguusil ed dagem. Sanen akitongtong ak ed saray amo na kompanya tan imbagak ed sikara a labay koy manpayunir, inopresian da ak a tampol na mas baleg a sueldo tan inilaloan dan mansiansia ak ed kompanya. Balet akapandesisyon ak la. Agnatalosan na dakel a totoo no akin ya insalat koy marakep a trabahok ed panagpayunir. Say rason et labay koy manbilay unong ed dedikasyon ko ed Dios. Lapud akasentro la natan so bilay ko ed panaglingkor ed Dios, mas maliket tan kontento ak. Ag-itan niiter na kuarta tan inkabantog.”

19. Anton makabat a desisyon so ipapaseseg a gawaen na saray kalangweran?

¹⁹ Diad interon mundo, nilibon kalangweran so nanggawa na ontan iran makabat a desisyon. Kanian sikayo ran tobonbalo, sano iisipen yoy arapen yo, naynay yon nonoten so agew nen Jehova. (2 Ped. 3:11, 12) Agyo iibegan iramay totoon aanamoten dan paaligwasen so bilay da ed sayan mundo. Imbes, dengel yo iramay peteg a mangaaro ed sikayo. Sano mantipon kayo na “kaykayamanan ed tawen” et singa kayo nampuonan ya anggapon balot so lugi, tan satan labat so makapangiter ed sikayo na andi-anggaan a gunggona. (Mat. 6:19, 20; basaen so 1 Juan 2:15-17.) On, nonot yo so Matalonggaring a Manamalsa yo. No gawaen yo itan, bendisyonan kayo nen Jehova.

[Paimano ed leksab]

Kasin Nanonotan Mo?

• Panon tayon ipanengneng a manmamatalek itayo ed Dios?

• Anto so sankaabigan ya edukasyon?

• Antoray naaralan tayo ed si Baruc?

• Sioparay sankaabigan ya ehemplo, tan akin?

[Tepetepet Parad Panagaral]

[Saray litrato ed pahina 13]

Itatarya nen Jehova so sankaabigan ya edukasyon

[Litrato ed pahina 15]

Dinengel nen Baruc si Jehova tan akaliktar sanen aderal so Jerusalem. Anto so naaralan mo ed sayan alimbawa?