Kasin Nanonotan Yo?

Nanggayagaan mo ta so impamasa ed agano niran paway na Say Panag-Bantayan? Salim pa sirin no naebatan mo iray onggendan a tepet:

• Kapigan dinalaw na saray astrologo si Jesus?

Oniay komento na sakey ya edisyon na Biblia: “Agdinalaw na saray Mago si Jesus diad atotong nen mismon labi na inkianak to, a singa ginawa na saramay pastol. Apalabas ni piga-pigaran bulan insan da dinalaw si Jesus.” Diad saman et sakey lan “ugaw” (aliwan kapangiyanak) si Jesus tan wala la’d abung. (Mat. 2:7-11) No aregaloan lay Jesus na balitok tan ankabli iran regalo diad samay labi na inkianak to, aliwa labat komon a duaran malapati so inyapay nen Maria ed templo, 40 agew ed saginonor.​—Ene.–Mar., pahina 31.

• Anto so sarag a gawaen na dakel pian magmaliw a makabkabaliksan so bilay da?

Oniay nayarin itepet na sakey, ‘Sarag ko kasin umanen so kipapasen ko tan pasimplien so kabibilay ko?’ Ontan so ginawa nen Amy. Mainawa lay bilay to balet ta agmaliket. Amoria ton lapud impanggegemtan to na karera ed sayan mundo et sikatoy dawdawit ya abalang ed pananisia. Kanian denesidi ton iyuna so intereses na Panarian, tan akapanpayunir. Inkuan ton “Naliliknak la natan so inkapnek ya agkon balot alikna” diad impanggegemtan na sekular iran kalat.​—1/15, pahina 19.

• Anton “kapolian” so tutukoyen nen Jesus diad saray salita ton nabasa ed Mateo 24:34?

Mabetbet ya uusaren nen Jesus ed negatibon paraan so salitan “kapolian” sano say tutukoyen odino pitotongtongan to et marelmeng a totoo. Balet aliwan negatibo so impangusar to ed satan diad sayan pankanawnawa, a say katongtong to et saray babangatan ton diad saman et magano lan nalanaan na masanton espiritu. Sikaraya so nagkalalo lan makatalos ed kabaliksan na saray nanengneng dan asalambit ed Mateo 24:32, 33. Kanian, maseguron say inmunan-siglo tan modernon kiyaplikaan na saramay imbaga nen Jesus et saray alanaan a papatumbok to.​—2/15, pahina 23-4.

• Unong ed Santiago 3:17, antoran kalidad so nepeg tayon ipatnag?

Pian magmaliw itayon malinis, kaukolan a tamtampol tayon ipulisay iray mauges a bengatla. (Gen. 39:7-9) Nepeg met a magmaliw itayon mareen a totoo, a paliisan tayo so pagmaliw ya agresibo odino pangipatnag na saray ugalin maneral na kareenan. Kanian onia so nepeg ya itepet na balang sakey ed sikatayo: ‘Kasin kabkabat ak a manangiyalibansay kareenan odino makolkol? Naynay kasin walay kasangsangan ko, odino agak makapipakna ed arum? Masinsinti ak kasi odino magmainomay a makasakit? Akaparaan ak kasin mamerdona tan agko bastabasta ipipilit a say dilin estandartek so natumbok?’​—3/15, pahina 24-5.

• Akin et kalkalna so impanambal nen Jesus ed bulag a laki? (Mar. 8:22-26)

Anggapoy eksakton paliwawa na Biblia ed saya. Balet, diad sayan pankanawnawa, posible a kalkalnan tinambal nen Jesus iyan bulag a laki ta pian agnabigla so mata to. No ontan sirin et panangipatnag itan nen Jesus na maaron panangiyansakit ed sayan laki.​—Abr.–Hun., pahina 30.