Paiwanwan ed si Jehova Diad Amin a Bengatla

“Saya a Dios sikato so Dios tayo ed ando lan ando: sikato so manangibasbas tayo angga ed ipatey [tayo].”​—SAL. 48:14.

1, 2. Imbes a manmatalek ed dilin kakabatan tayo, akin a say panangiwanwan nen Jehova so nepeg tayon tumboken, tan antoran tepet so pantongtongan tayo?

 NO NIPAAKAR ed saray bengatlan andi-kakanaan odino mapeligro, main-inomay tayon napalikdoy inkasikatayo. (Uli. 12:11) Alimbawa, sano walay talagan labalabay tayon gawaen ya agmanepeg ed sakey a Kristiano, mabetbet lan kombinsien itayo na puso tayo a manggawa ed satan. (Jer. 17:5, 9) Kanian, angipatnag na kakabatan so salmista sanen oniay impikasi to ed si Jehova: “Ipaway mo so liwawam tan say katuaan mo; ta sikara ibasbas da ak.” (Sal. 43:3) Say nanmatalekan to et aliwan say limitadon kakabatan to, noag si Jehova, tan siempre, talagan anggapo lay mas magmaong nin napanilaloan to parad panangiwanwan. Nepeg itayo met a paiwanwan ed Dios a singa sayan salmista.

² Balet, akin a say panangiwanwan nen Jehova so nepeg a manunan panmatalkan tayo? Kapigan tayo anapen itan? Antoran awawey so nepeg tayon paaligwasen diad ontan et minabang itayo ed panangiwanwan to, tan panon itayon iwawanwan nen Jehova natan? Pantongtongan tayo ed sayan artikulo irayan importantin tepet.

Akin a Panmatalkan so Panangiwanwan nen Jehova?

3-5. Akin a sigpot a napanmatalkan tayo so panangiwanwan nen Jehova?

³ Si Jehova so mangatatawen ya Ama tayo. (1 Cor. 8:6) Kabat ton sigpot so balang sakey ed  sikatayo tan nabasa to no antoy walad mismon puso tayo. (1 Sam. 16:7; Uli. 21:2) Oniay inkuan nen Arin David ed Dios: ‘Sika antam so kayuyurong ko tan say kakaalagey ko; sika natalosan mo so nonot ko a wala ni ed arawi. Ta anggapo ni salita dia ed dilak, et nia, O Jehova, antam la a sigpot.’ (Sal. 139:2, 4) Panduaruwaan tayo ni kasi no peteg ya amta nen Jehova no antoy sankaabigan parad sikatayo, anta kabkabat to itayon maong? Nilikud ni ed satan, si Jehova so sankakabatan ed amin. Nanenengneng to so amin a bengatla, naiimano toray agnaiimano na too, tan onggagapo ni labat so sakey a bengatla, amta to la no antoy pansumpalan na satan. (Isa. 46:9-11; Roma 11:33) Sikato so “saksakey a Dios a makabat.”​—Roma 16:27.

⁴ Niarum ni, inaro itayo nen Jehova tan say sankaabigan so labay to lawas parad sikatayo. (Juan 3:16; 1 Juan 4:8) Bilang sakey a maaron Dios, sikatoy mabunlok ed sikatayo. Oniay insulat nen babangatan a Santiago: “Amin a maong a palangkap tan amin ya ayadyarin palangkap manlapu ed tagey tan onleksab a manlapu ed Ama na saray liwawa.” (Sant. 1:17) Saramay paiwanwan ed Dios et minabang a maong ed inkamabunlok to.

⁵ Kaunoran, si Jehova et makapanyarin-amin. Oniay inkuan na salmista nipaakar ed saya: “Say manayam ed maamot a pasen na Sankatageyan mansiansia ed silong na sirum na Makapanyarin-amin. Salitaen ko so nipaakar ed Jehova, Sikato so salimbeng ko tan kiagelan ko; Dios ko, dia ed sikato so panmatalkan ko.” (Sal. 91:1, 2) No tutumboken tayo so panangiwanwan nen Jehova, papasalimbengan itayo ed Dios ya agbalot onsasaew. Anggano nipaarap itayo ed isusumpa, tulongan to itayon tulongan. Agto itayon balot dismayaen. (Sal. 71:4, 5; Basaen so Uliran 3:19-26.) On, amta nen Jehova no antoy sankaabigan parad sikatayo, labay to no antoy sankaabigan parad sikatayo, tan walay pakapanyari ton iter no antoy sankaabigan parad sikatayo. Kanian, agay met la no ag-itayo ni paiwanwan ed sikato! Balet, kapigan tayo kaukolan itan a panangiwanwan?

Kapigan Tayo Kaukolan so Panangiwanwan?

6, 7. Kapigan tayo nakaukolan so panangiwanwan nen Jehova?

⁶ Diad tua, kaukolan tayo so panangiwanwan na Dios ed interon bilay tayo, manlapud inkaugaw ya anggad itatken tayo. Oniay inkuan na salmista: “Saya a Dios sikato so Dios tayo ed ando lan ando: sikato so manangibasbas tayo angga ed ipatey [tayo].” (Sal. 48:14) Singa sayan salmista, saray makabat a Kristiano et mandedependi lawas ed panangiwanwan na Dios.

⁷ Balet, siempre, walaray panaon a nagkalautlan kakkaukolan tayo so tulong. No maminsan et ‘nagogonigon’ itayo, nayarin lapud panamasegsegang, graben sakit, odino biglaan a pakaandi na trabaho. (Sal. 69:16, 17) Diad saratan a panaon, makaligliwa so iyasingger ed si Jehova tekep na talek a pabiskegen to itayo a mansungdo tan igiya to itayon manggawa na maong a desisyon. (Basaen so Salmo 102:17.) Anggaman ontan, kaukolan tayo met so tulong to ed arum a pankanawnawa. Alimbawa, no itotongtong tayo so maong a balita na  Panarian ed arum, kaukolan tayo so panangiwanwan nen Jehova pian magmaliw itayon epektibo. Tan kapagno walaray dedesisyonan tayo, nipaakar man itan ed panagligliwaan, panangawes tan panag-ayos, pililimog, trabaho, edukasyon, odino antokaman ni, makaseguro itayo a makabat so ikiwas tayo salambengat no tumboken tayo so panangiwanwan nen Jehova. Diad katuaan to, agnaupot iray situasyon a nakaukolan tayo so panangiwanwan.

Saray Peligro No Ag-itayo Paiwanwan ed si Jehova

8. Antoray kabaliksan na samay impangakan nen Eva ed insebel a prutas?

⁸ Balet, tandaan a nepeg a mabulos itayon ontumbok ed panangiwanwan nen Jehova. Ag-itayo piliten na Dios no agtayo labay. Say unaan a too a pinili toy ag-ontumbok ed panangiwanwan nen Jehova et si Eva, tan anengneng tayo ed ginawa to no panon kaseryoso so ontan a lingon desisyon. Nonoten pa met no antoray kabaliksan na satan ya inkiwas to. Kinan nen Eva so insebel a prutas lapud labay toy magmaliw a ‘singa Dios ya amta toy maong tan mauges.’ (Gen. 3:5) Diad impanggawa to ed satan, singa to la sinamsamay betang so Dios. Imbes a tumboken to komon so panangiwanwan nen Jehova, sikato lay nandesisyon no antoy maong odino mauges. Sirin et impulisay to so inkasoberano nen Jehova. Labay nen Eva a sikato so manguley ed inkasikato. Tan akinonong met ed impanrebelde to so masiken ton si Adan.​—Roma 5:12.

9. Diad tua, anto ta so gagawaen tayo no agtayo tutumboken so panangiwanwan nen Jehova, tan akin a talagan aliwan makabat itan?

⁹ Natan, no agtayo tutumboken so panangiwanwan nen Jehova, singa tayo met la ipupulisay so inkasoberano to. Alimbawa, nonoten pa so sakey a toon niyugali to lay manbantay na pornograpiya. No sayan too et kabiangan na Kristianon kongregasyon, amta to no antoray ganggan nen Jehova nipaakar ed saya, salanti, saray marutak a bengatla so nepeg ya ag anggan bibitlaen, tan lalon agnepeg a nengnengen tekep na panlikliket tan pampilpilalek. (Efe. 5:3) No ipulisay to iray panangiwanwan nen Jehova, agto bibidbiren so inkasoberano To, tan agto ingangalngalep so inkaulo To. (1 Cor. 11:3) Talagan ag-itan makabat ta inkuan nen Jeremias ya ‘aliwan wala ed too a manaakar so pangitonton ed saray kurang to.’​—Jer. 10:23.

10. Akin a nepeg itayon magmaliw a responsable ed panangusar tayo ed kawayangan tayon mandesisyon?

¹⁰ Nayarin kontraen na arum iray imbaga nen Jeremias, a kuan dan akin a pibalian ni nen Jehova so panagdesisyon tayo, anta inikdan to itayo na kawayangan a mangusar ed satan? Agtayo komon lilingwanan a sayan regalo a kawayangan et walay katekep ton responsabilidad. On, diad amin a pilien tayon ibalikas odino ikiwas et walay eebatan tayo ed Dios. (Roma 14:10) Inkuan nen Jesus: “Dia ed inkadaakan na puso say sangi mansalita.” Inkuan to ni: “Dia ed puso so pawayan na saray mauges a nonot, panagpatey, saray pikakalugoran, saray panaglawan, saray panagtakew, panagtasi ed aliwan tua, saray mabanday a salita.” (Mat. 12:34; 15:19) Ipatnag na saray ibabaga tan gagawaen tayo no antoy walad puso tayo. Ipanengneng na saratan no siopa itayon talaga. Kanian, say talagan makabat a Kristiano et paiwanwan ed si Jehova ed amin a bengatla, diad ontan et ‘maptek so puso to’ ed imaton nen Jehova, tan sikatoy ‘gawaan To na maong.’​—Sal. 125:4.

11. Anto so naaralan tayo manlapud samay agawa ed Israel nensaman?

¹¹ Tandaan so agawa ed Israel nensaman. No maong so panagdesisyon na sayan nasyon diad panguunor da ed ganggan nen Jehova, sikaray sasalimbengan to. (Jos. 24:15, 21, 31) Ingen ta mabetbet lan pikewet so impangusar da ed kawayangan dan mandesisyon. Nen panaon nen Jeremias, inkuan nen Jehova ed sikara: “Ag-ira tinmalineng, agda met inkiling so layag da, noag ingen nanakar ira ed saray dili a simbawa ra tan ed  inkaawet na uges na puso ra, tan sinmener ira, ya ag-ira nanakar [a paabante].” (Jer. 7:24-26) Makapaermen itan! Agtayon balot komon ipupulisay so panangiwanwan nen Jehova lapu ed inkabenger odino andi-dangkan panamenek ed pilpilalek tayo, tan insan manakar ed saray dilin simbawa tayo, tan magmaliw laingen a say direksion tayo et ‘pasener imbes a paabante’!

Anto so Nakaukolan Pian Natumbok Tayo Iray Simbawa nen Jehova?

12, 13. (a) Anto so mamakiwas ed sikatayon ontumbok ed panangiwanwan nen Jehova? (b) Akin ya importante so pananisia?

¹² Pakiwasen itayo na panangaro ed si Jehova a mangunor ed saray simbawa to. (1 Juan 5:3) Balet, walay impabitar nen Pablo a nakaukolan tayo ni: “Manakar itayo lapu ed pananisia, aliwan lapud pakanengneng.” (2 Cor. 5:6, 7) Akin ya importante so pananisia? Bueno, say ‘basbas’ a pangiwawanwanan nen Jehova ed sikatayo et ‘matunong,’ balet ta ag-itan ompugta ed kaykayamanan odino inkabantog ed sayan mundo. (Sal. 23:3) Lapud satan, nepeg ya akateen so mata na pananisia tayo ed agnaparaan ya espiritual iran tumang ed panaglingkor ed si Jehova. (Basaen so 2 Corinto 4:17, 18.) Tan ontulong ed sikatayo so pananisia pian mankontento la ed manuna iran pankaukolan.​—1 Tim. 6:8.

¹³ Impabitar nen Jesus a nakaukolan ed tuan panagdayew so pagmaliw a masakripisyo, a mankaukolan met na pananisia. (Luc. 9:23, 24) Walaray matoor a managdayew ya agaylay impansakripisyo ra, sinungdoan da iray kairapan, panaglames, diskriminasyon, anggan say pirmin panamasegsegang ni ingen. (2 Cor. 11:23-27; Apo. 3:8-10) Agda itan nagawaan a maliket no aliwan lapud mabiskeg a pananisia ra. (Sant. 1:2, 3) No mabiskeg so pananisia tayo et sigpot itayon kombinsido a say pangunor ed panangiwanwan nen Jehova so lawas a sankaabigan. Lawas itan a parad magnayon a pankaabigan tayo. Agtayon balot panduaruwaan a sarayay nasasagmakan tayo natan et baliwala labat no ikompara ed saray tumang a nagamoran tayo no matoor itayon mansungdo.​—Heb. 11:6.

14. Akin a kaukolan nen Hagar ya ipatnag so mapaabeban awawey?

¹⁴ Nonoten pa met so papel na kapaabebaan pian natumbok tayo so panangiwanwan nen Jehova. Niyilustra iya ed agawa ed si Hagar, ya aripen a bii nen Sara. Sanen abaloan nen Sara ya agto la mananak, inter toy Hagar ed si Abraham, kanian nanlukon si Hagar. Kabebekta et matangtangsit lay Hagar ed katawan to a lepes. Bilang resulta, sikatoy ‘pinairap [“pinabaingan,” NW]’ nen Sara, kanian sikatoy tinmaynan. Si Hagar et nalmo na sakey ya anghel nen Jehova, ya angikuan ed sikaton: “Pawil ka ed katawan mo, tan manpaabeba ka ed saray limalima to.” (Gen. 16:2, 6, 8, 9) Seguro, no wala labat so arum a bilin, mas pilien itan nen Hagar. Lapud ta, pian natumbok to imay bilin na anghel et kaukolan ton ekalen so inkamapaatagey to. Anggaman kuan, mapaabeban inunor nen Hagar so anghel, kanian si Ismael ya anak to et nianak ed maligen a kasimpukokan na ama to.

15. Manalambit na pigaran situasyon a nayarin nakaukolan so inkamapaabeba pian natumbok tayo natan so panangiwanwan nen Jehova.

¹⁵ Pian natumbok tayo so panangiwanwan nen Jehova nayarin kaukolan tayo met so manpaabeba. Nayarin kaukolan na arum ya aksobien a say panlikliketan dan panagligliwaan et agmanaya makapaliket ed si Jehova. Nayarin walay asakitan na sakey a Kristiano a kaukolan ton kerewan na dispensa. Odino, akagaway lingo a kaukolan ton aksobien. Panon to balet no say sakey et akagaway  graben kasalanan? Kaukolan toy manpaabeba tan ipatua so kasalanan to ed saray mamatatken. Nayarin say sakey et kaukolan ni ingen a nadespilosip. Natan, pian makapawil ed kongregasyon et kaukolan toy mapaabeban magbabawi tan manpasimbalo. No kasabi’d oniaran kipapasen tan ed arum niran singa onia, makaligliwa so walad Uliran 29:23: “Say mapangta a too mangipaabeba ed sikato; balet say espiritu a mapaabeba makagamor na dayew.”

Panon Itayon Iwawanwan nen Jehova Natan?

16, 17. Panon itayon sigpot a nagunggonaan ed saray itatarya na Biblia a panangiwanwan?

¹⁶ Say manunan lapuan na madibinon panangiwanwan et say Biblia, say impuyan a Salita na Dios. (Basaen so 2 Timoteo 3:16, 17.) Pian sigpot itayon nagunggonaan ed satan, agtayo la alagaren ya onsabi ni mairap a situasyon insan tayo mananap na makatulong iran panangiwanwan manlapud Kasulatan. Imbes et nepeg ya iyugali tayon lan basaen ya inagew-agew so Biblia. (Sal. 1:1-3) Diad ontan et nakabisado tayo iray impuyan a balikas. Naalig tayo so panagnonot na Dios, tan akaparaan itayon mangarap ed anggan saray ag-iilaloan a problema.

¹⁷ Niarum ni, importanti met a dalepdepen tayo tekep na pikakasi iray nababasa tayo ed Kasulatan. No momotekteken tayo iray bersikulo ed Biblia, nanonotan tayo no panon iratan a nayarin onaplika ed espisipiko iran situasyon. (1 Tim. 4:15) Sano nipapaarap itayo ed seryoso iran problema, manpikasi itayo ed si Jehova, ya onkerew tayo na tulong pian nagamoran so panangiwanwan a kaukolan tayo. Ontulong ed sikatayo so espiritu nen Jehova pian nanonotan iray prinsipyo ya abasa tayo ed Biblia a mismo odino diad saray nibase ed Biblia a publikasyon tayo.​—Basaen so Salmo 25:4, 5.

18. Diad antoran paraan ya uusaren nen Jehova so Kristianon impanaagi pian iwanwan itayo?

¹⁸ Say Kristianon impanaagi tayo et sakey nin makanakanan lapuan na panangiwanwan nen Jehova. Sakey ya importantin kabiangan na satan et say “matoor tan makabat ya aripen” ya irerepresenta na Mananguley ya Ulop. Saya so lawas a mangitatarya na espiritual a tagano panamegley na saray babasaen tan programa parad saray pantitipon tan asamblea. (Mat. 24:45-47; ikompara ed Gawa 15:6, 22-31.) Niarum ni, diad limog tayo ran Kristiano et walaray maespiritual iran agagi, nagkalautla iray mamatatken, a kualipikadon mangiter na personal a tulong tan Makasulatan a simbawa. (Isa. 32:1) Saray kalangweran a walad Kristianon pamilya et walaan na sananey nin makanakanan natuplegan. Saray atateng dan mananisia et inikdan na Dios na autoridad a mangiwanwan ed sikara, tan nepeg a paiwanwan iray kalangweran ed atateng da.​—Efe. 6:1-3.

19. Antoran bendisyon so panggagayagaan tayo lapud pantutultuloy tayon panguunor ed panangiwanwan nen Jehova?

¹⁹ On, itatarya nen Jehova so panangiwanwan to ed dakdakel a paraan, tan nepeg a sigpot tayon anamoten iratan. Oniay inkuan nen Arin David diad panutukoy to ed samay panaon sanen say Israel et nanmatoor: “Saray atateng mi nanmatalek ira ed sika: nanmatalek ira, et sika inliktar mo ra. Tinmagleey ira ed sika, et niliktar ira; nanmatalek ira ed sika, et ag-ira abaingan.” (Sal. 22:3-5) No matalek tayo met a tumboken so panangiwanwan nen Jehova, ‘ag-itayo nabaingan.’ Ag-itayo nadismaya ed panilalo tayo. No ‘ipiya tayo ed si Jehova so dalan tayo,’ imbes a manmatalek ed dili tayon kakabatan, anggan natan ni labat, nabendisyonan itayo la na daakan. (Sal. 37:5) Tan no mansiansia itayo ed ontan a kurang, saratan a bendisyon et magmaliw a magnayon. Oniay insulat nen Arin David: “Si Jehova aroen to so kaalasan, tan agto ikaindan so sasantos to [odino matoor ed sikato]; niapiger ira lawas: Say matunong tawiren to so dalin tan manayam diman lawas.”​—Sal. 37:28, 29.

Kasin Nipaliwawa Yo?

• Akin a manmamatalek itayo ed panangiwanwan nen Jehova?

• No ipulisay tayo so panangiwanwan nen Jehova, anto so kabaliksan na satan?

• Antoray pigaran situasyon a nakaukolan ya ipatnag na sakey a Kristiano so inkamapaabeba?

• Panon itayon iwawanwan nen Jehova natan?

[Tepetepet Parad Panagaral]

[Saray litrato ed pahina 8]

Kasin papaiwanwan kayo ed si Jehova diad amin a pamaakaran?

[Litrato ed pahina 9]

Impulisay nen Eva so inkasoberano nen Jehova

[Litrato ed pahina 10]

Anton awawey so kaukolan ya ipatnag nen Hagar pian natumbok to so bilin na anghel?